34 C
Phnom Penh

អូស្ត្រាលី បដិសេធ​​​បរាជ័យ​នៃ​កិច្ច​​ព្រមព្រៀង​បញ្ជូន​ជន​ភៀស​​​ខ្លួន​មក​​តាំង​​​លំនៅ​ក្នុង​ប្រទេស​កម្ពុជា​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ​ រដ្ឋមន្ត្រី​​ការ​បរទេស​នៃ​ប្រទេស​អូស្ត្រាលី ​​​​បាន​​​​អះអាង​ថា ​កិច្ចព្រម​ព្រៀង​​​​​ជន​ភៀស​ខ្លួន​ដ៏ចម្រូងចម្រាស​មួយ​ជាមួយ​ប្រទេស​កម្ពុជា នៅ​តែ​មាន​​សុពល​ភាព ហើយ​​បាន​​ច្រាន​ចោល​​សេចក្ដី​រាយការណ៍​ព័ត៌មាន​របស់​អូស្ត្រាលី​​​ដែល​លើក​ឡើង​ថា កិច្ចប្រឹង​ប្រែង​​តាំង​លំនៅ​ជន​ភៀស​ខ្លួន​បន្ថែម​​​​​ទៀត​​ដែល​មក​ពី​កោះណូរូ បាន​បរាជ័យ​។

ផ្ទះ​​​​វីឡា​​​នៅ​​​ក្នុង​​​រាជធានីភ្នំពេញ ​​​ដែលជា​​​កន្លែង​​​ស្នាក់​​​នៅ​​​បណ្តោះ​​​អាសន្ន​​​សម្រាប់​​​ជន​​​ភៀស​​​ខ្លួន​​​បួន​​​នាក់​​​ដំបូង​​​​​​មក​​​ពី​​​កោះណូរូ ដែល​​​បាន​​​យល់​​​ព្រម​​​មក​​​រស់​​​នៅ​​​កម្ពុជា ​​​ជា​​​​​​ផ្នែក​​​នៃ​​​កិច្ច​​​ព្រម​​​ព្រៀង​​​តាំង​​​លំនៅថ្មី​​​ជាមួយ​​​ប្រទេស​​​​​​អូស្ត្រាលី។ រូបថតៈ ព្រីង សំរាំង / រ៉យទ័រ
ផ្ទះ​​​​វីឡា​​​នៅ​​​ក្នុង​​​រាជធានីភ្នំពេញ ​​​ដែលជា​​​កន្លែង​​​ស្នាក់​​​នៅ​​​បណ្តោះ​​​អាសន្ន​​​សម្រាប់​​​ជន​​​ភៀស​​​ខ្លួន​​​បួន​​​នាក់​​​ដំបូង​​​​​​មក​​​ពី​​​កោះណូរូ ដែល​​​បាន​​​យល់​​​ព្រម​​​មក​​​រស់​​​នៅ​​​កម្ពុជា ​​​ជា​​​​​​ផ្នែក​​​នៃ​​​កិច្ច​​​ព្រម​​​ព្រៀង​​​តាំង​​​លំនៅថ្មី​​​ជាមួយ​​​ប្រទេស​​​​​​អូស្ត្រាលី។ រូបថតៈ ព្រីង សំរាំង / រ៉យទ័រ

មនុស្ស​បួន​នាក់​ដំបូង​មក​ពី​ជំរំ​ជន​ភៀស​ខ្លួន​របស់​អូស្ត្រាលី នៅ​​លើ​ប្រទេស​​ដែន​កោះ​​​កណ្ដាល​មហាសមុទ្រ​បា៉ស៊ីហ្វិក​ខាង​ត្បូង​​នេះ បាន​មក​ដល់​ប្រទេស​កម្ពុជា កាលពី​ខែ​មិថុនា ​បន្ទាប់​ពី​រដ្ឋាភិបាល​​ក្រុងភ្នំពេញ ​បាន​​ចុះ​​កិច្ច​ព្រម​​ព្រៀង​​​ជាមួយ​រដ្ឋាភិបាល​ក្រុង​កង់បេរ៉ា ដើម្បី​ទទួល​យក​ជន​ភៀសខ្លួន​ក្នុង​ចំនួន​មិន​បញ្ជាក់​ច្បាស់​លាស់​​ក្នុង​រយៈ​ពេល​៤​ឆ្នាំ​ជា​ថ្នូរ​នឹង​​ជំនួយ​បន្ថែម​ចំនួន​៤០​លាន​ដុល្លារ​អូស្ត្រាលី ​​​​(ប្រហែល​២៨​,៥​លាន​ដុល្លារ​)។ ប៉ុន្តែ​​​ចាប់​​តាំង​ពី​ពេល​នោះ​មក ​គ្មាន​ជន​ភៀស​ខ្លួន​​ណា​ម្នាក់​​ស្ម័គ្រ​ចិត្តឡើយ។​​​

កាលពី​ថ្ងៃ​សុក្រ លោក ខៀវ សុភ័គ ​អ្នក​នាំពាក្យ​​​ក្រសួង​មហាផ្ទៃ​ បានមាន​ប្រសាសន៍​ថា កម្ពុជា​​ “​គ្មាន​គម្រោង​​” ​ទទួល​តាំង​លំនៅ​ជន​​​​ភៀសខ្លួន​បន្ថែម​ទៀត​ដែល​មក​ពី​កោះ​ណូរូ​ ឡើយ ហើយ​ថាបើ​មក​កាន់​តែ​តិច​កាន់​តែ​ល្អ​។ ​​​ផ្អែក​​លើ​ការ​អត្ថាធិប្បាយ​ទាំង​នោះ ប្រព័ន្ធ​ផ្សព្វ​​ផ្សាយ​របស់​អូស្ត្រាលី ​បាន​​ចុះ​ផ្សាយ​​​​ថា កិច្ច​ព្រមព្រៀង​ទាំង​មូល​​បាន​​បរា​ជ័យ​​ហើយ។

ប៉ុន្តែ​នៅឯ​សន្និសីទ​កាសែត​មួយ​​​ធ្វើ​ឡើង​នៅ​ក្នុង​ទីក្រុង​ស៊ីដនី​ កាលពី​ម្សិលមិញ​ ដែល​​ផ្សាយ​ដោយ​ទូរទស្សន៍ ABC News 24 លោកស្រី ​​ជូលី ប៊ីសប់ (Julie Bishop) រដ្ឋមន្ត្រី​ការ​បរទេស​​អូស្ត្រាលី ​បាន​ច្រាន​ចោល​ការ​លើក​ឡើង​​អំពី​​​ការ​បរាជ័យ​នេះ​។

លោកស្រី​​​បាន​​មាន​ប្រសាសន៍​ថា ”​នោះ​មិន​ត្រឹម​​​ត្រូវ​ទេ។ អស់​លោក​​កំពុង​តែ​ពឹង​ផ្អែក​លើ​​សេចក្ដី​ថ្លែងការណ៍​របស់​មន្ត្រី​ម្នាក់​” ដោយ​បន្ត​អះអាង​ថា កម្ពុជា​ ត្រូវ​ការ​កិច្ចព្រម​ព្រៀង​នេះ​ដើម្បី​បង្កើន​ផលិត​ផល​ក្នុង​ស្រុក​សរុប​ (GDP) របស់​ខ្លួន។

លោក​បាន​លើក​ឡើង​​ទៀត​ថា “​ខ្ញុំ​បាន​​ជួប​​​​គ្នា​​​​​ជាមួយ​លោក ហោ ណាំហុង រដ្ឋមន្ត្រី​ការ​បរទេស​ប្រកប​ដោយភាព​​វិជ្ជមាន ​ក្នុង​ទីក្រុង​គូឡាឡាំពូ​ កាលពី​ពេល​ថ្មីៗ​នេះ​​នៅ​ក្រៅ​កិច្ច​ប្រ​ជុំ​កំពូល​​អាស៊ីបូពា៌​ ហើយ​យើង​បាន​​ពិភាក្សា​​​គ្នា​ប្រកប​ដោយ​ផ្លែ​ផ្កា និង​​ការ​ស្ថាបនា​​អំពី​វិធី​ដែល​កម្ពុជា​ អាច​បន្ត​​សហការ​ជា​ដៃគូ​ជាមួយ​រដ្ឋាភិបាល​អូស្ត្រាលី និង​រដ្ឋាភិបាល​ផ្សេងៗ​ទៀត។ ​ហើយ​កម្ពុជា ​​គឺ​ជា​ប្រទេស​​ដែល​មាន​​​មហិច្ឆតា ​ចង់​​បង្កើន​​ GDP របស់​ខ្លួន​ ចង់​គ្រប់​គ្រង​ជំនាញ​របស់​កម្មករ​បរទេស​ ហើយ​​ក្នុង​វិធី​នេះ ​ពួកគេ​អាច​​ទទួល​តាំង​លំនៅ​​មនុស្ស​នៅ​​ក្នុង​ប្រទេស​កម្ពុជា ហើយ​បង្កើន​ GDP ​របស់​​​ខ្លួន​បាន​”។

នៅ​ពេល​ចោទ​សួរ​​ជុំវិញ​សេចក្ដី​សម្រេច​​របស់​រដ្ឋាភិបាល​លោកស្រី​ក្នុង​ការ​ចុះ​ហត្ថ​លេខា​ជាមួយ​ប្រទេស​មួយ​ដែល​សម្បូរ​​ដោយ​​​រឿង​អាស្រូវ​​រំលោភ​បំពាន​សិទ្ធិ​មនុស្ស​  លោកស្រី ​​ជូលី ប៊ីសប់ បាន​ច្រាន​ចោល​សំណួរ​​នេះ។

លោកស្រី​​បន្ថែម​ថា ”​បណ្តា​​អង្គការ​សិទ្ធិ​មនុស្ស​​​បន្ត​ថ្កោល​ទោស​​ប្រទេស​នានា​​យ៉ាង​ឆាប់​រហ័ស​ចំពោះ​អតីតកាល​របស់​ប្រទេស​ទាំង​នោះ។ កម្ពុជា​ ប្ដេជ្ញា​បំភ្លេច​អតីត​កាល​​របស់​ខ្លួន​​ ហើយ​កសាង​សមត្ថភាព​​​ដើម្បី​​​ក្លាយ​ជា​ប្រទេស​អភិវឌ្ឍន៍”។

ទោះ​ជា​យ៉ាង​ណា បណ្ដា​អង្គការ​​សិទ្ធិ​មនុស្ស​​​​ទាំង​នៅ​ក្នុង​ស្រុក និង​នៅ​បរទេស​​ កំពុង​បន្ត​ចោទ​​ប្រកាន់​រដ្ឋាភិបាល​កម្ពុជា ​​​ជុំ​វិញ​​​ការ​រំលោភ​​​បំពាន​សិទ្ធិ​មនុស្ស។

កាលពី​ខែ​កក្កដា សាលា​ដំបូង​រាជធានី​ភ្នំពេញ ​​បាន​​ចោទ​ប្រកាន់​សកម្មជន​​គណបក្ស​ប្រឆាំង​​ចំនួន​១១​រូប​ពីបទ​កុប​កម្ម​​ ក្នុង​សំណុំ​រឿង​មួយ​ដែល​គេ​មើល​​ឃើញជាទូ​ទៅ​ថាជា​​រឿង​នយោ​បាយ ហើយ​បាន​ផ្ដន្ទាទោស​ពួកគេ​​​ឲ្យ​ជាប់​ពន្ធនាគារ​ពី​៧​ឆ្នាំ​ដល់​២០​ឆ្នាំ។ នៅ​​ក្នុង​​​ខែ​​ដដែល​នោះ ​ក្រុម​តំណាង​រាស្ត្រ​គណ​បក្ស​កាន់​អំណាច​បាន​អនុម័ត​ច្បាប់​មួយ​​​​​​ដែល​​គំរាម​បិទ​មាត់​អង្គការ​មិន​មែន​រដ្ឋាភិបាល​នានា​​​នៅ​​ក្នុង​ប្រទេស​​ ប្រសិន​បើ​អង្គការ​ទាំង​នោះ​ហ៊ាន​​​លើក​ឡើង​​​ពី​បញ្ហា​​រសើបៗ ជា​​ហេតុ​នាំ​ឲ្យ​មាន​​​​ការ​ថ្កោល​ទោស​ជា​អន្តរជាតិ។

​ក្នុង​បទសម្ភាសន៍​ដាច់​ដោយ​ឡែក​មួយ​កាល​​​ពី​ម្សិលមិញ​ លោក ភីតធើ ដាត់ធិន (Peter Dutton) រដ្ឋមន្ត្រី​អន្តោ​ប្រវេសន៍​អូស្ត្រាលី​​​ បាន​​ប្រាប់​វិទ្យុ​ ABC របស់​អូស្ត្រាលី​ថា ​​រដ្ឋាភិបាល​របស់​លោក​​​រក​បាន​​ជន​ភៀសខ្លួន​បន្ថែម​ទៀត​​ហើយ​នៅ​លើ​កោះ​ណូរូ ដែល​ត្រៀម​​រួច​ជា​ស្រេច​ដើម្បី​មក​កាន់​កម្ពុជា​ “​ហើយ​​ពេល​នេះ​ យើង​កំពុង​​​​ធ្វើ​ការ​​ងារលើ​សេចក្ដី​លម្អិត​នៃ​រឿង​នោះ​ជាមួយ​មន្ត្រី​”។

ពេល​ទាក់​ទង​កាលពី​ម្សិលមិញ លោក ខៀវ សុភ័គ បាន​បញ្ជាក់​អំពី​​ការ​អត្ថាធិប្បាយ​របស់​លោក​​​មុន​នេះ​ជុំវិញ​កិច្ចព្រមព្រៀង​​ជន​ភៀស​ខ្លួន​។ លោក​​មាន​​ប្រសាសន៍​ថា កម្ពុជា ​​គ្មាន​​​គម្រោង​​ទទួល​តាំង​លំនៅ​ជន​ភៀស​​​​ខ្លួន​បន្ថែម​ទៀតដែល​​មក​ពី​កោះ​ណូរូ​ ​ទេ “​នៅ​ពេលនេះ​។ ​ប៉ុន្តែទៅ​ថ្ងៃ​​មុខ ​ខ្ញុំ​មិន​ដឹង​ទេ។ បើ​មាន​​អ្នក​​ដាក់​ពាក្យ​បន្ថែម​ទៀត យើង​នឹង​ពិចារណា​”។

លោក​​លើក​ឡើង​បន្ថែម​ទៀត​ថា ​ទោះ​ជា​​​​យ៉ាង​ណា ​កម្ពុជា​ នឹង​​មិន​ទទួល​យក​ជន​ភៀស​ខ្លួន​បន្ថែម​ទៀត​ឡើយ រហូត​ទាល់​តែ​ជន​ភៀស​​​ខ្លួន​ទាំង​បួន​នាក់​ដែល​បាន​មក​ដល់​កម្ពុជា​ កាលពី​ថ្ងៃទី​៤ ខែ​មិថុនា “អាច​សម្រប​ខ្លួន​ចូល​ទៅ​ក្នុង​សង្គម​កម្ពុជា​បាន​” សិន។

​បច្ចុប្បន្ន​ ជន​ភៀស​ខ្លួន​ទាំង​បួន​នាក់​ដែល​មាន​បី​នាក់​ជា​ជន​ជាតិ​អុីរ៉ង់ និង​ម្នាក់​ជា​​បុរស​ជន​ជាតិ​រ៉ូហ៊ីងយ៉ា​មកពី​ប្រទេស​​ភូមា កំពុង​រស់​នៅ​ក្នុង​វីឡា​​មួយ​ក្នុង​រាជធានី​ភ្នំពេញ​ ហើយ​នៅ​ទីនោះ ​ពួកគេ​កំពុង​រៀន​ភាសា​ខ្មែរ និង​ទទួល​បាន​ការ​ជួយ​ជ្រោម​ជ្រែង​​ស្វែង​រក​ការ​ងារ​ជាប់​លាប់​ធ្វើ​។

កាល​ពី​នៅ​លើ​កោះ​ណូរូ ​អូស្ត្រាលី ​បាន​ប្រាប់​ជន​ភៀស​ខ្លួន​ទាំង​​​នេះ​ថា ពួកគេ​​នឹង​ត្រូវ​បាន​អនុញ្ញាត​ឲ្យ​ស្នាក់​នៅ​​​ក្នុង​វីឡា​នេះ​រយៈ​ពេល​៣​ខែ ​ហើយ​បន្ទាប់ពី​នោះ ​ពួកគេ​នឹង​ទទួល​បាន​ជំនួយ​នៅ​ក្នុង​ការ​ស្វែង​រក​កន្លែង​​ស្នាក់​នៅ​ផ្សេង។

លោក ខៀវ សុភ័គ បាន​មាន​ប្រសាសន៍​ថា ​​ត្រង់​ពួកគេ​ស្នាក់​នៅ​​ក្នុង​វីឡា​នេះ​យូរ​ប៉ុណ្ណា វា​អាស្រ័យ​លើ​​​​ស្ថានទូត​អូស្ត្រាលី​។ កាលពី​ថ្ងៃ​សុក្រ​ អ្នក​នាំ​ពាក្យ​​អង្គ​ការ​​​អន្តរជាតិ​ទេសន្តរ​​​​ប្រវេសន៍​​ (IOM)​ ដែល​​កំពុង​ជួយ​ជន​ភៀស​ខ្លួន​​​​​​​​ទាំង​នេះបាន​និយាយ​ថា ​​​​ខ្លួន​គ្មាន​គម្រោង​ឲ្យ​ពួកគេ​រើ​ចេញ​ភ្លាមៗទេ​៕ សុខុម

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស