នគរបាលបាននិយាយថា មន្ត្រីស្រុកម្នាក់ក្នុងខេត្តបន្ទាយមានជ័យ ត្រូវបានចោទប្រកាន់ពីបទមនុស្សឃាតដោយអចេតនាកាលពីម្សិលមិញ បន្ទាប់ពីអ្នកជិតខាងរបស់ខ្លួនម្នាក់បានស្លាប់នៅពេលបុរសរូបនោះបានប៉ះខ្សែលួសដែលគេតភ្ជាប់ចរន្តអគ្គិសនីដាក់នៅជុំវិញរបងផ្ទះរបស់មន្ត្រីរូបនោះ។
យោងតាមលោក ឈួត ថា អធិការរងនគរបាលស្រុកបានឲ្យដឹងថា លោក សែន គុណ អាយុ៤៦ឆ្នាំ ដែលបម្រើការនៅការិយាល័យស្រុកថ្មពួក ត្រូវបានចាប់ខ្លួនកាលពីល្ងាចថ្ងៃសុក្រ បន្ទាប់ពីប្រទះឃើញសាកសពលោក សាំង ម៉ៅ អាយុ៣៦ឆ្នាំ នៅម៉ោងប្រហែល៧ព្រឹក។
លោក ឈួត ថា មានប្រសាសន៍ថា សាកសពនេះត្រូវបានអូសចេញចម្ងាយប្រហែល១៥ម៉ែត្រពីរបងតភ្ជាប់ចរន្តអគ្គិសនី ដែលលោក សែន គុណ បានដាក់កាលពីពេលថ្មីៗនេះនៅជុំវិញផ្ទះរបស់គាត់នៅក្នុងឃុំគំរូ។
លោកបានថ្លែងថា ”នគរបាលបានពិនិត្យសាកសព ហើយបានរកឃើញស្នាមរលាកត្រង់ភ្លៅទាំងពីរ ខ្នងនិងដៃ។ យើងសន្និដ្ឋានថា ជនរងគ្រោះស្លាប់ដោយសារឆក់ខ្សែភ្លើង”។
លោក ឈួត ថា បានថ្លែងថា លោក សែន គុណ បានប្រាប់នគរបាលថា គាត់បានតភ្ជាប់ចរន្តអគ្គិសនីដាក់នៅរបងផ្ទះដើម្បីការពារចោរកុំឲ្យចូលលួចមាន់ទារបស់គាត់។
លោកបានថ្លែងថា គេដឹងថា លោក សាំង ម៉ៅ ជាចោរ ហើយថា លោក សែន គុណ ធ្លាប់បានប្រាប់បុរសរូបនោះចំពោះការលួចមាន់ទារបស់គាត់ដែរ។
លោក ភឿង ម៉ាន់សឹង្ហ នាយការិយាល័យនគរបាលព្រហ្មទណ្ឌកម្រិតធ្ងន់ខេត្តបានមានប្រសាសន៍ថា សាលាដំបូងខេត្តបន្ទាយមានជ័យបានចោទប្រកាន់លោក សែន គុណ ហើយបានបញ្ជូនទៅពន្ធនាគារខេត្តដើម្បីរង់ចាំការជំនុំជម្រះ៕ សារុន