មន្ត្រីនគរបាលម្នាក់បានឲ្យដឹងថា បុរសថៃម្នាក់បានស្លាប់នៅខេត្តបៃ៉លិន កាលពីម្សិលមិញ បន្ទាប់ពីបានលោតចេញពីរថយន្តកំពុងបើក ដែលដឹកគាត់ទៅស្នងការដ្ឋាននគរបាលខេត្តដើម្បីសាកសួរ រួមជាមួយជនជាតិថៃ១៥នាក់ផ្សេងទៀត និងជនជាតិម៉ាឡេស៊ីម្នាក់។
លោក សាញ់ ណាំ ស្នងការរងខេត្តនេះបានលើកឡើងថា នគរបាលអន្តោប្រវេសន៍បានប្រមូលជនបរទេស១៧នាក់ក្នុងឃុំស្ទឹងកាច់ ស្រុកសាលាក្រៅ ជាកន្លែងដែលពួកគេរស់នៅដោយខុសច្បាប់។ ប៉ុន្តែ នៅតាមផ្លូវធ្វើដំណើរទៅស្នងការដ្ឋាននគរបាល ម៉ាទីន ពុំ ម៉ានុប អាយុ៥៩ឆ្នាំ បានលោតចេញពីរថយន្ត។ លោក បានមានប្រសាសន៍ថា “គេបានបញ្ជូនជននេះទៅមន្ទីរពេទ្យអង្អែកខេត្តប៉ៃលិនហើយគាត់បានស្លាប់នៅទីនោះដោយសារតែរបួសធ្ងន់។ ខ្ញុំមិនដឹងថា ហេតុអ្វីបានជាគាត់លោតចេញទេ”។ លោកបានបន្ថែមថា ម៉ាទីនពុំ ម៉ានុប ប្រហែលជាខ្លាចគេចាប់ខ្លួន។
លោក ណាំ លើកឡើងទៀតថា អាជ្ញាធរថៃកំពុងធ្វើដំណើរមកប្រទេសកម្ពុជាដើម្បីទទួលយកសពនេះកាលពីល្ងាចម្សិលមិញ។ លោកបានមានប្រសាសន៍ថា ”នេះមិនមែនជាកំហុសរបស់យើងទេ ពីព្រោះគាត់បានលោតចេញដោយខ្លួនឯង”។
លោកបានបន្ថែមថា ការប្រមូលជនជាតិថៃនិងជនជាតិម៉ាឡេស៊ីនេះ ត្រូវបានធ្វើឡើងជាផ្នែកមួយនៃការធ្វើជំរឿនជនបរទេសនៅខេត្តប៉ៃលិន ដែលបានចាប់ផ្តើមកាលពីថ្ងៃទី៥ ខែសីហា៕ និត