29 C
Phnom Penh

តំណាង​រាស្ត្រ​គណបក្ស​សង្គ្រោះ​ជាតិ​បដិសេធ​ការ​ញុះញង់​ព្រំដែន ទំនង​នឹង​ចាប់​ខ្លួន

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​អង្គារ លោក អ៊ុំ សំអាន តំណាង​​​រាស្ត្រ​គណបក្ស​​​សង្គ្រោះ​ជាតិ បាន​បដិសេធ​ការ​អះអាង​ពី​សំណាក់​រដ្ឋាភិបាល​ដែល​ថា លោក​បាន​ញុះញង់​ឲ្យ​មាន​អស្ថិរភាព​ក្នុង​ការ​បង្ហោះ​ហ្វេសប៊ុក​កាលពី​សប្តាហ៍​មុន ដែល​ក្នុង​ការ​បង្ហោះ​នោះ​លោក​បាន​អួត​អំពី​ការ​រក​ឃើញ​ផែនទី​ព្រំដែន​ខ្មែរ​ជាមួយ​វៀតណាម នៅ​បណ្ណាល័យ​សភា​អាមេរិក។

កាលពី​ថ្ងៃ​សុក្រ លោក វ៉ា គឹមហុង ទេស​រដ្ឋមន្ត្រី​ទទួល​បន្ទុក​កិច្ចការ​ព្រំដែន​នៅ​ទីស្តីការ​គណៈ​រដ្ឋមន្ត្រី បាន​ព្រមាន​លោក សំអាន ដែល​ស្ថិត​នៅ​ប្រទេស​អាមេរិក​នៅ​ឡើយ ចំពោះ​ការ​បន្ត​ចោទ​រដ្ឋាភិបាល​ថា​ប្រើ “ផែនទី​ក្លែងក្លាយ” ក្រោយពី​តំណាង​រាស្ត្រ​រូប​នេះ​ជា​ថ្មី​ម្តង​ទៀត​បាន​លើក​ឡើង​ថា លោក គឹមហុង ប្រើ​ផែនទី​វៀតណាម។

លោក សំអាន បាន​និយាយ​តាម​រយៈ​សារ​សំឡេង​នៅ​ថ្ងៃ​អង្គារ​ថា “ទាក់ទង​ទៅ​នឹង​បញ្ហា​ដែល​ខ្ញុំ​រក​ឃើញ​ផែនទី​កម្ពុជា​២៦​ផ្ទាំង​នៅ​ឯ​បណ្ណាល័យ​សភា នោះ​មិន​មែន​ជា​ការ​ញុះញង់​ទេ”។

“វា​គ្រាន់តែ​ជា​ផ្នែក​មួយ​នៃ​ការ​សិក្សា​របស់​ខ្ញុំ​ដើម្បី​ឲ្យ​ដឹង​ថា​មួយ​ណា​ជា​ផែនទី​ត្រឹមត្រូវ ហើយ​ប្រជាជន​ធម្មតា​ផ្សេងទៀត​ក៏​មាន​សិទ្ធិ​សិក្សា​អំពី​ផែនទី​ដែរ”។

តាម​ពិត វា​មិន​មែន​ការ​ចូល​មើល​ផែនទី​តម្កល់​នៅ​អាមេរិក​របស់​លោក សំអាន ដែល​នាំ​ឲ្យ​លោក គឹមហុង ធ្វើ​សន្និសីទ​កាសែត​នោះ​ទេ ប៉ុន្តែ​គ្រាន់តែ​ជា​ការ​លើក​ឡើង​របស់​គាត់​ក្នុង​ការ​បង្ហោះ​ហ្វេសប៊ុក ដែល​ភ្ជាប់​ទៅ​នឹង​រូប​គាត់​កាន់​ផែនទី។

លោក សំអាន បាន​សរសេរ​លើ​ទំព័រ​ហ្វេសប៊ុក​របស់​លោក​ថា “វ៉ា គឹមហុង បាន​និយាយ​ភូត ថា គាត់​បាន​យក​ផែនទី​​នៅ​ទីនេះ​ពី​ជាន់​ទី៥​។ តាម​ការ​ពិត ផែនទី​តម្កល់​នៅ​ជាន់​ក្រោម​ដី​​ឯណោះ​ទេ”។

លោក​បាន​និយាយ​ថា “ប្រហែល​ជា​គាត់​មិន​ដែល​មក​ទីនេះ​ទេ ហើយ​គាត់​បាន​ប្រើ​ផែនទី​​ដែល​ភ្ជាប់​ទៅ​នឹង​សន្ធិសញ្ញា​ឆ្នាំ​១៩៨៥ នៅ​ពេល​ដែល​យួន​​​បាន​ត្រួត​ត្រា​ប្រទេស​កម្ពុជា”។

ក្នុង​ការ​ខិតខំ​បង្ក្រាប​យុទ្ធនាការ​ព្រំដែន​របស់​គណបក្ស​សង្គ្រោះ​ជាតិ លោក​នាយក​រដ្ឋមន្ត្រី ហ៊ុន សែន បាន​មាន​ប្រសាសន៍​កាលពី​ខែ​មុន​ថា នរណា​ដែល​អះអាង​ថា រដ្ឋាភិបាល​ប្រើ​ផែនទី​ក្រៅពី​ផែនទី​ដែល​គូស​ដោយ​បារាំង​កំណត់​ឲ្យ​ប្រើ​ដោយ​រដ្ឋធម្មនុញ្ញ នឹង​ត្រូវ​ចាប់​ខ្លួន។

លោក សំអាន ជា​តំណាង​រាស្ត្រ​មួយ​រូប​ក្នុង​ចំណោម​តំណាង​រាស្ត្រ​គណបក្ស​សង្គ្រោះ​ជាតិ​ពីរ​បី​នាក់ ដែល​បាន​បន្ត​រិះគន់​ការ​កំណត់​ព្រំដែន​ដោយ​រដ្ឋាភិបាល​ជាមួយ​វៀតណាម ចាប់តាំង​ពី​លោក សម រង្ស៊ី មេដឹកនាំ​គណបក្ស​ប្រឆាំង បាន​និយាយ​កាលពី​ខែ​មុន​ថា លោក​ចង់​ឲ្យ​លោក ហ៊ុន សែន ដែល​ខឹង​នោះ អន់​ខឹង។

លោក សំអាន បាន​និយាយ​កាលពី​ថ្ងៃ​អង្គារ​ថា លោក​គ្រោង​នឹង​ត្រឡប់​មក​ប្រទេស​កម្ពុជា​វិញ​នៅដើម​ខែ​វិច្ឆិកា​ ហើយ​ថា លោក​បាន​ដឹង​ហើយ​ថា លោក​ប្រហែល​ជា​ត្រូវ​ចាប់ខ្លួន។

លោក សំអាន បាន​និយាយ​ថា “វា​មាន​ន័យ​ថា រដ្ឋាភិបាល​ត្រូវ​បាន​គេ​ចាក់​ចំ​ចំណុច​រសើប ដូច្នេះ​បញ្ហា​ហ្នឹង​អាច​កើត​មាន​ចំពោះ​ការ​ចាប់​ខ្លួន​ចាប់​អី​ហ្នឹង។ ប៉ុន្តែ ខ្ញុំ​នឹង​មក​វិញ​នៅ​ដើម​ខែ​វិច្ឆិកា​ជា​ប្រាកដ”។

លោក សុខ ឥសាន អ្នកនាំពាក្យ​គណបក្ស​ប្រជាជន​កម្ពុជា​កាន់អំណាច​ បាន​និយាយ​ថា លោក​ច្របូក​ច្របល់​នឹង​ការ​ថ្លែង​កន្លង​មក​របស់​លោក​ រង្ស៊ី និង​លោក កឹម សុខា អនុប្រធាន​គណបក្ស ដែល​និយាយ​ថា លោក សំអាន ធ្វើការ​លើ​បញ្ហា​ផែនទី​នេះ​ដោយ​ខ្លួនឯង ក្នុងនាម​ជា​តំណាង​រាស្ត្រ​មួយ​រូប​ ហើយ​មិនមែន​ក្នុងនាម​គណបក្ស​សង្គ្រោះ​ជាតិ​នោះ​ទេ។

លោក ឥសាន បាន​និយាយ​ថា “ថ្នាក់ដឹកនាំ​របស់​គណបក្ស​គាត់​បាន​ប្រកាស​ម្តង​ហើយ​ម្តង​ទៀត​ថា ពួកគេ​មិនដែល​ចាត់តាំង​គាត់​ទៅ​ធ្វើ​កិច្ចការ​នេះ​ទេ។ ខ្ញុំ​មិន​យល់​គោល​នយោបាយ​របស់​គណបក្ស​សង្គ្រោះ​ជាតិ​ទេ ពីព្រោះ​ថ្នាក់ដឹកនាំ​និយាយ​អី​ចេះ​ ប៉ុន្តែ អ្នក​គាំទ្រ​និយាយ​អី​ចុះ​វិញ”។

លោក ឥសាន បាន​បន្ថែម​ថា ផែនទី​ពី​ប្រទេស​បារាំង​នឹង​មកដល់​ប្រទេស​កម្ពុជា​នៅ​ថ្ងៃ​ព្រហស្បតិ៍​ ហើយ​ថា ការ​ប្រៀបធៀប​ជាមួយ​ផែនទី​ដែល​រដ្ឋាភិបាល​មាន​ នឹង​បញ្ជាក់​យ៉ាង​ពិតប្រាកដ​ថា ផែនទី​របស់​រដ្ឋាភិបាល​គឺជា​ផែនទី​ដែល​កំណត់​ឲ្យ​ប្រើ​ប្រាស់​ដោយ​រដ្ឋ​ធម្មនុញ្ញ។

លោក​បាន​និយាយ​ថា “នឹង​លែង​មាន​ការ​សង្ស័យ​ទៀត​លើ​រដ្ឋាភិបាល​ ដោយ​ហេតុ​ថា នៅ​ថ្ងៃ​ទី​៣ ខែ​កញ្ញា យើង​នឹង​ពិនិត្យ​ផ្ទៀងផ្ទាត់​ជាមួយ​ផែនទី​ពី​ប្រទេស​បារាំង ជា​ប្រភព​ដែល​បាន​ផែនទី​នោះ​មក”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស