ជនជាតិនីហ្សេរីយ៉ាប្រាំពីរនាក់ដែលត្រូវចោទពីបទជួញដូរគ្រឿងញៀន បានបដិសេធថា មិនបានជាប់ពាក់ព័ន្ធក្នុងការជួញដូរមេតំហ្វេតាមីនក្នុងអំឡុងពេលសវនាការថ្ងៃទី២ នៅឯតុលាការក្រុងភ្នំពេញកាលពីម្សិលមិញ គឺរយៈពេលមួយខែបន្ទាប់ពីបុរសជនជាតិនីហ្សេរីយ៉ាទី៨ បានសារភាពថាដើរតួជាអ្នកជួញដូរ។
ប៉ូលិសបានចាប់ខ្លួនជនជាតិនីហ្សេរីយ៉ាប្រាំបីនាក់ក្នុងក្រុងភ្នំពេញ នៅល្ងាចថ្ងៃទី២៦ ខែតុលា ដោយរឹបអូសបានមេតំហ្វេតាមីនជាង១០០ក្រាម ពីលោក អិន ជូហានុដុម អាយុ៥២ មុននឹងចាប់ខ្លួនអ្នកផ្សេងទៀត។
នៅថ្ងៃទី១នៃសវនាការរបស់ពួកគេកាលពីខែមុន លោក ជូហានុដុម បានសារភាពថា ជញ្ជូនគ្រឿងញៀនតាមការបញ្ជារបស់ជនញាតិនីហ្សេរីយ៉ាម្នាក់ទៀតដែលគាត់ហៅឈ្មោះត្រឹមថា លោក ហ្វ្រង់។
ក្នុងពេលសាកសួរកាលពីម្សិលមិញ ចុងចោទឈ្មោះ អេឆូឌូ សំសុន អាយុ៣៣ បានប្រាប់តុលាការតាមរយៈអ្នកបកប្រែភាសាថា លោកមិនបានដឹងអ្វីទាំងអស់ទាក់ទងនឹងបណ្តាញជួញដូរគ្រឿងញៀន ហើយលោកកំពុងតែធ្វើការនៅក្នុងភោជនីយដ្ឋានរបស់លោកក្នុងសង្កាត់ចោមចៅ ខណ្ឌពោធិ៍សែនជ័យ នៅពេលប៉ូលិសចាប់ខ្លួនគាត់។
បុរសជនជាតិនីហ្សេរីយ៉ារូបនេះបាននិយាយថា “ខ្ញុំមិនដឹងអីទាំងអស់ ហើយខ្ញុំកំពុងតែលក់ម្ហូបអាហារនៅក្នុងហាងខ្ញុំនៅពេលនោះ ស្រាប់តែប៉ូលិសមកចាប់ខ្ញុំ”។
សាកសួរដោយព្រះរាជអាជ្ញារង លី សុផាន់ណា លោក អេហ្សិកបូ ហ្គាប្រែ៊ល អាយុ៤១ឆ្នាំ ក៏បានអះអាងថា លោកមិនបានដឹងអ្វីទាំងអស់ ហើយនិយាយថា លោករត់គេចពីប៉ូលិស បន្ទាប់ពីឃើញការចាប់ខ្លួនរបស់លោក សុន ដែលមានភោជនីយដ្ឋានរបស់គាត់នៅក្បែរនោះដែរ។
អេហ្សិកបូ ហ្គាប្រែ៊ល បាននិយាយថា “ខ្ញុំឃើញប៉ូលិសចូលមក ហើយចាប់បុរសស្បែកខ្មៅម្នាក់ ហើយខ្ញុំក៏គ្មានទិដ្ឋាការដែរ ហើយគិតថា ប៉ូលិសចង់ចាប់អ្នកដែលគ្មានទិដ្ឋាការ”។
ទាក់ទងតាមទូរស័ព្ទលោក អឹម សុជាតិ មេធាវីរបស់លោក សុន បាននិយាយថា កូនក្តីរបស់លោក មានជំនួញស្របច្បាប់ ហើយមិនពាក់ព័ន្ធនឹងបទចោទប្រកាន់នោះទេ។
លោក សុជាតិ បាននិយាយថា “ក្រុមខុសច្បាប់មិនធ្វើជំនួញបើកចំហក្នុងហាងអ៊ីចឹងទេ គេធ្វើដោយស្ងាត់ៗ”។
លោក សុជាតិ ក៏បានចោទប៉ូលិសដែលបានចាប់ខ្លួនកូនក្តីរបស់លោកថា ប្រកាន់ពូជសាសន៍។
មេធាវីរូបនេះបាននិយាយថា “ខ្ញុំស្អប់ការជួញដូរគ្រឿងញៀន ប៉ុន្តែ យើងត្រូវតែធ្វើការស៊ើបអង្កេតបន្ថែមទៀត មិនត្រូវឃើញបុរសស្បែកខ្មៅ ហើយក៏ចាប់ខ្លួនចោទប្រកាន់អ៊ីចឹងទេ”។
ចៅក្រមជំនុំជម្រះលោក តុប ឈុនហេង បាននិយាយថា សវនាការនឹងបន្តនៅថ្ងៃទី៤ ខែកញ្ញា៕ រើន