អតីតអគ្គកុងស៊ុលរងរបស់ប្រទេសកម្ពុជាប្រចាំក្រុងហូជីមិញបានបដិសេធថាមិនបានក្លែងឯកសារដើម្បីជួយក្រុមហ៊ុនឯកជនមួយរត់ពន្ធឈើប្រណិតចូលប្រទេសវៀតណាម នៅថ្ងៃទី១នៃការកាត់ក្តីរូបលោក នៅតុលាការក្រុងភ្នំពេញកាលពីថ្ងៃច័ន្ទ។
លោក តាំង សុខងី អាយុ៣៨ឆ្នាំ ត្រូវបានចាប់ខ្លួននៅភោជនីយដ្ឋានមួយក្នុងក្រុងភ្នំពេញនៅខែមិថុនាឆ្នាំមុន ពីបទចេញលិខិតក្លែងក្លាយ អនុញ្ញាតឲ្យក្រុមហ៊ុនកម្ពុជាមួយនាំចេញឈើដែលមានតម្លៃខ្ពស់ចំនួនប្រហែល៣០០.000ម៉ែត្រគូប។ លោកជាប់ចោទពីបទក្លែងនិងប្រើឯកសារនោះ។
ជនជាតិខ្មែរបួននាក់ផ្សេងទៀតដែលជាប់ពាក់ព័ន្ធក្នុងសំណុំរឿងនេះមិនមានមុខនៅសវនាការទេ ហើយអវត្តមានរបស់ពួកគេមិនមានការពន្យល់ឡើយ។
ក្នុងការការពារខ្លួន លោក សុខងី បាននិយាយថា តំណាងម្នាក់នៃក្រុមហ៊ុន ហេង លី អុិនវេសមិន (Heng Ly Investment Company) ឈ្មោះ ឡា អន បានប្រគល់លិខិតមួយឲ្យគាត់នៅខែវិច្ឆិកាឆ្នាំ២០១៣ ដោយអះអាងថា មកពីក្រសួងពាណិជ្ជកម្ម ដែលបានផ្តល់ការអនុញ្ញាតឲ្យក្រុមហ៊ុនរបស់លោកនាំចេញឈើចំនួន១.០០០ម៉ែត្រគូប។ លោក សុខងី បាននិយាយថា លោកបានអីុម៉េលទៅប្រធាននាយកដ្ឋាននីតិកម្មរបស់ក្រសួងនេះ គឺលោក ម៉ក់ ឧសភា ដើម្បីពិនិត្យផ្ទៀងផ្ទាត់លិខិតនោះ ហើយបានទទួលភ្លើងខៀវដើម្បីបញ្ជូនកំណត់ទូតឲ្យក្រសួងពាណិជ្ជកម្មវៀតណាមបើកផ្លូវលក់។
លោក សុខងី បាននិយាយថា “គាត់បាននិយាយថា ត្រឹមត្រូវហើយ អ្នកអាចសម្រេច វាគ្មានបញ្ហាទេ”។ ដូច្នេះ ខ្ញុំបានចេញកំណត់ទូតមួយទៅវៀតណាម។
មេធាវីម្នាក់របស់លោកគឺលោក មួង ធនលាភី បានសួរថា “នៅពេលអ្នកទទួលលិខិត[ពីលោក អន] តើអ្នកដឹងថា លិខិតនោះជាលិខិតមែនទែនទេ?”
លោក សុខងី បានឆ្លើយតប “ខ្ញុំដឹង ពីព្រោះវាមានតែមក្រហមមួយនិងហត្ថលេខាត្រឹមត្រូវ ហើយខ្ញុំថែមទាំងបានទាក់ទងលោក ម៉ក់ ឧសភា ទៀតផង”។
លោក ឧសភា មិនស្ថិតនៅក្នុងតុលាការទេ។ ប៉ុន្តែ ក្រឡាបញ្ជីម្នាក់បានអានសេចក្តីថ្លែងមួយពីមន្ត្រីក្រសួងពាណិជ្ជកម្មដែលគាត់បានបដិសេធការអះអាងរបស់លោកសុខងី។ ក្នុងសេចក្តីថ្លែងនោះ គាត់បានបដិសេធថា មិនបានទទួលលិខិតពីលោក សុខងី ដើម្បីផ្ទៀងផ្ទាត់ភាពពិតប្រាកដនៃលិខិតពីក្រសួងនោះទេ ហើយថា ទោះក្នុងករណីណាក៏ដោយ គាត់មិនមានសិទ្ធិធ្វើដូច្នោះទេ។
គាត់បាននិយាយថា “ប្រសិនបើប៉ូលិសស៊ើបអង្កេត ហើយរកឃើញថា អ្វីដែលលោក តាំង សុខងី និយាយនោះពិត ខ្ញុំសុខចិត្តប្រឈមមុខនឹងច្បាប់”។
ក្នុងការថ្លែងជាលាយលក្ខណ៍អក្សររបស់ខ្លួនផ្ទាល់ ចុងចោទម្នាក់ទៀតឈ្មោះ ហេង លី បានបដិសេធថា មិនបានធ្វើការប៉ុនប៉ងណាមួយ ដើម្បីដឹកឈើចេញទៅប្រទេសវៀតណាម និងមានការជាប់ពាក់ព័ន្ធណាមួយជាមួយលោក សុខងី ឬលោក អន ដែលជាចុងចោទម្នាក់ដែរនោះទេ។
ក្នុងបន្ទប់សវនាការ ព្រះរាជអាជ្ញារង ខាំ សុផារី បានលើកឡើងនូវសារាចរចំនួនប្រាំមួយពីទីស្តីការគណៈរដ្ឋមន្ត្រី ដែលយល់ព្រមឲ្យដឹកឈើចេញទៅប្រទេសវៀតណាមដោយក្រុមហ៊ុនជាច្រើនផ្សេងទៀត។
លោក សុផារី បានសួរថា ហេតុអ្វីប៉ុស្តិ៍ព្រំដែនដែលកំណត់ក្នុងសារាចរទាំងនោះគឺផ្សេងពីប៉ុស្តិ៍ដែលបានលើកឡើងក្នុងកំណត់ទូតដែលមានបន្តមកទៀត ដែលលោក សុខងី បានបញ្ជូនទៅអាជ្ញាធរវៀតណាម។ លោក សុខងី បាននិយាយថា លោកបានប្តូរប៉ុស្តិ៍ត្រួតពិនិត្យតាមសំណើរបស់ក្រុមហ៊ុន ដើម្បីឲ្យពួកគេអាចចំណេញពេលនិងសោហុយដឹកជញ្ជូន ដោយទៅផ្លូវជិតជាង។
ចៅក្រមជំនុំជម្រះ លោក វេង ហួត បាននិយាយថា សវនាការនឹងបន្តធ្វើនៅថ្ងៃទី៣ ខែកញ្ញា៕ និត