27.5 C
Phnom Penh

ការ​ស្ទង់​លើ​ការ​ចំណាយ​របស់​កម្មករ​កាត់​ដេរ​នឹង​ចេញ​លទ្ធផល

ដោយ ឌឹ ខេមបូឌា ដេលី

បទវិភាគ

ដោយ​សង្ឃឹម​ថា​នឹង​ជួយ​បំពេញ​ចន្លោះ​ទំនេរ​ក្នុង​ទិន្នន័យ​គួរ​ជឿ​បាន ដែល​ធ្វើ​ឲ្យ​រាំង​ស្ទះ​​ការ​ចរចា​កន្លង​មក​អំពី​ប្រាក់​ខែ​អប្បបរមា​សម្រាប់​កម្មករ​កាត់​ដេរ​របស់​ប្រទេស​កម្ពុជា កាលពី​ថ្ងៃ​ច័ន្ទ ក្រុម​សិទ្ធិ​ការងារ​អន្តរជាតិ​មួយ​ក្រុម​បាន​ជួល​ក្រុមហ៊ុន​ស្រាវជ្រាវ​ក្នុង​ស្រុក​មួយ ដើម្បី​ឲ្យ​បាន​ដឹង​ពិត​ប្រាកដ​ថា​តើ​កម្មករ​កាត់​ដេរ​ចំណាយ​ប៉ុន្មាន​លើ​ការ​ទ្រទ្រង់​ជីវភាព​ប្រចាំ​ថ្ងៃ។

ពួកគេ​រំពឹង​ថា​នឹង​ទទួល​បាន​លទ្ធផល​នៅ​ដើម​ខែ​កញ្ញា ទាន់​ពេល​ដើម្បី​ប្រាប់​ទៅ​ការ​ចរចា​ដែល​កំពុង​ធ្វើ ដែល​នឹង​កំណត់​ប្រាក់​ខែ​អប្បបរមា​ថ្មី​សម្រាប់​វិស័យ​នេះ​នៅ​ឆ្នាំ​២០១៦។

លោក វីលៀម ខង់លីន នាយក​ប្រចាំ​ប្រទេស​សម្រាប់​មណ្ឌល​សាមគ្គីភាព (Solidarity Center) មាន​មូលដ្ឋាន​នៅ​អាមេរិក បាន​និយាយ​ថា ក្រុម​របស់​លោក​បាន​ចុះ​ហត្ថលេខា​លើ​កិច្ច​សន្យា​សម្រាប់​ការ​សិក្សា​ជាមួយ​ក្រុមហ៊ុន DC Research កាលពី​ថ្ងៃ​ច័ន្ទ។ ក្រុម​ផ្សេងៗ​ទៀត​ដែល​គាំទ្រ​កិច្ច​ប្រឹងប្រែង​នេះ គឺ​មូលនិធិ Friedrich Ebert​របស់​អាល្លឺម៉ង់ សហព័ន្ធ​ឧស្សាហកម្ម​សាកល (IndustriALL Global Union) មាន​មូលដ្ឋាន​នៅ​ប្រទេស​ស្វីស និង ការិយាល័យ​សកម្មភាព​កម្មករ​នៃ​អង្គការ​ពលកម្ម​អន្តរជាតិ។

លោក ខង់លីន បាន​និយាយ​ថា “វា​នឹង​ផ្តល់​ឲ្យ​សហជីព​នូវ​តួលេខ​សមស្រប ដើម្បី​បញ្ចូល​ក្នុង​ការ​ចរចា​ប្រាក់​ខែ”។

លោក​បាន​និយាយ​ថា ក្រុម​ស្រាវជ្រាវ​នឹង​ចាប់​ផ្តើម​ដោយ​បណ្តុះ​បណ្តាល​សមាជិក​សហជីព​ប្រហែល​១៥​នាក់​ជាមួយ​នឹង​សាខា IndustriALL ក្នុង​ស្រុក ដែល​ជា​លទ្ធផល​នឹង​ស្ទង់​មតិ​កម្មករ​កាត់​ដេរ​ប្រហែល​៧០០​នាក់​នៅ​ទូទាំង​ប្រទេស​អំពី​ការ​ចំណាយ​សព្វសារពើ​សព្វ​ថ្ងៃ​របស់​ពួកគេ។

លោក​បាន​និយាយ​ថា ក្រសួង​ការងារ​បាន​ធ្វើការ​សិក្សា​ចុង​ក្រោយ​របស់​ខ្លួន​អំពី​ការ​ចំណាយ​របស់​កម្មករ​នៅ​ឆ្នាំ​២០១៣ ប៉ុន្តែ​មិន​ដែល​បាន​ផ្សព្វផ្សាយ​លទ្ធផល​ដែល​រក​ឃើញ​នោះ​ទេ។ ការិយាល័យ​សកម្មភាព​កម្មករ​របស់ ILO បាន​ចូលរួម​ក្នុង​ការ​សិក្សា​មួយ​ដោយ​ឡែក​កាលពី​ឆ្នាំ​ទៅ​មួយ។

លោក ខង់លីន បាន​និយាយ​ថា ដើម្បី​តាម​ឲ្យ​ទាន់​អតិផរណា “មាន​វិធី​មួយ គឺ​ការ​ស្ទង់មតិ​ឯករាជ្យ​ចាំបាច់​ត្រូវ​ធ្វើ​រាល់​ឆ្នាំ”។

សហជីព​និង​កម្មករ​កាត់​ដេរ​ជា​រឿយៗ​តវ៉ា​ថា ម្ចាស់​ផ្ទះ​ឈ្នួល​និង​អាហារ​នៅ​ជុំវិញ​រោងចក្រ​ដំឡើង​តម្លៃ នៅ​ពេល​ពួកគេ​ទទួល​បាន​ការ​ដំឡើង​ប្រាក់​ខែ ដោយ​ស៊ី​អស់​ការ​ដំឡើង​ប្រាក់​ខែ​ភាគ​ច្រើន។

ក្នុង​ការ​ប្រឹងប្រែង​របស់​ខ្លួន​ផ្ទាល់​ដើម្បី​បន្ថែម​ទិន្នន័យ​ដ៏​គួរ​ជឿជាក់​ទៅ​នឹង​ការ​ចរចា​អំពី​ប្រាក់​ខែ អង្គការ​ពលកម្ម​អន្តរជាតិ​បាន​ចាប់​ផ្តើម​ចេញ​ព្រឹត្តិប័ត្រ​ប្រចាំ​ត្រីមាស​នៅ​ដើម​ខែ​នេះ ចុះ​ផ្សាយ​ស្ថិតិ​ថ្មី​បំផុត​ទាក់ទិន​នឹង​ការ​វិនិយោគ​វិស័យ​កាត់ដេរ ប្រាក់​ចំណូល​បាន​ពី​ការ​នាំ​ចេញ​និង​ប្រាក់​ខែ។ ព្រឹត្តិប័ត្រ​ចេញ​ផ្សាយ​ដំបូង​មិន​បាន​បញ្ចូល​ទិន្នន័យ​ស្តីពី​ការ​ចំណាយ​របស់​កម្មករ​ទេ ប៉ុន្តែ​បាន​បង្ហាញ​អំពី​អតិផរណា​ដែល​បាន​ស៊ី​អស់​មួយ​ភាគ​ធំ​នៃ​ប្រាក់​ខែ​ដំឡើង​របស់​ពួកគេ​ក្នុង​រយៈ​ពេល​ជាង​ប្រាំ​មួយ​ឆ្នាំ​កន្លង​មក​នេះ។

លោក អាត់ ធន់ ប្រធាន​សហជីព​ឯករាជ្យ​ធំ​បំផុត​ក្នុង​ប្រទេស​កម្ពុជា ជា​សាខា IndustriALL បាន​និយាយ​ថា លទ្ធផល​នៃ​ការសិក្សា​ថ្មី​ស្តីពី​ការ​ចំណាយ​របស់​កម្មករ​អាច​រៀបចំ​ហើយ​នៅ​ចុង​ខែ​ក្រោយ​យ៉ាង​យូរ។

លោក​បាន​និយាយ​ថា “យើង​ជឿ​ទុក​ចិត្ត​លើ​ការ​សិក្សា​នេះ ហើយ​យើង​នឹង​ប្រើ​តួ​លេខ​នេះ​ដើម្បី​ចរចា ពីព្រោះ​ការស្រាវជ្រាវ​នេះ​មាន​ការ​ចូលរួម​ពី ILO និង​ជា​ស្ថាប័ន​ឯករាជ្យ។ វា​នឹង​ផ្តល់​ឲ្យ​យើង​នូវ​មូលដ្ឋាន​ដើម្បី​បង្ហាញ​ហេតុផល​ជាមួយ​និយោជក​និង​រដ្ឋាភិបាល ពីព្រោះ​យើង​នឹង​ដឹង​ថ្លៃ​ចំណាយ​លើ​ការ​រស់​នៅ​ពិត”។

ប្រាក់​ឈ្នួល​អប្បបរមា​សម្រាប់​វិស័យ​កាត់​ដេរ ជា​ឧស្សាហកម្ម​តែមួយ​ក្នុង​ប្រទេស​នេះ​ដែល​មានប្រាក់​ឈ្នួល​អប្បបរមា ចំនួន១២៨​ដុល្លារ​ក្នុង​មួយ​ខែ។

លោក ធន់ និង មេដឹកនាំ​សហជីព​ពីរ​បី​នាក់​ដែល​មាន​ចិត្ត​គំនិត​ដូច​គ្នា​បាន​សម្រេច​ចិត្ត​ស្នើ​សុំ​១៧៧​ដុល្លារ​សម្រាប់​ឆ្នាំ​២០១៦។ រោងចក្រ​​ជាច្រើន​និយាយ​ថា ការ​ដំឡើង​តម្លៃ​ខ្ពស់​នឹង​ធ្វើ​ឲ្យ​អ្នក​បញ្ជា​ទិញ​លែង​ចង់​បាន ហើយ​ចង់​បាន​ការ​ដំឡើង​ប្រាក់​ខែ​តាម​កំណើន​ផលិតភាពវិញ​៕និត (រាយការណ៍​បន្ថែម​ដោយ ម៉ិច ដារ៉ា)

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស