នៅក្នុងការចោទប្រកាន់ពីបទអំពើពុករលួយដែលត្រូវបានចុះផ្សាយថ្មីបំផុតរបស់ខ្លួន កាលពីម្សិលមិញ អង្គភាពប្រឆាំងអំពើពុករលួយ (ACU) បានបង្ហោះពាក្យបណ្តឹងអនាមិកក្នុងគេហទំព័ររបស់ខ្លួនថា នាយកសាលាហ្វឹកហ្វឺនកងរាជអាវុធហត្ថនៅក្នុងរាជធានីភ្នំពេញ បានយកប្រាក់យ៉ាងច្រើនពីការចុះឈ្មោះចូលរៀន ការដំឡើងឋានន្តរស័ក្តិ និងអត្ថប្រយោជន៍ផ្សេងៗទៀត។
យោងតាមពាក្យបណ្តឹងនេះបានឲ្យដឹងថា ឧត្តមសេនីយ៍ទោ អឿ សាវ៉ន នាយកសាលាហ្វឹកហ្វឺនកងរាជអាវុធហត្ថនៅក្នុងខណ្ឌដង្កោ និងវរសេនីយ៍ត្រី ថាវ វណ្ណ មន្ត្រីក្រោម បង្គាប់របស់លោក និងជានាយការិយាល័យបុគ្គលិក បានយកប្រាក់ពី២៥០ដុល្លារ ទៅ៥០០ដុល្លារពីការដំឡើងឋានន្តរស័ក្តិចាប់ពីអនុសេនីយ៍ត្រីដល់វរសេនីយ៍ត្រី។
អ្នកទាំងពីរក៏រងការចោទប្រកាន់ដែរថា បានយកប្រាក់១០ដុល្លារសម្រាប់ថ្លៃធ្វើអត្តសញ្ញាណប័ណ្ណយោធាពី១.០០០ដុល្លារ ទៅ២.០០០ដុល្លារពីសិក្ខាកាមដើម្បីបានចូលរៀននៅសាលានេះ និង៣.០០០ដុល្លារសម្រាប់ការរត់ការឲ្យអ្នកណាម្នាក់បានស៊ីប្រាក់ខែកងរាជអាវុធហត្ថជាទៀងទាត់ក្រោមឈ្មោះមន្ត្រីអវត្តមាន ចូលនិវត្តន៍ ឬ “ខ្មោច”។
ដូចការរំពឹងទុក អង្គភាពប្រឆាំងអំពើពុករលួយក៏បានចុះផ្សាយការឆ្លើយតបសង្ខេបពីសំណាក់មន្ត្រីជាប់ចោទដែលបានការពារខ្លួន និងច្រានចោលការអះអាងទាំងេនះផងដែរ។ការឆ្លើយតបសង្ខេបនេះមានខ្លឹមសារដូច្នេះថា “ចាប់តាំងពីគាត់ [ ឧត្តមសេនីយ៍ទោអឿ សាវ៉ន] ចូលកាន់តំណែងមក គាត់ធ្លាប់បានចុះហត្ថលេខាលើសំណើសុំដំឡើងឋានន្តរស័ក្តិជូននាយ នាយរង និងកងរាជអាវុធហត្ថឲ្យស្របតាមមុខងារ និងពេលវេលាកំណត់។ប៉ុន្តែសុទ្ធតែយោងតាមស្មារតីអង្គប្រជុំថ្នាក់ដឹកនាំសាលា ហើយក៏មិនដែលកំណត់ ឬយកប្រាក់ជាថ្នូរនឹងការដំឡើងឋានន្តរស័ក្តិដែរ”។ឧត្តមសេនីយ៍រូបនេះក៏បានបដិសេធដែរថា ខ្លួនមិនបានយកប្រាក់សម្រាប់ការចុះឈ្មោះសិស្សឡើយ។
វរសេនីយ៍ត្រី ថាវ វណ្ណ បាននិយាយការពារខ្លួនថា លោកគ្មានសិទ្ធិអំណាចក្នុងការដំឡើងឋានន្តរស័ក្តិទេ ហើយថា អង្គភាពរបស់លោកមិនលក់ប្រាក់ខែមន្ត្រីឲ្យទៅអ្នកផ្សេងឡើយ។លោកក៏បានបដិសេធដែរថា លោកមិនបានយកប្រាក់សម្រាប់ការធ្វើអត្តសញ្ញាណប័ណ្ណយោធានោះទេ ហើយបានបន្ថែមថា គឺយកតែ១០.០០០រៀលទៅ១៥.០០០រៀលប៉ុណ្ណោះសម្រាប់ថ្លៃធ្វើឯកសារ។
មន្ត្រីយោធាជាប់ចោទទាំងពីរមិនអាចទាក់ទងសុំការអត្ថាធិប្បាយបានទេ។ ទោះជាយ៉ាងណា លោក អេង ហ៊ី អ្នកនាំពាក្យកងរាជ អាវុធហត្ថ បានចេញមុខនិយាយការពារមន្ត្រីទាំងនេះ ហើយបានចាត់ទុកពាក្យបណ្តឹង អនាមិកនេះថា “គ្មានមូលដ្ឋាន”។ លោកបានលើកឡើងថា “ការឆ្លើយតប [មកកាន់អង្គភាព ប្រឆាំងអំពើពុករលួយ] គឺគ្រប់គ្រាន់នឹងបង្ហាញថា ពួកគាត់គ្មានកំហុស។ ដូច្នេះគ្មានរឿងបែបនោះកើតឡើងទេ”។
អង្គភាពប្រឆាំងអំពើពុករលួយ តែងតែបង្ហោះពាក្យបណ្តឹងអនាមិកអមដោយការឆ្លើយបដិសេធតាមអីុនធឺណិត ដោយបានចុះផ្សាយពាក្យបណ្តឹងយ៉ាងហោចណាស់១០ករណីគ្រាន់តែក្នុងខែនេះ។
លោក ឱម យិុនទៀង ប្រធានអង្គភាពប្រឆាំងអំពើពុករលួយ បានមានប្រសាសន៍កាលពីម្សិលមិញថា អង្គភាពរបស់លោកបង្ហោះពាក្យបណ្តឹងទាំងនេះដោយសង្ឃឹមថា នឹងជំរុញឲ្យអ្នកចោទប្រកាន់ផ្តល់ព័ត៌មាន និងភ័ស្តុតាងបន្ថែម។ “យើងចង់បានប្រតិកម្មពីអ្នកប្តឹង។ ដោយមានការឆ្លើយតប [របស់អ្នកជាប់ចោទ] យើងគិតថា អ្នកប្តឹងអាចផ្តល់ភ័ស្តុតាងបន្ថែមទៀតដល់យើង ហើយយើងអាចបន្តឆ្លើយឆ្លងគ្នាបាន”។
លោកមិនបានពន្យល់ពីមូលហេតុដែលការឆ្លើយឆ្លងគ្នាទាំងនេះមិនត្រូវបានដោះស្រាយជាលក្ខណៈឯកជនទេ។ “នៅពេលយើងឃើញថា យើងគ្មានតម្រុយគ្រប់គ្រាន់ យើងទុកករណីនោះមួយឡែក។ ប៉ុន្តែ បើយើងឃើញថា យើងមានតម្រុយគ្រប់គ្រាន់យើងកត់ត្រាវាទុកក្នុងបញ្ជី បើកការសើុបអង្កេត ហើយកសាងពាក្យបណ្តឹង”។
ប្រធានអង្គភាពប្រឆាំងអំពើពុករលួយរូបនេះបានបកស្រាយថា ទោះជាយ៉ាងណា ករណីដែលខ្វះភ័ស្តុតាងមិនត្រូវបានបិទចោលឡើយ ហើយមានតែតុលាការប៉ុណ្ណោះដែល អាចបិទសំណុំរឿងរបស់អង្គភាពប្រឆាំងអំពើពុករលួយបានជារៀងរហូត។
លោកបានបន្តទៀតថា ”សម្រាប់ពាក្យបណ្តឹង ដែលគ្មានលក្ខណៈសម្បត្តិពេញលេញយើងសុំឲ្យអ្នកជាប់ចោទផ្តល់ការឆ្លើយតបហើយយើងប្រមូលសាក្សីដើម្បីកសាងមូលដ្ឋានសម្រាប់ធ្វើការសន្និដ្ឋានថា តើវាជាករណី ពុករលួយ ឬមិនមែន។ សម្រាប់ពាក្យបណ្តឹងខ្លះ វាផ្តល់តម្រុយយ៉ាងច្បាស់ ដូច្នេះយើងមិនចាំបាច់ត្រូវការការឆ្លើយ តបទេ ហើយយើងបើកការសើុបអង្កេតតែម្តង”៕សុខុម