មន្ត្រីមានសមត្ថកិច្ចបានឲ្យដឹងថា ពេលនេះនគរបាលកំពុងតាមប្រមាញ់យុវជនបីនាក់ដែលបានរំលោភបូកទៅលើក្មេងស្រីអាយុ១៦ឆ្នាំម្នាក់នៅក្នុងខេត្តកណ្តាលកាលពីថ្ងៃអង្គារ។
លោក ជា នី អធិការរងស្រុកមុខកំពូលខេត្តកណ្តាល បានមានប្រសាសន៍ថា យុវជនឈ្មោះ សុង ផាន់ណា អាយុ២២ឆ្នាំ ចាប ឡៃហៀង អាយុ១៨ឆ្នាំ និងយុវជនម្នាក់ទៀតអាយុ១៧ឆ្នាំដែលជាអ្នកជិតខាងគ្នា បានបបួលក្មេងស្រីរងគ្រោះទៅផឹកស៊ីជាមួយពួកគេនៅចំណុចដីឡូតិ៍ទំនេរមួយកន្លែងក្បែរផ្ទះរបស់ពួកគេនៅម៉ោងប្រហែល៣និង៣០នាទីរសៀលថ្ងៃអង្គារ។
លោកបានលើកឡើងថា ជនសង្ស័យបានបង្ខំឲ្យក្មេងស្រីរងគ្រោះផឹកស្រាយ៉ាងច្រើន រួចធ្វើសកម្មភាពរំលោភនាង នៅពេលនាងស្រវឹង។ “ជនសង្ស័យបានចាប់ផ្តើមរំលោភជនរងគ្រោះក្នុងគុម្ពោតព្រៃក្បែរកន្លែងពួក គេផឹកស៊ី ហើយពួកគេបានរំលោភម្តងម្នាក់”។ លោកបានបន្ថែមថា ក្មេងមួយក្រុមដែលកំពុងឃ្វាលគោក្បែរនោះ បានប្រទះឃើញហេតុការណ៍ចាប់រំលោភនេះ ហើយក៏រត់ទៅប្រាប់ឪពុកមារបស់ក្មេងស្រីរងគ្រោះ។
លោកមានប្រសាសន៍ទៀតថា ពេលនោះ ឪពុកមាបានជិះម៉ូតូសំដៅទៅកន្លែងកើតហេតុ ធ្វើឲ្យជនសង្ស័យរត់គេចខ្លួន នៅពេលពួកគេឮសំឡេងម៉ូតូរបស់គាត់ចូលទៅកាន់តែជិត។ បុរសជាឪពុកមាបានឃើញក្មួយស្រីរបស់ខ្លួនសន្លប់ស្ដូកស្ដឹង ហើយក៏ប្រញាប់បញ្ជូននាងទៅមន្ទីរពេទ្យនៅក្នុងមូលដ្ឋាន។ ”យើងនឹងចាប់ខ្លួនជនសង្ស័យបានក្នុងពេលឆាប់ៗ។ ទោះជាពួកគេរត់គេចខ្លួនក៏ដោយ យើង ស្គាល់អាសយដ្ឋាន និងក្រុមគ្រួសារពួកគេហើយ”។
លោកស្រី រុង ស្រីមុជ ជាមន្ត្រីកម្មវិធីស្ត្រីនៅអង្គការសិទ្ធិមនុស្សអាដហុកប្រចាំខេត្តកណ្តាលមានប្រសាសន៍ថា ជនរងគ្រោះត្រូវបានបញ្ជូនបន្តទៅសង្គ្រោះនៅមន្ទីរពេទ្យ មួយកន្លែងក្នុងក្រុងតាខ្មៅ ខេត្តកណ្តាល ហើយ រំពឹង ថា នាងនឹងចេញពីមន្ទីរពេទ្យវិញនៅថ្ងៃនេះ។
លោកស្រីបានគូសបញ្ជាក់ថា នៅក្នុងខេត្ត កណ្តាល ករណីចាប់រំលោភកុមារដែលត្រូវបានរាយការណ៍ មានចំនួន១០ករណីចាប់តាំងពីខែមករាមក ពោលគឺកើនឡើងធៀបនឹងរយៈពេលដូចគ្នាកាលពីឆ្នាំមុន៕ សុខុម