28 C
Phnom Penh

លោក​​​ ហ៊ុន សែន​​​ គំរាម​​​អ្នក​​​រិះគន់​​​ផែន​​​ទី​​​ដោយ​ចាត់​វិធាន​​​ការ​ច្បាប់

ដោយ ឌឹ ខេមបូឌា ដេលី

បទវិភាគ

យោង​​​តាម​​​សេចក្តី​​​ប្រកាស​​​ព័ត៌​​​មាន​​​ពី​​​ទី​​​ស្តី​​​ការ​​​គណៈ​​​រដ្ឋ​​​មន្ត្រី​​​បាន​​​ឲ្យ​​​ដឹង​​​ថា កាល​​​ពី​​​ថ្ងៃ​​​សុក្រ  លោក​​​នាយក​​​រដ្ឋ​​​មន្ត្រី ហ៊ុន សែន បាន​​​ដាក់​​​ចេញ​​​នូវ​​​​​​បទ​​​បញ្ជា​​​ឲ្យ​​​ស្ថាប័ន​​​មាន​​​សមត្ថកិច្ច​​​ចាត់​​​វិធានការ​ផ្លូវ​​​ច្បាប់​​​ចំពោះ​​​បុគ្គល​​​ ឬ​​​អង្គការ​​​ណា​​​ដែល​​​ចោទ​​​រដ្ឋាភិបាល​​​​​​ថា ប្រើ​​​ផែន​​​ទី​​​ខុស​​​ក្នុង​​​ការ​​​បោះ​​​បង្គោល​​​ព្រំដែន​​​កម្ពុជា។

បទ​​​បញ្ជា​​​េនះ​​​មាន​​​ឡើង​​​មួយ​​​ថ្ងៃ​​​ បន្ទាប់​​​ពី​​​រដ្ឋា​​​ភិបាល​​​បាន​​​ទទួល​​​ផែន​​​ទី​​​ពី​​​អង្គការ​​​សហ​ប្រជា​​​ជាតិ​​​ ដែល​​​រដ្ឋាភិបាល​​​និយាយ​​​ថា វា​​​បញ្ជាក់​​​ថា ផែន​​​ទី​​​របស់​​​​​​ខ្លួន​​​ត្រឹម​​​ត្រូវ​​​ និង​​​មួយ​​​សប្តាហ៍​​​ក្រោយ​​​ពី​​​លោក​​​ ហុង សុខហួរ សមាជិក​​​ព្រឹទ្ធ​​​សភា​​​គណបក្ស​​​ប្រឆាំង​​​ត្រូវ​​​បាន​​​ចាប់​​​​​​ខ្លួន​​​តាម​​​បញ្ជា​​​របស់​​​លោក​​​ ហ៊ុន សែន ចំពោះ​​​ការ​​​បង្ហាញ​​​ច្បាប់​​​ចម្លង​​​ក្លែង​​​ក្លាយ​​​នៃ​​​​​​សន្ធិ​​​​​សញ្ញា​​​ព្រំដែន​​​​​​​​​ជាមួយ​​​វៀតណាម​​​ក្នុង​​​វីដេអូ​​​ឃ្លីប​​​ដែល​​​បង្ហោះ​​​លើ​​​ហ្វេស​​​ប៊ុក។

សេចក្តី​ប្រកាស​​​ព័ត៌មាន​​​នោះ​​​បាន​​​និយាយ​​​ថា “សម្តេច​​​នាយក​​​រដ្ឋ​​​មន្ត្រី​​​​​​បាន​​​ដាក់​​​ចេញ​​​នូវ​​​បញ្ជា​​​ឲ្យ​​​ស្ថាប័ន​​​មាន​​​សមត្ថកិច្ច​​​ថ្នាក់​​​ជាតិ​​​ និង​​​ថ្នាក់​​​ក្រោម​​​ជាតិ​​​មាន​​​វិធាន​​​ការ​ផ្លូវ​​​ច្បាប់​​​ភ្លាមៗ​​​ចំពោះ​​​ក្រុម​​​ ឬ​បុគ្គល​​​ណា​​​​​​ដែល​​​ចោទ​​​រដ្ឋាភិបាល​​​​​​ប្រើ​​​ប្រាស់​​​ផែនទី​​​ក្លែង​​​ក្លាយ​ក្នុង​​​ការ​​​ងារ​​​បោះ​​​បង្គោល​​​ព្រំដែន​​​  និង​​​ចំពោះ​​​ការ​​​ប្រមាថ​​​ស្ថាប័ន​​​​​​ព្រះ​​​មហាក្សត្រ​​​ និង​​​ស្ថាប័ន​​​ជាតិ”។

យោង​​​តាម​​​សារ​​​ដែល​​​បង្ហោះ​​​លើ​​​ទំព័រ​​​ហ្វេស​​​ប៊ុក​​​របស់​​​គណបក្ស​​​ប្រជា​​​ជន​​​កម្ពុជា​​​បាន​​​ឲ្យ​​​ដឹង​​​ថា លោក ហ៊ុន សែន ក៏​​​បាន​​​សរសេរ​​​ទៅ​​​លោក​​​ សម រង្ស៊ី មេដឹកនាំ​​​បក្ស​​​ប្រឆាំង​​​កាល​​​ពី​​​ព្រឹក​​​ថ្ងៃ​​​សុក្រ ​​​ដោយ​​​ព្រមាន​​​ថា អ្នក​​​ដែល​​​បន្ត​​​រិះ​​​គន់​​​កិច្ច​​​ការ​​​ព្រំដែន​​​របស់​​​រដ្ឋាភិបាល​​​នឹង​​​ប្រឈម​​​មុខ​​​នឹង​​​តុលាការ។

សារ​​​មាន​​​ខ្លឹមសារ​​​ថា “តាម​​​រយៈ​​​ការ​​​ពន្យល់​​​ដ៏​​​ខ្លី​​​នេះ​​​ ឯកឧត្តម​​​ [លោក សម រង្ស៊ី] គួរ​​​យល់​​​ហេតុ​​​អ្វី​​​លោក​​​ ហុង សុខ​​​ហួរ​​​ ត្រូវ​​​បាន​​​​​​ចាប់​​​ខ្លួន​​​ ហើយ​​​វិធានការ​ច្បាប់​​​នឹង​​ត្រូវ​​​​​​ធ្វើ​​​លើ​​​នរណា​​​ដែល​​​និយាយ​​​ថា រដ្ឋាភិបាល​​​កំពុង​​​ប្រើ​​​ផែនទី​​​ក្លែង​​​ក្លាយ ធ្វើ​សកម្មភាព​ញុះញង់​​​ និង​​​​​​បោក​​​បញ្ឆោត​​​ប្រជា​ពលរដ្ឋ បង្ក​អស្ថិរភាព​ដើម្បី​កេង​​​ចំណេញ​​​សន្លឹក​​​ឆ្នោត​​​ ដោយ​​​មិន​​​គិត​ពី​​​ផល​​​ប្រយោជន៍​​​ស្រប​​​ច្បាប់​​​របស់​​​ជាតិ​​​ និង​ប្រជាជន​នោះ​ឡើយ”។

“ខ្ញុំ​សង្ឃឹម​​​ថា ពី​ឥឡូវ​​​នេះ​ទៅ បញ្ហា​​​ព្រំដែន​​​ ជា​​​ពិសេស​​​ព្រំដែន​​​កម្ពុជា​​​-វៀតណាម​​​ នឹង​លែង​ជា​ល្បែង​​​នយោបាយ​​​បោក​ប្រាស់​ប្រជាជន​ពី​សំណាក់​ឯកឧត្តម​ផ្ទាល់ និង​មនុស្ស​ក្នុង​​​​​​គណបក្ស​ឯក​ឧត្តម​ត​ទៀត​​​ហើយ”។

លោក សុខ ឥសាន អ្នក​​​នាំពាក្យ​​​គណបក្ស​​​ប្រជា​​​ជន​​​កម្ពុជា​​​បាន​​​បញ្ជាក់​​​ភា​​​ព​​​ពិត​​​នៃ​​​សារ​​​នោះ​​​ ហើយ​​​ថា វា​​​ត្រូវ​​​បាន​​​បញ្ជូន​​​​​​ទៅ​​​លោក​​​ សម រង្ស៊ី។

នៅ​​​ពេល​​​សួរ​​​ថា តើ​​​រដ្ឋាភិបាល​​​​​​​​​នឹង​​​ចាត់​​​វិធាន​​​ការ​​​លើ​​​អ្នក​​​ទាំង​​​ឡាយ​​​ដែល​​​អះអាង​​​ថា ​​​បង្គោល​​​ព្រំដែន​​​ត្រូវ​​​បាន​​​បោះ​​​មិន​​​ត្រឹម​​​ត្រូវ​​​ ឬ​​​យ៉ាង​​​ណា​​​ លោក​​​បាន​​​និយាយ​ថា “បាទ ពីព្រោះ​​​ពួក​​​គេ​​​មិន​​​មែន​​​ជា​​​អ្នក​​​ជំនាញ​​​ទេ”។

លោក សុខ ឥសាន បាន​​​និយាយ​​​ថា “នៅ​​​ពេល​​​មាន​​​ភ័ស្តុតាង​​​បញ្ជាក់​​​ថា ​​​ផែនទី​​​ត្រឹម​​​ត្រូវ​​​ ដែល​​​កំពុង​​​ត្រូវ​​​ប្រើ​​​ប្រាស់​​​នោះ​​​ មិន​​​មាន​​​មូល​​​ហេតុ​​​​​​ [ ថា​​​​​​បង្គោល​​​ព្រំដែន​​​បោះ​​​] នៅ​​​ក្នុង ឬ​​​នៅ​​​ក្រៅ​​​ទី​​​តាំង​​​ [ត្រឹម​​​ត្រូវ​​​] នោះ​​​ទេ។

រយៈ​​​ពេល​​​បី​ខែ​​​កន្លង​​​មក​​​នេះ​​​ គណបក្ស​​​ប្រឆាំង​​​បាន​​​ធ្វើ​​​យុទ្ធ​​​នាការ​​ដើម្បី​​​បង្ហាញ​​​ឲ្យ​​​ឃើញ​​​ការ​​​ទន្ទ្រាន​​​ដោយ​​​វៀតណាម​​​ចូល​​​ទឹក​​​ដី​​​ប្រទេស​​​កម្ពុជា ដោយ​អំពាវ​​​នាវ​​​ឲ្យ​​​រដ្ឋាភិបាល​​​បញ្ចេញ​​​ជា​​​សាធារណៈ​​​នូវ​​​ផែន​​​ទី​​​ដែល​​​ខ្លួន​​​ប្រើ​​​ដើម្បី​​​កំណត់​​​​​ព្រំដែន​​​​​​ជា​​​មួយ​​​ប្រទេស​​​វៀតណាម​​​ ដូច្នេះ​​​​​​ទីតាំង​​​ជាក់​​​ស្តែង​​​នៃ​​​បង្គោល​​​ព្រំដែន​​​អាច​​​ត្រូវ​​​ពិនិត្យ។

យុទ្ធនាការ​​​​​​នេះ​​​បាន​​​ឈាន​​​ដល់​​​កម្រិត​​​ខ្ពស់​​​បំផុត​​​នៅ​​​ថ្ងៃ​​​ទី​​​១៩​​​ ខែ​​​កក្កដា​​​ នៅ​​​ពេល​​​ដែល​​​លោក រៀល ខេមរិន្ទ្រ​​​ តំណាង​​​រាស្ត្រ​​​គណបក្ស​​​សង្គ្រោះ​​​ជាតិ​​​ បាន​​​ដឹក​​​នាំ​​​អ្នក​​​គាំទ្រ​​​ប្រហែល​​​២.៥០០​​​នាក់​​​ទៅ​​​តំបន់​​​មាន​​​ជម្លោះ​​​តាម​​​បណ្តោយ​​​ព្រំដែន​​​ជាប់​​​ប្រទេស​​​វៀតណាម​​​ក្នុង​​​ខេត្ត​​​ស្វាយ​​​រៀង​​​។ ពីរ​​​ថ្ងៃ​​​បន្ទាប់​​​មក​​​ សកម្មជន​​​គណបក្ស​​​សង្គ្រោះ​​​ជាតិ​​​១១នាក់​​​​​​ដែល​​​កំពុង​​​ត្រូវ​​​ជំនុំ​​​ជម្រះ​​​ដ៏​​​យូរ​​​ពី​បទ​​​ “កុបកម្ម​​​” ត្រូវ​​​បាន​​​ផ្តន្ទាទោស​​​ភ្លាម​​​ៗ​​​ឲ្យ​ជាប​​​់ពន្ធនាគា​​​ពីរ​​​៧​ទៅ​២០​​​ឆ្នាំ។

កាល​​​ពី​ថ្ងៃ​​​ច័ន្ទ លោក​​​ សម រង្ស៊ី បាន​​​ប្រាប់​​​អ្នក​​​យក​​​ព័ត៌មាន​​​ថា គណបក្ស​​​ប្រឆាំង​​​នឹ​​​ង​ឈប់​​​ “ចាក់​​​ក្រឡេក” រដ្ឋាភិបាល​​​លើ​​​បញ្ហា​​​ព្រំដែន​​​ បន្ទាប់​​​ពី​​​ទៅ​ពន្ធនាគារ​​​ព្រៃ​​​ស​​​ដើម្បី​​​ជួប​​​សួរ​សុខ​ទុក្ខ​សកម្មជន​​​ ដែល​​​ការ​​​ជាប់​​​ពន្ធនាគារ​​​របស់​​​អ្នក​​​ទាំង​​​នោះ លោក​បាន​បកស្រាយ​​​ថា​ជា​​​សារ​​​មួយ​​​ឲ្យ​​​គណបក្ស​​​សង្គ្រោះ​​​ជាតិ​​​បញ្ចប់​​​យុទ្ធនាការ​​​ព្រំដែន​​​របស់​​​ខ្លួន។

លោក សម រង្ស៊ី បាន​​​និយាយ​​​នៅ​ពេល​​​នោះ​​​ថា “យើង​ឈប់​ចាក់​ក្រឡេក​គ្នា រឿង​អ្វីៗ​ទាំង​អស់ ពីព្រោះ​​ជួនណា មិន​ត្រូវ​មក​និយាយ​ជា​សាធារណៈ ជួនណា​វា​​ខូច​ការណ៍​វិញ​ទេ ​មិន​ទាន់​បាន​ការ​ផង ​ការងារ​កំពុង​តែ​ធ្វើ​ មិន​​​ទាន់​បាន​សម្រេច ​បើ​យើង​​និយាយ​ជា​សាធារណៈ​មក​លាត​ត្រដាង​ ជួនណា​មាន​ខុស ជួន​ណា​មាន​ត្រូវ វា​បែក​​ភក់​បែក​ម៉ាំ វា​អត់​​មាន​ចំណេញ​ទេ”។

លោក យឹម សុវណ្ណ អ្នក​នាំ​ពាក្យ​​​គណបក្ស​​​សង្គ្រោះ​ជាតិ​​​​​​បាន​​​និយាយ​​​កាល​​​ពី​​​ថ្ងៃ​​​សុក្រ​​​ថា គណបក្ស​ប្រឆាំង​នឹង​បន្ត​​​ឲ្យ​​​រដ្ឋាភិបាល​​​ទទួល​​​ខុស​​​ត្រូវ​​​ចំពោះ​​​កិច្ចការ​របស់​​​ខ្លួន​​​ក្នុង​​​ការ​​​កំណត់​​​ព្រំដែន។

លោក​​​បាន​​​និយាយ​​​ថា “នៅ​​​ពេល​​​ពួក​​​គេ​​​ធ្វើ​​​ត្រូវ​​​ យើង​​​គាំទ្រ​​​ យើង​​​សរសើរ​​​ពួក​​​គេ​​​”។ លោក​​​បាន​​​បន្ថែម​​​ថា “នៅ​​​​​​ពេល​​​ពួក​​​គេ​​​ធ្វើ​​​ខុស​​​ យើង​​​​​​​​​នឹង​​​បន្ត​​​រិះគន់។យើង​នឹង​ផ្តល់​អនុសាសន៍​ស្ថាបនា បើ​យើង​ឈប់​​​រិះ​​​គន់​​​ ខ្ញុំ​​​ចង់​​​សួរ​​​ពួក​​​គេ​​​ថា តើ​​​ជា​​​សង្គម​​​​​​ប្រជាធិបតេយ្យ​ឬ?”។

លោក យឹម សុវណ្ណ បាន​​​និយាយ​​​ថា លោក​​​មិន​​​យល់​​​ថា ហេតុ​​​អ្វី​​​រដ្ឋាភិបាល​​​​​​ចាត់​​​ទុក​ថា​​​ខុស​​​ច្បាប់​ចំពោះ​ការ​​​និយាយ​អំពី​​​កង្វល់​​​ដែល​ថា​ទឹក​​​​​​ដី​​​កម្ពុជា​​​មិន​​​ត្រូវ​​​បាន​​​ការ​​​ពារ​​​នោះ​ទេ។

“យើង​​​មិន​​​​​​មែន​​​ជា​​​សត្រូវ​​​ទេ​​​ យើង​​​ជា​​​ខ្មែរ​​​ យើង​​​មាន​​​ឈាម​​​ជ័រ​​​ខ្មែរ​​​តែ​​​មួយ​​​ ដូច្នេះ​​​យើង​​​ត្រូវ​​​តែ​​​គិត​​​អំពី​​​បញ្ហា​​​ព្រំដែន​​​របស់​​​យើង​​​ អំពី​​​ប្រយោជន៍​​​ជាតិ​​​ អំពី​​​ទឹក​​​ដី​​​របស់​​​ជាតិ​​​យើង”៕និត (រាយការណ៍​​​បន្ថែម​​​ដោយ Colin Meyn)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស