កាលពីម្សិលមិញ លោក ហោ ណាំហុង រដ្ឋមន្ត្រីក្រសួងការបរទេសបានលើកឡើងថា គណបក្សសង្គ្រោះជាតិបាននិងកំពុងទទួលជោគជ័យយ៉ាងខ្លាំងនៅក្នុងយុទ្ធនាការនាពេលថ្មីៗរបស់ខ្លួនក្នុងការប្រឆាំងការឈ្លានពានចូលទឹកដីកម្ពុជាពីសំណាក់វៀតណាម ដោយសារគ្មានបញ្ហាផ្សេងកើតឡើងនៅក្នុងប្រទេស។
ពេលថ្លែងបន្ទាប់ពីធ្វើបាឋកថានៅវិទ្យាស្ថានបច្ចេកវិទ្យាកម្ពុជា លោក ហោ ណាំហុង បានលើកឡើងថា លោកមានអារម្មណ៍ធុញទ្រាន់ចំពោះជម្លោះមិនទាន់បានដោះស្រាយក្នុងពេលថ្មីៗរវាងរដ្ឋាភិបាល និងគណបក្សសង្គ្រោះជាតិពាក់ព័ន្ធបញ្ហាព្រំដែន ហើយសង្ឃឹមថា វានឹងបញ្ចប់ឆាប់ៗ។
លោកបានមានប្រសាសន៍ដោយសំដៅទៅលើអាយ៉ៃឆ្លើយឆ្លងថា ”កុំឲ្យយកបញ្ហាព្រំដែនធ្វើជាឆាកល្ខោន កុំឲ្យធ្វើអាយ៉ៃឆ្លើយឆ្លង”។
លោកបានលើកឡើងទៀតថា ហេតុផល តែមួយគត់ដែលគណបក្សសង្គ្រោះជាតិចំណាយពេលយ៉ាងយូរលើបញ្ហាព្រំដែន គឺដោយសារវាគឺជាបញ្ហាតែមួយគត់នៅសេសសល់ក្នុងប្រទេសដែលពួកគេអាចវាយប្រហារគណបក្សប្រជាជនកម្ពុជា។
លោកបានមានប្រសាសន៍ថា”ដោយសារបញ្ហាអភិវឌ្ឍសេដ្ឋកិច្ច និងសង្គមគេមើលឃើញទាំងអស់គ្នា ប្រជាជនឃើញទាំងអស់ បរទេសក៏ឃើញទាំងអស់ គេអត់មានលេស អីវ៉ៃប្រហាររដ្ឋាភិបាលដូច្នេះមានតែបញ្ហាហ្នឹង [ព្រំដែន ] មួយ បានទើបយកមកធ្វើជាប្រធានបទឃោសនាបោះឆ្នោត រកសន្លឹកឆ្នោត”។
លោកបានបន្ថែមទៀតថា “ ខ្ញុំសង្ឃឹមថា ប៉ុន្មានថ្ងៃប៉ុន្មានខែទៅមុខទៀត ទាំងអស់គ្នា នៅក្នុងស្ថាប័ននយោបាយផ្សេង នឹងភ្លឺភ្នែកអំពីអ្វីដែលរដ្ឋាភិបាលបានធ្វើ”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិមិនអាចទាក់ទងបានទេកាលពីម្សិលមិញ។
ចាប់តាំងពីខែមិថុនាមក គណបក្សសង្គ្រោះ ជាតិបានដឹកនាំយុទ្ធនាការមួយដើម្បីបង្ខូចការកំណត់ព្រំដែនរបស់រដ្ឋាភិបាល ដោយចោទប្រកាន់រដ្ឋាភិបាលថា បានសមគំនិតនៅ ក្នុងការឈ្លានពានចូលទឹកដីកម្ពុជាពីសំណាក់វៀតណាម ហើយក្នុងពេលថ្មីៗនេះ បានប្រើផែនទីមិនត្រឹមត្រូវនៅក្នុងការពិភាក្សាជាមួយវៀតណាម។
យុទ្ធនាការនេះបានធ្វើឲ្យលោកនាយករដ្ឋមន្ត្រី ហ៊ុន សែន ខឹងយ៉ាងខ្លាំង ដោយធ្វើឲ្យលោក សម រង្ស៊ី មេដឹកនាំគណបក្សប្រឆំាង បានលើកឡើងនៅក្នុងខែនេះថា លោកនឹងលុបចោលយុទ្ធនាការនេះ។ ទោះជាយ៉ាងណា ពេលថ្លែងទៅកាន់ពលរដ្ឋខ្មែរនៅក្នុងទីក្រុងស៊ីដនីអំឡុងការចុះបំពេញទស្សនកិច្ចក្នុងប្រទេសអូស្ត្រាលីកាលពីថ្ងៃសៅរ៍ លោក សម រង្ស៊ី មិនទំនងជាបំភ្លេចបញ្ហានេះទេ។
លោកបានមានប្រសាសន៍ថា “បងប្អូន អាជ្ញាធរគេថា យួនអត់យកដីខ្មែរទេ បងប្អូនចង់ជឿ ជឿទៅ។ តែ យើង គណបក្សសង្គ្រោះ ជាតិ យើងជឿប្រជារាស្ត្រ ពលរដ្ឋដែលរស់នៅតាមព្រំដែន ជាពិសេសកសិករខ្មែរ។ ប្រជារាស្ត្រ លោកមិនទៅពិនិត្យរឿងដោយមិនមែនជាការពិតទេ លោករងគ្រោះ។ ពួកគាត់ជាសាក្សីនិងភ័ស្តុតាងរស់”។ លោកបានមានប្រសាសន៍បន្ថែមថា ”ដូច្នេះដរាបណា មានប្រជាពលរដ្ឋត្អូញត្អែរយំស្រែកថាយួនយកដីគាត់ យើងត្រូវតែការពារប្រជាពលរដ្ឋ ខ្មែររបស់យើង ដែលរងគ្រោះដោយសារយួនឈ្លានពាន”៕ ស៊ុយឈាង