37 C
Phnom Penh

រោងចក្រ​កាត់ដេរ​និយាយ​ថា​ផលិតភាព​ខ្សោយ​គួរ​បន្ថយ​ការ​ដំឡើង​ប្រាក់​ខែ

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​ច័ន្ទ សមាគម​​​រោង​ចក្រ​កាត់​ដេរ​នៅ​កម្ពុជា​​​ ហៅ​​​កាត់​​​ថា GMAC  បាន​អំពាវនាវ​ឲ្យ​សហជីព​នានា​បង្អន់​ការ​ទាមទារ​របស់​ពួកគេ​ក្នុង​ការ​ចរចា​ថ្មីៗ​អំពី​ប្រាក់​ឈ្នួល​អប្បបរមា​សម្រាប់​ឧស្សាហកម្ម​កាត់​ដេរ ដោយ​ហេតុ​ថា​ផលិតភាព​ទាប​នៃ​កម្មករ​កម្ពុជា និង​ថ្ងៃ​ឈប់​សម្រាក​ច្រើន បើ​ធៀប​ជាមួយ​ប្រទេស​ប្រកួត​ប្រជែង​ជា​ច្រើន​ទៀត។

សមាគម​​​រោង​​​ចក្រ​​​កាត់​​​ដេរ​​​នៅ​​​កម្ពុជា​បាន​និយាយ​ថា តួ​លេខ​របស់​ខ្លួន​ស្តីពី​ផលិតភាព​ធៀប បាន​មក​ពី​ប្រភព​គួរ​ជឿ​ទុក​ចិត្ត​ជា​ច្រើន ហើយ​ថា​ខ្លួន​បាន​ប្រើ វីគីភីឌា សម្រាប់​ទិន្នន័យ​មួយ​ចំនួន​អំពី​ការ​សម្រាក​ដោយ​មាន​ប្រាក់​ខែ​ធម្មតា។

អង្គការ​ពលកម្ម​អន្តរជាតិ (ILO) បាន​ចេញ​ទិន្នន័យ​របស់​ខ្លួន​ជា​ច្រើន​កាលពី​ខែ​មុន​ដែល​បង្ហាញ​ថា ឧស្សាហកម្ម​នេះ​ដើរ​បាន​ល្អ និង​កំពុង​បន្ត​ទាក់ទាញ​អ្នក​វិនិយោគ បើ​ទោះជា​មាន​ការ​ដំឡើង​២៨​ភាគរយ​នា​ពេល​ថ្មីៗ​នេះ​លើ​ប្រាក់​ខែ​អប្បបរមា បាន​ដល់​១២៨​ដុល្លារ​ក្នុង​មួយ​ខែ​ក៏ដោយ។

ប៉ុន្តែ​សមាគម​​​រោងចក្រ​​​កាត់​​​ដេរ​​​នៅ​​​កម្ពុជា​បាន​និយាយ​ថា អង្គការ​ពលកម្ម​អន្តរជាតិ “វាងវៃ” ក្នុង​ការ​ជ្រើសរើស​តួ​លេខ​ដែល​ខ្លួន​ផ្សព្វផ្សាយ និង​បាន​តវ៉ា​ថា កត្តា​ជាច្រើន​ផ្សេងទៀត ក្នុង​នោះ​មាន​ផលិតភាព​ផង​ដែរ គេ​មិន​បាន​យក​មក​គិត​ទេ។

សមាគម​​​រោងចក្រ​​​កាត់​​​ដេរ​​​នៅ​​​កម្ពុជា​បាន​និយាយ​ក្នុង​សេចក្តី​ថ្លែងការណ៍​របស់​ខ្លួន​កាលពី​ថ្ងៃ​ច័ន្ទ​ថា “ឧស្សាហកម្ម​កាត់​ដេរ​កម្ពុជា​កំពុង​ខំ​ប្រឹង​ប្រកួត​ប្រជែង​តទល់​នឹង​ប្រទេស​ជិត​ខាង ដូចជា​ប្រទេស​វៀតណាម​និង​ឥណ្ឌូណេស៊ី​ជាដើម ជាមួយ​នឹង​ផលិតភាព​ទាប ចលាចល​ការងារ និង​សម្ពាធ​ខ្លាំង​ឡើង​លើ​ប្រាក់​ខែ ដែល​ធ្វើ​ឲ្យ​រាំង​ស្ទះ​ដល់​កំណើន”។

សមាគម​នេះ​ស្នើ​ឲ្យ​សហជីព ដែល​មួយ​ចំនួន​បាន​ព្រម​ជំរុញ​ដើម្បី​បាន​​ប្រាក់​ខែ​អប្បបរមា​១៧៧​ដុល្លារ គួរ​ទទួល​យក “ដំណោះស្រាយ​មាន​ការ​ពិចារណា​ហ្មត់ចត់​ថែម​ទៀត” ដើម្បី​ឲ្យ​ឧស្សាហកម្ម​នេះ​ផ្តោត​លើ​ការ​បង្កើន​ផលិតភាព និង​បង្កើត​ការងារ​មាន​តម្លៃ​ខ្ពស់​ច្រើន​ទៀត។

ដោយ​ប្រើ​ប្រទេស​ចិន​ជា​ខ្នាត​គំរូ​របស់​ខ្លួន​នោះ សមាគម​រោង​ចក្រ​កាត់​ដេរ​នៅ​កម្ពុជា​បាន​និយាយ​ថា កម្មករ​នៅ​ប្រទេស​ឥណ្ឌូណេស៊ី​និង​វៀតណាម​មាន​ផលិត​ភាព​៨០​ភាគរយ​ធៀប​នឹង​ដៃគូ​ចិន​របស់​ពួកគេ នៅ​ពេល​ដែល​កម្មករ​ក្នុង​ប្រទេស​កម្ពុជា​ផលិត​បាន​តែ​៦០​ភាគរយ​ប៉ុណ្ណោះ។ ប្រទេស​បង់ក្លាដេស ជា​ប្រទេស​តែ​មួយ​គត់​ដែល​សមាគម​រោង​ចក្រ​កាត់​ដេរ​នៅ​កម្ពុជា បាន​លើក​ឡើង​ថា មាន​ផលិត​ភាព​៥០​ភាគរយ ប៉ុន្តែ​មាន​ប្រាក់​ខែ​អប្បបរមា​ទាប​ជាង​ប្រទេស​កម្ពុជា​ឆ្ងាយ។

លោក កេន លូ អគ្គលេខាធិការ​សមាគម​​​រោង​ចក្រ​កាត់​ដេរ​នៅ​កម្ពុជា បាន​និយាយ​ថា តួលេខ​ប្រៀបធៀប​ផ្នែក​ផលិតភាព​បាន​មក​ពី​ការ​សន្ទនា​របស់​សមាគម​នេះ​ជាមួយ​សមាជិក​នៃ​គណៈ​ប្រតិភូ​ពី​ប្រទេស​ផ្សេងៗ​ដែល​មក​ធ្វើ​ទស្សនកិច្ច។

នៅ​ពេល​សួរ​អំពី​ភាព​ត្រឹមត្រូវ​នៃ​ព័ត៌មាន​នេះ លោក​បាន​និយាយ​ថា “យើង​គ្មាន​វិធី​ណា​ដើម្បី​ផ្ទៀងផ្ទាត់​ឲ្យ​ប្រាកដ​នោះ​ទេ”។

លោក​បាន​និយាយ​ថា “នេះ​ជា​ព័ត៌មាន​របស់​យើង។ អ៊ីចឹង វា​ជា​រឿង​ថា​តើ​សាធារណជន​ទុកចិត្ត​លើ​សមាគម​​​រោង​ចក្រ​កាត់​ដេរ​នៅ​កម្ពុជា​ប៉ុណ្ណា”។

លោក លូ បាន​និយាយ​ថា រឿង​ដដែល​នេះ​បាន​កើត​ឡើង​ចំពោះ​តួលេខ​របស់​សមាគម​​​រោង​ចក្រ​កាត់​ដេរ​នៅ​កម្ពុជា អំពី​តម្លៃ​អគ្គិសនី​ក្នុង​ប្រទេស​បី​ផ្សេងទៀត គឺ​ប្រទេស​ឥណ្ឌូណេស៊ី វៀតណាម​និង​ប្រទេស​បង់ក្លាដេស ដែល​សមាគម​នេះ​និយាយ​ថា មាន​តម្លៃ​ទាប​ជាង​តម្លៃ​នៅ​ប្រទេស​កម្ពុជា។

តួលេខ​របស់​សមាគម​​​រោង​ចក្រ​កាត់​ដេរ​នៅ​កម្ពុជា ក៏​បង្ហាញ​ដែរ​ថា កម្មករ​កម្ពុជា​ទទួល​បាន​ការ​សម្រាក​ដោយ​មាន​ប្រាក់​ខែ​ច្រើន​ថ្ងៃ​ជាង​ដៃ​គូ​របស់​ខ្លួន​ក្នុង​ប្រទេស​បី​ផ្សេងទៀត។ តួលេខ​និយាយ​ថា កម្ពុជា​មាន​៤៥​ថ្ងៃ​នៃ​ថ្ងៃ​ឈប់​សម្រាក​សាធារណៈ​ដោយ​មាន​ប្រាក់​ខែ និង​ការ​ឈប់​សម្រាក​ប្រចាំ​ឆ្នាំ​ដោយ​មាន​ប្រាក់​ខែ រីឯ​ឥណ្ឌូណេស៊ី​មាន​២៨​ថ្ងៃ វៀតណាម​២៦​ថ្ងៃ និង​បង់ក្លាដេស​២១​ថ្ងៃ។

នៅ​ពេល​តួលេខ​ខ្លះ​របស់​ខ្លួន​អំពី​ថ្ងៃ​ឈប់​សម្រាក​ដោយ​មាន​ប្រាក់​ខែ​បាន​មក​ពី​អង្គការ​ពលកម្ម​អន្តរជាតិ សមាគម​រោងចក្រ​​​កាត់​ដេរ​នៅ​កម្ពុជា​ក៏​បាន​ដក​ស្រង់​ពី​វីគីភីឌា ដែល​មាន​ការ​បញ្ចូល​ទិន្នន័យ​ធ្វើ​ឡើង​ដោយ​អ្នក​ប្រើ​ប្រាស់ ជា​ញឹកញាប់​មាន​ព័ត៌មាន​លំអៀង ជា​ប្រភព​មួយ។ យោង​តាម​គម្រោង​របស់​អង្គការ​ពលកម្ម​អន្តរជាតិ​នៅ​បង់ក្លាដេស ជា​ឧទាហរណ៍ និយោជិត​ជំទង់ៗ ឬ​អ្នក​ដែល​ធ្វើ​ការ​នៅ​ក្រៅ “តំបន់​កែច្នៃ​នាំ​ចេញ” នឹង​ត្រូវ​ជំពាក់​២១​ថ្ងៃ។

លោក លូ បាន​និយាយ​ថា “ភាគ​ច្រើន​បំផុត​នៃ​ព័ត៌មាន​លើ​វីគីភីឌា គឺ​ត្រឹមត្រូវ។ ហើយ​យើង​មិន​ពឹង​តែ​អង្គការ​ពលកម្ម​អន្តរជាតិ​នោះ​ទេ។ នោះ​នឹង​ហួស​ហេតុ”។

លោក មឿន តុលា ប្រធាន​កម្មវិធី​ការងារ​នៃ​មជ្ឈមណ្ឌល​អប់រំ​ច្បាប់ សម្រាប់​សហគមន៍ បាន​និយាយ​ថា ភាគ​ច្រើន​នៃ​កម្មករ​កាត់​ដេរ​កម្ពុជា​មិន​យក​ថ្ងៃ​ឈប់​ភាគ​ច្រើន​នៃ​ថ្ងៃ​វិស្សមកាល​១៨​ថ្ងៃ ដែល​ពួកគេ​មាន​ស្រប​ច្បាប់​ទេ ហើយ​ជា​ញឹក​ញាប់​ខំ​ធ្វើការ​លើស​ម៉ោង​នៅ​ថ្ងៃ​សម្រាក​សាធារណៈ។

លោក​បាន​និយាយ​ថា “ដូច្នេះ​ក្នុង​ការ​អនុវត្ត​ពិត​ប្រាកដ កម្មករ​មិន​យក​ថ្ងៃ​ទាំង​អស់​នោះ​ដើម្បី​សម្រាក​ទេ”។

លោក វីលៀម ខង់លីន នាយក​ប្រចាំ​ប្រទេស​សម្រាប់​មណ្ឌល​សាមគ្គីភាព (Solidarity Center) មាន​មូលដ្ឋាន​នៅ​អាមេរិក បាន​និយាយ​ថា កម្មករ​សម​នឹង​ទទួល​បាន​ថ្ងៃ​ឈប់​សម្រាក​មាន​ប្រាក់​ខែ​១៨​ថ្ងៃ ពីព្រោះ​ពួកគេ​ធ្វើការ​៦​ថ្ងៃ​ក្នុង​មួយ​សប្តាហ៍។

លោក​បាន​និយាយ​ថា ការ​អះអាង​អំពី​ផលិតភាព​​របស់​សមាគម​រោងចក្រ​​​កាត់​ដេរ​នៅ​កម្ពុជា ក៏​តម្រូវ​ឲ្យ​មាន​ជំនឿ​ទុក​ចិត្ត​ចំពោះ​អ្វី​ដែល​មិន​បញ្ជាក់​ភ័ស្តុតាង​បាន។

លោក​បាន​និយាយ​ថា “អ្នក​អាច​ប្រើ​ស្ថិតិ​តាម​វិធី​ណា​ក៏​បាន…​ដើម្បី​បង្ហាញ​ភាព​សម​ហេតុផល។ បើ​អ្នក​មិន​បញ្ចេញ​ឲ្យ​ដឹង​​ប្រភព​របស់​អ្នក​ទេ វា​ជា​គំនិត​ផ្ទាល់​ខ្លួន​ទាំង​អស់ វា​អាស្រ័យ​លើ​ថា​តើ​អ្នក​ចង់​ជឿ​សមាគម​រោងចក្រ​​​កាត់​ដេរ​នៅ​កម្ពុជា ឬ​មិន​ជឿ”៕ និត

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស