នគរបាលបានឲ្យដឹងកាលពីម្សិលមិញថា មនុស្សបួននាក់ដែលក្លែងបន្លំជាបុគ្គលិកអង្គការមិនមែនរដ្ឋាភិបាលការពារបរិស្ថាន និងកងរាជអាវុធហត្ថ ត្រូវបានចាប់ខ្លួននៅក្នុងស្រុកកែវសីមា ខេត្តមណ្ឌលគិរីកាលពីថ្ងៃសៅរ៍ ពេលព្យាយាមកំហែងទារប្រាក់ពីអ្នកភូមិដែលបានកាប់ឈើដោយគំរាមទូរស័ព្ទហៅអាជ្ញាធរ។
លោក ស៊ុំ សុភ័ណ នាយការិយាល័យនគរបាលព្រហ្មទណ្ឌកម្រិតស្រាលខេត្តនេះបានឲ្យដឹងថា ឈ្មោះ ប៉ិន ស៊ីណូ អាយុ៤៧ឆ្នាំ និង ឈ្មោះ ថាន់ កុសល អាយុ៣០ឆ្នាំ ដែលប្រាប់ជនរងគ្រោះថា ពួកគេធ្វើការឲ្យអង្គការមិនមែនរដ្ឋាភិបាលមួយឈ្មោះអង្គការការពារព្រៃឈើ និងអភិវឌ្ឍន៍ធនធានធម្មជាតិ ត្រូវបានចាប់ខ្លួនជាមួយឈ្មោះ ស៊ីម ទូច អាយុ៤៦ឆ្នាំ និងឈ្មោះ ជិន គា អាយុ៥២ឆ្នាំ ដែល សុទ្ធតែជាអ្នកនាំផ្លូវ។
លោកបានមានប្រសាសន៍ថា ”មនុស្សទាំងបួននាក់នេះត្រូវបានទាហានចាប់ខ្លួនកាលពីថ្ងៃទី២៩ [ខែសីហា] នៅវេលាម៉ោង៨និង៤០នាទីព្រឹក ខណៈពួកគេកំពុងកំហែង ទារប្រាក់ពីអ្នកភូមិដែលបានកាប់ឈើយកទៅសាងសង់ផ្ទះរបស់ខ្លួន ហើយបន្ទាប់មកពួកគេត្រូវបានប្រគល់មកឲ្យនគរបាលរបស់យើងនៅថ្ងៃទី៣០”។
លោកបានលើកឡើងទៀតថា ប៉ិន ស៊ីណូ និង ថាន់ កុសល ដែលជាមេក្រុមក្នុងប្រតិបត្តិការ នេះ ត្រូវបានចាប់ខ្លួនពីបទកំហែងទារប្រាក់ រីឯអ្នកនាំផ្លូវពីរនាក់ទៀតត្រូវបានចាប់ខ្លួនពីបទសមគំនិតក្នុងការកំហែងទារប្រាក់ពីអ្នកភូមិ។
លោកបានមានប្រសាសន៍បន្ថែមថា ”ពួក គេបានសារភាពថា ពិតជាបានកំហែងទារប្រាក់ពីអ្នកភូមិពីរបីលើកមែន ក្នុងនោះរួមទាំងអ្នកភូមិដែលដឹកឈើតាមម៉ូតូ និងរទេះផងដែរ ហើយជួនកាល ពួកគេកំហែងទារប្រាក់ ប្រហែលពី២០០.០០០ទៅ៣០០.០០០រៀល។ ប្រសិនបើអ្នកភូមិព្រមឲ្យប្រាក់ទៅពួកគេ ពួកគេអនុញ្ញាតឲ្យអ្នកភូមិបន្តដំណើរទៅមុខ ប៉ុន្តែប្រសិនបើអ្នកភូមិមិនបង់ប្រាក់ទេ ពួក គេនឹងទូរស័ព្ទហៅនគរបាល កងរាជអាវុធហត្ថ ឬរដ្ឋបាលព្រៃឈើ ដើម្បីចាប់ខ្លួនអ្នកភូមិ ហើយរឹបអូសយកឈើរបស់ពួកគាត់។ រីឯ ចាន់ គា វិញអះអាងថា ខ្លួន និង ស៊ីម ទូច បម្រើ ការនៅក្នុងជួរកងរាជអាវុធហត្ថ”។ លោកបានបន្ថែមថា ប្រាក់ចំនួន២៣៦.២០០រៀល ត្រូវបានរឹបអូសពីក្រុមនេះ ហើយថា ជន ទាំងបួននាក់នេះត្រូវបានបញ្ជូនទៅសាលាដំបូងខេត្តមណ្ឌលគិរីកាលពីម្សិលមិញ។
មន្ត្រីតុលាការមិនអាចទាក់ទងបានទេកាលពីម្សិលមិញ។
ស្រុកកែវសីមា ដែលមានទីតាំងស្ថិតនៅតាមព្រំដែនជាប់ប្រទេសវៀតណាម គឺជាកន្លែងកើតមានសកម្មភាពដឹកជញ្ជូនខុសច្បាប់ទ្រង់ទ្រាយធំយ៉ាងច្រើន។ កាលពីខែមិថុនា ទាហានប្រដាប់អាវុធពីរក្រុមបានប្រឈមមុខដាក់គ្នាពាក់ព័ន្ធនឹងឈើខុសច្បាប់មួយចំនួនធំ ដែលអាជ្ញាធរលើកឡើងថា មានគោលដៅដឹកទៅប្រទេសវៀតណាម។
កាលពីខែមុន មន្ត្រីរដ្ឋបាលព្រៃឈើនៅក្នុងស្រុកនេះបានអះអាងថា មន្ត្រីនគរបាលបានឃាត់រថយន្តចំនួនបួនគ្រឿងដែលដឹកសុទ្ធតែឈើកាប់ខុសច្បាប់ ពេលព្យាយាមឆ្លង កាត់ព្រំដែន៕ ស៊ុយឈាង