យោងតាមក្រសួងការបរទេសបានឲ្យដឹងថា បុរសបួននាក់បានត្រឡប់មកប្រទេសកម្ពុជាវិញកាលពីល្ងាចថ្ងៃអាទិត្យ បន្ទាប់ពីបានរត់គេចខ្លួនពីកប៉ាល់ទំនិញមួយគ្រឿងដែលចតនៅប្រទេសហ្វីលីពីន ហើយបានទាក់ទងស្ថានទូតកម្ពុជាប្រចាំក្រុងម៉ានីលកាលពីសប្តាហ៍មុន។
លោក ជុំ សុន្ទរី អ្នកនាំពាក្យក្រសួងការបរទេស បានមានប្រសាសន៍កាលពីថ្ងៃអាទិត្យថា បុរសទាំងនោះបានប្រាប់មន្ត្រីស្ថានទូតនៅថ្ងៃព្រហស្បតិ៍ថា ពួកខ្លួនបានទទួលរងការរំលោភបំពាន ធ្វើការហួសកម្លាំង និងទទួលបានប្រាក់តិចតួចនៅលើកប៉ាល់ប្លូ អិមភឺរើ១ (Blue Emperor 1)។
លោកបាននិយាយថា “អ្នកទាំងនោះត្រូវបានគេបង្ខំឲ្យធ្វើការ បើទោះជាពួកគេឈឺក៏ដោយ ហើយមិនបានទទួលប្រាក់ខែដូចដែលបានសន្យាឲ្យនោះទេ”។
លោក សុន្ទរី បាននិយាយថា នៅពេលទទួលបានពាក្យបណ្តឹងរបស់ពួកគេភ្លាម ស្ថានទូតបានផ្តល់កន្លែងស្នាក់នៅដល់អ្នកទាំងបួននាក់ និងបានទាក់ទងក្រុមហ៊ុន New Unite HK Marine Shipping ដែលជាម្ចាស់កប៉ាល់ និងមានការិយាល័យមួយក្នុងក្រុងម៉ានីល។
លោកបាននិយាយថា “ក្រុមហ៊ុនដែលគ្រប់គ្រងកប៉ាល់នេះបានយល់ព្រមចេញថ្លៃសំបុត្រយន្តហោះ”។
បុរសទាំងបួននាក់មានឈ្មោះ អិន អ៊ន អាយុ២១ឆ្នាំ អេង សុជាតិ អាយុ៣៥ឆ្នាំ សំ ចំរើន អាយុ២៨ឆ្នាំ និង មិត្ត តុលា អាយុ២៨ឆ្នាំ បានត្រឡប់មកដល់ក្រុងភ្នំពេញនៅម៉ោង៥ល្ងាចថ្ងៃអាទិត្យ។
ទាក់ទងតាមទូរស័ព្ទកាលពីយប់មិញ លោក អ៊ន បាននិយាយថា គាត់បានធ្វើការលើកប៉ាល់ ប្លូ អិមភឺរើ១ នៅដើមខែនេះ ហើយត្រូវបានប្រាប់អំពីលក្ខខណ្ឌការងារលំបាកខ្លាំងដោយពលរដ្ឋខ្មែរបួននាក់ផ្សេងទៀតនៅលើកប៉ាល់នោះ ដែលបានធ្វើការយ៉ាងហោចណាស់ប្រាំមួយខែមកហើយ។ គាត់បាននិយាយថា ពលរដ្ឋខ្មែរទី៥បានរត់គេចពីកប៉ាល់នេះនៅថ្ងៃទី១៣ខែសីហា។
លោក អ៊ន បាននិយាយថា ប្រុសៗនៅប្រទេសខ្មែរនៅពេលពួកគេដាក់ពាក្យធ្វើការឲ្យក្រុមហ៊ុន New Unite HK Marine Shipping អ្នកទាំងនោះត្រូវបានគេប្រាប់ថា នឹងទទួលបានការបណ្តុះបណ្តាលធ្វើជាជាងម៉ាស៊ីន ឬ សមាជិកក្រុមនាវិក ដោយមានប្រាក់ខែរវាង៥០០ដុល្លារដល់១.០០០ដុល្លារ។
លោកបាននិយាយថា “យើងត្រូវទៅ[ជាន់ក្រោម] ហើយធ្វើការយ៉ាងលំបាក លើករបស់ធ្ងន់ៗ និងប្រឹងធ្វើការ ទោះបីពេលយើងឈឺក៏ដោយ ហើយគេចាត់យើងឲ្យសម្អាតបង្គន់។ វាផ្ទុយនឹងអ្វីដែលខ្ញុំបានរំពឹងទុក នៅពេលខ្ញុំបានចាកចេញពីប្រទេសកម្ពុជា”។
លោក អ៊ន បាននិយាយថា ក្រុមហ៊ុននេះមានលេសច្រើនដែលខ្លួនមិនអាចបើកប្រាក់ខែពេញលេញនិងទាន់ពេលដែលបានសន្យាឲ្យលោកនិងជនជាតិខ្មែរផ្សេងទៀត។ គាត់បាននិយាយថា គាត់និងបីនាក់ផ្សេងទៀតបានរត់ចេញពីកប៉ាល់ ដែលចតនៅកំពង់ផែស៊ូប៊ិក ចម្ងាយប្រហែល៨០គីឡូម៉ែត្រពីក្រុងម៉ានីល នៅព្រឹកថ្ងៃព្រហស្បតិ៍។
លោកបានឲ្យដឹងទៀតថា “យើងបានចាប់ផ្តើមគេចខ្លួនពីកប៉ាល់នោះនៅម៉ោង១០និង៣០នាទីព្រឹក បន្ទាប់ពីទទួលបានលិខិតឆ្លងដែនរបស់យើង” ហើយបានធ្វើដំណើរទៅស្ថានទូតដោយថ្មើរជើង។
លោកបាននិយាយថា “យើងបានរត់ចេញ គ្នាយើងខ្លះស្លៀកខោអាវទ្រនាប់គ្មានអាវក្រៅ ហើយបុរសចិនម្នាក់បានរត់តាមយើង។ ប៉ូលិសបានឃាត់យើង និងបានសួរថាតើមានរឿងអ្វី យើងបាននិយាយថា ‘ពួកគេបោកយើងនិងបំពានកិច្ចសន្យាការងារ។ យើងធ្វើការយ៉ាងពិបាក ប៉ុន្តែមិនទទួលបានប្រាក់ទេ ហើយពួកគេអនុញ្ញាតឲ្យយើងទៅ”៕ និត (រាយការណ៍បន្ថែមដោយ Colin Meyn)