កាលពីម្សិលមិញ លោកនាយករដ្ឋមន្ត្រី ហ៊ុន សែន បានងាកមកធ្វើការវាយប្រហារដោយពាក្យសម្ដីឡើងវិញទៅលើលោក សម រង្ស៊ី ប្រធានគណបក្សប្រឆាំង ហើយជាថ្មីម្ដងទៀត លោកបានហៅលោក សម រង្ស៊ី ថា “មេចោរ” អ្នកពូកែភូតកុហក និងអ្នកពូកែខាងរករឿងគេឯង។
ដោយងាកចេញពីប្រធានបទទាំងស្រុងអំឡុងសុន្ទរកថាបិទសន្និបាតលើកទី២ តំណាងសមាគមអតីតយុទ្ធជនទូទាំងប្រទេសដូចដែលបានធ្វើជាញឹកញាប់ លោកនាយករដ្ឋមន្ត្រីបានចំអកឲ្យលោក សម រង្ស៊ី ចំពោះការអះអាងនៅពេលវិលត្រឡប់ពីបរទេសវិញថា លោកនឹងធានាឲ្យមានការដោះលែងសកម្មជនគណបក្សសង្គ្រោះជាតិទាំង១១រូប ដែលតុលាការចោទប្រកាន់កាលពីពេលថ្មីៗនេះ ចេញពីពន្ធនាគារវិញនៅត្រឹមខែសីហា។ កាលពីខែកក្កដា សកម្មជនទាំង១១រូបនេះត្រូវបានតុលាការផ្ដន្ទាទោសឲ្យជាប់ពន្ធនាគារពី៧ឆ្នាំដល់២០ឆ្នាំ តាមការចោទប្រកាន់ពីបទកុបកម្មដែលមជ្ឈដ្ឋាទូទៅចាត់ទុកថាជារឿងនយោបាយ។
លោក ហ៊ុន សែន បានថ្លែងយ៉ាងដូច្នេះថា លោក សម រង្ស៊ី ”ពូកែខាងភូតកុហក ចុះទម្រាំដឹកនាំប្រទេសម៉េចទៅ?។ ឥឡូវដោះទៅ ពេលចូលមកដល់ លោកឯងស្រែកថាខែ៨ដោះចេញ ឥឡូវខែ៩ដោះអត់ចេញផង លោកឯងភូតស្អីទៀត”។
លោកបានមានប្រសាសន៍បន្តថា ជាញឹកញាប់ “មេភូត” រូបនេះតែងតែទាមទារដំឡើងប្រាក់ខែសម្រាប់កម្មករមានជំនាញទាបនៅទូទាំងប្រទេស ប៉ុន្តែខ្លួនឯងបែរជាឲ្យប្រាក់ខែអ្នកបើកបររថយន្តផ្ទាល់ខ្លួន អ្នកបម្រើ និងសន្តិសុខរបស់ខ្លួនតិតួចទៅវិញ។
លោកលើកឡើងបន្ថែមទៀតថា លោករីករាយដែលយ៉ាងហោចណាស់ប្រធានគណបក្សប្រឆាំងរូបនេះមិនអើពើនឹងការទទូចសុំរបស់មន្ត្រីក្រោមបង្គាប់របស់លោក ដើម្បីទាមទារប្រាក់ខែរដ្ឋរបស់ខ្លួនអំឡុងពហិការមិនចូលសភារយៈពេលជិត១ឆ្នាំរបស់គណបក្សប្រឆាំងក្រោយការបោះឆ្នោតជ្រើសតាំង តំណាងរាស្ត្រឆ្នាំ២០១៣ដ៏ចម្រូងចម្រាស។
លោកបានមានប្រសាសន៍ថា “សំណាងហើយមិនស្នើបើកប្រាក់ខែក្នុងពេលធ្វើបាតុកម្ម។ ប៉ុន្តែខាងក្រោមបន្ទោសមេថា ម៉េចជួបសម្ដេចនាយក [លោក ហ៊ុន សែន] ហើយ គ្រាន់តែលើកមួយម៉ាត់ទៅ ប្រាក់ខែជិត១ឆ្នាំដែរ? អញត្រូវបាន២០.០០០ វាអត់បាននឹងគេ។ វាគ្មានម៉ែអាណាដើរធ្វើបាតុកម្មហើយបានប្រាក់ខែទេវើយ”។
ជាថ្មីម្តងទៀត លោក ហ៊ុន សែន ក៏បានហៅលោក សម រង្ស៊ី ថា “មេចោរ” ផងដែរកាលពីម្សិលមិញ។ លោកបានប្រើប្រាស់ពាក្យប្រមាថនេះលើកដំបូងកាលពីខែមុន បន្ទាប់ពីលោក សម រង្ស៊ី មានប្រសាសន៍ថា គណបក្សប្រឆាំងនឹងឈប់ “ចាក់ក្រឡេក” រដ្ឋាភិបាលទាក់ទិនកិច្ចការកំណត់ព្រំដែនកម្ពុជា-វៀតណាម ដែលមានភាពតានតឹងយ៉ាងខ្លាំងផ្នែកនយោបាយ។
ចំណែកឯលោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានបដិសេធមិនធ្វើអត្ថាធិប្បាយឡើយជុំវិញសុន្ទរកថាចុងក្រោយបំផុតរបស់នាយករដ្ឋមន្ត្រីនេះ៕ សុខុម