29 C
Phnom Penh

បុរសម្នាក់កាប់​​​់ប្រពន្ធរបស់​​​ខ្លួន​​​រហូត​​​ដល់​​​ស្លាប់​​​ រួច​​​ធ្វើអត្ត​​​ឃាត​​​ដោយសារ​តែ​​​ជម្លោះ​រឿង​នំ​អន្សម​

ដោយ ឌឹ ខេមបូឌា ដេលី

បទវិភាគ

​នគរ​បាល​បាន​ឲ្យ​ដឹង​កាលពី​ម្សិលមិញ​ថា បុរស​ម្នាក​​​់​រស់​​​នៅ​​​ក្នុង​ខេត្ត​កំពង់ធំ​បាន​សម្លាប់​​ប្រពន្ធ​របស់​ខ្លួន ហើយ​បន្ទាប់​មក​បាន​​សម្លាប់​ខ្លួន​ឯង​កាលពី​យប់​ថ្ងៃ​សុក្រ បន្ទាប់ពី​ពួកគេ​​ឈ្លោះ​​​​គ្នា​រឿង​នំ​អន្សម​​។

​លោក គឹម ចាន់រិទ្ធ ​នាយ​ប៉ុស្តិ៍​ឃុំ​ប្រឡាយ​ ស្រុក​ស្ទោង​បាន​មាន​ប្រសាសន៍​ថា ​ជម្លោះ​នេះ​បាន​កើត​ឡើង​នៅ​ម៉ោង​ប្រហែល​៦​ល្ងាច​​​​ថ្ងៃ​សុក្រ​​​ នៅ​ពេល​ សុន ថាំ ​អាយុ​៤៣​ឆ្នាំ និង​ប្រពន្ធ​របស់​ខ្លួន​ឈ្មោះ សាត នី អាយុ​២៨​ឆ្នាំ ​​បាន​ត្រឡប់​មក​​ផ្ទះវិញ​ពី​សែន​​ក្បាល​ទឹក​នៅ​​ផ្ទះ​អ្នក​ជិត​ខាង​។

​​យោង​តាម​លោក ចាន់រិទ្ធ បាន​ឲ្យ​ដឹង​ថា អ្នក​ជិត​ខាង​បាន​​ឲ្យ​​​នំអន្សម​មួយ​កំណាត់​ដល់​កូន​ប្រុស​អាយុ​៣​ឆ្នាំ និង​កូន​​ស្រី​​អាយុ​៧​ឆ្នាំ​របស់​ប្ដី​ប្រពន្ធ​នេះ ប៉ុន្តែ​កូនៗ​ទាំង​នោះ​មិន​​ញ៉ាំ​នំអន្សម​នោះ​ទេ ដូច្នេះ​អ្នកស្រី សាត នី ក៏​​​យក​វា​ហូប​ទៅ​។

លោក​បាន​ថ្លែង​ថា “​​បុរស​ជា​ប្ដី​បាន​ចាប់​ដៃ​​ប្រពន្ធ​ ហើយ​សួរ​ថា ‘ ហេតុ​អ្វី​បាន​ជា​ឯង​ហូប​វា? ហេតុ​អ្វី​មិន​ទុក​ឲ្យ​កូន?’”។ លោក​បាន​​​​បន្ថែម​ថា សុន ថាំ ​បាន​គ្រវែង​នំ​ដែល​នៅ​សល់​នោះ​ចោល​ទៅ​ដី បណ្ដាល​ឲ្យ​ប្ដី​ប្រពន្ធ​នេះ​​ប្រើពាក្យសម្តី​ធ្ងន់ៗ​ដាក់​គ្នា​យ៉ាង​ខ្លាំង​។

លោក ចាន់រិទ្ធ បាន​ថ្លែង​ថា ទីបំផុត​នៅ​​​ពេល​​​​ពួកគេ​ឈប់​ឈ្លោះ​គ្នា សុន ថាំ បាន​​ប្រញាប់​ ទៅ​យក​កាំបិត​ផ្គាក់​​ ហើយ​​​​បន្ទាប់​មក​​​កាប់​ប្រពន្ធ​របស់​ខ្លួន​រហូត​ដល់​ស្លាប់ ដោយ​កាប់​ត្រូវ​​​ត្រង់​ក្បាល​ និង​ដៃ​យ៉ាង​ដំណំ។

