មន្ត្រីម្នាក់បាននិយាយថា នគរបាលកំពុងស្វែងរកចាប់ខ្លួនឈ្មួញត្រីឆ្តោដែលបានរត់គេចខ្លួនពីក្រុងពោធិ៍សាត់កាលពីព្រឹកម្សិលមិញ បន្ទាប់ពីបានបើករថយន្តរបស់គាត់បុករថយន្តមួយគ្រឿង ដែលបើកបរដោយក្រុមមន្ត្រីមកពីការិយាល័យបង្ក្រាបបទល្មើសសេដ្ឋកិច្ចរបស់ក្រសួងមហាផ្ទៃ ហើយបានធ្វើឲ្យវាខូចខាត។
លោក ទូច យុទ្ធា នាយការិយាល័យនេះបានឲ្យដឹងថា មន្ត្រីពីរនាក់របស់លោកបានបើកដេញតាមរថយន្តតួរីសសាំងយ៉ុង តាមផ្លូវជាតិលេខ៥ សង្កាត់រលាប ក្នុងក្រុងនេះក្រោយពីបានទទួលព័ត៌មានថា រថយន្តនេះកំពុងដឹកត្រីដោយខុសច្បាប់។ នៅពេលពួកគេបើកដេញ តាមទាន់រថយន្តនោះក្នុងបំណង បង្ខំឲ្យឈប់ អ្នកបើករថយន្តតួរីសនេះបានឆ្លើយតបដោយហិង្សា។
លោកបានថ្លែងថា “រថយន្តតួរីសនោះបានបិទភ្លើង ហើយបានបុករថយន្តអាជ្ញាធររបស់យើង បន្ទាប់មកវា (រថយន្តនគរបាល) បានក្រឡាប់ពីរបីត្រឡប់ ក្រោយពេលធ្លាក់ផ្លូវ”។ លោក យុទ្ធា បានឲ្យដឹងបន្តថា ក្រោយពីបុករថយន្តនគរបាលរួច ពួកឈ្មួញបានទុករថយន្តតួរីសរបស់ពួកគេចោល ហើយបានភៀសខ្លួនតាមរថយន្តលុចសីសមួយគ្រឿងដែលបានបើកតាមពីក្រោយ អំឡុងពេលនគរបាលដេញតាម។
លោកបានមានប្រសាសន៍ថា “មន្ត្រីរបស់ខ្ញុំបានប្រាប់ខ្ញុំថា រថយន្តបីគ្រឿងបានជួយការពាររថយន្តតួរីសនោះ ពីព្រោះពួកគេចង់ឲ្យរថយន្តអាជ្ញាធរនៅឆ្ងាយពីរថយន្តតួរីសនោះ។ យើងមិនដឹងថាមនុស្សប៉ុន្មាននាក់ជិះក្នុងរថយន្តនោះទេ ពីព្រោះមេឃងងឹត”។
លោក យុទ្ធា បានមានប្រាសាសន៍បន្តថា មន្ត្រីរបស់លោកបានរងរបួសស្រាលហើយត្រូវបានបញ្ជូនមកក្រុងភ្នំពេញដើម្បីព្យាបាល។លោកបាននិយាយថា “នគរបាលមូលដ្ឋានបានរឹបអូសបានកូនត្រីឆ្តោទើបញាស់ចំនួន២០០.០០០ក្បាល ពីឃ្លុបក្រោយរថយន្តតួរីសនោះ ហើយបានប៉ាន់ប្រមាណថា មានកូនត្រីងាប់ប្រហែល ៨០០.០០០ក្បាល នៅក្នុងរថយន្តនេះ”។
ក្រសួងកសិកម្មបានហាមប្រាមមិនឲ្យចិញ្ចឹមត្រីឆ្តោកាលពីឆ្នាំ២០០៥ ពីព្រោះអ្នកចិញ្ចឹមត្រីទាំងនោះបានធ្វើឲ្យចំនួនត្រីទឹកសាបវិនាសហិនហោច ដោយសារតែយកវាទៅឲ្យចំណីត្រីឆ្តោ ដែលឃ្លានចំណីខ្លាំង ហើយឆាប់ធំ។
លោក យុទ្ធា បាននិយាយថា កូនត្រីឆ្តោ ដែលចាប់បានកាលពីម្សិលមិញ ទំនងជាបានទិញនៅតាមព្រំដែនវៀតណាម ហើយពួកឈ្មួញបម្រុងលក់វានៅតាមតំបន់បណ្តោយទន្លេសាប។ ហើយថា ការិយាល័យរបស់លោកបានស្គាស់ភិនភាគអ្នកបើករថយន្តតួរីសនោះហើយ ហើយកំពុងកសាងសំណុំរឿងចោទប្រកាន់គាត់ ប៉ុន្តែ លោកបានបដិសេធមិនប្រាប់ឈ្មោះជននេះទេ។
លោកបានថ្លែងថា “យើងចោទប្រកាន់អ្នកបើករថយន្តតួរីសនោះពីបទបំផ្លិចបំផ្លាញទ្រព្យសម្បត្តិរដ្ឋ និងប៉ុនប៉ងបុកសម្លាប់មន្ត្រីរបស់យើង”៕និត