ក្រុមប្រឹក្សាធម្មនុញ្ញប្រកាសថ្ងៃនេះថា ច្បាប់អង្គការក្រៅរដ្ឋាភិបាលដែលអនុមតិដោយសភានិងព្រឹទ្ធសភាកាលពីខែមុន ថាស្របនឹងរដ្ឋធម្មនុញ្ញ។
សេចក្តីសម្រេចថ្ងៃនេះដែលចុះហត្ថលេខាដោយលោក ឯក សំអុល ប្រធានក្រុមប្រឹក្សាធម្មនុញ្ញ និយាយថា “ក្រុមប្រឹក្សាធម្មនុញ្ញសម្រេច មាត្រា១ ច្បាប់ស្តីពីសមាគមនិងអង្គការក្រៅរដ្ឋាភិបាលដែលរដ្ឋសភាអនុមតិ និងព្រឹទ្ធសភាបានពិនិត្យនិងឲ្យយោបល់ឯកភាពទាំងស្រុងលើទម្រង់និងគតិច្បាប់ ត្រូវបានប្រកាសថា ស្របនឹងរដ្ឋធម្មនុញ្ញ”។
រដ្ឋសភាបានអនុម័តច្បាប់អង្គការមិនមែនរដ្ឋាភិបាលកាលពីថ្ងៃទី១៣ ខែកក្កដា ហើយព្រឹទ្ធសភាក៏បានអនុម័តដែរកាលពីថ្ងៃទី២៤ ខែកក្កដា។ ទាំងពីរលើក សមាជិកសភាគណបក្សប្រជាជនកម្ពុជាបានអនុម័តច្បាប់នោះ ទោះបីជាមានការធ្វើពហិការរបស់គណបក្សប្រឆាំងដែលជំទាស់នឹងច្បាប់នេះក៏ដោយ។
លោក ព្រហ្ម ញាណវិចិត្រ អ្នកនាំពាក្យនិងជាសមាជិកក្រុមប្រឹក្សាធម្មនុញ្ញ បានមានប្រសាសន៍ថាក្រុមប្រឹក្សាធម្មនុញ្ញបានអនុមតិជាឯកច្ឆន្ទនូវច្បាប់អង្គការក្រៅរដ្ឋាភិបាល។
លោក ញាណវិចិត្រ បានមានប្រសាសន៍ថា “យើងរៀបចំបញ្ជូនទៅស្ថាប័នសភា ព្រឹទ្ធសភា ជាពិសេសព្រះករុណា លោកនឹងរៀបចំឡាយព្រហស្តលេខា។ យើងខំធ្វើម៉េចឲ្យទាន់ទៅស្ថាប័នទាំងបីនិងរៀបចំទៅរដ្ឋាភិបាលទៀត ហើយស្អែកនឹងទៅដល់ហើយ”។
កាលពីថ្ងៃទី៣០ ខែកក្កដា សមាជិកសភាគណបក្សសង្គ្រោះជាតិ១៣រូបបានផ្ញើលិខិតជូនលោក ឯក សំអុលប្រធានក្រុមប្រឹក្សាធម្មនុញ្ញ ក្នុងការខិតខំប្រឹងប្រែងចុងក្រោយ ដើម្បីចង់ឃើញសេចក្តីព្រាងច្បាប់នេះត្រូវបានច្រានចោល៕