35 C
Phnom Penh

សមាជិក​​​សភា​​​​​​​​​គណបក្ស​​​ប្រឆាំង​​​បដិសេធ​​​ថា មិន​​​បាន​​​កេង​​​ប្រវ័ញ្ច​​​ប្រាក់​​​

ដោយ ឌឹ ខេមបូឌា ដេលី

បទវិភាគ

លោក រៀល ខេមរិន្ទ្រ សមាជិក​សភា​គណ​​​បក្ស​ប្រឆាំង​បាន​សរសេរ​លិខិត​​ផ្ញើ​​​ជូន​​​​អង្គភាព​​​​​​​ប្រឆាំង​អំពើពុករលួយ (ACU) ដោយ​​​បដិសេធ​​​​​​​ការ​ចោទ​ប្រកាន់​ដែល​ថា លោក​កេង​ប្រវ័ញ្ច​​​​​​​​​​ភាគ​ច្រើន​នៃ​ប្រាក់​​៥៥.០០០​ដុល្លារ​​ ដែល​តាម​ចោទ​ថា លោក​បាន​រៃអង្គាស​​ដើម្បី​​​​ចំណាយ​សម្រាប់​​​ដំណើរ​ទៅ​ពិនិត្យ​ព្រំដែន​ជាប់​​ប្រទេស​វៀតណាម​។

កាលពី​ថ្ងៃ​​​ទី​៣១ ខែ​កក្កដា មិន​ដល់​២​សប្ដាហ៍​​​​​​​ផង​បន្ទាប់ពី​លោក រៀល ខេមរិន្ទ្រ បាន​ដឹក​​​នាំ​​អ្នក​គាំទ្រ​ប្រហែល​២.៥០០​នាក់​ទៅ​ពិនិត្យ​មើល​ការ​រំលោភ​បំពាន​​ព្រំដែន​ពី​សំណាក់​វៀតណាម​នៅ​ក្នុង​ខេត្ត​ស្វាយរៀង លោក ឱម យ៉ិនទៀង ប្រធាន​ ACU បាន​សរសេរ​លិខិត​​​​​​​ផ្ញើ​​​ជូន​សមាជិក​សភា​គណបក្ស​សង្គ្រោះ​​​​​​​​​ជាតិ​រូប​នេះ ដោយ​ស្នើ​​​​សុំ​​​ឲ្យ​លោក​ឆ្លើយ​តប​ចំពោះ​​​​​​​​​​ការ​អះអាង​ដែល​ថា លោក​បាន​​កេង​​​​​​ប្រវ័ញ្ច​ប្រាក់​នេះ ដើម្បី​ប្រើ​ប្រាស់​ផ្ទាល់​ខ្លួន។

នៅ​ក្នុង​​​​លិខិត​​មួយ​ច្បាប់​​ផ្ញើ​​​ជូន​កាលពី​ថ្ងៃ​សុក្រ​ ហើយ​​​ទទួល​បាន​កាលពី​ម្សិលមិញ ​លោក រៀល ខេមរិន្ទ្រ ​​ដែល​បច្ចុប្បន្ន​នេះ​​ស្ថិត​​​​​​​នៅ​សហរដ្ឋ​​​អាមេរិក​នោះ​បាន​បដិសេធ​ការ​ចោទ​ប្រកាន់​ដែល​ថា លោក​​បាន​រៃអង្គាស​ប្រាក់​​​៥៥.០០០​ដុល្លារ​ ហើយ​ថា លោក​​បាន​​យក​​ប្រាក់​ទាំង​នេះ​​ដើម្បី​ប្រើ​ប្រាស់​ផ្ទាល់​ខ្លួន ដោយ​លើក​ឡើង​ថា ​ពួកគេ​​មាន​បំណង​ដើម្បី​​​​​​​​បង្ខូច​​​​កេរ្តិ៍​ឈ្មោះ​របស់​លោក​។

លោក​បាន​មាន​ប្រសាសន៍​ថា “​ខ្ញុំ​សូម​ជម្រាប​​​​​​​ឯក​ឧត្ដម​ថា ខ្ញុំ​​មិន​បាន​ទទួល ​​ឬ​កេងប្រវ័ញ្ច​ប្រាក់​​​​​​​​​​ចំនួន​រាប់​ម៉ឺន​ដុល្លារ​ដែល​​​ប្រើ​ប្រាស់​​​ក្នុង​ការ​​​​​​​ធ្វើ​ដំណើរ​ទៅ​ពិនិត្យ​មើល​បង្គោល​ព្រំដែន​​​​​​​​​​​នៅ​តាម​ព្រំដែន​កម្ពុជា-វៀតណាម ដូច​ACU​​​​​​បាន​ចោទ​ប្រកាន់​នោះ​ឡើយ​”។

លោក រៀល ខេមរិន្ទ្រ បាន​ថ្លែង​ថា “​ការ​ចោទ​ប្រកាន់​​នោះ​ធ្វើ​ឡើង​​ដើម្បី​​​បង្ខូច​កេរ្តិ៍​ឈ្មោះ​​ខ្ញុំ​។ ខ្ញុំ​បាន​ទទួល​ប្រាក់​ពី​សប្បុរស​ជន​​ទាំង​ក្នុង​ និង​ក្រៅ​ប្រទេស​​សរុប​ចំនួន​២០.៧៥០​​​​​​​ដុល្លារ​​​សម្រាប់​​​​ប្រើ​​​ក្នុង​​​ការ​​​ធ្វើ​ដំណើរ​ទៅ​ពិនិត្យ​​​​មើល​បង្គោល​ព្រំដែន​​”។

លោក​​​លើក​ឡើង​ថា “​​ថវិកា​នេះ​​​​ចំណាយ​ក្នុង​​​ការ​​​​ជួល​រថយន្ត​​ និង​ទិញ​ទង់ជាតិ​​ ម្ហូប​អាហារ​ ​​​​​​និង​សម្ភារ​ផ្សេងទៀត​ ហើយ​ថវិកា​នោះ​ត្រូវ​បាន​​គ្រប់គ្រង​ដោយ​ក្រុម​ការ​ងារ​គណបក្ស​សង្គ្រោះ​ជាតិ​​”។

ដោយ​សំដៅ​ដល់​​ពាក្យ​បណ្ដឹង​ចំនួន​បី​​​ដែល​ ACU បាន​លើក​ឡើង​ថា ខ្លួន​ទទួល​​​បាន​​​ទាក់​​​ទង​​​នឹង​ការ​កេងប្រវ័ញ្ច​យក​ប្រាក់​នោះ​ ​លោក​បាន​បន្ថែម​ថា ​”​ខ្ញុំ​សូម​ស្នើ​ឲ្យ ACU… ស្វែង​រក​មនុស្ស​អាក្រក់​​ដែល​បាន​​​ព្យាយាម​បង្ខូច​កេរ្តិ៍​ឈ្មោះ​ខ្ញុំ”។

លោក ឱម យ៉ិនទៀង បាន​មាន​ប្រសាសន៍​​​​​​​កាលពី​ម្សិលមិញ​ថា លោក​មិន​ទាន់​បាន​ឃើញ​​​​​​​លិខិត​របស់​លោក រៀល ខេមរិន្ទ្រ នៅ​ឡើយ​ទេ ហើយ​បាន​បដិសេធ​​មិន​ធ្វើ​អត្ថាធិប្បាយ​ថា​តើ​ ACU នឹង​ស៊ើប​​​អង្កេត​ការ​អះអាង​​ប្រឆាំង​​​​​​​សមាជិក​សភា​រូប​នេះ​ឬ​យ៉ាង​ណា​នោះ​ឡើយ។

លោក ឱម យ៉ិនទៀង បាន​​​​​​​មាន​​​ប្រសាសន៍​​​​​​​​​​​​​បន្ថែម​​​ថា “​លោក​​​​​​​​​​អ្នក​គួរ​ស្វែង​យល់​ពី​ច្បាប់ ពីព្រោះ​ឥឡូវ​នេះ​​វា​មិនមែន​ជា​ដំណាក់​កាល​​​​​​​​សម្រាប់​ការ​ស៊ើប​​​អង្កេត​ឡើយ។ យើង​នឹង​ធ្វើ​ការ​ស៊ើបអង្កេត​លុះ​ណា​តែ​យើង​ទទួល​បាន​ភ័ស្តុ​តាង​បន្ថែម​ទៀត​។

​លោក​បាន​បន្ថែម​ថា “​នៅ​ពេល​នេះ យើង​​​​​​​​​និយាយ​​​អំពី​​​ការ​​​ប្រមូល​ព័ត៌មាន។ យើង​កំពុង​​​ធ្វើ​ការ​​​លើ​​​រឿង​​​នេះ​​​ ហើយ​អ្នក​​​បែរ​​​ជា​​​សួរ​ខ្ញុំ​រឿង​​​នោះ​​​​​​ទៅវិញ​​​។ នោះ​មិន​មែន​ជា​ការ​​​​​​​ត្រឹម​​​​​​​ត្រូវ​ឡើយ សូម​ពិនិត្យ​មើល​ច្បាប់ ​បើ​មិន​ដូច្នោះ​ទេ សំណួរ​នេះ​គឺ​ជា​ការ​បង្ក​ហេតុ​ហើយ​”៕ សារុន​​​​​​​         

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស