27 C
Phnom Penh

មនុស្ស​ពីរ​នាក់​ត្រូវ​ចាប់​ខ្លួន​ពេល​បញ្ជូន​កូន​ក្រមុំ​ខ្មែរ​ទៅ​ប្រទេស​ចិន

ដោយ ឌឹ ខេមបូឌា ដេលី

បទវិភាគ

ប៉ូលិស​បាន​និយាយ​ថា ប្តី​ប្រពន្ធ​វ័យ​ក្មេង​មួយ​គូ​បាន​សារភាព​ថា​ បាន​ជួញ​ដូរ​ស្ត្រី​ខ្មែរ​យក​ទៅ​លក់​ឲ្យ​បុរស​នៅ​ប្រទេស​ចិន បន្ទាប់ពី​ពួកគេ​ត្រូវ​បាន​ចាប់​ខ្លួន​នៅ​ឯ​អាកាស​យានដ្ឋាន​អន្តរជាតិ​ភ្នំពេញ​នៅ​យប់​ថ្ងៃ​អង្គារ ខណៈ​ដែល​កំពុង​ត្រៀម​ឡើង​យន្តហោះ​ទៅ​ក្រុង​សៀងហៃ​ជាមួយ​ជន​រងគ្រោះ​ពីរ​នាក់​របស់​ខ្លួន។

លោក កែវ ធា ប្រធាន​ការិយាល័យ​ប្រឆាំង​ការ​ជួញ​ដូរ​មនុស្ស និង​ការពារ​អនីតិជន បាន​និយាយ​ថា នៅ​ពេល​សាកសួរ តូ ម៉ា អាយុ​២៥​ឆ្នាំ និង​ប្រពន្ធ​របស់​គាត់ ណៃ ធាវី អាយុ​២៤​ឆ្នាំ បាន​សារភាព​ថា​ បាន​ជួញ​ដូរ​ស្ត្រី​ម្នាក់​ទៅ​ប្រទេស​ចិន​លើក​មុន ក៏​ប៉ុន្តែ​ប៉ូលិស​ជឿ​ថា ប្តី​ប្រពន្ធ​នេះ​បាន​បញ្ជូន​ស្ត្រី​យ៉ាង​ហោច​ណាស់​បួន​នាក់​ទៅ​ប្រទេស​ចិន ក្រោម​លេស​មិន​ពិត។

លោក ធា បាន​និយាយ​ថា “ជន​សង្ស័យ​បាន​ប្រាប់​យើង​ថា នៅ​ប្រទេស​ចិន​មាន​ប្រជាជន​ខ្មែរ​មួយ​ក្រុម និង​ជនជាតិ​ចិន​បាន​ចំណាយ​ប្រាក់​ឲ្យ​ពួកគេ​១០.០០០​ដុល្លារ ដើម្បី​រៀបចំ​អ្វីៗ​គ្រប់​យ៉ាង [លិខិត​ឆ្លងដែន ទិដ្ឋាការ ជើង​យន្តហោះ] ​ក្នុង​បំណង​នាំ​ជន​រងគ្រោះ​ទាំង​ពីរ​នាក់​ទៅ​ប្រទេស​ចិន”។ លោក​បាន​បន្ថែម​ថា ក្រុម​នៅ​ប្រទេស​ចិន​ត្រូវ​បាន​គេ​ស្គាល់​ភិនភាគ ហើយ​ថា លោក​នឹង​អំពាវនាវ​ទៅ​អាំងទែរប៉ូល​សុំ​ជំនួយ​ក្នុង​ការ​ចាប់​ខ្លួន​សមាជិក​របស់​ក្រុម​នេះ។

លោក កែវ ធា បាន​និយាយ​ថា ជន​រងគ្រោះ​ពីរ​នាក់​នេះ ដែល​មាន​អាយុ​២២​និង​២៤​ឆ្នាំ មក​ពី​ខេត្ត​កំពង់ចាម​និង​ខេត្ត​កណ្តាល ជឿ​ថា​ពួកគេ​នឹង​ស្វែងរក​បាន​ជីវភាព​មួយ​ប្រសើរ និង​ស្វាមី​ល្អ​នៅ​ប្រទេស​ចិន។ លោក​បាន​ឲ្យ​ដឹង​ទៀត​ថា យោង​តាម​ជន​រងគ្រោះ​ជា​ច្រើន​នាក់​ដែល​បាន​ត្រឡប់​មក​វិញ​បាន​ឲ្យ​ដឹង​ថា គេ​មាន​គម្រោង​លក់​អ្នក​ទាំង​ពីរ​ឲ្យ​បម្រើ​ផ្លូវ​ភេទ​និង​ទាសករ​ក្នុង​ស្រុក។

លោក ធា បាន​និយាយ​ថា “ពួកគេ​បាន​សារភាព​ថា ពួកគេ​មាន​គម្រោង​បញ្ជូន​ស្ត្រី​ទាំង​នេះ​ទៅ​ប្រទេស​ចិន​ដើម្បី​លក់​ទៅ​ឲ្យ​នរណា​ដែល​ចង់​រៀបការ​ជាមួយ​ពួកគេ” ហើយ​ប្តី​ប្រពន្ធ​នេះ​នឹង​ឡើង​តុលាការ​ក្រុង​នៅ​ថ្ងៃ​នេះ។

យោង​តាម​សេចក្តី​ប្រកាស​ព័ត៌មាន​ពី​ក្រសួង​ការបរទេស​កាលពី​ថ្ងៃ​ពុធ​បាន​ឲ្យ​ដឹង​ថា ដោយ​ឡែក​ពី​នេះ ស្ត្រី​ខ្មែរ​ប្រាំ​នាក់​ដែល​ត្រូវ​បាន​គេ​លក់​និង​រំលោភ​បំពាន​ដោយ​បុរស​នៅ​ខេត្ត​ជាំងស៊ូ​ក្នុង​ប្រទេស​ចិន នឹង​ត្រូវ​វិលមក​ប្រទេស​វិញ​យប់​នេះ។

កាលពី​ថ្ងៃ​អង្គារ លោក ជុំ សុន្ទរី អ្នក​នាំ​ពាក្យ​ក្រសួង​ការបរទេស បាន​មាន​ប្រសាសន៍​ថា ក្នុង​រយៈ​ពេល​ប្រាំពីរ​ខែ​ដំបូង​នៃ​ឆ្នាំ​នេះ ស្ត្រី​ខ្មែរ​៥០​នាក់​ត្រូវ​បាន​គេ​ជួយសង្គ្រោះ​ពី​បុរស​ដែល​រំលោភ​បំពាន​នៅ​ប្រទេស​ចិន បើ​ធៀប​នឹង​៥០​នាក់​ក្នុង​ឆ្នាំ​២០១៤៕និត (រាយការណ៍​បន្ថែម​ដោយ Matt Blomberg and Kang Sothear)

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស