កាលពីថ្ងៃអង្គារ គណៈមេធាវីនៃព្រះរាជាណាចក្រកម្ពុជាបានសរសេរទៅអង្គការអាដហុក ដោយចោទលោក នី ចរិយា ប្រធានផ្នែកឃ្លាំមើលនៅអង្គការអាដហុក ថាបំពានការអនុវត្តច្បាប់ ដែលបង្គាប់បញ្ជាឲ្យមេធាវីរបស់អង្គការនេះប្រគល់សំណុំរឿងក្តីទាំងអស់មកខ្លួនដើម្បីធ្វើការត្រួតពិនិត្យទាក់ទិននឹងក្តីដែលពួកគេការពារ។
លិខិត ដែលចុះកាលបរិច្ឆេទថ្ងៃច័ន្ទ និងចុះហត្ថលេខាដោយលោក ប៊ុន ហុន ប្រធានគណៈមេធាវី មានខ្លឹមសារថា នៅថ្ងៃទី៦ខែកក្កដា មេធាវីដែលធ្វើការជាមួយអង្គការអាដហុកបានរាយការណ៍មកគណៈមេធាវីថា លោក ចរិយា តែងតែបង្គាប់សុំមើលសំណុំរឿងក្តីដែលមានទាក់ទងនឹងករណីផ្សេងៗ ដើម្បីត្រួតពិនិត្យរកកំហុសនីតិវិធីក្នុងសំណុំរឿង។
លិខិត ដែលសរសេរទៅលោក ធន សារាយ ប្រធានអង្គការសិទ្ធិមនុស្សអាដហុក និយាយថា “ខ្ញុំមានករណីកិច្ចជម្រាបប្រធានអង្គការអាដហុកថា គណៈមេធាវីនៃព្រះរាជាណាចក្រកម្ពុជាបានទទួលសេចក្តីរាយការណ៍ ពីមេធាវីដែលធ្វើការឲ្យអង្គការអាដហុក ដោយពន្យល់ថា [លោក ចរិយា] តែងតែបង្គាប់បញ្ជាឲ្យមេធាវីយកសំណុំរឿងមកឲ្យគាត់ពិនិត្យរកកំហុសនីតិវិធីក្នុងសំណុំរឿង”។
លិខិតនោះលើកមាត្រាមួយចំនួនពីច្បាប់ស្តីពីគណៈមេធាវី ដែលចែងថា មេធាវីប្រកបវិជ្ជាជីវៈដោយគ្មានការជ្រៀតជ្រែក និងការពារផលប្រយោជន៍អតិថិជនជាអតិបរមា ហើយត្រូវរក្សាការសម្ងាត់ជាដាច់ខាត។
លិខិតនោះមានខ្លឹមសារថា រាល់ការបំពារបំពានលើការសម្ងាត់នៃវិជ្ជាជីវៈខាងលើនឹងត្រូវផ្តន្ទាទោសតាមមាត្រា៨៣និង១២១នៃក្រមព្រហ្មទណ្ឌ។
លិខិតបានបន្តថា “យើងស្នើសុំលោកប្រធានស៊ើបអង្កេតនិងចាត់វិធានការ ដើម្បីធានាបាននូវការអនុវត្តបានត្រឹមត្រូវតាមបទប្បញ្ញត្តិទាំងអស់”។
លោក ចរិយា កំពុងស្ថិតក្រោមការស៊ើបអង្កេតរបស់តុលាការក្រុងភ្នំពេញ ទាក់ទិននឹងការចោទប្រកាន់ថាលោកបានបង្ខូចកេរ្តិ៍ឈ្មោះ និងប៉ុនប៉ងបង្ខិតបង្ខំមន្ត្រីតុលាការពីររូប ដោយអះអាងថា ពួកគេបានដោះស្រាយមិនត្រឹមត្រូវនូវសំណុំរឿងវិវាទដីធ្លីនៅខេត្តសៀមរាប ដែលកសិករពីរនាក់បានជាប់ពន្ធនាគាររយៈពេលពីរឆ្នាំ ប៉ុន្តែទោសភាគច្រើនរបស់ខ្លួនត្រូវព្យួរ។
កាលពីសប្តាហ៍មុន អង្គការឃ្លាំមើលសកម្មជនការពារសិទ្ធិមនុស្ស ជាក្រុមចម្រុះសិទ្ធិមនុស្សអន្តរជាតិ បានចេញសេចក្តីថ្លែងការណ៍មួយរិះគន់អ្វីដែលខ្លួនបានហៅថា “ការរំខានខាងតុលាការជាបន្តលើលោក នីចរិយា”។
ថ្លែងតាមទូរស័ព្ទកាលពីថ្ងៃអង្គារ លោក ហុន បាននិយាយថា សូម្បីរូបគាត់ ជាប្រធានគណៈមេធាវី ក៏មិនអាចទាមទារសុំមើលសំណុំឯកសារទាំងអស់ពាក់ព័ន្ធនឹងរឿងក្តីបានដែរ។
លោក ហុន បាននិយាយថា “យើងចង់ឲ្យ [អាដហុក] យល់អំពីច្បាប់ ពីព្រោះគេមិនអាចធ្វើអ៊ីចឹងបានទេ ហើយប្រសិនបើពួកគេបន្តធ្វើទៀត យើងនឹងចាត់វិធានការតាមច្បាប់”។ លោកបានបន្ថែមថា គណៈមេធាវីមិនសំដៅលើអាដហុកទេ ប៉ន្តែ គ្រាន់តែនិយាយអំពីករណីល្មើសច្បាប់។
“នេះមិនមែនជាករណីខ្ញុំជ្រៀតជ្រែកអាដហុកទេ ប៉ុន្តែ ដោយសកម្មភាពរបស់អង្គការនេះផ្ទុយនឹងច្បាប់”។
លោក ចរិយា បាននិយាយថា លោកមិនបានឃើញលិខិតនោះ ឬដឹងអំពីមេធាវីណាម្នាក់ដែលបានរាយការណ៍អំពីគាត់ទេ។ លោកបានបដិសេធការសុំមើលសំណុំរឿងសម្ងាត់ ហើយបាននិយាយថា ឯកសារដែលមេធាវីរបស់អាដហុកត្រូវតម្រូវឲ្យប្រគល់ គឺដើម្បីគោលបំណងរដ្ឋបាល។
លោក ចរិយា បាននិយាយថា “យើងគ្រាន់តែគ្រប់គ្រងកិច្ចការរដ្ឋបាលប៉ុណ្ណោះ ប៉ុន្តែ យើងមិនជ្រៀតជ្រែកសិទ្ធិ ឬកាតព្វកិច្ចរបស់មេធាវីដែលធ្វើការឲ្យអាដហុកទេ”។
លោកបានបន្ថែមថា គណៈមេធាវីគួរជួបជាមួយអង្គការអាដហុក ដើម្បីឲ្យដឹងនិងយល់ដំណើរការរបស់អាដហុកមុនពេលចេញលិខិត។
លោក សារាយ ប្រធានរបស់អង្គការអាដហុក បានគាំទ្រលោក ចរិយា និងបាននិយាយថា ឯកសារដែលមេធាវីដាក់ជាមួយអាដហុកទាក់ទងនឹងសំណុំរឿង គឺពាក់ព័ន្ធតែបញ្ហាថវិកាប៉ុណ្ណោះ។
លោកបាននិយាយថា “យើងមិនតម្រូវឲ្យមេធាវីរបស់យើងផ្តល់សំណុំឯកសារពេញលេញទេ។ យើងមិនត្រូវការមើលសេចក្តីពិស្តារទាំងស្រុងនៃសំណុំរឿងណាមួយឡើយ។ ប៉ុន្តែ យើងត្រូវការមើលភ័ស្តុតាងឯកសារទាក់ទិននឹងប្រាក់ខែ និងការចំណាយរបស់ពួកគេសម្រាប់សវនករហិរញ្ញវត្ថុរបស់យើង”។ លោកបានបន្ថែមថា អង្គការអាដហុកនឹងឆ្លើយតបពេញលេញទៅគណៈមេធាវីនៅថ្ងៃស្អែក។
លោកបាននិយាយថា “យើងកំពុងរៀបចំសេចក្តីថ្លែងការណ៍យ៉ាងប្រយ័ត្នប្រយែង ហើយនឹងផ្តល់ការឆ្លើយតបពេញលេញនិងត្រឹមត្រូវទៅប្រធានគណៈមេធាវី និងទៅសាធារណជន”៕ និត (រាយការណ៍បន្ថែមដោយ Simon Henderson)