លោក​បាន​ថ្លែង​ថា “​បុរស​ជា​ប្ដី​​បាន​កាប់​ប្រពន្ធ​របស់​ខ្លួន​បួន​កាំបិត​ត្រង់​ក្បាល ត្រូវ​​​​ដៃទាំងពីរ​​​​ និង​ត្រូវ​ថ្គាម​ខាង​ឆ្វេង​។ ជន​រង​​​គ្រោះ​​​​បាន​ស្លាប់​​ភ្លាមៗ​”។ លោក​បាន​បន្ថែម​ថា “​ខ្ញុំធ្វើ​ជា​​​នគរ​បាល​២៣​ឆ្នាំ​មក​ហើយ ខ្ញុំ​មិន​ដែល​ឃើញ​ករណី​​បែប​នេះ​ទេ​”។

លោក វ៉ន សុភ័ណ អធិការ​រងនគរ​បាល​ស្រុក​បាន​មាន​ប្រសាសន៍​ថា បន្ទាប់ពី​សម្លាប់​ប្រពន្ធរបស់ខ្លួន​រួច​ សុន ថាំ​ បាន​រត់​ទៅ​លាក់​ខ្លួន​នៅ​ផ្ទះ​អ្នក​ជិត​ខាង​ដើម្បី​គេច​ពី​នគរ​បាល​ដែល​​គេ​​​​បាន​​ទូរស័ព្ទ​ហៅ​ឲ្យ​​​មក​កន្លែង​កើត​ហេតុ​។

លោក សុភ័ណ បាន​ថ្លែង​ថា នៅ​ពេល​​ម្ចាស់​ផ្ទះ​បង្ខំ​ឲ្យ​ចាក​ចេញ សុន ថាំ បាន​រត់​ទៅ​ព្រៃ​ក្បែរ​នោះ ដោយ​យក​កាំបិត​ទៅ​ជាមួយ​ដើម្បី​​​ទុក​កាប់​នគរ​បាល​ដែល​​បាន​បាញ់​ជន​​​នេះ​មួយគ្រាប់​ចំ​ជើង​។ លោក​បាន​ថ្លែង​ថា ទោះ​យ៉ាង​ណា បុរស​រូប​នេះ​បាន​​​​រត់​គេច​ខ្លួន​ចូលក្នុង​​ព្រៃ​​ចម្ងាយ​ប្រហែល​​១៥០​ម៉ែត្រ​ ដែល​នៅ​ទីនោះ​​ ជននេះ​បាន​ចង​ក​សម្លាប់​ខ្លួន​នឹង​មែក​ឈើ​​នៅម៉ោង​ប្រហែល​១០​និង​១៥នាទីយប់​។

​អធិការ​រង​នគរ​បាល​រូប​នេះ​បា​ន​បន្ថែម​ថា សុន ​ថាំ​ គឺ​​​ជាមនុស្ស​​​ដែល​​​​អាជ្ញាធរ​កំពុង​តាម​ចាប់​ខ្លួន​​នៅ​ក្នុង​ស្រុក​ប្រាសាទ​បល្ល័ង្ក​​ក្បែរ​នោះ ពីបទ​សម្លាប់​ម្ដាយ​មីង​របស់​ខ្លួន​ ប៉ុន្តែ​ថា ​លោក​មិន​ដឹង​ថា តើ​បទ​​ឧក្រិដ្ឋ​នោះ​​កើត​ឡើង​នៅ​ពេល​​​​ណា​នោះ​ឡើយ​​។

លោក​បាន​ថ្លែង​ថា បុរស​រូប​នេះ​​បាន​ជួប​អ្នកស្រី សាត នី ខណៈ​ពេល​ធ្វើ​ការ​នៅ​ប្រទេស​​​​ថៃ ដែល​​ជននេះ​បាន​​រត់​ទៅ​ទីនោះ​បន្ទាប់​​​ពី​​​ប្រព្រឹត្ត​​អំពើ​មនុស្ស​ឃាត​លើក​ទី១​។

លោក​បាន​​បន្ថែម​ថា “​​ប្រសិន​បើ​​ជន​នេះ​នៅ​រស់​ ក៏​ត្រូវ​ប្រឈម​នឹង​​វិធាន​ការ​ច្បាប់​ដែរ​៕ សារុន​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស