ស្រុកសំឡូត-ខេត្តបាត់ដំបង-ដោយមានការរិះគន់កាន់តែខ្លាំងឡើងក្នុងរយៈពេលប៉ុន្មានខែថ្មីៗកន្លងមកនេះចំពោះការខកខានរបស់ប៉ូលិសមិនបានអនុវត្តដីកាចាប់ខ្លួនទៅលើលោក មាស មុត អតីតមេបញ្ជាការកងទ័ពជើងទឹកខ្មែរក្រហម ក្រសួងមហាផ្ទៃបាននិយាយថា ខ្លួនត្រូវធ្វើការស្ទាបស្ទង់មតិមហាជនសិន មុននឹងចាត់វិធានការ។
នៅពេលសួរកាលពីខែមិថុនាថា ហេតុអ្វីលោក មាស មុត មិនត្រូវបានចាប់ខ្លួន ទោះបីជាមានដីកាដែលចេញដោយតុលាការកាលពីខែធ្នូនោះ លោក ម៉ៅ ចាន់ដារ៉ា ប្រធានសន្តិសុខនៅសាលាក្តីខ្មែរក្រហម បាននិយាយថា “វាមិនមានន័យថា យើងមិនអើពើនឹងការអនុវត្តដីកាចាប់ខ្លួននោះទេ ប៉ុន្តែ មន្ត្រីយើងចុះទៅទីនោះដើម្បីសិក្សាផលប៉ះពាល់ផ្នែកសង្គម សន្តិសុខ និងមតិរបស់ប្រជាពលរដ្ឋ”។
លោក ចាន់ដារ៉ា បាននិយាយថា “ដូច្នេះនៅពេលដែលគេវិលមកវិញ យើងនឹងវាយតម្លៃលើការសិក្សានោះ”។
ការបដិសេធដោយរដ្ឋាភិបាលកម្ពុជាមិនចាប់ខ្លួនជនត្រូវចោទនៅក្នុងសំណុំរឿង០០៣និង០០៤ ដែលត្រូវជំទាស់ដោយចំហពីលោកនាយករដ្ឋមន្ត្រី ហ៊ុន សែន នឹងជាការរំលោភកិច្ចព្រមព្រៀងជាមួយអង្គការសហប្រជាជាតិដែលបានជួយបង្កើតអង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក.) ក្នុងឆ្នាំ២០០៦ដើម្បីកាត់ទោសសមាជិកជាន់ខ្ពស់នៃរបប ប៉ុល ពត។
លោក ហែម សារុំ មេប៉ុស្តិ៍ឃុំតាសាញ់ ខេត្តបាត់ដំបង ជាកន្លែងដែលលោក មាស មុត រស់នៅបាននិយាយកាលពីថ្ងៃអង្គារថា មានរថយន្តពីរគ្រឿងដឹកមន្ត្រីក្រសួងមហាផ្ទៃបី ឬបួននាក់បានមកដល់ផ្ទះលោក មាស មុត កាលពីពីរបីខែមុន។ លោក សារុំ បាននិយាយថា នៅពេលនោះមន្ត្រីបានសម្ភាសអ្នកជិតខាងរបស់គាត់។
លោក សារុំ បាននិយាយថា “បន្ទាប់ពីលោក មុត ត្រូវបានចោទប្រកាន់ មានមនុស្សមួយក្រុមមកសួរមតិរបស់អ្នកភូមិ។ ដំបួងគេមកជួបខ្ញុំ បន្ទាប់មកគេទៅផ្ទះលោក មាស មុត ដែលខ្ញុំបានចង្អុលឲ្យពួកគេទៅ។ បន្ទាប់មកពួកគេបានសួរអ្នកភូមិ ហើយភាគច្រើនបាននិយាយថា ពួកគេមិនចង់ឲ្យគេនាំគាត់ទៅ អ.វ.ត.ក. ទេ”។
ប៉ុន្តែ ក្នុងការសម្ភាសជាមួយអ្នកយកព័ត៌មានកាលពីថ្ងៃអង្គារ អ្នកភូមិដែលរស់នៅក្បែរលោក មាស មុត ក្នុងភូមិតាសាញ់ជើង រួមមានអ្នកស្គាល់ជិតស្និទ្ធបាននិយាយថា មិនឃើញមានមន្ត្រីណាម្នាក់មកពីក្រសួងមហាផ្ទៃបានមកតំបន់នេះដើម្បីនិយាយជាមួយអ្នកស្រុកទេ។
លោក ហៃ ម៉ាប់ ជាតតីតទាហានខ្មែរក្រហមដែលបានទម្លាក់អាវុធចុះក្នុងទសវត្សរ៍ឆ្នាំ១៩៩០ហើយបានស្គាល់អតីតមេបញ្ជាការកងទ័ពជើងទឹករូបនេះប្រហែល១៥ឆ្នាំមកហើយ បាននិយាយថា “ខ្ញុំមិនដែលឃើញប៉ូលិសចុះមកសួរមតិប្រជាជនទេ។ ខ្ញុំមិនដែលឮរឿងហ្នឹងទេ”។
លោក ម៉ាប់ បាននិយាយថាប្រសិនបើមានមន្ត្រីក្រៅពីឃុំនេះមកតំបន់នេះហើយចាប់ផ្តើមសួរសំណួរ ពាក្យនោះនឹងដឹងឮសុសសាយហើយ។
អតីតទាហានខ្មែរក្រហមរូបនេះ បាននិយាយថា “ពិបាកនឹងនិយាយថាតើ[លោក សារុំ]និយាយកុហកឬអត់ទេ ប៉ុន្តែដោយសារតែប៉ូលិសនិងទាហាន គឺជាផ្នែកនៃរដ្ឋាភិបាល ប្រហែលពួកគេគ្រាន់តែនិយាយតាមថ្នាក់ដឹកនាំប៉ុណ្ណោះ”។
អង្គុយក្នុងចម្ការម្រេចរបស់គាត់ លោក ចាន់ សំអាន អតីតអង្គរក្សលោក មាស មុត និយាយសរសើរខ្មែរក្រហម ដោយបញ្ជាក់ថា អ្នកដែលត្រូវសម្លាប់ដោយរបបខ្មែរក្រហមគឺជារឿងរបស់ខ្មែរក្រហម។
លោក សំអាន ក៏បាននិយាយទៀតថា មិនមានប៉ូលិស ឬមន្ត្រីចុះមកតំបន់នេះទេថ្មីៗនេះ ដោយបញ្ជាក់ថាលោកសង្ស័យថា វាអាចជាការប្រឌិតឡើង។
អតីតអង្គរក្សរូបនេះ បាននិយាយថា “ខ្ញុំមិនដែលឃើញមន្ត្រីប៉ូលិសណាម្នាក់ចុះមកសួរអ្នកភូមិទេ។ ខ្ញុំគិតថា [លោក សារុំ]និយាយកុហក ព្រោះខ្ញុំមិនដែលឃើញប៉ូលិសទេ។ បើមិនជឿខ្ញុំ សូមសួរអ្នកភូមិជុំវិញទីនេះទៅ”។
មនុស្ស៦នាក់បន្ថែមទៀតដែលបានសម្ភាសនៅភូមិតាសាញ់ជើង បាននិយាយថា ពួកគេមិនដែលបានឃើញ ឬឮគេសម្ភាសទាក់ទងនឹង មាស មុតទេ។
ប្រពន្ធលោក មាស មុតបដិសេធមិនឲ្យអ្នកយកព័ត៌មានសម្ភាសប្តីគាត់ទេ។ កាលពីខែមិថុនា លោកបាននិយាយតាមទូរស័ព្ទថា លោកមានការព្រួយបារម្ភអំពីការដាំពោតនិងដំឡូងមីជាជាងសកម្មភាពរបស់តុលាការខ្មែរក្រហម។
លោក អ៊ិន សាវរិទ្ធ អភិបាលស្រុកសំឡូត បាននិយាយកាលពីថ្ងៃពុធថា លោកមិនបានដឹងថាមានមន្ត្រីក្រសួងមហាផ្ទៃចុះមកស្ទង់មតិទេ។
លោក សាវរិទ្ធ បាននិយាយថា “ខ្ញុំមិនបានឃើញមន្ត្រីប៉ូលិសណាម្នាក់ពីក្រសួងមហាផ្ទៃមកទីនេះទេ ប៉ុន្តែខ្ញុំបានឃើញមន្ត្រីអ.វ.ត.ក.ចុះមកជាមួយព្រះរាជអាជ្ញាជនជាតិអាមេរិកាំងម្នាក់ ដើម្បីធ្វើសិក្ខាសាលាសាកសួរមតិប្រជាពលរដ្ឋអំពីករណីនេះក្នុងឆ្នាំ២០១៤”។
លោក ចាន់ដារ៉ា ប្រធានសន្តិសុខនៅអ.វ.ត.ក.បាននិយាយថា លោកមិនអាចធ្វើអត្ថាធិប្បាយបានទេកាលពីថ្ងៃពុធ ព្រោះលោកមានជំងឺហើយនៅមន្ទីរពេទ្យ។
លោក ហ៊ុន សែន បាននិយាយថា ការកាត់ទោសកម្មាភិបាលខ្មែរក្រហមលើសពីមេដឹកនាំខ្មែរក្រហមជាន់ខ្ពស់ដែលកំពុងត្រូវជំនុំជម្រះនាពេលបច្ចុប្បន្ននេះ អាចគំរាមកំហែងដល់ស្ថិរភាពប្រទេសនិងធ្វើឲ្យអតីតទាហានកុម្មុយនិស្តរត់ចូលព្រៃវិញ។
លោកនាយករដ្ឋមន្ត្រីបានមានប្រសាសន៍អំឡុងពេលសុន្ទរកថាក្នុងខែកុម្ភៈថា “[អ.វ.ត.ក.]ពង្រីកវិសាលភាពស្ទើរតែធ្វើឲ្យមនុស្សរត់ចូលព្រៃវិញ”។
លោកនាយករដ្ឋមន្ត្រីបានមានប្រសាសន៍បន្តថា ” រឿងទៅទៀត វាអ៊ីចឹង វិសាលភាពពង្រីកចេះតែពង្រីក ត្រូវគិតពីតម្លៃសន្តិភាពនិងតម្លៃជីវិតមនុស្ស។ ប្រសិនបើសង្គ្រាមកើតឡើងវិញ តើប៉ុន្មាន នាក់ដែលត្រូវស្លាប់”។
អ្នកភូមិនៅភូមិតាសាញ់ជើង និយាយថាមិនដែលមាននរណាមកសួរនាំពួកគេអំពីការអាចចាប់ខ្លួនលោក មាស មុតទេ ចំណែកឯអារម្មណ៍លើសលុបនៅទីនេះគឺថាគួរទុកឲ្យគាត់នៅបានសុខសាន្ត។
អតីតកម្មាភិបាលខ្មែរក្រហមមួយរូបដែលប្រាប់ឈ្មោះមួយម៉ាត់ថាអ៊ិម បាននិយាយថា “យើងសោកស្តាយណាស់ដែលតុលាការចេញដីកាចាប់ខ្លួន។ គាត់ចាស់ហើយ គាត់ណែនាំយើងឲ្យធ្វើល្អ។ ជួនកាល គាត់ដើរកាត់ទីនេះហើយសួរនាំយើងអំពីដំណាំដាំដុះរបស់យើង”។
មតិជំទាស់មួយ គឺលោក ម៉ាប់ ដែលបានចូលរួមជាមួយខ្មែរក្រហមតាំងពីអាយុ១៤ឆ្នាំ បាននិយាយថា លោក មាស មុត គួរប្រឈមមុខនឹងបទចោទ រួមមានការចោទថាគាត់បានធ្វើវិសុទ្ធិកម្មទាហានរបស់គាត់និងសម្លាប់ជនបរទេសនៅលើផ្ទៃសមុទ្រ ប៉ុន្តែលោកសង្ស័យថាការចាប់ខ្លួនមិនអាចកើតមានបានទេ។
លោក ម៉ាប់ បាននិយាយថា “ខ្ញុំមិនគិតថា ប៉ូលិសនឹងមកចាប់ខ្លួនគាត់ទេ ព្រោះហាក់ដូចជារដ្ឋាភិបាលមិនសហការជាមួយតុលការខ្មែរក្រហមសោះ។ ខ្ញុំបានឮតាមបណ្តាញផ្សព្វផ្សាយថាប្រមុខរដ្ឋាភិបាលបាននិយាយថា [ការចោទថែមទៀត]នឹងបង្កើតសង្គ្រាមស៊ីវិល។ តាមគំនិតខ្ញុំ ខ្ញុំមិនគិតដូច្នេះទេ គឺនរណាវាយជាមួយនរណា? ខ្ញុំមិនបានឃើញ[មាស មុត]សម្លាប់គេទេ ប៉ុន្តែខ្ញុំចង់ឃើញគេចាប់ខ្លួនគាត់ ព្រោះខ្ញុំចង់ដឹងការពិត”៕ រើន