យោងតាមអាជ្ញាធរបានឲ្យដឹងថា កងរាជអាវុធហត្ថមួយក្រុមក្នុងខេត្តមណ្ឌលគិរី ដែលតាមចោទថា បានបង្ខំឲ្យនគរបាលមូលដ្ឋានដោះលែងអ្នកបើកបររថយន្តបួននាក់ដែលដឹកឈើកាប់ខុសច្បាប់ដោយយកកាំភ្លើងភ្ជង់កាលពីថ្ងៃសុក្រនោះ មានការងារទី២ជាសន្តិសុខនៅក្រុមហ៊ុនចម្ការកៅស៊ូដែលកាន់កាប់ដោយវៀតណាម។
កាលពីថ្ងៃអាទិត្យ មន្ត្រីរដ្ឋបាលព្រៃឈើក្នុងខេត្តនេះបាននិយាយថា នគរបាលប្រឆាំងបទល្មើសសេដ្ឋកិច្ចនៅក្នុងស្រុកកែវសីមា បានឃាត់រថយន្តបួនគ្រឿងដឹកឈើសុក្រំជាឈើប្រភេទលេខ១ចំនួន៥៦ដុំ ស្រាប់តែនៅពេលនោះកងរាជអាវុធហត្ថប្រដាប់ដោយអាវុធប្រាំពីរនាក់បានមកដល់ ហើយទាញឈើទម្លាក់ចុះពីលើរថយន្ត រួចនាំយករថយន្តទាំងនេះ និងអ្នកបើកបរចាកចេញទៅបាត់។
ពួកគេបន្ថែមថា មុនគេចខ្លួន អ្នកបើកបរទាំងនោះបានប្រាប់នគរបាលប្រឆាំងបទល្មើស សេដ្ឋកិច្ចថា ឈើទាំងនេះជារបស់លោក សាក់ សារុន មេបញ្ជាការកងរាជអាវុធហត្ថស្រុក។
យោងតាមរបាយការណ៍នគរបាលកាលពីម្សិលមិញបានឲ្យដឹងថា ឈើនេះត្រូវបានកាប់ឲ្យក្រុមហ៊ុនចម្ការកៅស៊ូ Binh Phuoc Kratie Rubber 1 នៅក្បែរនោះ ដែលក៏ស្ថិតនៅក្នុងខេត្តមណ្ឌលគិរីផងដែរ ហើយបានដឹកទៅទីនោះមុនពេលរថយន្តទាំងនេះត្រូវបានឃាត់។
របាយការណ៍ទាំងនេះឲ្យដឹងផងដែរថា កងរាជអាវុធហត្ថដែលបានដោះលែងអ្នកបើកបរ និងរថយន្តទាំងនោះជាសន្តិសុខនៅក្រុមហ៊ុននេះ ជាការអនុវត្តទូទៅដែលត្រូវបានរិះគន់ពីសំណាក់អង្គការសិទ្ធិមនុស្ស។
លោក ញ៉ែម វណ្ណី ស្នងការនគរបាលខេត្តមានប្រសាសន៍កាលពីម្សិលមិញថា ”ករណីនេះត្រូវបានដោះស្រាយដោយរដ្ឋបាលព្រៃឈើក្នុងស្រុកកែវសីមា។ ប្រសិនបើមន្ត្រីរដ្ឋបាលព្រៃឈើចង់ដាក់ពាក្យបណ្ដឹងប្ដឹងពួកគេនៅតុលាការនោះ វាស្ថិតនៅក្រៅដែនសមត្ថកិច្ចរបស់យើងហើយ”។
លោក រឿន សុផាត នាយខណ្ឌរដ្ឋបាលព្រៃឈើស្រុកកែវសីមា បានមានប្រសាសន៍ថា លោកមិនទាន់សម្រេចថាតើត្រូវបញ្ជូនករណីនេះទៅតុលាការឬយ៉ាងណានោះឡើយ។
លោកបានមានប្រសាសន៍ថា “យើងត្រូវស៊ើបអង្កេតរកការពិតពីករណីនេះជាមុនសិន មុនពេលបញ្ជូនទៅតុលាការ”។
លោក សុផាត បានលើកឡើងថា លោកក៏បម្រើការនៅអង្គការសង្គមអភិរក្សសត្វព្រៃផងដែរ ហើយថា ឈើសុក្រំទាំងនោះត្រូវបានយកទៅរក្សាទុកនៅការិយាល័យរបស់អង្គការមិនមែនរដ្ឋាភិបាលក្នុងមូលដ្ឋាន ពីព្រោះវានៅជិតកន្លែងរបស់កងរាជអាវុធហត្ថជាងការិយាល័យរដ្ឋបាលព្រៃឈើ។
លោកបានឲ្យដឹងថា លោក សារុន ដែលជាមេបញ្ជាការកងរាជអាវុធហត្ថស្រុកនៅតែជាជនសង្ស័យនៅឡើយ។ កាលពីថ្ងៃអាទិត្យ លោក សារុន បានបដិសេធថា លោកមិនជាប់ពាក់ព័ន្ធនៅក្នុងការកាប់ឈើខុសច្បាប់ទេ ហើយបានគំរាមប្ដឹងនរណាដែលចោទប្រកាន់លោកពីបទកាប់ឈើ។
តំណាងក្រុមហ៊ុនចម្ការកៅស៊ូ Binh Phuoc 1 ដែលស្ថិតក្នុងតំបន់អភិរក្សជីវចម្រុះសីមាមិនអាចទាក់ទងសុំអត្ថាធិប្បាយបានទេ។
ទោះយ៉ាងណា យោងតាមរបាយការណ៍នគរបាលបានឲ្យដឹងថា តំណាងក្រុមហ៊ុនដែលបានបង្ហាញអត្តសញ្ញាណថា ឧកញ៉ា សឹង សំអុល បានធ្វើដំណើរទៅកាន់ការិយាល័យរបស់អង្គការសង្គមអភិរក្សសត្វព្រៃដើម្បីរាប់ឈើទាំងនោះ៕ សារុន