33 C
Phnom Penh

មន្ត្រី​សិទ្ធិ​​​មនុស្ស​​​​ថា អ្នកកាប់ឈើ​បួននាក់​ត្រូវ​ទាហាន​ថៃ​បាញ់ស្លាប់​

ដោយ ឌឹ ខេមបូឌា ដេលី

បទវិភាគ

បុគ្គលិក​អង្គការ​សិទ្ធិមនុស្ស​ម្នាក់​​ក្នុង​ខេត្ត​ឧត្ដរមានជ័យបាន​​ឲ្យ​ដឹង​កាលពី​​ម្សិលមិញ​ថា មន្ត្រី​ព្រំដែន​​ម្នាក់​បាន​​ប្រាប់ខ្លួន​ថា បុរស​​ជន​​​ជាតិ​ខ្មែរ​​បួន​នាក់​ត្រូវ​បាន​ទាហាន​ថៃ​បាញ់​ស្លាប់​កាល​ពី​សប្ដាហ៍​មុន ខណៈ​ពេល​ពួកគាត់​បាន​ឆ្លងព្រំដែន​ទៅ​កាប់​ឈើ​ប្រណីត។

លោក ស្រី ណារ៉េន អ្នក​សម្រប​សម្រួល​នៅ​​​អង្គការ​សិទ្ធិ​មនុស្ស​​អាដហុក​ប្រចាំ​ខេត្ត​​នេះ​បាន​មាន​ប្រសាសន៍​ថា អ្នក​កាប់​ឈើ​ជន​​​ជាតិ​ខ្មែរ​ពីរក្រុម​ដាច់​ដោយឡែកពីគ្នា​​ ដែល​អាច​រត់​គេចខ្លួន​​រួច​ពីទាហាន​​ថៃ​ បាន​ប្រាប់​មន្ត្រី​នគរ​បាល​ព្រំដែននៅ​​​​ក្នុង​ស្រុក​ត្រពាំង​​ប្រាសាទ​ថា ការ​បាញ់​នេះ​បាន​កើត​ឡើង​កាលពី​ថ្ងៃ​អង្គារ។

ដោយ​សំដៅ​ដល់​មន្ត្រី​ដដែល​នេះ​ដែល​អ្នក​កាប់​ឈើ​រាយការណ៍ប្រាប់​ពី​ហេតុ​ការណ៍​​​​ដែល​​​បាន​​​កើត​​​ឡើង​​​ ប៉ុន្តែ​បាន​បដិសេធមិន​ប្រាប់​ឈ្មោះ លោក ស្រី ណារ៉េន បាន​មាន​ប្រសាសន៍​ថា “បុរស​​បួន​នាក់​ត្រូវបាន​​​បាញ់​ស្លាប់ ហើយពីរ​នាក់​ទៀត​ត្រូវ​អាជ្ញាធរ​ថៃ​ចាប់​​​​​​​ខ្លួន​កាលពី​សប្ដាហ៍​មុន នេះ​បើ​តាម​​​ការ​លើក​ឡើង​របស់​នគរ​បាល​ព្រំដែនម្នាក់​​”។

លោក​បាន​លើក​ឡើង​ថា “​​អ្នក​ដែល​បាន​រត់​គេច​ខ្លួន​រួច​បាន​ឲ្យ​ដឹង​ថា ការ​​បាញ់​​ទាំងពីរ​លើក​បាន​កើត​ឡើង​​កាលពី​ថ្ងៃទី​៦ ខែ​សីហា នៅ​ម៉ោង​១១​ព្រឹក និង​ម៉ោង​៤ល្ងាច​នៅ​​ក្នុង​ព្រៃ​ទឹកដី​ថៃ​ ហើយ​​មនុស្ស​បួន​នាក់​ត្រូវ​ទាហាន​ថៃបាញ់​ស្លាប់​​ និង​ពីរ​នាក់ទៀត​ត្រូវ​បាន​ចាប់ខ្លួន​​​”។

លោក ណារ៉េន​ បាន​បន្ថែម​ថា មន្ត្រី​នគរ​​​បាល​ព្រំដែន​​​​​បាន​ប្រាប់​ឈ្មោះ​អ្នក​កាប់​ឈើ​​​ដែល​បាន​បាត់​ខ្លួន​​ទាំង​ប្រាំមួយ​នាក់​គឺ​ តូច ថុន អាយុ​៣៩​ឆ្នាំ ស៊ិន សាញ់ អាយុ​៣៦​ឆ្នាំ ហម​ ពៅ អាយុ​៣៤​ឆ្នាំ ហួន​ ជិន អាយុ​៣៤​ឆ្នាំ ​​ជួន ទិត្យ អាយុ​​១៧​ឆ្នាំ និង​ ហែម រ៉ន អាយុ​១៧​ឆ្នាំ។

លោក​បាន​ឲ្យ​ដឹង​ថា លោក​មិន​​ស្គាល់​ឈ្មោះ​អ្នក​ដែល​ស្ថិត​ក្នុង​ចំណោម​ពួកគេ​ទាំង​ប្រាំមួយ​នាក់​ដែល​បាន​ស្លាប់​នោះ​ឡើយ ប៉ុន្តែ​ ថា អ្នក​ទាំង​អស់​នេះ​មកពី​ស្រុក​ត្រពាំង​ប្រាសាទ​​​ និង​ស្រុក​អន្លង់វែង។

លោក តូច​ រ៉ា នាយការិយាល័យ​ទំនាក់​ទំនង​ព្រំដែន​នៅ​ច្រក​​ទ្វារ​​អន្តរជាតិ​ជាំសាងាំ ​បាន​មាន​ប្រសាសន៍​ថា លោក​មិន​អាច​បញ្ជាក់​ពី​​អ្នក​ស្លាប់​ទាំង​នេះ​បាន​ទេ ប៉ុន្តែ​ថា លោក​បាន​បញ្ជូន​​សំណើ​ទៅ​អាជ្ញាធរ​ថៃ ​​​​ដើម្បី​សុំ​​​ព័ត៌មាន​អំពី​បុរស​ដែលបាន​​​​បាត់​ខ្លួន​ទាំង ​នោះ​​​ហើយ​។

លោក​បាន​​ថ្លែង​ថា “​ខ្ញុំ​បាន​បញ្ជូន​របាយ​​​ការណ៍​ទាក់​ទង​នឹង​អ្នក​​បាត់​ខ្លួន​ទាំង​នេះ​ទៅ​នគរ​បាល​ព្រំដែន​ថៃ ហើយ​ពួកគេ​បាន​សន្យា​ស៊ើបអង្កេត​ជូន​ពួក​យើង​។ យើង​​កំពុង​រង់ចាំ​ព័ត៌​មាន​នៅ​ឡើយ”។

លោក សូ នៅ អធិការ​រង​នគរ​បាល​ស្រុក​អន្លង់វែង​​មាន​ប្រសាសន៍​ថា មន្ត្រី​របស់​លោក​​​​ក៏កំពុង​ស៊ើបអង្កេត​ពី​ការ​បាញ់​នេះ​ដែរ​។

លោក​បាន​មាន​ប្រសាសន៍​ថា “​យើង​​ទទួល​​​​បាន​ព័ត៌មាន​ថា បុរស​ម្នាក់​ក្នុង​ចំណោម​​បុរស​ដែល​បាត់​ខ្លួន​នោះ​មកពី​ស្រុក​អន្លង់វែង”។

លោក​ ពៀង នន់ នាយ​ប៉ុស្តិ៍​ឃុំ​ទំនប់​ដាច់ បាន​មាន​ប្រសាសន៍​ថា អ្នក​ភូមិ​ពីរ​នាក់​ដែល​បាន​បាត់​ខ្លួននេះ​​មកពី​ឃុំ​របស់​លោក ហើយ​ថា លោក​កំពុង “ស្រាវជ្រាវ” ពី​​​ការ​បាត់​ខ្លួន​របស់​ពួកគេ​៕ សារុន​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស