កាលពីថ្ងៃអាទិត្យ មន្ត្រីកិច្ចការព្រំដែនជាន់ខ្ពស់បំផុតទី២របស់ប្រទេសកម្ពុជាបានព្រមានប្រឆាំងនឹងការបកស្រាយខុសដែលបង្កឲ្យមានជម្លោះទឹកដី បន្ទាប់ពីលោក សម រង្ស៊ី មេដឹកនាំគណបក្សប្រឆាំង បានអះអាងថា ប្រទេសវៀតណាមបានយកដីបន្ថែមយ៉ាងជាក់ស្តែងនៅខាងតំបន់ព្រំដែនដែលកំណត់ហើយរបស់ប្រទេសកម្ពុជា ក្នុងខេត្តស្វាយរៀង។
កាលពីថ្ងៃសៅរ៍ លោក រង្ស៊ី បានបង្ហោះលើទំព័រហ្វេសប៊ុករបស់លោកនូវការអំពាវនាវមួយឲ្យរដ្ឋាភិបាលប្រើតែផែនទីខ្នាត១លើ១០០.០០០ដែលអនុញ្ញាតដោយរដ្ឋធម្មនុញ្ញ ដើម្បីគូសព្រំដែនរបស់ប្រទេសកម្ពុជា ហើយបន្ទាប់មកទៀតប្រើបច្ចេកវិជ្ជា GPS ដើម្បីឲ្យប្រាកដថា បង្គោលសម្គាល់ព្រំដែនត្រូវគេដាំចំខ្សែបន្ទាត់ព្រំដែននោះ។
ទោះជាយ៉ាងនេះក្តី លោកបាននិយាយថា កិច្ចការទាំងពីរនេះអាចមិនគ្រប់គ្រាន់ទេ ដោយលោកអះអាងថា វៀតណាមបានបន្តអះអាងទាមទារយកតំបន់ដីមួយផ្នែកដែលកំណត់រួចហើយនៅខាងកម្ពុជា ក្នុងស្រុកកំពង់រោទិ៍ ចន្លោះបង្គោលព្រំដែនលេខ២០២និង២០៣។
លោក រង្ស៊ី បានមានប្រសាសន៍ថា “យោងតាមឧទាហរណ៍ជាក់ស្តែងជាច្រើន បើទោះជាកិច្ចការត្រង់ចំណុចទី១និងទី២ខាងលើត្រូវបានបញ្ចប់ត្រឹមត្រូវក៏ដោយ ក៏មិនសំខាន់ទេ វៀតណាមនៅតែមិនគោរពបូរណភាពទឹកដីកម្ពុជា ហើយបានវាតទីយ៉ាងគឃ្លើនចូលប្រទេសរបស់យើង”។
“ឧទាហរណ៍ ដីមួយផ្នែករបស់កម្ពុជាក្នុងស្រុកកំពង់រោទិ៍ខេត្តស្វាយរៀង ត្រូវបានភ្ជាប់យករួចទៅហើយដោយប្រទេសវៀតណាម គឺថាបើយោងតាមផែនទីដែលផលិតដោយវៀតណាម គេចាត់ទុកមួយផ្នែកនៃទឹកដីកម្ពុជាជារបស់ខេត្តឡុង អាន របស់វៀតណាម”។
តាមការអះអាងនេះ លោក រង្ស៊ី បានបង្ហោះរូបមួយដែលលោកបាននិយាយថា ជាផែនទីខេត្តឡុង អាន ដែលគូសដោយវៀតណាម ដែលជាន់លើផែនទីកម្ពុជាខ្នាត១លើ១០០.០០០ ដោយបង្ហាញការអះអាងរបស់វៀតណាមរំលោភចូលទឹកដីកម្ពុជា។
ផែនទីនោះបង្ហាញខ្សែបន្ទាត់ព្រំដែនប្រវែងប្រហែលមួយគីឡូម៉ែត្រនៅចន្លោះបង្គោលលេខ២០២និង២០៣ ដែលជាកន្លែងដដែល ដែលអាជ្ញាធរនិងក្រុមមនុស្សប្រើហិង្សាឈរជាជួររាំងផ្លូវសកម្មជនដែលដឹកនាំដោយលោក រៀល ខេមរិន្ទ្រ តំណាងរាស្ត្រគណបក្សសង្គ្រោះជាតិ ក្នុងដំណើរចុះទៅពិនិត្យព្រំដែនកាលពីថ្ងៃទី១៩ខែកក្កដាកន្លងមក។
លោកស្រី កុយ ពិសី អនុប្រធានលេខាធិការដ្ឋាននៃអាជ្ញាធរជាតិទទួលបន្ទុកកិច្ចការព្រំដែន បាននិយាយកាលពីថ្ងៃអាទិត្យថា ការបង្ហោះរបស់លោក រង្ស៊ី ជាព័ត៌មានដឹងតិចតួច ហើយប្រភពដើមនៃផែនទីរបស់គាត់គូសដោយវៀតណាមនោះមិនច្បាស់លាស់។
លោកស្រី ពិសី បាននិយាយតាមរយៈទូរស័ព្ទថា “យើងមិនដឹងថា គាត់បានផែនទីនោះមកពីណាទេ ហើយយើងមិនអាចទទួលស្គាល់វាបានទេ។ យើងគួរតែប្រយ័ត្នប្រយែងអំពីផែនទីនោះ។ អ្វីដែលគាត់បានបង្ហាញ នឹងបង្កើតភាពវឹកវរបាន ហើយគាត់ត្រូវទទួលខុសត្រូវចំពោះរឿងហ្នឹង”។
លោកស្រី ពិសី បាននិយាយថា តំបន់ចម្រូងចម្រាសនៅត្រង់បង្គោលព្រំដែនលេខ២០២និង២០៣ នៅកំពុងដំណើរការបោះបង្គោលតូចៗនៅឡើយ ហើយគ្មានការផ្ទេរដីត្រូវគេធ្វើឡើងទេ រហូតដល់ការងារនោះសម្រេចសិន។
លោកស្រី ពិសី បាននិយាយថា “យើងទាំងពីរបានគោរពកិច្ចព្រមព្រៀង។ កន្លែងណា [វៀតណាម] ធ្លាប់គ្រប់គ្រង គេបន្តគ្រប់គ្រងតំបន់នោះ។ កន្លែងណាយើងធ្លាប់គ្រប់គ្រង យើងបន្តគ្រប់គ្រងកន្លែងនោះ។ យើងបានបោះបង្គោលមែន ប៉ុន្តែយើងនៅមានពីរឬបីជំហានទៀតដើម្បីបញ្ចប់ការបោះបង្គោលព្រំដែនចន្លោះៗ”។
លោកស្រី ពិសី បានពន្យល់ថា ពេលណាបង្គោលតូចៗនៅចន្លោះៗត្រូវគេដាំរវាងបង្គោល២០២និង២០៣ ដីនៅខាងកម្ពុជានិងវៀតណាមនៃព្រំដែនដែលគូសច្បាស់លាស់ នឹងត្រូវប្រគល់ទៅឲ្យអ្នកណាក៏ដោយដែលជាម្ចាស់ពេញច្បាប់៕ និត