36 C
Phnom Penh

​អតីត​អ្នក​គ្រប់គ្រង​ការដ្ឋាន​​​នៅ​អាង​​ត្រពាំង​ថ្ម ​​​ផ្ដល់​សក្ខីកម្ម​​​​នៅ​សាលា​ក្ដី​​អំពី​ការ​ភ័យ​ខ្លាច​នៅទី​នោះ​

ដោយ ឌឹ ខេមបូឌា ដេលី

បទវិភាគ

អតីត​អ្នក​គ្រប់គ្រង​ម្នាក់​នៅ​ការដ្ឋាន​​អាង​ត្រពាំង​ថ្ម​ ក្នុង​ខេត្ត​បន្ទាយ​មានជ័យ​ បាន​ផ្តល់​សក្ខី​កម្ម​​នៅ​​​​សាលាក្ដី​ខ្មែរ​ក្រហម​កាលពី​ម្សិល​មិញ​ថា ​គាត់​​​មាន​ការ​ភ័យ​ខ្លាច​​​បាត់​បង់​​​អាយុ​ជីវិត​របស់​​​ខ្លួន ហើយ​បាន​​រៀប​រាប់​​​​ពី​​​ហេតុ​ការណ៍​ដែល​​​​អ្នក​​ធ្វើ​​ការ​​ត្រូវ​បាន​បង្ខំ​ឲ្យ​​ធ្វើ​ការ​​ទាំង​យប់​នៅ​ពេល​​​ការ​ជីក​ដី​លើកអាង​​នេះ​ជិត​ចប់​​រួច​រាល់​។

លោក កាន ថុល ដែល​ជា​អនុប្រធាន​​​កង​តូច​​នៃ​កង​ចល័ត​នៅ​ការដ្ឋាន​ត្រពាំង​ថ្ម បាន​និយាយ​ថា ​គាត់​មិន​បាន​​រត់គេច​​ទៅ​ណា​ឡើយ ​​ទោះបី​អ្នក​ធ្វើ​​ការ​អស់​កម្លាំង​​​ពី​ខ្លួន និង​ធ្លាក់​ខ្លួន​​​ឈឺក៏​ដោយ ពីព្រោះ​គាត់​ខ្លាច​​គេ​សម្លាប់​គាត់​ចោល។ “ខ្ញុំ​គ្មាន​សេចក្ដី​ក្លាហាន​​​​បដិសេធ​ការ​ចាត់​តាំង​នោះ​ទេ។ ខ្ញុំ​ខ្លាច​ពួកគេ…។ ខ្ញុំ​ខ្លាច​ច្បាប់​​​​របស់​ពួកគេ​​ និង​ការ​ធ្វើ​បាប​​របស់​ពួកគេ​មក​លើ​​​ខ្ញុំ​។ ខ្ញុំ​ខ្លាច​ត្រូវ​គេ​​យក​ទៅ​សម្លាប់​ចោល”។

សាក្សី​រូប​នេះ​​និយាយ​ទៀត​ថា ​ដំបូង​ឡើយ​​​​​​ម៉ោង​ធ្វើ​ការ​​​គឺ​ចាប់​ពី​ម៉ោង​៧ព្រឹកដល់​ម៉ោង​​៥ល្ងាច ប៉ុន្តែ​ក្រោយ​មក​អ្នក​ធ្វើ​ការ​​​​ត្រូវ​បាន​បង្ខំ​​​ឲ្យ​ធ្វើ​ការ​​​​ទាំង​​យប់ នៅ​ពេល​មន្ត្រី​ខ្មែរ​ក្រហម​​​ខំ​ប្រឹង​​​បញ្ចប់​​ការ​ជីក​ដី​លើក​​អាង​នេះ​​ឲ្យ​បាន​​​​មុន​ចូល​ឆ្នាំ​ខ្មែរ​នៅ​​​ក្នុង​ឆ្នាំ​១៩៧៧។ ”​នៅ​ពេល​យើង​ជិត​បញ្ចប់​គម្រោង​នេះ​ យើង​​​​​​​ត្រូវ​លើក​ដី​​ពេញ​មួយ​ថ្ងៃ​​ និង​២៤​ម៉ោង​”។

គាត់​និយាយ​​ទៀត​ថា ក្នុង​មួយ​ថ្ងៃ​ៗ​​​ អ្នក​ធ្វើ​ការ​​ដល់​ទៅ​​ប្រាំនាក់​​ក្នុង​កង​​របស់​គាត់​ដែល​មាន​​​​សមាជិក​​ប្រហែល​៣០​នាក់ ​បាន​ធ្លាក់​ខ្លួន​ឈឺ ដែល​គាត់​បន្ទោស​ថា​មក​ពី​​​អាហារ​គ្មាន​អនា​​​ម័យ និង​ទឹក​ផឹក​មិន​​ចម្រោះ​​​នៅ​ការដ្ឋាន​នោះ​។ ​​គ្រូពេទ្យ​​ខ្មែរ​ក្រហម​គ្មាន​លក្ខណៈ​សម្បត្តិ​​​គ្រប់​​​គ្រាន់​​​ទេ ​​ហើយ​​បរិក្ខារ​ពេទ្យ​ទៀត​សោត​​​​ក៏​មិន​​គ្រប់​​​គ្រាន់​ដែរ ចំណែកឯ “​ថ្នាំពេទ្យ​” ដែល​អាច​​​​រក​​​​បាន​​ គឺ​មាន​តែ​​​ថ្នាំ​អាចម៍​ទន្សាយ​​ប៉ុណ្ណោះ​។​

នៅ​ពេល​សាកសួរ​អំពី​ការ​រៀប​ការ​​​នៅ​ការដ្ឋាន​នោះ ​លោក​ កាន ថុល ​បាន​​រៀបរាប់​ថា មាន​​ពិធី​រៀបការ​ពី​៣០​​ទៅ​៤០​គូ ប៉ុន្តែ​បាន​បដិសេធ​ថា ការ​រៀបការ​នេះ​គ្មាន​ការ​បង្ខិត​បង្ខំ​នោះ​ទេ។

គាត់​និយាយ​ទៀត​ថា ”ពួកគេ​បាន​ស្គាល់​គ្នា​មុន ហើយ​ពួកគេ​បាន​ស្គាល់​គ្នា​តាម​​រយៈ​​ប្រធាន​កង​របស់​ពួកគេ​។ ឧទា​ហរណ៍ បុរស​ធ្វើ​ការ​​ម្នាក់​បាន​ទៅ​ប្រាប់​​មេ​របស់​ខ្លួន ហើយ​ស្ត្រី​ធ្វើ​ការ​ម្នាក់​​ក៏​បាន​​ទៅ​ប្រាប់​ប្រធាន​​​របស់​ខ្លួនដែរ ហើយ​ពួកគេ​ក៏​យល់​ព្រម​​​​រៀបការ​ជាមួយ​គ្នា។ បន្ទាប់​​មក ការ​រៀបការ​​ក៏​ត្រូវ​បាន​​​​រៀបចំ​ឡើង​សម្រាប់​​ប្ដី​ប្រពន្ធ​មួយ​គូ​នោះ”។

សវនាការ​​ជំនុំជម្រះ​​​ក្នុង​ដំណាក់​កាល​ទី២​នៃ​សំណុំរឿង​០០២​​ ដែល​ ខៀវ សំផន និង​ នួន ​​​ជា ត្រូវ​ឡើង​សវនាការ​ទទួល​​ការ​​​ជំនុំ​ជម្រះ​​​​​​ពី​បទ​ឧក្រិដ្ឋ​​នានា​ រួម​ទាំង​បទ​ប្រល័យ​ពូជ​សាសន៍​​​ផង​នោះ ​នឹង​​​ធ្វើឡើង​​​បន្ត​នៅ​ថ្ងៃ​នេះ៕ សុខុម    

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស