មន្ត្រីនគរបាលមួយរូបបានឲ្យដឹងថា កាលពីម្សិលមិញ សាលាដំបូងរាជធានីភ្នំពេញ បានចោទប្រកាន់បុគ្គលិកម្នាក់នៃធនាគារពាណិជ្ជកម្មក្រៅប្រទេស នៃកម្ពុជា ហៅកាត់ថា FTB ពីបទលួចប្រាក់ ១,៦លានដុល្លារពីក្រុមហ៊ុន។
លោក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលរាជធានី បានមានប្រសាសន៍ថា មន្ត្រីរបស់លោកបានចាប់ខ្លួនឈ្មោះ ជូ ជាសារិ ដែលមានវ័យ៥០ឆ្នាំប្លាយកាលពីថ្ងៃច័ន្ទ នៅសាខាធនាគារ FTB ដែលគាត់ធ្វើការ។ ”យើងបានចាប់ខ្លួនគាត់នៅការិយាល័យរបស់គាត់ បន្ទាប់ពីយើងទទួលបានពាក្យបណ្ដឹងពីក្រុមហ៊ុន”។
លោកបានលើកឡើងបន្ថែមថា តុលាការបានចោទប្រកាន់លោក ជូ ជាសារិ កាលពីម្សិលមិញ បន្ទាប់ពីគាត់សារភាពថាខ្លួនពិតជាបាន លួចប្រាក់នោះមែន។ ”តុលាការបានចោទប្រកាន់គាត់ពីបទរំលោភលើសេចក្ដីទុកចិត្ត និងបទក្លែងឯកសារ”។
បទចោទប្រកាន់ទាំងពីរនេះត្រូវមានទោសជាប់ពន្ធនាគារអតិបរមា៣ឆ្នាំ និងពិន័យជាប្រាក់ចំនួន៦លានរៀល។
នាយការិយាល័យព្រហ្មទណ្ឌរូបេនះបានបន្ថែមថា លោកមិនអាចផ្ដល់ព័ត៌មានលម្អិតបន្ថែមទៀតស្ដីពីករណីចោរកម្មនេះបានទេព្រោះលោកគ្មានសំណុំរឿងនេះនៅក្នុងដៃ។
ចំណែកឯមន្ត្រីតុលាការ និងមន្ត្រីធនាគារវិញ មិនអាចទាក់ទងសុំការបំភ្លឺបានទេ។ មន្ត្រីនគរបាលដែលក្រៀកលោក ជូ ជាសារិ ចេញពីសាលាដំបូងរាជធានីភ្នំពេញ បន្ទាប់ពីគាត់ត្រូវបានចោទប្រកាន់នោះ បានបដិសេធមិនឆ្លើយបំភ្លឺឡើយ។
ការចាប់ខ្លួនលោក ជូ ជាសារិ ធ្វើឡើងរយៈពេលជិត១ឆ្នាំ បន្ទាប់ពីសាលាដំបូងរាជធានីសម្រេចឲ្យនាយកធនាគារកាណាឌីយ៉ាពីរនាក់ និងមនុស្សបីនាក់ទៀត ជាប់ពិរុទ្ធភាពនៅក្នុងសំណុំរឿងលួចបន្លំធំបំផុតមួយនៅក្នុងវិស័យធនាគារ។
កាលពីថ្ងៃទី១៨ ខែសីហា តុលាការបានចោទប្រកាន់ម្នាក់ក្នុងចំណោមនាយកធនាគារទាំងពីរនាក់ឈ្មោះ យ៉េត សុភក្ត្រា ដែលបានអះអាងថា ខ្លួនបានលួចបន្លំប្រាក់ចំនួន២,៧លានដុល្លារពីធនាគារកាណាឌីយ៉ា ចន្លោះពីខែមីនា ដល់ខែតុលា ឆ្នាំ២០១៣ ឲ្យជាប់ពន្ធនាគាររយៈពេល៥ឆ្នាំ។
ស្ត្រីឈ្មោះ យ៉េត សុភក្ត្រា ត្រូវបានតុលាការសម្រេចឲ្យជាប់ពិរុទ្ធភាពពីបទរំលោភលើសេចក្ដីទុកចិត្ត និងបទលួចបន្លំចំពោះការប្រើមុខតំណែងរបស់ខ្លួននៅធនាគារនេះ បង្កើតគណនីក្លែងក្លាយដើម្បីដកប្រាក់រាប់ម៉ឺនដុល្លារក្នុងមួយថ្ងៃៗពីម៉ាស៊ីនដកប្រាក់ ATM នៅទូទាំងរាជធានីភ្នំពេញ។
ជនជាប់ចោទទាំងបួននាក់ទៀតដែលមានឈ្មោះដូចជា ឡេង ស៊ុនទ្រី អតីតនាយកផ្នែកប័ណ្ណឥណទាននៃធនាគារនេះ ឈ្មោះ ស៊ុន សៅរ៍នីន ដែលត្រូវជាមិត្តប្រុសរបស់ យ៉េត សុភក្ត្រា ឈ្មោះ ចក់ គឹមហេង ដែលត្រូវជាម្ដាយរបស់ យ៉េត សុភក្ត្រា និង ទេព វិនចន្ធី ដែលឈ្មោះរបស់ខ្លួនមាននៅលើប័ណ្ណឥណទានក្លែងបន្លំដែលត្រូវបានប្រើប្រាស់នៅក្នុងផែនការនេះ ត្រូវបានចោទប្រកាន់ថាជាជនសមគំនិត ហើយត្រូវតុលាការផ្ដន្ទាទោសឲ្យជាប់ពន្ធនាគាររយៈពេល២ឆ្នាំ”៕ សុខុម (រាយការណ៍បន្ថែមដោយ អ៊ូច សូនី)