បន្ទាប់ពីរយៈពេលជិតបីខែនៃការធ្វើយុទ្ធនាការរបស់គណបក្សប្រឆាំង ឲ្យរដ្ឋាភិបាលបញ្ចេញផែនទីដែលខ្លួនប្រើដើម្បីកំណត់ព្រំដែនប្រទេសកម្ពុជាមក អ្នកសិក្សាស្រាវជ្រាវមួយរូបដែលមានភារកិច្ចសិក្សាស្រាវជ្រាវអំពីភាពតានតឹងក្នុងពេលបច្ចុប្បន្នពាក់ព័ន្ធបញ្ហាព្រំដែនបាននិយាយកាលពីម្សិលមិញថា ផែនទីរបស់រដ្ឋាភិបាលដូចគ្នាបេះបិទទៅនឹងផែនទីដែលគណបក្សប្រឆាំងមាន។
រដ្ឋាភិបាលបានបដិសេធមិនបង្ហាញផែនទីដែលខ្លួនប្រើដើម្បីកំណត់ព្រំដែនជាសាធារណៈឡើយ ចាប់តាំងពីបញ្ហានេះបានកើតឡើងកាលពីខែមិថុនាមក ដោយធ្វើឲ្យមានការចោទប្រកាន់ពីសំណាក់គណបក្សប្រឆាំងថា រដ្ឋាភិបាលប្រើផែនទីខុសច្បាប់ដើម្បីប្រគល់ដីទៅឲ្យវៀតណាម។ ក៏ប៉ុន្តែ កាលពីសប្តាហ៍មុនរដ្ឋាភិបាលបានប្រគល់ផែនទីរបស់ខ្លួនឲ្យលោក សុខ ទូច អ្នកសិក្សាស្រាវជ្រាវនៅរាជបណ្ឌិត្យសភាកម្ពុជា ដោយស្នើឲ្យលោកជួយដោះស្រាយបញ្ហាព្រំដែននេះ។
លោក សុខ ទូច ដែលជាប្រធានវិទ្យាស្ថានទំនាក់ទំនងអន្តរជាតិនៅរាជបណ្ឌិត្យសភាបាននិយាយតាមទូរស័ព្ទកាលពីម្សិលមិញថា ផែនទីរបស់រដ្ឋាភិបាលដូចគ្នាបេះបិទទៅនឹងផែនទីរបស់គណបក្សសង្គ្រោះជាតិ។
លោកបានមានប្រសាសន៍ថា “គ្រប់ផែនទីដែលខ្ញុំទទួលបាន ពីរដ្ឋាភិបាល ពីគណបក្សសង្គ្រោះជាតិ ពីអាមេរិក និងបារាំង គឺដូចគ្នាទាំងអស់ លើកលែងតែផែនទីដែលអង្គការសហប្រជាជាតិបញ្ជូនមកឲ្យ។ ខ្ញុំនឹងធ្វើសន្និសីទសារព័ត៌មានមួយនៅថ្ងៃសុក្រ…ដូច្នេះអ្នកគ្រប់គ្នាអាចមើលបាន”។
រដ្ឋធម្មនុញ្ញចែងថា មានតែផែនទីព្រំដែនគូសដោយបារាំងនៅចន្លោះឆ្នាំ១៩៣៣ និងឆ្នាំ១៩៥៣ ខ្នាត១លើ១០០.០០០ និងតម្កល់នៅអង្គការសហប្រជាជាតិដោយសម្តេច នរោត្តម សីហនុ ក្នុងទសវត្សរ៍ឆ្នាំ១៩៦០ប៉ុណ្ណោះ ដែលអាចយកមកប្រើដើម្បីកំណត់ព្រំដែន។
កាលពីខែមុន លោកនាយករដ្ឋមន្ត្រី ហ៊ុន សែន បានសរសេរលិខិតទៅអង្គការសហប្រជាជាតិស្នើសុំផែនទី ប៉ុន្តែ អង្គការសហប្រជាជាតិបានឆ្លើយតបវិញកាលពីសប្តាហ៍មុនដោយនិយាយថា ខ្លួនមិនអាចរកផែនទីទាំងនោះឃើញទេ។ ជាជំនួសវិញ អង្គការសហប្រជាជាតិបានផ្តល់ផែនទីព្រំដែនដែលបញ្ជូនមកដោយសម្តេច នរោត្តម សីហនុ ជាផ្នែកមួយនៃបណ្តឹងទាក់ទិននឹងការទម្លាក់គ្រាប់បែកដោយអាមេរិកអំឡុងសង្គ្រាមឥណ្ឌូចិនលើកទី២។
លោក អ៊ូ ច័ន្ទឫទ្ធិ អ្នកនាំពាក្យស្តីទីគណបក្សសង្គ្រោះជាតិ ដែលបានគំរាមថា នឹងប្រើផែនទី និងបច្ចេកវិទ្យាជីភីអេស ដើម្បីពិនិត្យផ្ទៀងផ្ទាត់ព្រំដែនប្រវែង១.២២៨គីឡូម៉ែត្រជាមួយប្រទេសវៀតណាម បានលើកឡើងកាលពីម្សិលមិញថា គណបក្សប្រឆាំងនឹងរក្សានូវការវិនិច្ឆ័យលើការវាយតម្លៃរបស់លោក សុខ ទូច រហូតដល់ខ្លួនបានវិភាគផែនទីទាំងនោះដោយខ្លួនឯង។
លោកបានមានប្រសាសន៍ថា ”គណបក្សសង្គ្រោះជាតិចង់បានផែនទីពីភាគីផ្សេងៗ ក៏ដូចជាពីភាគីរដ្ឋាភិបាលដែរ និងផែនទីដែលរដ្ឋាភិបាលបានទទួលពីអង្គការសហប្រជាជាតិ ដើម្បីធ្វើការសិក្សាស្រាវជ្រាវដែរ មុនពេលយើងសន្និដ្ឋាន ថាតើផែនទីទាំងនោះដូចគ្នា ឬយ៉ាងណា”។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានមានប្រសាសន៍ថា លោកជឿជាក់ថា ការរកឃើញដំបូងរបស់លោក សុខ ទូច បានបង្ហាញឲ្យឃើញថា រដ្ឋាភិបាលត្រឹមត្រូវ។
លោកបានមានប្រសាសន៍ថា “ការពិនិត្យផ្ទៀងផ្ទាត់ពីប្រភពចំនួនបួន គឺរដ្ឋាភិបាល គណបក្សសង្គ្រោះជាតិ បណ្ណាល័យបារាំងនិងបណ្ណាល័យសភាអាមេរិក បង្ហាញថា ផែនទីទាំងនោះមានលក្ខណៈដូចគ្នា ដូច្នេះនេះជារឿងល្អមួយដើម្បីជម្រះការយល់ច្រឡំក្នុងចំណោមសាធារណជន និងអ្នកដែលបានចោទប្រកាន់រដ្ឋាភិបាលថា ប្រើផែនទីក្លែងក្លាយ។ផែនទីរបស់រដ្ឋាភិបាល គឺដូចគ្នានឹងផែនទីរបស់អ្នកចោទប្រកាន់ ដូច្នេះវានឹងជួយលុបបំបាត់ការចោទប្រកាន់មិនត្រឹមត្រូវបែបនេះលើរដ្ឋាភិបាល”៕ និត