27 C
Phnom Penh

​នគរ​​បាល​​​មិន​​អាចស្រាវ​ជ្រាវ​រក​​​​ជន​រងគ្រោះ​​បាត់​ខ្លួន​​នៅ​ផ្លូវ​វេង​​​ស្រេង​​ ​ដោយ​​​សារ​គ្មាន​​ពាក្យ​បណ្តឹង

ដោយ ឌឹ ខេមបូឌា ដេលី

បទវិភាគ

អគ្គ​ស្នង​​​​​ការ​ដ្ឋាន​នគរ​បាល​​​​​ជាតិ​លើក​ឡើង​​​​នៅ​សប្ដាហ៍​នេះ​​​​​​​​​ថា សមត្ថ​កិច្ច​មិន​​អាច​ស៊ើប​អង្កេត​​​បាន​ឡើយ​​ទាក់​ទិន​ជោគវាសនា​​របស់​យុវជន​អាយុ​១៦​ឆ្នាំ​ម្នាក់​ដែល​បាន​បាត់​ខ្លួន​​បន្ទាប់ពី​គេ​ឃើញ​ហូរ​ឈាម​​ដាប​ខ្លួន​អំឡុង​​​​ស្ថាន​ការណ៍​ចលាចល​នៅ​​​​​ខែ​មករា ឆ្នាំ​២០១៤​ ​​ដែល​​កង​រាជ​អាវុធ​ហត្ថ​​បាន​បង្ក្រាប​នៅ​លើ​ផ្លូវ​វេង​ស្រេង ក្នុង​រាជធានី​ភ្នំពេញ ដោយ​សារ​តែ​គ្មាន​អ្នក​ដាក់​ពាក្យ​បណ្ដឹង​។

នៅ​​ថ្ងៃ​ទី​៣ ខែ​មករា ឆ្នាំ​២០១៤ កង​រាជ​អាវុធ​ហត្ថ​ប្រដាប់​ដោយ​កាំភ្លើង​​វែង​អាកា​៤៧​ បាន​បញ្ចប់​​ការ​ធ្វើ​កូដកម្ម​​ទូទាំង​ប្រទេស​​​របស់​កម្មករ​កាត់​ដេរ​​ដែល​​ទាម​ទារ​​ប្រាក់​ខែ​គោល​១៦០​ដុល្លារ​ នៅ​ពេល​ពួកគេ​​សម្រុក​ចូល​​ទៅ​កាន់​មហាវិថី​វេង​ស្រេង​ ដែល​​មាន​​រោងចក្រ​ជាជួរ​អម​សងខាង​ស្ថិត​នៅ​​​ជាយ​រាជធានី​ភ្នំពេញ រួច​​បាញ់​ប្រហារ​ ឬ​វាយ​ដំ​​ស្លាប់​​​មនុស្ស​យ៉ាង​ហោច​ណាស់​៥​នាក់​ដែល​ចូល​រួម​​ក្នុង​បាតុកម្ម​​​ហិង្សា​​។

ប៉ុន្តែ​មាន​តែ​សាកសព​មនុស្ស​បួន​នាក់​ប៉ុណ្ណោះ​ដែល​បណ្ដា​អង្គការ​សិទ្ធិ​មនុស្ស​រក​ឃើញ​​ និង​កំណត់​អត្តសញ្ញាណ​បាន​​​នៅ​មន្ទីរ​ពេទ្យ​នានា​ទូទាំង​រាជធានី​ភ្នំពេញ។ ​ចំណែក​ឯ​សាកសព​យុវជន​ ឃឹម សុផាត អាយុ​១៦​ឆ្នាំ​ ​រក​មិន​​ឃើញ​​ទេ​។

​ក្នុង​វីដេអូ​ឃ្លីប​មួយ​បង្ហោះ​តាម​គេហទំព័រ​របស់​អគ្គស្នងការដ្ឋាន​នគរ​បាល​ជាតិ​​ កាលពី​ថ្ងៃ​ច័ន្ទ ឧត្ដម​សេនីយ៍​ឯក គៀត ច័ន្ទថារិទ្ធ អ្នក​នាំពាក្យ​អគ្គស្នងការដ្ឋាន​នគរ​បាល​ជាតិ​ បាន​ឆ្លើយ​តប​ទៅ​នឹង​​សេចក្ដីថ្លែងការណ៍​ស្ដីពី​ការ​បាត់​ខ្លួន​របស់​យុវ​ជន ឃឹម សុផាត ដែល​ចេញ​ដោយ​មជ្ឈមណ្ឌល​សិទ្ធិ​មនុស្ស​កម្ពុជា​ សម្រាប់​​​ទិវា​​អន្តរជាតិ​នៃ​អ្នក​បាត់​ខ្លួន​ ដោយ​​អំពាវ​នាវ​ឲ្យ​ក្រុម​គ្រួសារ​​របស់​ក្មេង​ប្រុស​រងគ្រោះ​ដាក់​ពាក្យ​បណ្ដឹង​។

លោក​បាន​មាន​ប្រសាសន៍​ថា ” ​​បន្ទាប់ពី​ការ​​​ធ្វើ​បាតុកម្ម​​នៅ​ផ្លូវ​វេង​ស្រេង ​កាលពី​ឆ្នាំ​ទៅ​​​ យើង​មាន​ឮ​អង្គការ​​មួយ​ចំនួន​បាន​និយាយ​អំពី​ការ​បាត់​ខ្លួន​យុវជន​ម្នាក់​​ឈ្មោះ ‘ផាត’ ​ហើយ​​​យើង​ក៏​បាន​​ធ្វើ​ការ​ស៊ើបអង្កេត​មួយ​ចំនួន​ដែរ​ តែ​មក​ទល់​ម៉ោង​នេះ ​យើង​ពិបាក​នឹង​បន្ត​ស្រាវជ្រាវ​​ ដោយ​សារ​យើង​មិន​បាន​​​ឃើញ​ក្រុម​គ្រួសារ​នោះ​​​មក​ធ្វើ​បណ្ដឹង​ណាមួយ​​​ជា​ផ្លូវ​ការ​​ជាមួយ​កង​កម្លាំង​នគរ​បាល​ជាតិ​​​យើង​នៅ​ភ្នំពេញ ឬ​នៅ​ត្រង់​ណា​នោះ​ទេ​។ ​ដល់​ពេល​អត់​អ៊ីចឹង​ទៅ ​វា​បាត់​ការ​សហការ​ជា​មួយ​គ្នា​ [ពីគ្រួសារ​​ជនរងគ្រោះ​]។ យើង​មាន​ការ​សោក​ស្ដាយ​ណាស់​ពេល​ដែល​ឮ​ថា ​ប្រជា​​ពលរដ្ឋ​លោក​មាន​ការ​​បាត់​កូនចៅ​​​។ យើង​ខ្ញុំ​ជា​កងកម្លាំង​នគរ​បាល​ជាតិ ​​មិន​សប្បាយ​ចិត្ត​ទេ​ ​​​​ប៉ុន្តែ​យើង​សំណូម​ពរ​​​ក្រុម​គ្រួសារ​​​ ជា​ពិសេស​​​​ឪពុក​ម្ដាយ​​នៅ​​​ស្រុក​ស្វាយ​ជ្រុំ​ ខេត្ត​ស្វាយ​រៀង​ ​​​​​គួរ​ណា​ដាក់​ពាក្យ​បណ្ដឹង​​ឲ្យ​ច្បាស់​លាស់”។

លោក​​​​​បាន​​លើក​ឡើង​​បន្ត​​ថា នគរ​បាល​​​​​​បាន​ធ្វើការ​ស្រាវជ្រាវ​ខ្លះ​ហើយ​ដោយ​ផ្អែក​លើ​ព័ត៌មាន​​​បាន​ពី​អង្គការ​មិន​មែន​រដ្ឋាភិបាល ​​​ប៉ុន្តែ​ត្រូវ​ការ​ប្រភព​ច្បាស់​លាស់​​ដើម្បី​ផ្ដើម​ការ​ស៊ើបអង្កេត​ឲ្យ​បាន​ត្រឹម​ត្រូវ​ថា​ តើ​មាន​អ្វី​កើត​ឡើង​​ចំពោះ ឃឹម សុផាត។

លោក​បាន​​មាន​ប្រសាសន៍​​​បន្ថែម​ទៀត​ថា ”ឧទាហរណ៍​ថា ថ្ងៃ​ណុង​គាត់​មាន​វត្តមាន​​នៅ​ណុង​មែន​ឬក៏អត់​ ហើយ​យ៉ាង​ម៉េច​បាន​​​ជា​បាត់​ខ្លួន​? គាត់​រត់ទៅ​ណា​មក​ណា ឬ​ក៏​គាត់​រត់​ធ្លាក់​​ភក់​​ធ្លាក់​ទឹក​យ៉ាង​ម៉េច​? ឲ្យ​វា​មាន​ប្រភព​​​​អ៊ីចឹង​មក​​ ​យើង​នឹង​ស្រាវ​ជ្រាវ​​តគ្នា ឬ​ក៏​នរណា​​​​​ដែល​​​ឃើញ​ចុងក្រោយ​គេ​។ យើង​សុំ​ការ​សហការ​ យើង​សំណូមពរ​សុំ​ឲ្យ​លោក​ឪពុក​អ្នក​ម្ដាយ​ហ្នឹង​ដាក់​​ពាក្យ​ប្ដឹង​ជា​ផ្លូវ​ការ​មក​”។ ​

សាក្សីក្នុង​ហេតុការណ៍​បាញ់​ប្រហារ​នៅ​ថ្ងៃទី​៣ ខែមករា ឆ្នាំ​២០១៤ បាន​និយាយ​ថា ពួកគេ​ឃើញ​កង​រាជអាវុធ​ហត្ថ​​​ប្រើ​កាំភ្លើង​​វែងអាកា​៤៧​របស់​ខ្លួន​បាញ់​​ដោយមិន​រើស​មុខ​ពី​រថយន្ត​ធំៗ​នៅ​​លើ​ផ្លូវ​វេងស្រេង មុន​ពេល​ចេញពី​​រថយន្ត​ទាំង​នោះ​ ហើយ​​បាញ់​តម្រង់​ទៅ​រក​កម្មករ​ដែល​មិន​បាន​គេច​ខ្លួន។

សាក្សី​ម្នាក់​​ក្នុង​ហេតុការណ៍​បាញ់​ប្រហារ​ដែល​​​បាន​បណ្ដាល​ឲ្យ​មនុស្ស​យ៉ាង​ហោច​ណាស់​៤០​នាក់​​រង​របួស​ធ្ងន់​ដែរ​​នេះ​​និយាយ​ថា គាត់​បាន​ឃើញ​​យុវជន ឃឹម សុផាត លើក​ចុង​ក្រោយ​​នៅ​លើ​ផ្លូវ​វេង​ស្រេង ដេក​នៅ​នឹង​ដី ហើយ​​ហូរ​​ឈាម​​ដាប​ខ្លួន​។

ប៉ុន្តែ​​ភ្លាមៗ​ក្រោយ​ការ​បង្ក្រាប​បណ្តាល​ឲ្យ​​​មនុស្ស​ស្លាប់​នេះ​ ក្រសួង​មហាផ្ទៃ​បាន​បញ្ជាក់​​ថា​ ចំនួន​​អ្នក​ស្លាប់​ត្រូវបាន​រាប់​ឃើញ​​តែ​បួន​នាក់​ប៉ុណ្ណោះ ហើយ​បាន​​បដិសេធ​ថា ខ្លួន​មិន​ដឹង​​ឡើយ​រឿង​​​អ្នក​បាត់​ខ្លួន ​ឬ​អ្នក​​ស្លាប់​​​ដែល​​រក​សាក​សព​មិន​ឃើញ​។

កាល​ពី​​ខែ​សីហា ឆ្នាំ​២០១៤ អង្គការ​សហ​​ប្រជាជាតិ​បាន​ចេញ​សេចក្ដី​ថ្លែងការណ៍​មួយ​អំពាវ​នាវ​ឲ្យ​​រដ្ឋាភិបាល​​ស៊ើបអង្កេត​​​ឲ្យ​បាន​ល្អិត​ល្អន់​លើ​ “​ការ​បាត់​ខ្លួន​ដោយ​បង្ខំ​​” របស់​យុវ​ជន ឃឹម សុផាត ដោយ​គូស​បញ្ជាក់​ថា រដ្ឋាភិបាល​​​​មាន​កាតព្វកិច្ច​ធ្វើ​ដូច្នេះ​ក្នុង​​ឋានៈ​​ជា​ហត្ថលេខី ​​​នៃ​អនុសញ្ញា​អន្តរជាតិ​​ដើម្បី​ការ​​​ពារ​ពលរដ្ឋ​គ្រប់​រូប​ពី​ការ​បាត់​ខ្លួន​ដោយ​បង្ខំ​។

អ្នកស្រី អុិន លក្ខិណា អាយុ​៣៨​ឆ្នាំ ដែល​ត្រូវ​ជា​ម្ដាយ​របស់​​យុវជន​ ឃឹម សុផាត ​បាន​និយាយ​តាម​ទូរស័ព្ទ​កាលពី​ម្សិលមិញ​ថា គាត់​មិន​ដែល​​បាន​ដាក់​ពាក្យ​បណ្ដឹង​ទៅ​នគរ​បាល​ទេ ពីព្រោះ​​ការ​បាត់​​ខ្លួន​របស់​កូនប្រុស​អ្នក​ស្រី​​ត្រូវ​បាន​ផ្សព្វផ្សាយ​ជា​សាធារណៈ​​​​ ធ្វើ​ឲ្យ​អ្នកស្រី​​​​គិត​ថា នគរ​បាល​​បានស៊ើបអង្កេត​ករណី​នេះ​រួច​ទៅ​ហើយ​។

អ្នកស្រី​និយាយ​ទៀត​ថា ”យើង​មិន​បាន​ដាក់​ពាក្យ​បណ្ដឹង​ទៅ​អាជ្ញាធរ​ទេ ព្រោះ​ពួកគេ​​មិន​ដែល​មក​សួរ​អំពី​ការ​បាត់​ខ្លួន​នេះ​​។ ​ទើប​តែ​ម្សិលមិញ​នេះ ​​ប្រធានភូមិ​​បាន​​​មក​សួរ​រក​ថ្ងៃ​ខែ​ឆ្នាំ​កំណើត និង​កាលបរិច្ឆេទ​​បាត់​ខ្លួន ពីព្រោះ​ប៉ូលិស​​សុំ​ព័ត៌មាន​នេះ​ដើម្បី​បញ្ជូន​​ទៅ​ថ្នាក់​លើ​”។

លោក ឃឹម សឿន អាយុ​៤២​ឆ្នាំ ដែល​ត្រូវ​ជា​ឪពុក​របស់​ ឃឹម សុផាត ​បាន​និយាយ​​ត្រង់​ៗ​ថា គាត់​មិន​ជឿ​ទុក​ចិត្ត​​​នគរ​បាល​ជាតិ​​ឡើយ​។ គាត់​និយាយ​ថា “​យើង​មិន​ដែល​ដាក់​ពាក្យ​បណ្ដឹង​ទៅ​អាជ្ញាធរ​ទេ ព្រោះ​​ពួកគេ​សុទ្ធ​​តែ​កាន់​ជើង​​ខាង​អ្នក​បាញ់​កម្មករ​ ជា​ពិសេស​ប៉េអឹម។ ដូច្នេះ​ពួកគេ​នឹង​មិន​រក​យុត្តិធម៌​ឲ្យ​កូន​ប្រុស​ខ្ញុំ​ទេ​។ ដូច្នេះ​ហើយ​យើង​ក៏​សម្រេច​​​ចិត្ត​ដាក់​ពាក្យ​បណ្ដឹង​ទៅ​អង្គការ​តែ​ម្ដង​ទៅ​”។

