38 C
Phnom Penh

ប៉ូលិស​ស្វែងរក​អ្នក​បើក​ឡាន​ដែល​សង្ស័យ​ថា លួច​សម្លៀក​បំពាក់​មួយ​កុងតឺន័រ​

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​ថា ប៉ូលិស​ក្រុង​ភ្នំពេញ​កំពុង​ស្វែងរក​អ្នក​បើក​ឡាន​កុងតឺន័រ​ទទេ​ដែល​គេ​បោះ​បង់​ចោល ដែល​គេ​រក​ឃើញ​ក្នុង​ខណ្ឌ​ឫស្សីកែវ​កាលពី​ព្រឹក​ថ្ងៃ​អាទិត្យ ហើយ​ដែល​គ្រោង​នឹង​ដឹក​ទំនិញ​សម្លៀក​បំពាក់​ទៅ​ផែ​ស្ងួត​ក្នុង​ខណ្ឌ​ពោធិ៍​សែន​ជ័យ។

លោក អីុវ ឈុនផេង អធិការ​រង​ខណ្ឌ​ឬស្សី​កែវ បាន​និយាយ​ថា អ្នក​រស់​នៅ​ក្នុង​សង្កាត់​ទួល​សង្កែ​ក្នុង​ខណ្ឌ​នេះ បាន​ប្រទះ​ឃើញ​ឡាន​ដឹក​ទំនិញ​នៅ​តាម​បណ្តោយ​ផ្លូវ​នា​ម៉ោង​ប្រហែល​៨​ព្រឹក​ថ្ងៃ​អាទិត្យ។

លោក​បាន​និយាយ​ថា “បន្ទាប់ពី​យើង​បាន​ទទួល​ព័ត៌មាន​ថា ឡាន​ដឹក​ទំនិញ​មួយ​គ្រឿង​ចត​ចោល​និង​ធ្វើ​ឲ្យ​កក​ស្ទះ​ចរាចរ​នោះ យើង​បាន​ដឹក​នាំ​កម្លាំង​ទៅ​ពិនិត្យ​មើល។ ប៉ុន្តែ​នៅ​ពេល​យើង​បើក​កុងតឺន័រ យើង​មិន​ឃើញ​មាន​ទំនិញ​នៅ​ខាង​ក្នុង​ទេ”។

លោក ឈុន បាន​និយាយ​ថា ក្រោយ​មក តំណាង​ផែ​ស្ងួត (Olair Dry Port Worldwide Logistics) បាន​ប្រាប់​ប៉ូលិស​ថា គេ​រំពឹង​ថា ឡាន​ដឹក​ទំនិញ​នោះ​នឹង​មក​ដល់​នៅ​ព្រឹក​ថ្ងៃ​អាទិត្យ​ជាមួយ​នឹង​ទំនិញ​សម្លៀក​បំពាក់ ហើយ​ថា ប៉ូលិស​សង្ស័យ​ថា អ្នក​បើក​ឡាន​បាន​លួច​ទំនិញ​ទាំង​នោះ​ក្នុង​អំឡុង​ពេល​យប់​ថ្ងៃ​អាទិត្យ។

លោក​បាន​និយាយ​ថា “អ្នក​បើក​ឡាន​បាន​យក​ឡាន​កុងតឺន័រ ដែល​មាន​សម្លៀក​បំពាក់​ពេញលក់​ឲ្យ​ពួក​ឈ្មួញ​ផ្សេង ហើយ​បន្ទាប់​មក​បាន​បោះបង់​ឡាន​នោះ​ចោល​នៅ​ទី​នោះ”។

លោក អធិការ​រង ឈុនផេង បាន​និយាយ​ថា ប៉ូលិស​ទើប​តែ​ដឹង​ថា ឡាន​ដឹក​ទំនិញ​នោះ​មក​ពី​រោងចក្រ​មួយ​ក្នុង​ខេត្ត​កំពង់​ចាម ហើយ​មិន​បាន​ស្គាល់​ឈ្មោះ​តៃកុង ប្រភេទ​សម្លៀក​បំពាក់​ផ្ទុក​ក្នុង​ឡាន ឬ​ចំនួន​ប៉ុន្មាន​ឡើយ។

លោក​បាន​និយាយ​ថា “ឥឡូវ​នេះ យើង​កំពុង​សហការ​ជាមួយ​ផែ​ស្ងួត ដើម្បី​ស្វែង​រក​អ្នក​បើក​ឡាន”។ លោក​បាន​បន្ថែម​ថា ប៉ូលិស​ក៏​កំពុង​ស្វែងរក​អ្នក​ផ្សេងទៀត​ដែល​ពាក់​ព័ន្ធ​ដែរ។

លោក​បាន​និយាយ​ថា “ខ្ញុំ​គិត​ថា ប្រាកដ​ជា​មាន​អ្នក​ពាក់ព័ន្ធ​ច្រើន​ទៀត​ក្នុង​ករណី​នេះ ពីព្រោះ​អ្នក​បើក​ឡាន​មិន​អាច​លួច​សម្លៀក​បំពាក់​ទាំង​អស់​ពី​ឡាន​ខ្លួន​ឯង​បាន​ទេ”។

លោក ហ៊ុយ ហ៊ាន មេ​ប៉ុស្តិ៍​សង្កាត់​ទួល​សង្កែ បាន​និយាយ​ដែរ​ថា លោក​មិន​បាន​ដឹង​ថា ឡាន​ដឹក​ទំនិញ​នេះ​មកពី​រោងចក្រ​ណា​នោះ​ទេ ប៉ុន្តែ​ដឹង​ថា ឡាន​ជា​របស់​ផែ​ស្ងួត។

លោក​បាន​និយាយ​ថា “ម្ចាស់​ឡាន​ដឹក​ទំនិញ​មិន​បាន​ផ្តល់​ចំនួន​បាត់បង់​ជាក់លាក់​ទេ ប៉ុន្តែ​ប្រហែល​មិន​ច្រើន​ទេ។ សម្លៀក​បំពាក់​មួយ​ចំនួន​តូច​បាន​បាត់”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស