យោងតាមសេចក្តីថ្លែងការណ៍មួយដែលបានចេញផ្សាយដោយអង្គភាពប្រឆាំងអំពើពុករលួយ (ACU) កាលពីម្សិលមិញ បានឲ្យដឹងថា ស្នងការរងទទួលបន្ទុកការងារអន្តោប្រវេសន៍នៃស្នងការដ្ឋាននគរបាលរាជធានីភ្នំពេញបានបដិសេធការចោទប្រកាន់ថា មិនបានពិនិត្យមើលបណ្តាញមន្ត្រីពុករលួយដែលតែងតែជំរិតទារប្រាក់ពីជនបរទេសដែលបើកអាជីវកម្មក្នុងរាជធានី។
សេចក្តីថ្លែងការណ៍នេះ ដែលនិយាយលម្អិតពីការចោទប្រកាន់លោកឧត្តមសេនីយ៍ត្រី អ៊ុច សុធារ័ត្ន និងរួមទាំងការសង្ខេបពីការបដិសេធរបស់គាត់ ចំពោះការអះអាងទាំងនោះមិនបានលើកឡើងថា តើ ACU នឹងសើុបអង្កេតករណីនេះ ឬយ៉ាងណានោះឡើយ ហើយក្រុមមន្ត្រីក្នុងអង្គភាពនេះមិនអាចទាក់ទងបានទេកាលពីម្សិលមិញ។
ដោយលើកឡើងពីពាក្យបណ្តឹងអនាមិកនិងគ្មានចុះកាលបរិច្ឆេទដែលក៏បានចោទប្រកាន់រូបលោកពីបទបក្ខពួកនិយមដែរនោះសេចក្តីថ្លែងការណ៍ដដែលនេះបន្តថា ក្រៅពីធ្វើការប្រយុទ្ធប្រឆាំងបទល្មើស ឧត្តមសេនីយ៍ត្រី សុធារ័ត្ន បានបង្កើត “ស្នាក់ការកណ្តាលដោះស្រាយក្រៅប្រព័ន្ធដើម្បីជំរិតទារប្រាក់ពីជនបរទេស” នៅក្នុងការិយាល័យនគរបាលអន្តោប្រវេសន៍។
សេចក្តីថ្លែងការណ៍នេះឲ្យដឹងថា ឧត្តមសេនីយ៍រូបនេះ ”បានបញ្ជាឲ្យមន្ត្រីដែលជាបក្ខពួករបស់ខ្លួនដើរប្រមូលលុយតាមបណ្តារោងចក្រសហគ្រាស ស្ថាប័ន ឧស្សាហកម្មភោជនីយដ្ឋាន ក្លឹប កន្លែងម៉ាស្សា សាលារៀននិងគ្លីនិក ដែលមានជនបរទេសធ្វើអាជីវកម្ម”។
ដោយសង្ខេបពីការឆ្លើយតបរបស់ឧត្តមសេនីយ៍ត្រី សុធារ័ត្ន ACU បានលើកឡើងថា គាត់បានបដិសេធការចោទប្រកាន់ទាំងអស់មកលើរូបគាត់។
ឧត្តមេសនីយ៍រូបេនះបានលើកឡើងថា ស្នាក់ការកណ្តាលនេះបានបង្កើតឡើងកាលពីខែមិថុនា ឆ្នាំ២០១០ មុនលោកចូលកាន់តំណែងជាស្នងការរងទទួលបន្ទុកការងារអន្តោប្រវេសន៍មកម៉្លេះ ហើយបានបដិសេធ
ា មន្ត្រីរបស់លោកមិនបានបង្ខំទារលុយពីអ្នកណាទេ។
យោងតាមសេចក្តីថ្លែងការណ៍នេះបានឲ្យដឹងថា ឧត្តមសេនីយ៍ត្រី សុធារ័ត្ន ក៏បានបដិសេធថា មិនមានបក្ខពួកនិយមនៅក្នុងការិយាល័យដែរ។
សេចក្តីថ្លែងការណ៍នេះបានលើកឡើងថា “លោក អ៊ូច សុធារ័ត្ន បានបញ្ជាក់ថា លោកមកកាន់តំណែងជាស្នងការរងទទួលបន្ទុកអន្តោប្រវេសន៍នៃស្នងការដ្ឋាននគរបាលរាជធានីតែម្នាក់ឯងប៉ុណ្ណោះ មិនបានយកសាច់ញាតិ ឬក្រុមណាមកជាមួយឡើយ”។ គេមិនអាចទាក់ទងឧត្តមសេនីយ៍ត្រី សុធារ័ត្ន បានទេកាលពីម្សិលមិញ។
ការចាប់ខ្លួនមួយក្នុងចំណោមការចាប់ខ្លួនដ៏លេចធ្លោរបស់ACUកាលពីឆ្នាំមុនគឺការចាប់ខ្លួនលោក ហ៊ី ណារិន អធិការនគរបាលខណ្ឌមានជ័យ ដែលត្រូវបានផ្តន្ទាទោសឲ្យជាប់ពន្ធនាគារ១៨ខែពីបទកិបកេងប្រាក់ជាង៦៧០.០០០ដុល្លារ រយៈពេលជិតមួយទសវត្សរ៍អំឡុងពេលលោកកាន់តួនាទីនេះ។
ប៉ុន្តែ ក្រៅពីការចាប់ខ្លួនមន្ត្រីទាំងនោះ ក៏មានការផ្សព្វផ្សាយជាសាធារណៈពីការចោទប្រកាន់ពាក់ព័ន្ធអំពើពុករលួយអមដោយលិខិតបដិសេធផងដែរ ដែលក្នុងនោះACU បាន បដិសេធមិននិយាយថា តើខ្លួនបន្តសើុបអង្កេត បទល្មើស ឬយ៉ាងណានោះឡើយ៕ សារុន