គាត់​បាន​និយាយ​បន្ត​​ថា នគរ​បាល​​បាន​ដឹង​ពី​ករណី​​នេះ​ហើយ និង​​មាន​អ្វី​ៗ​ទាំង​អស់​​ដែលពួក​គេ​ត្រូវ​ការ ​​ប្រសិន​បើពួកគេ​ចង់​ស៊ើបអង្កេត​ ហើយ​គ្រួសារ​របស់​គាត់​បានជួប​ជាមួយ​អាជ្ញាធរ​​ម្តង​រយៈ​ពេល​២ម៉ោង​កាល​​ពី​ខែ​ឧសភា។

គាត់​និយាយ​​បន្ថែម​​ទៀត​​ថា “​ក្រសួង​មហា​ផ្ទៃ​បានកោះ​ហៅ​យើង​ ហើយ​សាកសួរ​យើង​​​​​ថា ​កូន​យើង​​បាត់​ខ្លួន​នៅ​កន្លែង​ណា និង​នៅ​ទីណា​។ ខ្ញុំ​នឹង​ពិភាក្សា​បញ្ហា​នេះ​ជាមួយ​អង្គការ​​​​លីកាដូ​ថា​ តើ​យើង​គួរ​ដាក់​​ពាក្យ​បណ្ដឹង​ឬ​ក៏​អត់” ពីព្រោះ​គាត់​នៅ​តែ​​មិន​ប្រាកដ​ក្នុង​ចិត្ត​ថា តើ​គាត់​គួរ​ជឿ​នគរ​បាល ​​ឬក៏អត់​។

លោក អំ សំអាត ​ប្រធាន​ផ្នែក​​បច្ចេក​ទេស​​​​ស៊ើប​​អង្កេត​នៅ​អង្គការ​សិទ្ធិ​មនុស្ស​​ក្នុង​ស្រុក​​លីកាដូ​ បាន​មាន​ប្រសាសន៍​ថា ​ឧត្ដម​សេនីយ៍​ឯក គៀត ច័ន្ទថារិទ្ធ ​​និយាយ​មិន​ស្មោះ​ត្រង់​​ទេ​ទាក់​ទិន​ការ​​​​​ស្រាវជ្រាវ​​​​របស់​សមត្ថ​កិច្ច​​​ក្នុង​ការ​ស្វែង​រក​ការ​ពិត​ថា តើ​​មាន​អ្វី​កើត​ឡើង​ចំពោះ​​​​យុវ​ជន ឃឹម សុផាត។

លោក​បាន​ចោទ​សួរ​ដូច្នេះ​ថា ”​បើ​គ្មាន​ពាក្យ​​​បណ្ដឹង​ ម៉េច​បាន​ជា​​ក្រសួង​មហាផ្ទៃ​កោះ​ហៅ​​ ​​និង​សាកសួរ​ឪពុកម្ដាយ​​ និង​សាក្សី​​កាលពី​ខែ​ឧសភា ឆ្នាំ​២០១៤ ទាំង​​​ឪពុក​ម្ដាយ​មិន​​ទាន់​ទទួល​បាន​ព័ត៌មាន​ណា​មួយ​នៅ​ឡើយ​​ទាក់​ទិន​ការ​បាត់​ខ្លួន​​នេះ។ យើង​មិន​អាច​និយាយ​បាន​ទេ​ថា តើ​គាត់​នៅ​រស់ ឬស្លាប់​ [ប៉ុន្តែ​] បើ​គាត់​នៅ​រស់​​ ម្លេ៉ះ​គាត់​ផ្ដល់​ដំណឹង​​ដល់​​គ្រួសារ​គាត់​បាត់ទៅ​ហើយ ពីព្រោះ​​​គាត់​បាន​​​​​បាត់​ខ្លួន​ជាង​​១ឆ្នាំ​ហើយ​”៕ សុខុម​​​​​​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស