អ្នកសារព័ត៌មានចំនួនបួននាក់បានចោទប្រកាន់មន្ត្រីខណ្ឌរដ្ឋបាលព្រៃឈើខេត្តរតនគិរី ថាបានចាក់សោបិទទ្វាររបងបង្ខាំងពួកគាត់នៅក្នុងទីស្នាក់ការខណ្ឌរដ្ឋបាលព្រៃឈើក្នុងគោលបំណងរារាំងមិនឲ្យពួកគាត់ធ្វើសេចក្តីរាយការណ៍ពាក់ព័ន្ធនឹងការដឹកជញ្ជូនឈើប្រណីតខុសច្បាប់។
លោក កេត សុធី អ្នកយកព័ត៌មានឲ្យស្ថានីយទូរទស្សន៍អាស៊ីអាគ្នេយ៍បានលើកឡើងថា លោកនិងអ្នកសារព័ត៌មានបីនាក់ផ្សេងទៀតមកពីស្ថានីយទូរទស្សន៍អប្សរាស្ថានីយទូរទស្សន៍ហង្សមាស និងកាសែតរស្មីកម្ពុជា បានទៅទីស្នាក់ការខណ្ឌរដ្ឋបាលព្រៃឈើខេត្តរតនគិរីក្នុងក្រុងបានលុង ដើម្បីយកព័ត៌មានអំពីការរឹបអូសរថយន្តដឹកឈើប្រណីតមួយគ្រឿងក្នុងពេលថ្មីៗដោយជឿថា មន្ត្រីខណ្ឌរដ្ឋបាលព្រៃឈើកំពុងលាក់បាំងព័ត៌មានអំពីករណីនេះ។
លោកបានលើកឡើងបន្តថា មិនយូរប៉ុន្មានបន្ទាប់ពីបានទៅដល់ លោក វង់ សុខសេរី នាយខណ្ឌរដ្ឋបាលព្រៃឈើខេត្តនេះបានបញ្ជាឲ្យបិទទ្វាររបងបង្ខាំងពួកគាត់ដោយទុកតែប្រឡោះតូចមួយសម្រាប់លោក ប្រាក់សុវណ្ណ អ្នកយកព័ត៌មានឲ្យកាសែតរស្មីកម្ពុជា បើកម៉ូតូចេញប៉ុណ្ណោះ។
បន្ទាប់ពីលោក ប្រាក់ សុវណ្ណ បានចាកចេញទៅ មន្ត្រីរដ្ឋបាលព្រៃឈើបានបិទទ្វារជិតទាំងស្រុងដោយបង្ខាំងអ្នកសារព័ត៌មានបីនាក់ផ្សេងទៀត និងរថយន្តរបស់ពួកគាត់នៅខាងក្នុងទីស្នាក់ការ។
លោកបាននិយាយថា “តាមខ្ញុំគិត [លោក វង់ សុខសេរី] មានបំណងដាក់សម្ពាធយើងកុំឲ្យធ្វើសេចក្តីរាយការណ៍អំពីព័ត៌មានដែលយើងទទួលបាន”។
លោក កេត សុធី បានឲ្យដឹងបន្ថែមទៀតថា លោកបានស្នើសុំការអនុញ្ញាតពីលោក វង់ សុខសេរី ដើម្បីថតផ្តិតយករូបភាពរថយន្ត មុនពេលចូលទៅខាងក្នុងទីស្នាក់ការខណ្ឌរដ្ឋបាលព្រៃឈើ។
លោកបាននិយាយថា “គាត់បានយល់ព្រម ប៉ុន្តែ នៅពេលអ្នកសារព័ត៌មានព្យាយាមបើករថយន្តរបស់ខ្លួនចេញមកវិញ ស្រាប់តែទ្វាររបងក៏បានបិទតែម្តង”។
លោកបានលើកឡើងបន្ថែមទៀតថា ទ្វាររបងបានបើកឡើងវិញ ប្រហែល១ម៉ោងក្រោយ នៅពេលអ្នកសារព័ត៌មាន១០នាក់ផ្សេងទៀតមកពីស្ថាប័នប្រព័ន្ធផ្សព្វផ្សាយផ្សេងៗបានប្រមូលផ្តុំគ្នាដើម្បីទាមទារឲ្យដោះលែង អ្នកសារព័ត៌មានដែលគេចាក់សោទ្វាររបងបង្ខាំង។
ចំណែកឯ លោក វង់ សុខសេរី វិញបានលើកឡើងថា លោកបានបញ្ជាឲ្យបិទទ្វាររបងព្រោះលោកចង់ពិភាក្សាអំពី “អត្ថបទសរសេរ បំផ្លើសមួយចំនួន”ដែលអ្នកសារព័ត៌មានពីរនាក់បានសរសេរ។
លោកបានមានប្រសាសន៍ថា “ពួកគាត់មកកន្លែងរបស់ខ្ញុំ ខ្ញុំមានសិទ្ធិចាក់សោទ្វាររបង។ វាជាសិទ្ធិរបស់ខ្ញុំ។ ខ្ញុំគ្មានធ្វើអ្វីខុសទេ ប៉ុន្តែ ប្រសិនបើខ្ញុំខុស ពួកគាត់អាចដាក់ពាក្យប្តឹងខ្ញុំទៅតុលាការបាន”។
លោក កេត សុធី បានលើកឡើងបន្តទៀត ថា អ្នកសារព័ត៌មាននឹងមិនដាក់ពាក្យបណ្តឹងទេ ព្រោះពួកគាត់មិនចង់ឲ្យមានបញ្ហា បន្តទៀតជាមួយលោក វង់ សុខសេរី ៕ ស៊ុយឈាង