28 C
Phnom Penh

កង​រាជអាវុធហត្ថ​​​ព្យាយាម​​​ចាប់ខ្លួន​ក្រុម​អ្នក​តវ៉ា​ក្នុង​ខេត្ត​កោះ​កុង

ដោយ ឌឹ ខេមបូឌា ដេលី

បទវិភាគ

​បុគ្គលិក​សិទ្ធិ​មនុស្ស​ម្នាក់ និង​មន្ត្រី​ម្នាក់​បាន​និយាយ​ថា កង​រាជ​អាវុធ​ហត្ថ​បាន​ព្យាយាម​​​​​ចាប់​ ខ្លួន​អ្នក​តវ៉ា​មួយ​ក្រុម ខណៈ​ដែល​ពួក​គាត់​បាន​ហែក្បួន​កាត់​ក្រុង​ខេមរភូមិន្ទ ខេត្ត​កោះកុង កាល​ពី​ព្រឹក​ម្សិលមិញ ដើម្បី​​​ទាម​ទារ​ឲ្យ​ដោះ​លែង​សកម្មជន​កំពុង​​​ជាប់​​​ពន្ធនាគារ​​​បី​នាក់​​មកពី​អង្គការ​មាតាធម្មជាតិ​​ ជា​អង្គការ​មិន​មែន​រដ្ឋាភិបាល​ការពារ​បរិ​​​ស្ថាន។

លោក ហួ អុិន អ្នក​ឃ្លាំមើលរបស់​​​អង្គការ​សិទ្ធិ​មនុស្ស​លីកាដូ​ប្រចាំ​ខេត្ត​​នេះ ​បាន​មាន​ប្រសា​សន៍​ថា អ្នក​ភូមិ​ប្រហែល​៥០​នាក់​បាន​ធ្វើ​ការ​តវ៉ា​នៅ​ខាង​ក្រៅ​​សាលា​ដំបូង​ខេត្ត​កោះកុង ដើម្បី​​​ទាម​ទារ​ឲ្យ​ដោះលែង​​សកម្ម​​​ជន​​ទាំង​នេះ​ដែល​ត្រូវ​បាន​ចាប់​ដាក់​ពន្ធនាគារ​កាលពី​សប្ដាហ៍​មុន បន្ទាប់ពី​ពួកគាត់​​ត្រូវ​បាន​ចោទ​ប្រកាន់​ពីបទ​​គំរាម​កំហែង​បំផ្លាញ​សាឡង់​​​​ របស់​ក្រុម​ហ៊ុន​បូម​ខ្សាច់​មួយ​។

យោង​តាម​លោក ហួ អុិន បាន​ឲ្យ​ដឹង​ថា បន្ទាប់មក​​​​ក្រុមអ្នកភូមិ​បាន​ព្យាយាម​ហែក្បួន​ជុំវិញ​ផ្សារមួួ​​​យ​​​ដែល​​​នៅ​​​​ក្បែរ​នោះ។ប៉ុន្តែ​​​​នៅ​ម៉ោង​ប្រហែល​៩​និង​៣០​នាទី​ព្រឹក មន្ត្រី​កង​រាជអាវុធ​ហត្ថ​​ជាង​៣០​នាក់​ និង​​មន្ត្រី​អនុវត្ត​ច្បាប់​ផ្សេង​ទៀត​បាន​​យក​រថយន្ត​របស់​ពួកគេ​មកចត​​បិទ​ផ្លូវ។

លោក ហួ​ អុិន បាន​ថ្លែង​ថា “​ខ្ញុំ​បានឃើញ​រថយន្ត​ភីកអាប់ និង​ម៉ូតូ​​ជាច្រើន​គ្រឿង​​ដឹក​​កង​រាជអាវុធ​ហត្ថ​ប្រហែល​២០​នាក់​មក​ដល់ ​ហើយ​​បិទ​ផ្លូវ​​​ដែល​អ្នក​ភូមិ​ហែក្បួន។ បន្ទាប់​មក ពួកគេ​បាន​ប៉ុនប៉ង​​​ចាប់​ស្ត្រី​ពីរ​នាក់​​ ហើយ​​រុញ​ចូល​ក្នុង​រថយន្ត​តែ​ម្ដង​”។

លោក​បាន​បន្ថែម​ថា “​ស្ត្រី​ម្នាក់​ទៀត​បាន​ព្យាយាម​​ចាប់​ទាញ​ស្ត្រី​ទាំង​ពីរ​នាក់​នោះ​ចេញ​​​ពី​ដៃ​​កង​រាជអាវុធហត្ថ​ ហើយ​កង​រាជ​​​អាវុធហត្ថ​ម្នាក់​បាន​ដាល់​ក្បាល​ស្ត្រីរូបនេះ​ជាច្រើន​ដៃ​។ បន្ទាប់​មក​ពួកគេ​បាន​ដោះ​​​លែង​​​​ស្ត្រីនោះវិញ ​​បន្ទាប់ពី​អ្នក​តវ៉ា​ទាំង​អស់​​​បាន​​មក​តតាំង​ជាមួយ​កង​រាជអាវុធហត្ថ​​”។

​លោក ហួ អិុន បាន​ថ្លែងទៀត​​ថា ​​ប្រហែល​​​​៣០​នាទី​បន្ទាប់​ពី​ការ​ប៉ះទង្គិច​គ្នា​ នគរ​បាល​បាន​អនុញ្ញាត​ឲ្យ​អ្នក​តវ៉ា​ទាំងនោះ​ត្រឡប់​ទៅ​កាន់តុលាការ​​​វិញ​​​ ​​​​ដើម្បី​បន្ត​ការតវ៉ារបស់ខ្លួន​។ លោក​បាន​បន្ថែម​ថា ​សាលា​ក្រុង​​បាន​ចេញ​លិខិត​​មួយ​ច្បាប់​កាលពី​ថ្ងៃពុធ​ ហាម​អ្នក​តវ៉ា​ទាំង​អស់​មិន​ឲ្យ​​ហែក្បួន​ឡើយ។

លោក ប៉ែន ប៊ុនឈួយ អភិបាល​រង​ក្រុង​ខេមរភូមិន្ទ​បាន​អះអាង​ថា ​លិខិត​នេះ​​មាន​ខ្លឹមសារ​ថា អ្នក​តវ៉ា​ទាំង​អស់​នឹង​មិន​ត្រូវ​អនុញ្ញាត​ឲ្យ​ហែក្បួន​ទេ​​​ ហើយ​អាច​ធ្វើ​ការ​តវ៉ា​​នៅ​តុលាការបាន​ ពីព្រោះ​​ វាងាយ​ស្រួល​ក្នុង​ការ​ការ​ពារ​ពួកគាត់​។ លោក​បាន​ថ្លែង​ថា នគរ​បាល​បាន​ប៉ុនប៉ង​​ចាប់​ខ្លួន​ស្ត្រី​ទាំង​ពីរ​នាក់​នេះ ពីព្រោះ​ពួកគាត់​មិន​ស្ដាប់​​​តាម​ខ្លឹមសារ​​លិខិត​​របស់​សាលាក្រុង​​។

លោក ប៊ុនឈួយ បាន​ថ្លែង​ថា “​យើង​បាន​ដោះលែង​ពួកគាត់វិញ ពីព្រោះ​ពួកគាត់មិន​បាន​ប្រព្រឹត្ត​បទ​ឧក្រិដ្ឋ​ឡើយ​។ យើង​គ្រាន់​តែ​ណែនាំ​ពួកគាត់​ប៉ុណ្ណោះ ហើយ​បាន​អនុ​​​ញ្ញាត​​​​ឲ្យ​ពួកគាត់ទៅ​ចូល​រួម​ការ​តវ៉ា​វិញ”។

លោក​បាន​បន្ថែម​ថា “​យើង​នឹងរង់ចាំ​មើល​ថា តើ​ពួកគាត់ហែក្បួន​នៅ​ថ្ងៃ​ស្អែក​​​ឬ​​​អត់​។ ប្រសិន​បើ​ពួកគាត់ហែក្បួន​ ហើយ​បង្ក​ការ​ញុះញង់​នោះ ប្រហែល​ជា​យើង​ចាប់​ខ្លួន​ពួកគាត់មិន​ខាន​”៕ សារុន​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស