រយៈពេលជាងប្រាំឆ្នាំបន្ទាប់ពីលោកនាយករដ្ឋមន្ត្រី ហ៊ុន សែន បានផ្តើមគំនិតឧបត្ថម្ភរដ្ឋាភិបាលដោយចងមេត្រីភាពក្រុមហ៊ុនឯកជននានាជាមួយអង្គភាពយោធាមក លោក ទៀ បាញ់ រដ្ឋមន្ត្រីក្រសួងការពារប្រទេសបានដឹកនាំសិក្ខាសាលាមួយកាលពីថ្ងៃពុធ ដោយស្នើសុំក្រុមហ៊ុននានាបន្តជួយផ្តល់ប្រាក់ទៀត។
មន្ត្រីជាង៣០០នាក់មកពីកងយោធពលខេមរភូមិន្ទ នគរបាលជាតិ និងតំណាងក្រុមហ៊ុន ហើយនិងក្រសួងនានា បានជួបជុំគ្នានៅឯអគារវិមានសន្តិភាពរបស់លោកនាយករដ្ឋមន្ត្រី ហ៊ុន សែន ដើម្បីពិភាក្សាគ្នាអំពីការសន្យារបស់ខ្លួនក្នុងការជួយកងទ័ព ផ្គត់ផ្គង់និងផ្តល់នូវគ្រឿងបរិក្ខារ។
ក្នុងការប៉ុនប៉ងដើម្បីបង្កើនការផ្តល់ប្រាក់ជួយកងយោធពលខេមរភូមិន្ទ លោក ហ៊ុន សែន កាលពីខែកុម្ភៈឆ្នាំ២០១០ បានចាប់ផ្តើមកម្មវិធីដែលនឹងឃើញក្រុមហ៊ុនធំៗបំផុតមួយចំនួនរបស់ប្រទេសនេះផ្តល់អំណោយប្រាក់រាប់រយរាប់ពាន់ដុល្លារជួយអង្គភាពទ័ពទាំងឡាយ។
នៅពេលដែលការផ្តើមគំនិតនេះបានចាប់ផ្តើម មានក្រុមហ៊ុនចំនួន៤២ ដែលក្រុមហ៊ុនជាច្រើនក្នុងចំណោមនោះមានទំនាក់ទំនងជិតស្និទ្ធនឹងគណបក្សប្រជាជនកម្ពុជាកំពុងកាន់អំណាច បានសន្យាផ្តល់អំណោយជួយអង្គភាពមួយចំនួន។
ក្នុងសុន្ទរកថាបន្ទាប់ពីសិក្ខាសាលាកាលពីថ្ងៃពុធ នាយឧត្តមសេនីយ៍ ទៀ បាញ់ បានរំឭកយ៉ាងហោចណាស់១០ក្រុមហ៊ុនដែលមានវត្តមានថា យោធានៅត្រូវការប្រាក់របស់ក្រុមហ៊ុននៅឡើយ។
លោកបានមានប្រសាសន៍ថា “បណ្តាក្រុមហ៊ុនឯកជនដែលធ្វើជំនួញរកស៊ីសុខសាន្តក្នុងប្រទេសកម្ពុជា សូមជួយកងទ័ពដោយផ្តល់មួយចំណែកតូចនៃប្រាក់ចំណេញរបស់អ្នក”។
នាយឧត្តមសេនីយ៍ បាញ់ បានមានប្រសាសន៍ថា ភាគច្រើននៃប្រាក់អំណោយនឹងបានជាប្រយោជន៍ដល់ការដំឡើងប្រាក់ខែរបស់ទាហាន ដែលលោកបានមានប្រសាសន៍ថា នឹងត្រូវដំឡើងដល់មួយលានរៀល ឬប្រហែល២៥០ដុល្លារ នៅឆ្នាំ២០១៨យ៉ាងយូរ។
លោកបានមានប្រសាសន៍ថា “យើងដឹងថា យើងមិនមានថវិកា ប្រសិនបើយើងមានវិញ យើងនឹងផ្តល់ភ្លាម”។
ប្រាក់ខែទាហានថ្នាក់ទាបបំផុតរបស់កងយោធពលខេមរភូមិន្ទសព្វថ្ងៃមានរវាង៣៥៥.០០០រៀលទៅ៥៣៣.០០០រៀល។
យោងតាមនាយឧត្តមសេនីយ៍ បាញ់ បានឲ្យដឹងថា ប្រាក់ដែលប្រមូលបានពីក្រុមហ៊ុននានា ក៏នឹងចំណាយលើការទិញស្បៀងអាហារនិងគ្រឿងផ្គត់ផ្គង់យោធាផងដែរ។
លោកបានមានប្រសាសន៍ថា “កាលពីមុន នៅពេលដែលយើងត្រូវការសម្ភារសម្រាប់កងទ័ព ក្រុមហ៊ុនមួយចំនួនបានផ្តល់ប្រាក់ជួយយើង។ និយាយដោយស្មោះទៅ [ក្រុមហ៊ុន]ទិញសព្វាវុធ”។
តំណាងក្រុមហ៊ុនមិតហ្វូន ជាក្រុមហ៊ុនទូរស័ព្ទចល័តធំបំផុតនៅកម្ពុជាតាមចំនួនអ្នកប្រើ បានប្រាប់សិក្ខាសាលាថា ក្រុមហ៊ុនរបស់លោកបានផ្តល់ប្រាក់ដ៏ច្រើនដល់យោធារបស់ប្រទេសកម្ពុជាក្នុងពេលប៉ុន្មានឆ្នាំថ្មីៗនេះ។
តំណាងរូបនេះដែលមិនប្រាប់ឈ្មោះបាននិយាយថា “ពីឆ្នាំ២០១០ដល់ឆ្នាំ២០១៤ ក្រុមហ៊ុនមិតហ្វូន បានផ្តល់អំណោយជាប្រាក់សរុប៤៦១.១០០ដុល្លារដល់មូលដ្ឋានទ័ពជើងទឹករាម និងកងពលតូចជើងទឹកលេខ៣១”។
ក្រុមហ៊ុន មិតហ្វូន ជាសាខាមួយរបស់វៀតថែល (Viettel) ដែលគ្រប់គ្រងដោយយោធាវៀតណាម។
លោក សុខ គង់ ម្ចាស់ក្រុមហ៊ុនសូគីម៉ិចដែលជាសម្ពន្ធមិត្តរបស់លោក ហ៊ុន សែន ក៏បានបញ្ជូនតំណាងមួយរូបដើម្បីប្រាប់សិក្ខាសាលាកាលពីថ្ងៃពុធថា ក្រុមហ៊ុនប្រេងនេះបានផ្តល់អំណោយ៣៥០.០០០ដុល្លារដល់កងយោធពលខេមរភូមិន្ទចាប់តាំងពីឆ្នាំ២០១០មក។
ទាក់ទងនៅថ្ងៃដដែលនោះ លោក ម៉ុង ឫទ្ធី សមាជិកព្រឹទ្ធសភាគណបក្សប្រជាជនកម្ពុជា និងជាប្រធានក្រុមហ៊ុន ម៉ុង ឫទ្ធី គ្រុប បានមានប្រសាសន៍ថា ក្រុមហ៊ុនរបស់លោកបានផ្តល់អំណោយយ៉ាងច្រើនក្រាស់ក្រែលដល់យោធាក្នុងពេលជាច្រើនឆ្នាំនេះ។ ក៏ប៉ុន្តែ លោកមិនបានផ្តល់តួលេខច្បាស់លាស់ទេ។
លោកបានមានប្រសាសន៍ថា “ខ្ញុំបានជួយគ្រឿងផ្គត់ផ្្គង់ស្បៀងអាហារដល់កងទ័ពនៅតាមបណ្តោយព្រំដែនក្នុងខេត្តកោះកុង ពីព្រោះខ្ញុំគិតថា ពួកគេស្ថិតនៅជួរមុខ ហើយខ្វះស្បៀងអាហារ”។
“ខ្ញុំក៏បានផ្តល់អំណោយដល់ពួកគេដែរ ពីព្រោះខ្ញុំចង់ផ្សារភ្ជាប់វិស័យឯកជនជាមួយកងទ័ព ជាពិសេស ពីព្រោះខ្ញុំដឹងគុណដែលកងទ័ពការពារប្រទេសជាតិរបស់យើង”។
ទោះជាមានវត្តមានក្រុមហ៊ុនជិតស្និទ្ធនឹងគណបក្សប្រជាជនកម្ពុជានៅសិក្ខាសាលា ដែលមានឧបនាយករដ្ឋមន្ត្រី ម៉ែន សំអន ជាអធិបតីក៏ដោយ ក៏នាយឧត្តមសេនីយ៍ បាញ់ បានបញ្ជាក់ថា យោធាមិនបានលម្អៀងទេ។
លោកបានមានប្រសាសន៍ថា “កងទ័ពត្រូវតែអព្យាក្រឹតចំពោះគ្រប់គណបក្សនយោបាយទាំងអស់”។
ក៏ប៉ុន្តែ លោក ជា តារា អគ្គមេបញ្ជាការរងកងយោធពលខេមរភូមិន្ទ បានមានប្រសាសន៍ថា យោធាពិតណាស់ស្មោះនឹងគណបក្សកាន់អំណាច។
នាយឧត្តមសេនីយ៍ តារា បានមានប្រសាសន៍ថា “សម្តេចតេជោ [ហ៊ុន សែន] បានមានប្រសាសន៍ ហើយខ្ញុំចាំសុន្ទរកថានេះនៅថ្ងៃទី២៣ខែកក្កដាថា ប្រសិនបើយើងនិយាយឲ្យត្រឹមត្រូវ កងទ័ពជារបស់គណបក្សប្រជាជនកម្ពុជា ពីព្រោះសម្តេចតេជោបានយកចិត្តទុកដាក់និងបានដឹកនាំកងទ័ព”។
លោកបានបន្ថែមថា “កងទ័ពជារបស់គណបក្សប្រជាជនកម្ពុជា ប៉ុន្តែ កងទ័ពក៏មានភារកិច្ចផ្សេងទៀត ការពារច្បាប់រដ្ឋធម្មនុញ្ញ ព្រះមហាក្សត្រនិងរដ្ឋាភិបាលដែលត្រូវបានបង្កើតឡើងតាមរយៈការបោះឆ្នោត”។
លោកស្រី ជា វណ្ណាត អ្នកវិភាគនយោបាយ និងជាអតីតប្រធានមជ្ឈមណ្ឌលអភិវឌ្ឍន៍សង្គម បានមានប្រសាសន៍ថា វិស័យឯកជនផ្តល់ប្រាក់ជួយយោធា ពិតណាស់នាំឲ្យមានភាពអនុគ្រោះនិយម។
លោកស្រីបានមានប្រសាសន៍ថា “ប្រាកដហើយ វានឹងអ៊ីចឹង។ ដូចភាសិតខ្មែរនិយាយថា កុំខាំដៃដែលចិញ្ចឹមអ្នក”៕ និត(រាយការណ៍បន្ថែមដោយ Chris Mueller)