ប្រជាពលរដ្ឋចំនួន៣៥គ្រួសារមកពីខេត្តកណ្តាលបានសរសេរទៅគណបក្សសង្គ្រោះជាតិ ដោយស្នើសុំឲ្យប្រគល់ប្រាក់ជាង១.៣០០ដុល្លារ ដែលពួកគេបានឲ្យទៅគណបក្សនេះ ដើម្បីគាំទ្រការបង្កើតស្ថានីយទូរទស្សន៍របស់ខ្លួន ដោយលើកឡើងពីកង្វល់អំពីគៃបន្លំ។
កាលពីឆ្នាំមុន គណបក្សសង្គ្រោះជាតិទទួលបានការអនុញ្ញាតឲ្យបង្កើតស្ថានីយទូរទស្សន៍បក្សប្រឆាំងដែលមានជាលើកដំបូង ហើយតាំងពីពេលនោះមកបានចាប់ផ្តើមរៃអង្គាសប្រាក់រាប់លានដុល្លារ ដែលខ្លួននិយាយថា ត្រូវការចាប់ផ្តើមការផ្សាយនៅចុងឆ្នាំនេះ។
ដំបូងឡើយ គណបក្សនេះមានផែនការរៃប្រាក់តាមរយៈការចេញភាគហ៊ុនដោយក្រុមហ៊ុនឯករាជ្យមួយ ប៉ុន្តែ បទប្បញ្ញត្តិហិរញ្ញវត្ថុបានរារាំងវិធីនេះ បង្ខំឲ្យពឹងផ្អែកលើអំណោយពីប្រជាជនក្នុងប្រទេសកម្ពុជានិងក្រៅប្រទេសជាជំនួសវិញ។
ក្នុងលិខិតមួយច្បាប់ផ្ញើទៅគណបក្សសង្គ្រោះជាតិ បុរសម្នាក់ឈ្មោះ ស សុគុណ បាននិយាយថា គាត់តំណាងឲ្យប្រជាជនជាច្រើនគ្រួសារមានកង្វល់យ៉ាងខ្លាំងចំពោះ ការចាត់ចែងវិភាគទានរបស់គណបក្សនេះ។
លិខិតនោះនិយាយថា “ក្នុងនាមប្រជាជន៣៥គ្រួសារនៅស្រុកកណ្តាលស្ទឹង ខេត្តកណ្តាល សូមស្នើដកប្រាក់៥.៣៥០.០០០រៀល [ប្រហែល១.៣៤០ដុល្លារ] ដែលពួកយើងបានធ្វើវិភាគទានចូលមូលនិធិបង្កើតទូរទស្សន៍ព្រះអាទិត្យកាលពីពាក់កណ្តាលខែមិថុនាកន្លងមក”។
លិខិតនោះបានឲ្យដឹងទៀតថា ក្រុមគ្រួសារទាំងនេះបានអានសេចក្តីរាយការណ៍ព័ត៌មានមួយចំនួនដែលមានប្រជាជនតវ៉ាអំពីកង្វះតម្លាភាពពីគណបក្សសង្គ្រោះជាតិក្នុងការចាត់ចែងប្រាក់នោះ ហើយថា ក្នុងសេចក្តីរាយការណ៍នោះ គណបក្សប្រឆាំងមិនបានបំភ្លឺអំពីការតវ៉ានោះទេ។
លិខិតបានសន្និដ្ឋានថា “យើងសង្ស័យថា ព័ត៌មានដែលបានផ្សាយអំពីអំពើពុករលួយនិងការកិបកេងលុយមូលនិធិកន្លងមកនោះជាការពិត ដូច្នេះហើយប្រជាពលរដ្ឋ៣៥គ្រួសារនៅស្រុកកណ្តាលស្ទឹងស្នើសុំដកប្រាក់ដែលយើងបានបដិភាគនោះមកវិញ”។
លោក អេង ឆៃអ៊ាង តំណាងរាស្ត្រគណបក្សសង្គ្រោះជាតិបាននិយាយថា លោកសង្ស័យអំពីការលេងល្បិច ប៉ុន្តែថា គណបក្សនឹងប្រគល់ប្រាក់ឲ្យវិញប្រសិនបើគ្រួសារទាំងនោះមានបង្កាន់ដៃ។
លោក ឆៃអ៊ាង បាននិយាយថា “មកដល់ពេលនេះ យើងមិនទាន់ទទួលបានលិខិតនេះទេ។ យើងគ្រាន់តែបានឃើញវាតាមរយៈបណ្តាញព័ត៌មានគាំទ្រគណបក្សប្រជាជនកម្ពុជាប៉ុណ្ណោះ ប៉ុន្តែ យើងបានដឹងយូរមកហើយថា ពួកគេមានផែនការធ្វើរឿងនេះ”។
លោកបានបន្ថែមថា “ហេតុដូច្នេះហើយ យើងបានរៀបចំឲ្យមានបង្កាន់ដៃត្រឹមត្រូវ”។
“ខ្ញុំសុំឲ្យបងប្អូនប្រជាជនបង្ហាញបង្កាន់ដៃរបស់ខ្លួនពីការចូលរួមវិភាគទានប្រាក់ ហើយយើងនឹងពិនិត្យផ្ទៀងផ្ទាត់។ ប្រសិនបើជាបង្កាន់ដៃពិតប្រាកដមែននោះ ហើយពួកគេចង់ដក[ប្រាក់]វិញ យើងនឹងប្រគល់ឲ្យវិញ”៕ និត