សាច់ញាតិនិងអ្នកជិតខាងរបស់បងប្អូនស្រីពីរនាក់ដែលត្រូវបានចាប់ខ្លួនក្នុងក្រុងភ្នំពេញកាលពីសប្តាហ៍មុន ទាក់ទិននឹងការចោទអំពីទាសភាពផ្លូវភេទលើក្មួយស្រីអាយុ១៣របស់ខ្លួននោះ មានកំហឹងយ៉ាងខ្លាំង។
សមាជិកនៃសហគមន៍ចាមដែលរស់នៅតាមបណ្តោយដងទន្លេសាប ក្នុងសង្កាត់ច្រាំងចំរេះ១ ខណ្ឌឫស្សីកែវ បាននិយាយកាលពីថ្ងៃច័ន្ទថា មិនមែនជាការពិតទេដែលថា ស្ត្រីពីរនាក់នោះបានសារភាពចំពោះការដាក់ច្រវាក់ក្មេងស្រីនៅផ្ទះរបស់ពួកគេជាច្រើនថ្ងៃនៅពេលពួកគេមានកំហឹង ប៉ុន្តែពួកគេមិនគួរត្រូវចាប់ខ្លួនទាល់តែសោះ។
ប៉ូលិសបានចាប់ខ្លួន ជា ស្រស់ អាយុ៣២ឆ្នាំ និង ជា ទីណា អាយុ២៧ឆ្នាំ នៅថ្ងៃទី៣ ខែសីហា បន្ទាប់ពីបានទទួលបណ្តឹងផ្ទាល់ពីក្មេងស្រីនោះ ដែលចោទមីងៗរបស់នាងថា ដាក់ច្រវាក់នាងក្នុងផ្ទះ ហើយបណ្តោយឲ្យ ឈឹម ឆៃលី អាយុ៣៦ឆ្នាំ រំលោភនាងជាច្រើនលើករយៈពេលមួយឆ្នាំ។
លោក ឆៃលី ក៏ត្រូវបានចាប់ខ្លួនដែរ និងចោទពីបទទិញពេស្យាចារកុមារ និងសង្ស័យថាឲ្យ១.០០០ដុល្លារទៅបងប្អូនស្រីទាំងពីរនាក់ ដើម្បីរួមភេទជាមួយក្មេងស្រីនេះ។ ទាំងពីរនាក់បងប្អូនរងការចោទពីបទបង្ខាំងមនុស្សខុសច្បាប់ និងសញ្ចរកម្ម។ ក្នុងការការពារខ្លួន អ្នកទាំងបីបានអះអាងថា ក្មេងស្រីនោះបានភ្ជាប់ពាក្យនឹងលោក ឆៃលី។
ពីរថ្ងៃមុននោះ អ្នកភូមិជាង១០០នាក់នៃសហគមន៍ចាមក្នុងភូមិបី បាននាំគ្នាការពារបងប្អូនស្រីទាំងពីរដោយផ្តិតស្នាមមេដៃលើឯកសារទាមទារឲ្យតុលាការដោះលែងពួកគេ។ ពួកគេនិយាយថា អ្នកស្រី ស្រស់ និងអ្នស្រី ទីណា ដែលបានចិញ្ចឹមក្មេងស្រីនេះ តាំងពីពេលម្តាយរបស់នាងបោះបង់នាងចោលពេលនាងនៅជាក្មេងតូចនោះ មានហេតុផលដើម្បីដាក់ច្រវាក់រារាំងនាង ប៉ុន្តែបានទទួលស្គាល់ថា ពួកគេមិនដឹងថាតើអ្នកទាំងពីរបានលក់ក្មេងស្រីនោះសម្រាប់រួមភេទឬយ៉ាងណាទេ។
រេស រ៉ូនី ជាបព្វជិតមូស្លីមក្នុងសហគមន៍នេះ បាននិយាយថា “ប្រជាជនរបស់យើងបន្ទោសក្មេងស្រីនេះព្រោះតែចរិយារបស់នាងមិនល្អ ពីព្រោះនាងមិនស្តាប់បង្គាប់មីងរបស់នាង នាងបានចេញពីផ្ទះដោយមិនប្រាប់គ្រួសាររបស់នាង ហើយនាងបានទៅក្លឹប”។
នៅពេលសួរ ថាតើលោក ឆៃលី បានរំលោភក្មេងស្រីនេះ ឬថាតើការរួមភេទដោយការព្រមព្រៀងគ្នាឬយ៉ាងណានោះ លោក រ៉ូនី បាននិយាយថា លោកមិនដឹងទេ ប៉ុន្តែ ជាការធម្មតាទេសម្រាប់ក្មេងស្រីអាយុ១៣ឆ្នាំដែលត្រូវរៀបការតាមប្រពៃណីចាមនោះ។
លោកបាននិយាយថា “តាមអីុស្លាមរបស់យើង នៅពេលនាងមានរដូវ នាងអាចរៀបការបាន ប៉ុន្តែ តាមច្បាប់រដ្ឋ មិនអនុញ្ញាតទេ លុះត្រាតែនាងមានអាយុ១៨ឆ្នាំ”។ លោកបានបន្ថែមថា ក្មេងស្រីនេះបានភ្ជាប់ពាក្យនឹងលោក ឆៃលី រួចហើយ តាំងពីខែមករាឆ្នាំមុនម៉្លេះ។
ខណៈដែលសមាជិកផ្សេងទៀតនៃសហគមន៍នេះឈរក្បែរលោកបានលើកហេតុផលថា ជារឿងធម្មតាទេ ចំពោះគូស្នេហ៍ដែលភ្ជាប់ពាក្យរួចហើយរួមរ័កគ្នានោះ លោក រ៉ូនី បាននិយាយថា “ខ្ញុំនិងអ្នកភូមិជាច្រើនក្នុងសហគមន៍មូស្លីមរបស់យើងបានទៅចូលរួមពិធី [ភ្ជាប់ពាក្យ] របស់ពួកគេកាលពីឆ្នាំមុន ប៉ុន្តែ ខ្ញុំមិនប្រាកដ ថាតើពួកគេស្រឡាញ់គ្នាឬ អត់នោះទេ”។
សារី ហ្វា អាយុ៤៥ឆ្នាំ ជាអ្នកជិតខាងរបស់អ្នកស្រី ស្រស់ និងអ្នកស្រី ទីណា បាននិយាយថា អ្នកស្រីក៏ជឿដែរថា បងប្អូនស្រីទាំងពីរមានហេតុផលត្រឹមត្រូវឃាត់ឃាំងខ្លួនក្មេងស្រីនេះ ជាការយល់ឃើញដែលគាំទ្រដោយសមាជិកប្រហែល១២នាក់ផ្សេងទៀតក្នុងសហគមន៍នេះ ដែលសម្ភាសកាលពីថ្ងៃច័ន្ទ។
អ្នកស្រី ហ្វា បាននិយាយថា “នាងបានព្យាយាមរត់ចេញពីផ្ទះបួនដងមកហើយ ហើយមួយដងៗ គ្រួសារនេះលំបាករកនាងឃើញណាស់។ ខ្ញុំបានស្រែកយំនៅពេលដែលប៉ូលិសចាប់ខ្លួនបងប្អូនស្រីទាំងពីរនាក់”។
អ្នកស្រី ម៉េត អារីយ៉ាស់ អាយុ៣៦ឆ្នាំ បានចោទប៉ូលិសថា យល់ច្រឡំស្ថានការណ៍នេះ ហើយចាប់ខ្លួនបងប្អូនស្រីទាំងពីរនាក់ខុស។
អ្នកស្រី អារីយ៉ាស់ បាននិយាយថា “ខ្ញុំគិតថា ប៉ូលិសបានធ្វើខុស ពីព្រោះពួកគេមិនបានសាកសួរនរណាម្នាក់ក្នុងភូមិរបស់យើង ឬធ្វើការស៊ើបអង្កេតទេ”។ អ្នកស្រីបានបន្ថែមថា អ្នកស្រីមិនគិតថា បងប្អូនស្រីទាំងពីរនាក់បង្ខំក្មួយស្រីរបស់ខ្លួនឲ្យរួមភេទយកប្រាក់ទេ។
អ្នកស្រីបាននិយាយថា “ខ្ញុំមិនជឿថា ពួកគេធ្វើរឿងអ៊ីចឹងទេ ពីព្រោះពួកគេបានថែរក្សាបីបាច់ក្មេងស្រីនេះ តាំងតែពីនាងនៅតូចម៉្លេះ”។
ទោះជាយ៉ាងនេះក្តី លោក កែវ ធា ប្រធានការិយាល័យប្រឆាំងការជួញដូរមនុស្ស និងការពារអនីតិជនក្រុង បាននិយាយថា មានភ័ស្តុតាងដាក់បន្ទុកលើបងប្អូនស្រីទាំងពីរច្រើនលើសលុប។
លោកបាននិយាយថា “ពួកគេបានសារភាពថា បាននាំក្មេងស្រីទៅរួមភេទជាមួយបុរសនោះ ហើយយកប្រាក់ពីគាត់១.០០០ដុល្លារ។ លោក ឆៃលី ក៏បានសារភាពថាបានឲ្យប្រាក់នោះទៅបងប្អូនស្រីទាំងពីរដែរ”។
លោក កែវ ធា បានបន្ថែមថា ក្មេងស្រីនោះស្ថិតនៅក្រោមការមើលថែរក្សារបស់អង្គការក្រៅរដ្ឋាភិបាលមួយក្នុងក្រុងភ្នំពេញ៕ និត