26.3 C
Phnom Penh

អង្គការ​​​ជំរុញ​​​​​​ឲ្យ​ធនាគារ​ពិភពលោក​​​​ជួយ​អ្នក​​​ភូមិបឹងកក់ ​ពេល​​​បន្ត​​​ផ្តល់​កម្ចី​

ដោយ ឌឹ ខេមបូឌា ដេលី

បទវិភាគ

អង្គការ​មិន​មែន​រដ្ឋាភិបាល​​​ក្នុង​​ស្រុក និង​អន្តរជាតិ​មួយ​ក្រុម​​កំពុង​​ជំរុញ​ឲ្យ​ធនាគារ​ពិភព​​​​លោក​​បញ្ចូល​​កម្មវិធី​មួយ​​ ដើម្បី​ជួយ​​​អ្នក​ភូមិ​​រាប់​ពាន់​គ្រួសារ​ ដែល​ត្រូវ​បាន​បណ្ដេញ​​​ចេញ​​​​ពី​តំបន់​បឹងកក់ ជា​ផ្នែក​នៃ​ផែនការ​​​​​​ចាប់​​​ផ្តើម​​​ផ្ដល់មូលនិធិ​​ដល់​គម្រោង​ថ្មី​ៗនៅ​កម្ពុជា។

ធនាគារ​​ពិភព​លោក​​បាន​ផ្អាក​ការផ្តល់​​កម្ចី​ថ្មី​ទាំងអស់​​ដល់កម្ពុជា​​​កាលពី​ឆ្នាំ​២០១១ ដើម្បី​ឆ្លើយ​តប​នឹង​​ការ​​​​បណ្តេញ​​​ចេញ​​​ដោយ​​​បង្ខំ​​​ពី​សំណាក់​រដ្ឋាភិបាលឲ្យ​អ្នកភូមិ​ប្រមាណ​៣.០០០​គ្រួសារ​​​ចាក​ចេញពី​តំបន់​បឹងកក់​​ ដើម្បី​បើក​ផ្លូវ​សម្រាប់​គម្រោង​អចលនទ្រព្យ​ដ៏ទំនើប​របស់​សមាជិក​ព្រឹទ្ធសភា​មួយ​រូប​មកពី​គណបក្ស​កាន់​អំណាច​។ អំឡុង​ពេល​នោះ ធនាគារ​នេះ​បាន​លើក​ឡើង​ថា ខ្លួន​នឹង​មិន​​លុប​​​​ចោល​ការ​ផ្អាក​ការ​ផ្ដល់​​កម្ចី​ថ្មី​នេះ​ទេ ​លុះ​ត្រា​​តែ​រដ្ឋាភិបាល និង​ពលរដ្ឋ​ឈាន​ដល់​ការ​​ព្រមព្រៀង​គ្នា​សិន​។

ប៉ុន្តែ​​​ពលរដ្ឋ​ទាំង​នេះ​ និង​អង្គការ​សិទ្ធិ​មនុស្ស​ព្រួយបារម្ភ​ថា ការ​ផ្ដល់​កម្ចី​​នឹង​ចាប់​ផ្ដើម​ឡើង​វិញ​ក្នុង​ពេល​ឆាប់ៗ ​ដោយ​គ្មាន​​ការ​ព្រមព្រៀង​​​​ ព្រោះ​ឥឡូវ​នេះ​ធនាគារ​ពិភព​លោក​​បាន​បញ្ចប់​​កិច្ចប្រជុំមួយ​ចំនួន​​នៅ​ក្នុង​ការ​​​រៀបចំ​ផែន​​​ការ​​​យុទ្ធសាស្ត្រ​រយៈ​​​ពេល​​​ខ្លី​ ជា​ផែន​ការ​​មួយ​ដើម្បី​ចូល​រួមពាក់​ព័ន្ធ​ជាមួយ​ប្រទេស​គោលដៅ​ឡើង​វិញ​។

អង្គការ​មិន​មែន​រដ្ឋាភិបាល​​បាន​លើក​ឡើង​នៅ​ក្នុង​​​លិខិត​​​​រួម​មួយ​ចុះកាល​បរិច្ឆេទ​ថ្ងៃ​សុក្រ​ថា “​យើង​​ស្វែង​​​រក​​​​ការ​​​ធានា​ពី​ភាគី​ធនាគារ​ថា ​ផែន​​​ការ​​​យុទ្ធសាស្ត្រ​រយៈ​​​ពេល​​​ខ្លី​ នឹង​មាន​បញ្ចូល​យុទ្ធសាស្ត្រ​មួយ​សម្រាប់​ដោះ​​​ស្រាយ​ទុក្ខលំបាក​​យ៉ាង​ខ្លាំង​​របស់​អ្នក​ភូមិ​​តំបន់​បឹងកក់​ ជា​ផ្នែក​​នៃ​ការ​​ប្ដេជ្ញា​ជា​សាធារណៈ​​​​របស់​ធនាគារ​​​នេះ​​​​”។

លិខិត​​រួម​នេះ​មាន​ខ្លឹមសារ​បន្ត​​ដូច្នេះ​ថា     ” ខណៈ​ទុក្ខ​​​លំបាក​មួយ​ចំនួន​ត្រូវ​បាន​ដោះ​​​ស្រាយ​​តាម​រយៈ​ការ​ចេញ​​ប័ណ្ណ​កម្មសិទ្ធិ​ដីធ្លី​ដល់​គ្រួសារ​ដែល​នៅ​សេសសល់​​ក្នុង​រយៈ​ពេល​ប៉ុន្មាន​ឆ្នាំ​នេះ អ្នក​ភូមិ​រាប់ពាន់​គ្រួសារ​​​បន្ត​ប្រឈម​​នឹង​អសន្តិសុខ​ក្នុង​ការ​រស់​នៅ ឬ​តស៊ូ​នឹង​ភាព​លំបាក​ប្រចាំ​ថ្ងៃ​​ដែល​បង្ក​ឡើង​ដោយ​​ការ​បណ្ដេញ​ចេញ​”។

លិខិត​​​ចុះ​ហត្ថលេខា​ដោយ​​អង្គការ​មិន​មែន​រដ្ឋាភិបាល​​​​​ក្នុង​ស្រុក​ចំនួន​១៥ រួម​ទាំង​​វេទិកា​នៃ​​​អង្គការ​មិន​​​មែនរដ្ឋាភិបាល និង​​គណៈកម្មាធិការ​សហប្រតិបត្តិការដើម្បី​​​​​កម្ពុជា​​​​ [ដែល​​​ក្នុងនោះ​អង្គការទាំងនេះ​មាន​សមាជិក​​​​​​រាប់​រយ]​ និង​អង្គការ​មិនមែន​រដ្ឋាភិបាល​អន្តរជាតិ​​​​ចំនួន​២៨​​ផ្សេង​ទៀត​។

ធនាគារ​ពិភព​លោក​​មិន​បាន​ឆ្លើយ​តប​នឹង​សំណើ​សុំ​ការ​បំភ្លឺ​ឡើយ​។

គ្រួសារ​​ដែល​ត្រូវ​បាន​បណ្ដេញចេញពី​តំបន់​បឹងកក់​​ត្រូវ​បាន​ផ្ដល់​​នូវ​ជម្រើស​​រវាង​ប្រាក់​សុទ្ធ​ចំនួន​៨.៥០០​ដុល្លារ​ ឬ​ផ្ទះ​មួយ​ល្វែង​នៅជាយ​រាជធានី​​ភ្នំពេញ ប៉ុន្តែ​​គ្រួសារ​ទាំង​នេះ និង​អង្គការ​សិទ្ធិ​មនុស្ស​សុទ្ធ​តែ​បាន​លើក​ឡើង​ថា ជម្រើស​ទាំង​ពីរ​នេះ​​គឺ​​នៅ​មិន​ទាន់​​សមស្រប​ទៅ​នឹង​តម្លៃ​ដី​​ដែល​ពួកគាត់​​ត្រូវ​បានគេ​បង្ខំ​ឲ្យ​ចាក​ចេញ​នោះ​​ឡើយ​។

​ធនាគារ​ពិភព​លោក​បាន​ទទួល​ស្គាល់​ថា បរាជ័យ​របស់​ខ្លួន​ក្នុង​ការ​​​រៀប​​​ចំ​​​ និង​​​អនុវត្ត​​គម្រោង​​ផ្ដល់​ប័ណ្ណ​កម្មសិទ្ធិដីធ្លី​​ដែល​ឥឡូវ​លែង​​​មាន​​​ទៅ​​​ហើយ​​​នោះ​​​​បាន​ចូល​រួម​ចំណែក​​​​​ក្នុង​ការ​ធ្វើ​ឲ្យ​មាន​ការ​​បណ្ដេញ​ចេញ​អ្នក​ភូមិ​បឹងកក់ ប៉ុន្តែ​​មិន​ទាន់​បាន​​ធ្វើ​អ្វី​​ដើម្បី​ជួយ​គ្រួសារ​ដែល​ត្រូវ​បាន​បណ្ដេញចេញ​នៅ​ឡើយ​ទេ​មក​ទល់​នឹង​ពេល​នេះ​។

កាលពី​ចុង​ខែ​មិថុនា និង​ដើម​ខែ​កក្កដា ធនាគារ​ពិភព​លោក​បាន​​រៀប​​​ចំ​​​កិច្ចប្រជុំមួយ​ចំនួន​ជាមួយ​​មន្ត្រី​រដ្ឋាភិបាល ​សមាជិក​សភា ពាណិជ្ជករ និង​អង្គការ​មិន​មែន​រដ្ឋាភិបាល​ ដើម្បី​​​ទទួល​​​​បាន​មតិ​យោបល់​​សំខាន់ៗ​សម្រាប់​ ផែនការ​​​យុទ្ធសាស្ត្រ​​ ដែល​​​មាន​បំណង​ដាក់​​​ចេញ​​​អាទិភាព​​ផ្តល់​មូលនិធិ​​​របស់ខ្លួន​ ​នៅ​ពីរ​ឬបី​ឆ្នាំ​ក្រោយ។

អង្គការ​សិទ្ធិ​មនុស្ស​បាន​រិះគន់​ធនាគារ​ពិភព​លោក​ថា មិន​បាន​កំណត់​​​កាលបរិច្ឆេទ​សម្រាប់​​កិច្ចប្រជុំ​ណាមួយ​ជាមួយ​​គ្រួសារ​ដែល​ ត្រូវ​បាន​បណ្ដេញ​ចេញ​ពី​តំបន់​បឹងកក់ ឬ​​​កន្លែង​ ផ្សេងៗ​ ដែលរងគ្រោះ​ដោយសារ​គម្រោង​របស់​ធានាគារនេះ​៕ ស៊ុយឈាង​​​​​​​​​​​​​​​   

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស