បន្ទាប់​ពី​ការ​ចាប់​ខ្លួន អង្គការ​បរិស្ថាន​ការពារវីធីសាស្ត្រ​​របស់​ខ្លួន

នៅពេល​កូន​ប្រុស​របស់​អ្នក​ស្រី សម សំណាង បាន​សម្រេច​ចិត្ត​ចូលរួម​ក្នុង​ជួរ​អង្គការ​ក្រៅ​រដ្ឋាភិបាល ជា​អង្គការ​បរិស្ថាន​ឈ្មោះ​ថា មាតា​ធម្មជាតិ អ្នក​ស្រី​ដឹង​រួច​ហើយ​ថា កូន​ប្រុស​នឹង​មាន​បញ្ហា​ជា​មិន​ខាន។

អ្នក​ស្រី​សំណាង បាន​និយាយ​កាលពី​ថ្ងៃ​អង្គារ​ថា “ខ្ញុំតែងតែ​ព្រួយ​បារម្ភ​អំពី​សុវត្ថិភាព​របស់​កូន​ប្រុស​របស់​ខ្ញុំ នៅ​ពេល​វា​ធ្វើការ​ឲ្យ​អង្គការ​មាតា​ធម្មជាតិ ពីព្រោះ​ខ្ញុំ​គិត​ថា វា​អាច​ត្រូវ​គេ​ចាប់​ខ្លួន​នៅ​ថ្ងៃ​ណាមួយ​ជា​មិន​ខាន”។

“អាជ្ញាធរ​មិន​សប្បាយ​ចិត្ត​នឹង​អង្គការ​នេះ​ទេ ពីព្រោះ​ពួកគេ​កំពុង​ព្យាយាម​រារាំង​ពលរដ្ឋ​ពី​ការ​រក​ប្រាក់​ចំណូល​ពី​ធនធាន​ធម្មជាតិ”។

ការ​ព្រួយ​បារម្ភ​របស់​អ្នក​ស្រី​សំណាង បង្ហាញ​ឲ្យ​ឃើញ​ថា មាន​ហេតុផល​ច្បាស់​លាស់។

កូនប្រុស​របស់​អ្នក​ស្រី​ឈ្មោះ ទ្រី សុវិគា អាយុ​២៥​ឆ្នាំ ត្រូវ​បាន​ចាប់​ខ្លួន​កាលពី​សប្តាហ៍​មុន​រួម​ជាមួយ​នឹង​សកម្មជន​មាតា​ ធម្មជាតិ​ពីរ​នាក់​ផ្សេង​ទៀត គឺ ស៊ុន ម៉ាឡា អាយុ​២២​ឆ្នាំ និង ស៊ឹម សំណាង អាយុ​២៩​ឆ្នាំ ដោយសារតែ​ការ​ខិតខំ​របស់​ពួកគេ​ដើម្បី​បញ្ឈប់​ក្រុមហ៊ុន​បូម​ខ្សាច់​ពីរ​ ក្រុមហ៊ុន មិន​ឲ្យ​បូម​ខ្សាច់​នៅ​ពាម​អណ្តូង​ទឹក​ក្នុង​ខេត្ត​កោះកុង។

សកម្មជន ​និង​ប្រជា​នេសាទ​មូលដ្ឋាន​ចោទ​ប្រកាន់​ក្រុមហ៊ុន​ទាំង​នេះ​ថា​បាន​បូម​ ខ្សាច់​ជ្រៅៗ និង​ក្នុង​តំបន់​ធំ​ជាង​ដែល​អាជ្ញាប័ណ្ណ​របស់​ខ្លួន​អនុញ្ញាត ដោយ​បាន​បំផ្លាញ​បរិស្ថាន​និង​ការ​ប្រកប​របរ​ចិញ្ចឹម​ជីវិត​របស់​ ប្រជាពលរដ្ឋ​មូលដ្ឋាន។

បន្ទាប់ពីការ​ចាប់​ខ្លួន​ពួកគេ​នៅ​ថ្ងៃ​ទី​១៧​ ខែ​សីហា តុលាការ​ខេត្ត​បាន​ចោទ​សកម្មជន​ទាំង​បី​នាក់​ពី​បទ​គំរាម​បំផ្លាញ​ទ្រព្យ​សម្បត្តិ ក្រោយពី​ពួកគេ​បាន​ឡើង​លើ​សាឡង់​បូម​ខ្សាច់​របស់​ក្រុមហ៊ុន ដាយរិក អែកសេស (Direct Access) ជា ​ក្រុមហ៊ុន​មួយ​កំពុង​ដំណើរការ​បូម​ខ្សាច់​នៅ​ពាម​ក្នុង​ស្រុក​បទុម​សាគរ ហើយ​ត្រូវ​គេ​ចោទ​ថា បាន​ប្រាប់​កម្មករ​ថា ពួកគេ​នឹង​ដុត​សាឡង់​នេះ​ចោល ប្រសិនបើ​មិន​ឈប់​បូម​ខ្សាច់​ទេ​នោះ។

ប្រសិនបើ​រក​ឃើញ​កំហុស ពួកគេ​ប្រឈម​នឹង​ទោស​ជាប់​ពន្ធនាគារ​ពីរ​ឆ្នាំ។

ការចាប់​ខ្លួន​សកម្មជន​គឺ​ជា​ហេតុការណ៍​ថ្មី​បំផុត​ក្នុង​យុទ្ធនាការ​ខិតខំ​ជា ​ខ្លាំង​ជា​បន្ត​បន្ទាប់​របស់​អង្គការ​មាតា​ធម្មជាតិ​ ដើម្បី​ការពារ​បរិស្ថាន។ ចាប់​តាំងពី​ការ​បង្កើត​អង្គការ​នេះ​នៅ​ឆ្នាំ​២០១២​មក​ អង្គការ​បាន​ផ្តោត​ជា​សំខាន់​លើ​ការ​បញ្ឈប់​គម្រោង​ទំនប់​វារីអគ្គិសនី​នៅ​ តំបន់​អារ៉ែង ខេត្ត​កោះកុង។

កាលពីខែ​កុម្ភៈ រដ្ឋាភិបាល​បាន​ចាប់ខ្លួន​និង​និរទេស​លោក​ អាឡិច ហ្គន់ហ្សាឡេស ដាវីដ​សុន ជនជាតិ​អេស្ប៉ាញ​ ជា​សហ​ស្ថាបនិក​របស់​អង្គការ​មាតា​ធម្មជាតិ បន្ទាប់ពី​មិន​ទទួល​បាន​ការ​បន្ត​ទិដ្ឋាការ​ ពីព្រោះ​គាត់​និង​សកម្មជន​បាន​រាំងផ្លូវ​ក្បួន​រថយន្ត​រដ្ឋាភិបាល​មួយ​ រយៈពេល​ខ្លី​មិន​ឲ្យ​ចូល​ទៅដល់​ការដ្ឋាន​ទំនប់​វារីអគ្គិសនី​កាលពី​ឆ្នាំ​ មុន។

ក្នុងបទ​សម្ភាស​មួយ​កាលពី​សប្តាហ៍​មុន លោក ហ្គន់ហ្សាឡេស ដាវីដ​សុន ដែល​សុំ​មិន​ប្រាប់​ទីកន្លែង​ស្នាក់នៅ​បច្ចុប្បន្ន​របស់​លោក បាន​ទទួលស្គាល់​ថា វិធីសាស្ត្រ​របស់​អង្គការ​មាតា​ធម្មជាតិ​គឺ​ត្រង់​ផ្ទាល់​ជាង​អ្នក​ដែល​ធ្វើ​ ការ​ឲ្យ​អង្គការ​ក្រៅ​រដ្ឋាភិបាល​ភាគច្រើន​បំផុត​ក្នុង​ប្រទេស​កម្ពុជា។

លោក​បាន​និយាយ​ថា “ប្រសិនបើ ​អ្នក​មើល​អ្វី​ដែល​កំពុង​ធ្វើ​ ដូចជា​របាយការណ៍​សិក្ខាសាលា ការ​ធ្វើការ​ជាមួយ​រដ្ឋាភិបាល​ អ្វី​ដែល​អង្គការ​ក្រៅ​រដ្ឋាភិបាល​ជាច្រើន​បាន​និង​កំពុង​ធ្វើ ហើយ​ប្រសិន​បើ​អ្នក​ក្រឡេក​មើល​អ្វី​ដែល​ពួកគេ​ទទួល​បាន​ពិតប្រាកដ​នោះ​ អ្នក​ត្រូវ​សួរ​ថា​តើ​កិច្ចការ​ទាំងនោះ​បានផល​ពិត​ទេ។ កិច្ចការ​ទាំងនោះ​មិន​បាន​ផល​ទេ”។

លោកបាន​និយាយ​ថា សកម្មជន​ជាប់​ពន្ធនាគារ​ទាំង​នោះ បាន​ដឹង​ច្បាស់​ថា យុទ្ធនាការ​របស់​ពួកគេ​ប្រឆាំង​ក្រុមហ៊ុន​ពីរ​នេះ​នឹង​នាំ​ឲ្យ​រដ្ឋាភិបាល​ ខឹង ហើយ​អាច​ឈាន​ដល់​ការ​ចាប់ខ្លួន​ពួកគេ។

លោក​បាន​និយាយ​ថា “យើង​បាន​សម្រេច​ចិត្ត​ហើយ​ថា យើង​នឹង​មិន​ដកថយ​ទេ។ មាន​ប្រយោជន៍​ពី​ការ​ចាប់​ខ្លួន​ ប៉ុន្តែ គ្មាន​ប្រយោជន៍​សោះ​ពី​ការ​ដកថយ”។

ពិតមែន​ហើយ​ ការ​ចាប់​ខ្លួន​នេះ​បាន​បណ្តាល​ឲ្យ​មាន​ការ​គាំទ្រ​ច្រើន​សម្បើម​ចំពោះ​ អង្គការ​ក្រៅ​រដ្ឋាភិបាល​នេះ​តាម​បណ្តាញ​ព័ត៌មាន​សង្គម​ និង​ទទួល​បាន​ការ​ផ្សព្វផ្សាយ​ទូលំ​ទូលាយ​ក្នុង​បណ្តាញ​ព័ត៌មាន​ក្នុងស្រុក។

ហើយវិធីសាស្ត្រ​របស់​អង្គការ​មាតា​ធម្មជាតិ​ក្នុង​ខេត្ត​កោះកុង​ ហាក់​ដូចជា​បាន​ឲ្យ​ផល។​ ក្រុមហ៊ុន​ ដាយរិក អែកសេស​ និង​ក្រុមហ៊ុន​រេនបូ អុីនធើណេសូណល​ ជា​ក្រុមហ៊ុន​បូម​ខ្សាច់​នៅ​ពាម​អណ្តូង​ទឹក បាន​បញ្ឈប់​ការ​យក​ខ្សាច់​នៅ​ទីនោះ​ប្រហែល​ពីរ​សប្តាហ៍​មក​ហើយ។

អាជ្ញាប័ណ្ណ ​ដាយរិក អែកសេស ឥឡូវ​បាន​ផុត​កំណត់​ ហើយ​ក្រសួង​រ៉ែ​និង​ថាមពល បាន​ឲ្យ​ដឹង​តាម​រយៈ​សារ​អេឡិចត្រូនិក​កាលពី​ថ្ងៃ​អង្គារ​ថា មិនទាន់​បន្ត​អាជ្ញាប័ណ្ណ​ឲ្យ​នៅ​ឡើយ​ទេ។

លោក ទិត គុណ អាយុ​៤១ឆ្នាំ​ជា​អ្នក​នេសាទ​ម្នាក់​នៅ​ឃុំ​អណ្តូង​ទឹក​ ស្រុក​បទុម​សាគរ បាន​និយាយ​កាលពី​ថ្ងៃ​អង្គារ​ថា សាឡង់​បូម​ខ្សាច់​ឥឡូវ​នេះ​បាន​បើក​ចេញ​ពី​ពាម​អណ្តូងទឹក ទៅ​ពាម​ព្រែក​កន្ទួត​ក្បែរ​នោះ ជា​កន្លែង​ដែល​ក្រុមហ៊ុន​រេនបូ​ អុិនធើណេសូណល មាន​អាជ្ញាប័ណ្ណ​បូម​ខ្សាច់​នៅ​ទីនោះ។

ទោះជាមាន​ជោគជ័យ​តិចតួច​ក៏ដោយ​ អ្នកស្រីថា សុជា អាយុ​២៣​ឆ្នាំ​ ភរិយា​របស់​លោក​ សំណាង សកម្មជន​ជាប់​ពន្ធនាគារ​ម្នាក់​បាន​និយាយ​ថា អ្នកស្រី​នឹង​បន្ត​ចូលរួម​ការ​ធ្វើ​បាតុកម្ម​ទៀត​នៅ​ក្រុង​ខេមរភូមិន្ទ​ ខេត្ត​កោះកុង ដើម្បី​អំពាវនាវ​ឲ្យ​មាន​ការ​ដោះលែង​ប្តី​របស់​អ្នកស្រី​និង​សហការី​របស់​ គាត់។

អ្នក​ស្រី​បាន​និយាយ​នៅ​ពេល​សម្រាក​ក្នុង​ការ​តវ៉ា​កាលពី​ថ្ងៃ​អង្គារ​ថា “ខ្ញុំ ​សូម​អំពាវនាវ​ដល់​អ្នក​ដែល​ស្រឡាញ់​ធម្មជាតិ​ងើប​ឈរ​ឡើង និង​ចូលរួម​ជាមួយ​យើង​ ដើម្បី​ទាមទារ​ឲ្យ​មាន​ការ​ដោះលែង​ប្តី​ខ្ញុំ​និង​សកម្មជន​ពីរ​នាក់​ពី​ ពន្ធនាគារ”។

លោក​ ស៊ុន ដារ៉ា អភិបាលរង​ខេត្ត​បាន​និយាយ​ថា លោក​នៅតែ​គិត​ថា ការ​ចាប់​ខ្លួន​នេះ​មាន​ហេតុផល​ត្រឹម​ត្រូវ។

លោក​បាន​និយាយ​ថា “ខ្ញុំ​គិត​ថា ការ​ចាប់ខ្លួន​អ្នក​ទាំង​បី​គឺ​ត្រឹមត្រូវ ពីព្រោះ​ពួកគេ​បាន​បង្កើត​បញ្ហា​ច្រើន​ក្នុង​ខេត្ត​កោះកុង”។

លោក ហ្គន់ហ្សាឡេស ដាវីដ​សុន បាន​និយាយ​តាម​រយៈ​អុីម៉េល​កាលពី​ថ្ងៃ​អង្គារ​ថា មិន​ចំពោះ​ថា សកម្មជន​ត្រូវ​កាត់​ឲ្យ​ជាប់ទោស​ ឬ​យ៉ាងណា​នោះ​ទេ​ ការ​តាំង​ចិត្ត​របស់​ពួកគេ​មិន​រង្គោះរង្គើ​ឡើយ។

“សកម្មជន​ជាប់​ក្នុង​ពន្ធនាគារ​ពីព្រោះ​ពួកគេ​បាន​សម្រេច​ចិត្ត​ថា ដើរ​តួនាទី​ជា​ ‘អ្នក​ទោស​មនសិការ’​ ជា ​អ្វី​ដែល​ចាំបាច់​នៅ​ពេល​ឥឡូវនេះ ប្រាកដ​ណាស់​ សង្គម​កម្ពុជា​នឹង​ផ្តល់​រង្វាន់​ឲ្យ​ពួកគេ​ចំពោះ​ការ​លះបង់​របស់​ពួកគេ​ដល់ ​អនាគត​ដ៏​ខ្លី​ខាង​មុខ​នេះ”៕ និត

© 2015, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.