យោងតាមមន្ត្រីប៉ូលិសព្រំដែនខេត្តម្នាក់បានឲ្យដឹងថា វៀតណាមបានបញ្ឈប់ការធ្វើផ្លូវនៅជិតព្រំដែនជាប់ខេត្តកំពត បន្ទាប់ពីមន្ត្រីខ្មែរបានតវ៉ាថា គម្រោងនេះធ្វើនៅកៀកខ្សែបន្ទាត់ព្រំដែនពេក។
លោក ទូច សារី អនុប្រធានប៉ូលិសព្រំដែនវីរៈ៦០១ក្នុងស្រុកកំពង់ត្រាច បាននិយាយថា ប៉ូលិសខ្មែរបានទៅមើលកម្មករសំណង់វៀតណាមកាលពីថ្ងៃច័ន្ទ និងបានស្នើឲ្យដកគ្រឿងចក្រចេញពីក្បែរបង្គោលព្រំដែនលេខ៣១២និង៣១៣។
លោក សារី បាននិយាយថា “តាមពិត វៀតណាមបានបញ្ឈប់ការឈូសឆាយដីធ្វើផ្លូវជាបណ្តោះអាសន្នចាប់តាំងពីថ្ងៃច័ន្ទមក។ ពិតហើយ សំណង់នេះស្ថិតនៅខាងក្នុងប្រទេសវៀតណាម ប៉ុន្តែវាកៀកពេកទៅនឹងខ្សែបន្ទាត់ព្រំដែន គឺតែ២០ម៉ែត្រពីបន្ទាត់ព្រំដែនប៉ុណ្ណោះ”។
លោក សារី បាននិយាយថា គម្រោងធ្វើផ្លូវក្បែរទឹកដីខ្មែរតម្រូវឲ្យមានការយល់ព្រមពីអាជ្ញាធរខេត្ត។
លោកបានឲ្យដឹងទៀតថា “អាជ្ញាធរនៃខេត្តទាំងពីរបានព្រមព្រៀងថា ចាំបាច់ត្រូវមានការយល់ព្រមពីភាគីទាំងពីរ នៅពេលណាមានការអភិវឌ្ឍ ឬ សំណង់នៅជិតព្រំដែន”។
សំណើពីអាជ្ញាធរខេត្តកំពតធ្វើឡើងបន្ទាប់ពីមានកំណត់ទូតជាបន្តបន្ទាប់ពីក្រសួងការបរទេសកម្ពុជា ទៅប្រទេសវៀតណាមក្នុងពេលជាងពីរខែនេះ ដោយស្នើឲ្យរដ្ឋាភិបាលក្រុងហាណូយផ្អាកគម្រោងជាច្រើនក្នុងខេត្តចំនួនបី ដែលទាំងស្ថិតនៅលើទឹកដីកម្ពុជា ឬស្ថិតក្នុងតំបន់ព្រំដែនមានជម្លោះ។
ការតវ៉ាជាសាធារណៈរបស់រដ្ឋាភិបាលចំពោះសកម្មភាពរបស់វៀតណាមនៅតាមបណ្តោយព្រំដែន កើតមានឡើងនៅចំពេលយុទ្ធនាការរបស់គណបក្សសង្គ្រោះជាតិបង្ហាញថាខុសចំពោះកិច្ចការរបស់រដ្ឋាភិបាលជាមួយប្រទេសវៀតណាម ក្នុងការកំណត់ព្រំដែនរួម។
យោងតាមសេចក្តីប្រកាសព័ត៌មានដែលចេញដោយក្រសួងការបរទេសកម្ពុជានៅដើមខែនេះបានឲ្យដឹងថា ក្នុងកិច្ចប្រជុំនៃគណៈកម្មាធិការព្រំដែនចម្រុះនាដើមខែនេះ អនុរដ្ឋមន្ត្រីក្រសួងការបរទេសវៀតណាម ហូរ ស៊័ន សឺន បានសន្យាថានឹងបញ្ឈប់គម្រោងនានានៅតាមបណ្តោយព្រំដែនជាមួយខេត្តកណ្តាល ខេត្តស្វាយរៀង និងខេត្តរតនគិរី។
ប៉ុន្តែនៅខេត្តរតនគិរី កន្លែងដែលប្រទេសវៀតណាមបានសន្យាថានឹងលុបស្រះទឹកបីកន្លែង ដែលត្រូវបានជីកលើទឹកដីកម្ពុជាដើម្បីស្រោចស្រពចម្ការវៀតណាមនោះ លោក ញ៉ែម សំអឿន អ្នកនាំពាក្យខេត្ត បាននិយាយថា មិនទាន់បានលុបទេ។
លោកបាននិយាយកាលពីថ្ងៃអង្គារអំពីស្រះទឹកនោះថា “រហូតមកដល់ពេលនេះ ស្រះទឹកមិនបានលុបវិញទេ”។
លោក ឆាយ ធី អ្នកសម្របសម្រួលរបស់អង្គការសិទ្ធិមនុស្ស អាដហុក ខេត្តរតនគិរី បាននិយាយថា ប្រទេសវៀតណាមគួរតែធ្វើតាមការសន្យារបស់ខ្លួនឲ្យឆាប់រហ័សជាងនេះ។
លោកបាននិយាយថា “ប្រសិនបើប្រទេសវៀតណាមប្តេជ្ញាធ្វើតាមការសន្យារបស់ខ្លួន ស្រះទឹកគួរត្រូវលុបតែក្នុងរយៈពេលពីរបីថ្ងៃប៉ុណ្ណោះ បន្ទាប់ពីការព្រមព្រៀងលុបនោះ”៕ និត