កាលពីថ្ងៃច័ន្ទ លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ បានធ្វើជាអធិបតីក្នុងពិធីស្បថចូលកាន់មុខតំណែងរបស់និស្សិតបញ្ចប់ការសិក្សាថ្មីៗចំនួន៥៥នាក់នៅរាជ្យបណ្ឌិតសភាវិជ្ជាជីវៈចៅក្រម ជាចៅក្រមនិងព្រះរាជអាជ្ញា នៅព្រះបរមរាជវាំងក្រុងភ្នំពេញ។
យោងតាមលោក សំ ប្រជាមានិត អ្នកនាំពាក្យឧត្តមក្រុមប្រឹក្សានៃអង្គចៅក្រម បានឲ្យដឹងថា ក្រុមនេះបានបញ្ចប់ការសិក្សារបស់ខ្លួននៅឆ្នាំនេះ និងត្រូវបានទទួលយកដោយឧត្តមក្រុមប្រឹក្សានៃអង្គចៅក្រមកាលពីថ្ងៃទី១៧ ខែកក្កដា ប៉ុន្តែ ត្រូវរង់ចាំរហូតដល់ថ្ងៃច័ន្ទ ដើម្បីទទួលមុខតំណែងរបស់ខ្លួន។
លោក ប្រជាមានិត បាននិយាយថា ព្រះមហាក្សត្រ នរោត្តម សីហមុនី មិនបានមានព្រះរាជវត្តមានក្នុងពិធីនេះទេ ប៉ុន្តែចៅក្រមនិងព្រះរាជអាជ្ញាក្មេងៗ៥៥នាក់នេះ កាលពីថ្ងៃច័ន្ទពួកគេបានស្បថដាក់ជីវិត ថាពួកគេនឹងមិនពុករលួយឡើយ។
លោកបាននិយាយថា “ផ្អែកលើពាក្យពេចន៍ដែលពួកគេបានស្បថ ពួកគេនឹងត្រូវគោរពរដ្ឋធម្មនុញ្ញ និងច្បាប់ទាំងអស់ផ្សេងទៀត។ សំបថទាំងនោះធ្ងន់ណាស់ ហើយសំបថជាច្រើនអាចធ្វើឲ្យពួកគេអស់ជីវិតរបស់ខ្លួន ប្រសិនបើពួកគេរំលោភសំបថទាំងនោះ”។
លោក ប្រជាមានិត បាននិយាយថា មន្ត្រីថ្មីដែលពួកគេភាគច្រើនមានអាយុក្រោម៣៥ឆ្នាំ នឹងជួយបំពេញតំណែងតុលាការ។
“ចំនួននេះគ្រប់គ្រាន់ដើម្បីបំពេញតម្រូវការធនធានមនុស្សក្នុងប្រព័ន្ធតុលាការរបស់យើង បើទោះជាយើងត្រូវការ[មនុស្ស]ថែមទៀត នៅពេលយើងបង្កើតសាលាឧទ្ធរណ៍ថ្នាក់តំបន់នាពេលអនាគតក៏ដោយ”៕ និត