យោងតាមមន្ត្រីរដ្ឋាភិបាលបានឲ្យដឹងថា កាលពីថ្ងៃពុធព្រះមហាក្សត្រ នរោត្តម សីហមុនី បានឡាយព្រះហស្តលេខាលើច្បាប់ស្ដីពីអង្គការមិនមែនរដ្ឋាភិបាល ដោយធ្វើឲ្យច្បាប់នេះដែលអន្តរជាតិរិះគន់ថា ជាការគំរាមកំហែងដ៏ធ្ងន់ធ្ងរចំពោះសិទ្ធិសេរីភាពក្នុងការបញ្ចេញមតិ និងសមាគមនៅកម្ពុជាចូលជាធរមាន។
ច្បាប់ស្ដីពីសមាគម និងអង្គការមិនមែនរដ្ឋាភិបាលនេះ តម្រូវឲ្យអង្គការមិនមែនរដ្ឋាភិបាល និងសមាគមទាំងអស់ចុះបញ្ជីជាមួយរដ្ឋាភិបាល ហើយដាក់ជូនរបាយការណ៍ប្រចាំឆ្នាំស្ដីពីហិរញ្ញវត្ថុ និងសកម្មភាពរបស់ខ្លួន។ វាផ្ដល់អំណាចដល់ក្រសួងក្នុងការបិទអង្គការដែលមិនរក្សាអព្យាក្រឹតភាពនយោបាយ ឬធ្វើឲ្យប៉ះពាល់ដល់ប្រពៃណីកម្ពុជា។
ប៉ុន្តែលោក ឈឹម ផលវរុណ អនុប្រធានក្រុមប្រឹក្សាអ្នកច្បាប់នៃទីស្ដីការគណៈរដ្ឋមន្ត្រីដែលបញ្ចេញច្បាប់ចម្លងផ្លូវការនៃច្បាប់នេះ អមដោយព្រះរាជក្រឹត្យកាលពីម្សិលមិញ បានបញ្ជាក់អំពីការឡាយព្រះហស្តលេខារបស់ព្រះមហាក្សត្រ។
លោកមានប្រសាសន៍ថា “នៅពេលព្រះរាជក្រឹត្យត្រូវបានផ្សព្វផ្សាយជាសាធារណៈ វាមានន័យថា ទ្រង់ [ព្រះមហាក្សត្រ] បានឡាយព្រះហស្តលេខាលើច្បាប់នេះហើយ”។ លោកបានបន្ថែមថា ព្រះមហាក្សត្របានឡាយព្រះហស្តលេខាលើច្បាប់នេះកាលពីថ្ងៃពុធ។
រដ្ឋាភិបាលអះអាងថា ខ្លួនត្រូវការច្បាប់នេះដើម្បីប្រយុទ្ធប្រឆាំងនឹងការលាងលុយ និងទប់ស្កាត់កុំឲ្យហិរញ្ញប្បទានភេរវកម្មហូរចូលមកក្នុងប្រទេសតាមរយៈអង្គការមិនមែនរដ្ឋាភិបាល។
បណ្តាអ្នករិះគន់បានចាត់ទុកទឡ្ហីករណ៍បែបនេះថា មានពុតត្បុត ហើយថា រដ្ឋាភិបាលមានច្បាប់ទាំងអស់ដែលខ្លួនត្រូវការដើម្បីប្រយុទ្ធប្រឆាំងនឹងការគំរាមកំហែងបែបនេះហើយ។ ពួកគេខ្លាចក្រែងគណបក្សប្រជាជនកម្ពុជាមានបំណងប្រើប្រាស់បទប្បញ្ញត្តិមិនច្បាស់លាស់នៅក្នុងច្បាប់នេះ ដើម្បីបិទអង្គការមួយចំនួនដែលរិះគន់រដ្ឋាភិបាលខ្លាំងៗ។
លោក ហ្វីល រ៉ូបឺតសុន អនុប្រធានអង្គការឃ្លាំមើលសិទ្ធិមនុស្សប្រចាំនៅតំបន់អាស៊ីបានលើកឡើងនៅក្នុងសេចក្ដីថ្លែងការណ៍កាលពីម្សិលមិញថា “សូមកុំចាញ់ល្បិចកល។ ការដែលជំរុញឲ្យច្បាប់ស្ដីពីអង្គការមិនមែនរដ្ឋាភិបាលនេះក្លាយជាផ្លូវការ មានន័យថា ឥឡូវនេះ លោកនាយករដ្ឋមន្ត្រី ហ៊ុន សែន មានពូថៅនៅក្នុងដៃដើម្បីវាយប្រហារអង្គការប្រឆាំងអំពើពុករលួយ និងអង្គការសិទ្ធិមនុស្សផ្សេងៗដែលបាននិងកំពុងការពារសហគមន៍កម្ពុជា និងរាយការណ៍អំពីគម្រោងពុករលួយរបស់លោកជាច្រើនឆ្នាំមកនេះ”។
លោកស្រី ប្រ៊ីតធីស អេដមែន ប្រធានកម្មវិធីអាស៊ីអាគ្នេយ៍នៃអង្គការ ក្រុមអ្នកច្បាប់ការពារសិទ្ធិជនស៊ីវិល (Civil Rights Defender) ដែលមានមូលដ្ឋាននៅក្នុងទីក្រុងស្តុកខុម ក៏បានរិះគន់ច្បាប់នេះ[ដែលអង្គការសិទ្ធិមនុស្សក្នុងស្រុកចាត់ទុកថា ផ្ទុយនឹងរដ្ឋធម្មនុញ្ញ] ដូចលោក ហ្វីល រ៉ូបឺតសុន ដែរ។
លោកស្រីបានលើកឡើងនៅក្នុងសេចក្ដីថ្លែងការណ៍មួយថា ”ច្បាប់ដ៏តឹងរ៉ឹងនេះគឺជាការគំរាមកំហែងយ៉ាងពិតប្រាកដដល់អង្គការសង្គមស៊ីវិលនៅកម្ពុជា។ សហគមន៍អន្តរជាតិត្រូវខិតខំបន្តទៀតដើម្បីជំទាស់នឹងច្បាប់នេះ ហើយឃ្លាំមើលការអនុវត្តដែលអាចនឹងមានការរំលោភបំពាន”៕ ស៊ុយឈាង