មន្ត្រីនគរបាលម្នាក់បានឲ្យដឹងកាលពីម្សិលមិញថា នៅក្នុងកិច្ចប្រជុំមួយស្តីពីបញ្ហាព្រំដែននៅក្នុងទីក្រុងបាងកកកាលពីសប្តាហ៍ មុន លោក ស ខេង រដ្ឋមន្ត្រីក្រសួងមហាផ្ទៃ និងសមភាគីថៃរបស់លោកបានព្រមព្រៀងធ្វើការជាមួយគ្នាដើម្បីទប់ស្កាត់អន្តោប្រវេសន៍ ខុសច្បាប់ និងការជួញដូរមនុស្សហើយបានពិភាក្សាអំពីការវិវឌ្ឍទៅមុខនៃផ្លូវដែកដែលតភ្ជាប់ប្រទេសទាំងពីរ។
លោក គៀត ច័ន្ទថារិទ្ធ អ្នកនាំពាក្យនគរបាលជាតិបានមានប្រសាសន៍ទាក់ទងនឹងកិច្ចប្រជុំរយៈពេលបីថ្ងៃជាមួយលោក អនុពង្ស ផៅចិន្តា រដ្ឋមន្ត្រីក្រសួងមហាផ្ទៃថៃ ដែលបញ្ចប់កាលពីថ្ងៃសុក្រថា “លោក ស ខេង បាន មានប្រសាសន៍នៅក្នុងកិច្ចប្រជុំថា អាជ្ញាធរក្នុងប្រទេសទាំងពីរកំពុងធ្វើការជាមួយគ្នាដើម្បីចាត់វិធានការប្រឆាំងការជួញដូរមនុស្ស និងពលករចំណាកស្រុក ដែលឆ្លងកាត់ព្រំដែនដោយខុសច្បាប់”។
ឧត្តមសេនីយ៍ឯក គៀត ច័ន្ទថារិទ្ធ បានលើកឡើងទៀតថា រដ្ឋមន្ត្រីទាំងពីរបានព្រមព្រៀងគ្នាចាប់ផ្តើមចេញ “ឯកសារ” ដល់ពលករខ្មែរចំណាកស្រុកដែលឆ្លងកាត់ព្រំដែនទៅប្រទេសថៃរាល់ថ្ងៃ។ លោកមិនបានប្រាប់ លម្អិតពីគោលបំណងនៃការចេញឯកសារនេះទេ ប៉ុន្តែយោងតាមសេចក្តីថ្លែងការណ៍ដែលចេញកាលពីថ្ងៃព្រហស្បតិ៍ ក្រសួងមហា ផ្ទៃនឹងចាប់ផ្តើមចេញឯកសារធ្វើដំណើរពិសេសដល់ពលរដ្ឋខ្មែរដែលធ្វើការស្របច្បាប់នៅក្រៅប្រទេសក្នុងពេលឆាប់ៗ។
ឧត្តមសេនីយ៍ឯក គៀត ច័ន្ទថារិទ្ធ បានលើក ឡើងទៀតថា រដ្ឋមន្ត្រីទាំងពីរក៏បានពិភាក្សាអំពីផ្លូវដែកមួយខ្សែដែលទីបំផុតនឹងតភ្ជាប់រាជធានីភ្នំពេញ និងទីក្រុងបាងកកផងដែរ។
លោកបានមានប្រសាសន៍ថា “ភាគីទាំងពីរ បានព្រមព្រៀងបញ្ចប់ការសាងសង់ផ្លូវដែកតភ្ជាប់ប្រទេសថៃ និងប្រទេសកម្ពុជាឲ្យបានឆាប់តាមដែលអាចធ្វើទៅបាន។ភាគីកម្ពុជាកំពុងជំរុញឲ្យមានការសាងសង់បញ្ចប់ផ្លូវដែកផ្នែកចុងក្រោយដែលមានប្រវែងប្រហែល១០គីឡូម៉ែត្រចន្លោះខេត្តបាត់ដំបងនិងក្រុងប៉ោយប៉ែត ខេត្តបន្ទាយមានជ័យ”៕ស៊ុយឈាង