31 C
Phnom Penh

នគរបាល​ប្រ​ទះ​ឃើញ​គ្រាប់មីន​​ក្បែរ​កន្លែង​លក់​សំបុត្រ​​ចូលទស្សនា​​អង្គរ

ដោយ ឌឹ ខេមបូឌា ដេលី

បទវិភាគ

នគរ​​​បាល​​​ខេត្ត​​​សៀម​​​រាប​​​កំពុង​​​សើុប​​​អង្កេត​​​​​​រក​​​ប្រភព​គ្រាប់​​​មីន​​​ប្រឆាំង​​​មនុស្ស​​​មួយ​​​គ្រាប់​​​ដែល​​​គេ​​​ប្រទះ​​​ឃើញ​​​ចម្ងាយ​​​​​​រាប់​សិប​​​ម៉ែត្រ​​​ពី​​ច្រក​​​​ចូល​​​ឧទ្យាន​​​បុរាណ​​​អង្គរ​​​កាល​​​ពី​​​ម្សិល​​​មិញ ​​​ប៉ុន្តែ សង្ស័យ​​​ថា គ្រាប់​​​មីន​​​នេះ​​​ទំនង​​​ជា​​​គ្មាន​​​នរណា​​​ម្នាក់​​​បង្កៃនៅ​​​ទី​​​នោះ​​​ដោយ​​​ចេតនា​​​ឡើយ​​​។

លោក ញឹក កែវ ស្នង​​​ការ​​​រង​​​នគរ​​​បាល​​​ខេត្ត​​​​​​ បាន​​​មាន​​​ប្រសាសន៍​​​ថា អ្នក​​​ភូមិ​​​រាយការណ៍​​​ថា បាន​​​ឃើញ​​​គ្រាប់​​​មីន​​​នេះ​​​នៅ​​​ម៉ោង​​​ប្រហែល​​​៦​​​និង​​​៣០​​​នាទី​​​ព្រឹក​​​នៅ​​​ចិញ្ចើម​​​ផ្លូវ​​​លំ​​​មួយ​​​ឆ្ពោះ​​​ទៅ​​​ច្រក​​ទ្វារ​ចូល​​​ខាង​​​មុខ​​​នៃ​​​បន្ទាយ​​យោធា​ចម្ងាយ​​​ប្រហែល​​​៥០​​​ម៉ែត្រ​​​ពី​​កន្លែង​​​​លក់​​​សំបុត្រ​​​នៅ​​​ច្រក​​​ចូល​​​​​​ឧទ្យាន​​​នេះ​​​ក្នុង​​​ក្រុង​​​សៀម​​​រាប​​​។

លោក​​​ ញឹក កែវ បាន​​​ថ្លែង​​​ថា គ្រាប់​​​មីន ​​​OZM-4 ផលិត​​​នៅ​​​អតីត​សហភាព​​​​សូវៀត ត្រូវ​​​បាន​​​គេ​​​ប្រទះ​​​ឃើញ​​​នៅ​​​លើ​​​ចិញ្ចើម​​​ផ្លូវ​​​ដោយ​​​គ្មាន​​​​​​​​​កិបបំផ្ទុះ​​​​ទេ​​​។

លោក​​​បាន​​​ឲ្យ​​​ដឹង​​​ថា “ប្រហែល​​​ជា​​​នរណា​​​ម្នាក់​​​ជ្រុះ​​​ដោយ​​​ចៃដន្យ​​​។​​​គ្មាន​​​នរណា​​​ម្នាក់​​​យក​​​​​​វា​​​មក​​​បង្កៃនៅ​ទី​​​នេះ​​​ទេ​​​ ពីព្រោះ​​​វា​​​មិន​​​មាន​​​ កិប​​​បំផ្ទុះ​​​ឡើយ​​​។ យើង​​​កំពុង​​​ស៊ើប​​​អង្កេត​​​​​​ករណី​​​នេះ​​​”។

លោក ញឹក កែវ បាន​​​ថ្លែងថា មន្ត្រីមក​​​ពី​​​មជ្ឈមណ្ឌល​​​សកម្មភាព​​​កំចាត់​​​មីន​​​កម្ពុជា​​​ជា​​​ក្រុម​​​ដោះ​​​មីន​​​របស់​​​រដ្ឋាភិបាល​​​បាន​​​មក​​​ដល់​​​ហើយ​​​បាន​​​ដោះ​​​គ្រាប់​​​មីន​​​នេះ​​​ដោយ​​​សុវត្ថិ​​​ភាព​​​នៅ​​​ម៉ោង​​​ប្រហែល​​​៧​​​និង​​​២០​​​នាទី​​​ព្រឹក​​​។

យោង​​​តាម​​​គេហទំព័រ​​​​​​​​​មជ្ឈមណ្ឌលសកម្ម​​​ភាព​​​​​​កំចាត់​​​មីន​​​កម្ពុជា​​​​​​បាន​​​ឲ្យ​​​ដឹង​​​ថា គ្រាប់​​​មីន​​​​​​ OZM-4 នេះ​​​ទម្ងន់​​​ប្រហែល​​​៥​​​គីឡូក្រាម ​​​ហើយ​​​ ​​​មាន​​​កម្លាំង​​​ផ្ទុះ​​​រហូត​​​ដល់​​​២០០​​​ម៉ែត្រ​​​​​​បួន​​​ជ្រុង​​​។

លោក ហេង​​​ រតនា អគ្គនាយក​​​មជ្ឈ​​​​​​មណ្ឌល សកម្ម​​​ភាព​​​​​​កំចាត់​​​មីន​​​កម្ពុជា​​​ បាន​​​មាន​​​ប្រសា​សន៍​​​​​​ ថា វា​​​ធម្មតា​​​ទៅ​​​ហើយ​​​សម្រាប់​​​​អ្នក​​​ភូមិ​​​ដែល​ឃើញ​​​គ្រាប់​​​មីន ហើយ​​​ទុក​វាចោល​​​​នៅ​​​កណ្តាលវាល​​​ ដើម្បី​​​ឲ្យ​​​​ទាហាន​​​មក​​​​​​​​ឃើញ​។ លោក​​​បាន​​​លើក​​​ឡើង​​​ថា ករណី​​​​​​នេះ​​​ក៏​​​ប្រហែល​​​ជា​​​ដូច​​​គ្នា​​​ដែរ​​​។ លោក​​​បាន​​​សន្និដ្ឋាន​​​ថា គ្រាប់​​​មីន​​​ដែល​​​​​​គេ​​​ប្រទះ​​​​ឃើញ​​​កាល​​​ពី​​​ម្សិល​​​មិញ ​​​ផលិត​​​តាំង​​​ពី​​​ចុង​​​ទសវត្សរ៍​​​ឆ្នាំ​​​១៩៨០​​​ឯណោះ​​​​​​។

លោក ម៉ៃ សំកាល់​​​ ប្រធាន​​​ភូមិ​​​៣​​​ នៅ​​​ក្នុង​​​សង្កាត់​​​ស្លក្រាម​​​ ក្រុង​​​សៀ​​​ម​​​រាប​​​បាន​​​ថ្លែង​​​ថា ​​​គ្រាប់​​​មីន​​​នេះ​​​ទំនង​​​ជាមិន​បង្ករបួស​ស្នាមដល់​​ភ្ញៀវ​​​ទេសចរ​​​ឡើ​យ​ បើ​​​វា​​​ផ្ទុះ​​​នោះ​។

លោក​​​បាន​​​បន្ថែម​​​ថា “គ្រាប់​​​មីន​​​នេះ​​​ត្រូវ​​​បាន​​​គេ​​​រក​​​ឃើញ​​​នៅ​​​ខាង​​​ជើង​​​កន្លែង​លក់​​​សំបុត្រ​​​សម្រាប់​​​ភ្ញៀវ​​​ទេសចរ​​​ដែល​​​មក​​​ទស្សនា​​​ តំបន់​​​អង្គរ​​​ ប៉ុន្តែ ភ្ញៀវ​​​ទេសចរ​​​ភាគច្រើន​​​មិន​​​ដើរ​​​តាម​​​ផ្លូវ​​​នោះ​​​ទេ ពីព្រោះ​​​វា​​​ជា​​​ផ្លូវ​​​ចូល​​​បន្ទាយ ​​​ទាហាន​​​”។

គេ​​​មិន​​​អាច​​​ទាក់​​​ទង​​​ក្រុម​​​មន្ត្រី​​​យោធា​​​ដើម្បី​​​ សុំ​​​​​​ការ​​​អត្ថាធិប្បាយ​​​បាន​​​ទេ​​​៕សារុន​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស