សំណើសុំ​​ឲ្យ​ឥណ្ឌាបញ្ឈប់​សាង​សង់​​ប្រាសាទ ​​ទំនង​ជា​​​មិន​​អាច​ទៅ​រួច ព្រោះ​វា​​មិន​ចម្លង​​តាម​​អង្គ​រ​វត្ត​

កាលពី​ម្សិលមិញ លោក ហោ ណាំហុង ​​រដ្ឋមន្ត្រី​ក្រសួង​ការ​បរទេស​​ បាន​​ជម្រាប​លោក​ ​​​ឌីណេស ប៉ាតណាអុីក (Dinesh Patnaik) ឯក​អគ្គ​រដ្ឋទូត​ឥណ្ឌា​​​​ថា ​កម្ពុជា ​​​ចង់​ឲ្យ​លុប​ចោល​ទាំង​ស្រុង​​​នូវ​គម្រោង​សាងសង់​​ប្រាសាទ​ចម្លង​​​​តាម​រចនាបថ​​ប្រាសាទ​​អង្គរ​វត្ត​នៅ​ក្នុង​ប្រទេស​​​​​នោះ នេះ​បើ​យោង​តាម​​​​លោក ជុំ ស៊ុនរី ​​​​​អ្នក​នាំ​​​​​​​​ពាក្យ​ក្រសួង​​នេះ​បាន​ថ្លែង​ទៅ​កាន់​ក្រុម​អ្នក​​​​​​យក​ព័ត៌មាន​ បន្ទាប់ពី​ជំនួប​រវាង​​មន្ត្រីទាំងពីរ​​ដើម្បី​ប្រារព្ធ​ថ្ងៃ​​កាន់​មុខ​តំណែង​​ចុង​ក្រោយ​​របស់​លោក ឌីណេស ប៉ាតណាអុីក។

នៅ​ពេល​​​​បែក​ធ្លាយ​ព័ត៌មាន​កាលពី​ឆ្នាំ​២០១២​ថា ក្រុម​ហ៊ុន​ឯកជន​មួយ​របស់​ឥណ្ឌា​ មាន​បំណង​​សាង​សង់ប្រាសាទ​​​ដ៏ធំស្កឹម​ស្កៃ​មួយ​ចម្លង​តាម​រចនាបថ​ប្រាសាទ​អង្គរវត្ត​ ដែល​​ជា​សំណង់​ល្បី​ល្បាញ​បំផុត​នៅ​​ក្នុង​ឧទ្យាន​​​បុរាណ​វិទ្យា​នា​សតវត្សរ៍​ទី​១២​​ក្នុង​​​ក្រុង​សៀម​រាប​នោះ កម្ពុជាបាន​​សម្ដែង​ការ​មិន​ពេញ​ចិត្ត​​ស្ទើរ​តែ​​ភ្លាមៗ​។

ចាប់​តាំងពី​ពេល​នោះ​មក ជំហរ​របស់​កម្ពុជាកាន់​តែ​រឹងមាំ​ឡើង​ ទោះបី​ជា​​ប្រទេស​ឥណ្ឌា​ ធានា​អះអាង​ថា ខ្លួន​នឹង​​កែប្រែ​ប្លង់​ដើម​ដើម្បី​​​ការ​ពារ​​​តំបន់​បេតិកភណ្ឌ​ពិភព​លោក​ដែល​ទទួល​ស្គាល់​ដោយ​អង្គ​ការ​យូណេស្កូ​មួយ​នេះ​។ ​កាល​ពី​មុន​​​ ប្រទេស​កម្ពុជា​ បាន​ស្នើ​ឲ្យ​ផ្អាក​ការ​សង​សង់​ប្រាសាទ​​នៅ​ក្នុង​ខេត្ត​ប៊ីហា (Bihar) ​នេះ​​ជា​បណ្ដោះ​អាសន្ន​ ​គឺ​​មិន​មែន​ឲ្យ​លុប​ចោល​ឡើយ​​។

​លោក ជុំ ស៊ុនរី ​​​​មាន​ប្រសាសន៍​ថា “​ឯក​ឧត្ដម​ ហោ ណាំហុង ​បាន​ស្នើ​ឲ្យ​រដ្ឋាភិបាល​ឥណ្ឌា​​​​ បញ្ឈប់​​​​​ក្រុមហ៊ុន​ទាំង​ស្រុង​​​​​​កុំ​ឲ្យ​សាង​សង់​ប្រាសាទ​នេះ ពីព្រោះ​ប្រាសាទ​អង្គរ​វត្ត​គឺ​ជា​និមិត្តរូប​ជាតិ​របស់​កម្ពុជា​”។ លោក​បាន​លើក​ឡើង​បន្ថែម​ទៀត​ថា ​ក្រៅ​ពី​ការ​ខ្វែង​គំនិត​គ្នា​​ជុំវិញ​គម្រោង​សាង​សង់​​​ប្រាសាទ​​នេះ ​​​​ទំនាក់​ទំនង​កម្ពុជា​-ឥណ្ឌា​ កាន់​តែ​​មាន​ភាព​ជិត​​ស្និទ្ធ​ខ្លាំង​ឡើង​។

ថ្លែង​តាម​ទូរស័ព្ទ​កាលពី​ម្សិលមិញ លោក ឌីណេស ប៉ាតណាអុីក ​បាន​​ទប់​ស្កាត់​​​​​ការ​ចុះ​ផ្សាយ​របស់​ប្រព័ន្ធ​ផ្សព្វ​ផ្សាយ​ឥណ្ឌា​ ដែល​បាន​លើក​ឡើង​ថា លោក​បាន​ពិភាក្សាគ្នា​​រួច​​ហើយ​​អំពី​លទ្ធភាព​​ដែលឥណ្ឌា នឹង​បញ្ជា​​ឲ្យ​ក្រុម​ហ៊ុនដែល​​សាង​សង់​ប្រាសាទ​នេះ​ បញ្ឈប់​​​ការ​សាង​សង់​។

លោក​​មាន​ប្រសាសន៍​ថា ​”​ខ្ញុំ​គិត​ថា ប្រាកដ​​​​ជា​មាន​បញ្ហា​ភាសា​​ជា​មិន​ខាន”។ លោក​បាន​បន្ត​ថា ​​ក្នុង​នាម​​ប្រទេស​ប្រជាធិបតេយ្យ​ មិន​អាច​អន្តរាគមន៍​​​បាន​​ឡើយ​ពាក់​ព័ន្ធ​​សិទ្ធិ​របស់​ក្រុម​ហ៊ុន​ក្នុង​ការ​សាង​សង់​ប្រាសាទ​​ ទោះបី​ជា​​​​អាច​ធានា​បាន​ថា ខ្លួន​នឹង​​​មិន​ធ្វើ​ឲ្យ​​​​មិត្ត​របស់​ខ្លួន​​អាក់​អន់​ស្រពន់​ចិត្ត​​​ក៏ដោយ​។

លោក​បាន​ថ្លែង​ថា ”​យើង​បាន​សន្យា​នឹង​កម្ពុជា​ ហើយ​ថា ​​ប្រាសាទ​នេះ​នឹង​មិន​ចម្លង​តាម​​​​រចនាបថ​​ប្រាសាទ​អង្គរវត្ត​ឡើយ ព្រោះ​ប្រជា​​​​​​ពលរដ្ឋ​ខ្មែរ​ភាគ​​ច្រើន​​មាន​​ការ​ព្រួយបារម្ភ​ខ្លាំង​ពេក ដោយ​សារ​តែ​មាន​មនោសញ្ចេត​នា​​​​​ខ្លាំង​ចំពោះ​​​ប្រាសាទ​អង្គរវត្ត”។

​​​​​​​​​​​​​លោក​​​​​​មាន​ប្រសាសន៍​ទៀត​​ថា លោក​​​​​​​​រីក​រាយ​​​​ក្នុង​ការ​​​​​ដោះស្រាយ​បញ្ហា​​ប្រាសាទ​ដែល​​​​កើត​មាន​ជាថ្មី​នេះ​អំឡុង​ពេល​លោក​​កាន់​មុខ​តំណែង​។ “​កម្ពុជា ​គឺ​ជា​មិត្ត​របស់​យើង ​​​ហើយ​យើង​នឹង​មិន​អនុញ្ញាត​ឲ្យ​ស្ថានភាព​មួយ​​ដែល​កើត​ឡើង​ ធ្វើ​​ឲ្យ​​​ខូច​​មិត្ត​ភាព​​នោះ​ឡើយ​”។

ក្រៅ​ពី​បញ្ហា​ប្រាសាទ​​​​ដែល​គ្រោង​សាង​សង់​​​​​​ក្នុង​ខេត្ត​ប៊ីហា​នេះ លោក ហោ ណាំហុង ​​​និង​លោក ឌីណេស ប៉ាតណាអុីក ក៏​បាន​ពិភាក្សា​​​​​​​​​គ្នា​ដែរ​​ដើម្បី​រិះរក​វិធី​​ធ្វើ​​យ៉ាង​ណា​ឲ្យ​ទំនាក់​ទំនង​​​​រវាង​ប្រទេស​ទាំង​ពីរ​​​កាន់​តែ​​ប្រសើរ​ឡើង​។

លោក ជុំ ស៊ុនរី ​បាន​មាន​ប្រសាសន៍​ថា “ឯក​​​អគ្គរដ្ឋ​ទូត​ឥណ្ឌា​ បាន​ត្រៀម​​​​​ទទួល​គណៈ​ប្រតិភូ​​មួយ​​ក្រុម​​មកពី​ក្រសួង​ទេសចរណ៍​​​ ដើម្បី​ទៅ​ធ្វើ​ទស្សនកិច្ច​​ក្នុង​ប្រទេស​ឥណ្ឌា នៅ​ឆ្នាំ​ក្រោយ”។ លោក​បាន​បន្ថែម​ថា ​កាល​ពី​ឆ្នាំ​មុន ​ភ្ញៀវ​ទេសចរ​ឥណ្ឌា​​ ដែល​មក​លេង​កម្ពុជា ​មាន​ចំនួន​២៨.០០០​នាក់​។ “​ឯក​ឧត្ដម​ ហោ ណាំហុង ក៏​បាន​ស្នើ​ឲ្យ​មាន​ជើង​ហោះ​ហើរ​ផ្ទាល់​​ [រវាង​កម្ពុជា​ និង​​ឥណ្ឌា​] ដែរ ពីព្រោះ​​​​​​​​​​​លោក​ជឿ​ថា ​ប្រជាជន​ឥណ្ឌា​ កាន់​តែ​ច្រើន​នឹង​​​​​មក​លេង​កម្ពុជា”៕ សុខុម​

© 2015, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.