31 C
Phnom Penh

ស្ថាប័ន​រៀបចំ​ការ​បោះ​ឆ្នោត ​គ្រោងធ្វើ​​​ការ​​​​ជ្រើស​រើស​មន្ត្រី​រដ្ឋបាល​ថ្មី​

ដោយ ឌឹ ខេមបូឌា ដេលី

បទវិភាគ

អនុក្រឹត្យ​ដែល​​កំណត់​​មុខ​ងារ​ផ្ទៃ​ក្នុង​របស់​គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប.) ថ្មី ត្រូវ​បាន​ចុះ​ហត្ថលេខា​ដោយ​លោក​នាយក​រដ្ឋមន្ត្រី ហ៊ុន សែន ​កាលពី​ថ្ងៃ​ច័ន្ទ ​​​បើក​ផ្លូវឲ្យ​​ស្ថាប័ន​​រៀបចំ​ការ​បោះ​ឆ្នោត​នេះ​​​ជ្រើសរើស​មន្ត្រី​រដ្ឋបាល​ថ្មី ហើយ​ចាប់​ផ្ដើម​រៀបចំ​ការ​បោះ​ឆ្នោត​ដោយខ្លួន​ឯង ដែល ​​គ្រោង​ធ្វើ​នៅ​ឆ្នាំ​២០១៧ និង​ឆ្នាំ​២០១៨។

គ.ជ.ប.​ថ្មី​នេះ​ដែល​ត្រូវ​បាន​បង្កើត​ឡើង​កាលពី​ខែ​មេសា ​ដើម្បី​ឆ្លើយ​តប​តាម​ការ​សន្យា​​ដ៏សំខាន់​ដែល​​គណបក្ស​ប្រជាជន​កម្ពុជា​​​​ បាន​ធ្វើ​ចំពោះ​គណបក្ស​សង្គ្រោះជាតិ​​នៅ​ក្នុង​កិច្ច​ព្រមព្រៀង​នយោបាយ​ ២២ កក្កដា ​​​ឆ្នាំ​ មុននោះ​​ បាន​​រក្សា​ទុក​បុគ្គលិក​រដ្ឋបាល​ចាស់​របស់​ គ.ជ.ប.​ ខណៈ​ដែល​រង់ចាំ​អនុក្រឹត្យ​នេះ​។

​លោក ហង្ស ពុទ្ធា អ្នក​នាំពាក្យ​​ គ.ជ.ប.​ បាន​មាន​ប្រសាសន៍​កាលពី​ម្សិលមិញ​ថា អនុក្រឹត្យ​ដែល​មាន​២៧​មាត្រានេះ​​ អនុញ្ញាត​ឲ្យ​ស្ថាប័ន​​​​បោះ​ឆ្នោត​ថ្មី​ដែល​មាន​ពីរ​គណបក្ស​​​ ជ្រើស​រើស​អគ្គលេខាធិការ​ដ្ឋាន​របស់​ខ្លួន​ផ្ទាល់ ​​ដែល​​បន្ទាប់​មក​នឹង​​ចាប់​ផ្ដើម​រៀបចំ​បញ្ជី​ឈ្មោះ​បោះ​ឆ្នោតនៅ​ទូទាំង​ប្រទេស និង​ចាត់ចែង​ថវិកា​របស់​ គ.ជ.ប.។

លោក ហង្ស ពុទ្ធា បាន​ថ្លែង​ថា “ខណៈ​ដែល ​​គ.ជ.ប.​ ទទួល​បាន​ឯកសារ​​​ផ្លូវ​ច្បាប់​ដែល​ចាំ​​​បាច់​​​​នៅក្នុង​ដៃ រួម​​​ទាំង​​​​ ព្រះរាជក្រឹត្យ​ និង​អនុ​​​ក្រឹត្យ​ហើយនោះ​ ឥឡូវ​នេះ​គ.ជ.ប.​កំពុង​ពិចារណា​ធ្វើ​សមាហរណកម្ម​​បុគ្គលិក​ជាប់​កិច្ចសន្យា​​ឲ្យ​ទៅ​ជា​​​មន្ត្រី​រាជការ​ស៊ីវិល​របស់​គ.ជ.ប.”។ ​​

អនុក្រឹត្យ​នេះ​ក៏​នឹង​អនុញ្ញាត​ឲ្យ​សមាជិក​គណៈកម្មការ​​គ.ជ.ប.​ទាំង​ប្រាំបួន​រូប​បោះ​ឆ្នោត​ជ្រើស​រើស​អ្នក​ជំនួស​លោក ទេព នីថា អគ្គលេខាធិការ​​របស់​ស្ថាប័ន​នេះ​យូរ​មក​ហើយ ដែល​លោក​មាន​ទំនាក់​ទំនង​ជា​មួយ​គណបក្ស​ប្រជាជន​កម្ពុជា​។ ប៉ុន្តែ​លោក ហង្ស ពុទ្ធា បាន​ថ្លែង​ថា ​តួនាទី​នេះ​គឺ​ពិត​ជា​តួនាទី​រដ្ឋបាលសុទ្ធសាធ​​។

​លោក​បានលើក​ឡើង​ថា “​​បើ​ទោះ​ជា​អគ្គលេខាធិការ​រូប​នេះ​ជា​ជំនួយ​ការ​​សំខាន់​ជូន​​គ.ជ.ប.​​ក៏ដោយ ក៏​មិន​មែន​មាន​ន័យ​ថា អគ្គលេខាធិការ​រូប​នេះ​​មាន​តួនាទី​ណាមួយ​​ ឬ​ក៏​សិទ្ធិ​ចូល​រួម​​​ក្នុង​ការ​ធ្វើ​សេចក្តី​សម្រេច​​​របស់​គ.ជ.ប.​ដែរ”។

លោក ទេព នីថា ដែល​ក្នុង​ទសវត្សរ៍​ឆ្នាំ​១៩៩០ បាន​បម្រើ​ការ​ងារ​​នៅក្នុង​​នាយក​​​ដ្ឋាន​ឃោសនាការ​​នៃ​សមាគម​យុវជន​កម្ពុជា ដែល​នៅ​ពេល​នោះ​គេ​ស្គាល់​ថា ជា​ក្រុម​យុវ​​​ ជន​​គណបក្ស​ប្រជាជន​កម្ពុជា​នោះ បាន​មាន​ប្រសាសន៍​ថា លោក​​នឹង​​ដាក់​​ពាក្យ​សម្រាប់​

តួនាទី​បច្ចុប្បន្ន​របស់​លោក​ម្តងទៀត។

លោក​បាន​មាន​ប្រសាសន៍​ថា “​ខ្ញុំ​​​ក៏​ដូច​អ្នក​រាល់​គ្នា​ដែរ​ ប្រសិន​បើ​​មាន​ឱកាស​ យើង​ត្រូវ​ក្ដាប់​វា​ឲ្យ​បាន​”។

​លោក​បាន​បន្ថែម​ថា “​ទុក​ឲ្យ​សមាជិក​​គ.ជ.ប.​ សម្រេច​ពី​ជោគវាសនា​របស់​ខ្ញុំ​ចុះ។ ក្នុង​ករណី​ដែល​​​អ្នក​​ចាកចេញពី​តួនាទី​​ ប៉ុន្តែ​អ្នក​នៅ​តែ​មាន​សិទ្ធិ​ឈរ​ឈ្មោះ​ម្ដង​ទៀតនោះ​ ហេតុ​អ្វី​បាន​ជា​មិនសាកល្បង?”។

លោក គល់ បញ្ញា នាយក​គណៈកម្មាធិការ​​ដើម្បី​​ការ​បោះ​ឆ្នោត​ដោយ​សេរី និង​យុត្តិធម៌ បាន​មាន​ប្រសាសន៍​កាលពី​ម្សិលមិញ​ថា អនុក្រឹត្យ​ដែល​ចុះ​ហត្ថលេខា​ដោយ​លោក ហ៊ុន សែន ​មិន​មែន​មាត្រា​ណា​ដែល​រារាំង​​ដល់​ឯករាជភាព​​​​​របស់​ស្ថាប័ន​បោះ​ឆ្នោត​ឡើយ ប៉ុន្តែ​​បាន​សួរពី​​​មូល​​​ហេតុ​​​ដែល​​​​​លោក ហ៊ុន សែន​ យល់​​​ព្រម​​​។

លោក គល់ បញ្ញា បាន​មាន​ប្រសាសន៍​ថា “​ប្រសិន​បើ​គ.ជ.ប.​ចង់​ផ្លាស់​ប្ដូរ​​ ពួកគេ​​នឹង​​​ត្រូវ​ការ​ស្ថាប័ន​នីតិប្រតិបត្តិ​យល់ព្រម​ជាមួយ​ការ​ធ្វើ​វិសោធនកម្មនោះ​​​​ នេះ​គឺ​ជា​កង្វល់​។ បញ្ហា​​​​​​​ នេះ​ត្រូវ​បាន​រៀបរាប់​លម្អិត​​ ហើយ​នៅ​ពេល ​និយាយ​ដល់​​ការ​គ្រប់គ្រង​​ ​គួរ​តែ​ផ្តល់​​​​ឱកាស​ឲ្យ​គ.ជ.ប.​រៀបចំ​​ចុះ​”។

តម្រូវ​ការ​​ដែល​លោក​ ហ៊ុន សែន ចេញ​​អនុក្រឹត្យ​​​កំណត់​​​គ.ជ.ប.​​គឺ​​​ចំណុច​មួយ​ក្នុង​ចំណោម​ចំណុច​​ជាច្រើន​​អំឡុង​ការ​ពិភាក្សា​​ក្នុងការ​សរសេរ​ច្បាប់​គណៈកម្មាធិការ​ជាតិ​រៀបចំ​ការ​បោះ​ឆ្នោត ដែល​ទីបំផុត​​គណបក្ស​សង្គ្រោះ​ជាតិ​ទទួល​ស្គាល់​។

លោក គល់ បញ្ញា បាន​មាន​ប្រសាសន៍​ថា ​”​អនុក្រឹត្យ​នេះ​​គឺ​ជា​អ្វី​ដែល​យើង​​បាន​លើក​ឡើង​​ចាប់​តាំងពី​ច្បាប់​នេះ​ត្រូវ​បាន​អនុម័ត។ ក្នុងនាម​ជា​ស្ថាប័ន​ឯករាជ្យ និង​ស្ថាប័ន​​​ធម្មនុញ្ញ​​ គ.ជ.ប.​គួរ​តែ​មាន​​អំណាច​​ធ្វើ​ការ​កំណត់​ដោយ​​​​ខ្លួន​ឯង​ក្នុងករណី​ចាំបាច់​។ យើង​មិន​ដឹង​​ថា​នឹងមាន​អ្វី​​កើត​ឡើង​ឡើយ បើ​​​បញ្ហា​ទាំង​​​នេះ​​​មិន​ទាន់​ក្លាយ​ជា​ផែន​ការ​ ហើយ​គ.ជ.ប.​ចាំ​​​បាច់ត្រូវ​ធ្វើ​ការ​ផ្លាស់​ប្ដូរ”៕សារុន (រាយការណ៍​បន្ថែម​ដោយ Alex Willemyns)​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស