29.3 C
Phnom Penh

បក្ស​កាន់​​​អំណាច​​​ជ្រើសរើស​មន្ត្រីសំខាន់ៗ​​ធ្វើ​ជា​សមាជិក​គណៈកម្មការ​ឃោសនាថ្មី​

ដោយ ឌឹ ខេមបូឌា ដេលី

បទវិភាគ

​​​មន្ត្រី​សំខាន់​​​ៗ​​​មួយ​​​ចំនួន​​​ក្នុង​​​គណបក្ស​​​ប្រជាជនកម្ពុជា ត្រូវ​​​បាន​​​ជ្រើស​​​រើស​​​សម្រាប់​​​”គណៈ​កម្មការ​​​ឃោស​​​នា​​​ និង​​​អប់​​​រំ” ថ្មី​​​មួយនៅ​​​ក្នុង​​​គណបក្ស​​​កាន់​​​អំណាច​​​ដោយ​​​មាន​​​លោក​​​ស្រីឧបនាយក​​​រដ្ឋ​​​មន្ត្រី ម៉ែន សំអន ជាអ្នក​​​ដឹក​​​នាំ​​​ក្រុម​​​​​​មាន​​​សមាជិក​​​២៥​​​រូបដែល​​​មាន​ភារ​​​កិច្ច​ស្តារ​ប្រជាប្រិយ​​​ភាព​​​ឡើងវិញនេះ​។

យោង​​​តាម​​​សេចក្តី​​​សម្រេច​​​របស់គណ​​​បក្ស​​​ដែល​​​ទទួល​​​បាន​​​កាល​​​ពី​​​ម្សិលមិញ បាន​​​ឲ្យ​​​ដឹង​​​ថា ភារកិច្ច​​​របស់​​​គណៈកម្មការ​​​នេះ​​​​​​នឹង​​​ត្រូវ ​​​”ប្រមូល​​​ព័ត៌មាន​​​ទាក់​​​ទង​​​ស្ថានភាព​​​នយោបាយ​​​​​​​​​នៅ​​​ក្នុង​​​គណបក្ស​​​ ក្នុង​​​ចំណោម​​​មហាជន​​​ និង​​​ពី​​​ប្រភព​​​ផ្សេង​​​ៗ​​​ទៀត​​​” ហើយ​​​ធ្វើ​​​យុទ្ធ​​​នាការ​​​សម្រាប់​​​គណបក្ស​​​ប្រជា​​​ជន​​​កម្ពុជា។

ដឹក​​​នាំ​​​ដោយ​​​លោក​​​ស្រី ម៉ែន សំអន ​​​រដ្ឋ​​​មន្ត្រី​​​ ក្រសួង​​​ទំនាក់​​​ទំនង​​​ជាមួយ​រដ្ឋ​​​សភា​​​ ព្រឹទ្ធ​​​សភា​​​ និង​​​អធិការកិច្ច​​​ គណៈកម្មការ​​​នេះ​​​ក៏​​​រួម​​​មាន​​​លោក ឱម យិុនទៀង​​​ ប្រធាន​​​អង្គភាព​​​ប្រឆាំង​​​អំពើ​​​ពុក​​​រលួយ​​​ លោក ​​​ហង់ ​​​ជួន ​​​ណារ៉ុន ​​​រដ្ឋ​​​មន្ត្រី​​​ក្រសួង​​​អប់​​​រំ​​​ លោក សៅ សុខា ​​​មេ​​​បញ្ជាការ​​​កង​​​​​​រាជអាវុធ​​​ហត្ថ​​​លើ​​​ផ្ទៃ​​​ប្រទេស​​​ លោក ផៃ ស៊ីផាន អ្នក​​​នាំ​​​ពាក្យទីស្តីការ​​​គណៈ​​​រដ្ឋ​​​មន្ត្រី និងកូនប្រុស​​​របស់​​​លោក​​​នាយក​​​រដ្ឋ​​​មន្ត្រី ហ៊ុន សែន គឺ​​​​​​លោក ហ៊ុន ម៉ានី ដែល​​​ជា​​​សមាជិក​​​សភា និង​​​ជា​​​ប្រធាន​​​ក្រុម​​​យុវជន​​​។

លោក សុខ ឥសាន​​​ អ្នក​​​នាំពាក្យ​​​គណបក្ស​​​ប្រជា​​​ជនកម្ពុជា​​​បាន​​​មាន​​​ប្រសាសន៍​​​ថា គណៈ​​​កម្មការ​​​​​​នេះ​​​ត្រូវ​​​បាន​​​បង្កើត​​​ឡើង​​​កាល​​​ពីចុង​​​ខែ​​​មុន ដើម្បី​​​ជួយ​​​គណបក្ស​​​កាន់​​​អំណាច​​​     អនុ​​​វត្ត​​​ឲ្យ​​​បានខ្លាំង​​​ក្លា​​​នៅក្នុងការ​​​បោះឆ្នោត​​​ឃុំ​​​-សង្កាត់​​​ក្នុង​​​ឆ្នាំ​​​២០១៧ និង​​​ការ​​​បោះ​​​ឆ្នោត​​​ជាតិ​​​ក្នុង​​​ឆ្នាំ​​​២០១៨ បន្ទាប់​​​ពីមាន​​​ការ​​​បង្កើត​​​គណបក្ស​​​សង្គ្រោះ​​​ជាតិ​​​ ជា​​​គណបក្ស​​​ប្រឆាំង​​​ដ៏​​​សំខាន់​​​មួយ​​​ក្នុង​​​ការ​​​បោះ​​​ឆ្នោត​​​កាល​​​ពី​​​ឆ្នាំ​​​២០១៣។

លោក​បាន​​​មាន​​​ប្រសាសន៍​​​ថា “យើង​​​កំពុង​​​ ប្រឈម​​​ការ​​​បោះ​​​ឆ្នោត​​​នៅ​​​ឆ្នាំ​​​២០១៧ និង​​​២០១៨​​​ ដោយ​​​មាន​​​សំណើ​​​សំខាន់ៗ​​[ពី​​​សាធារណជន]​​​ ដូច្នេះដើម្បី​​​ឲ្យ​​ដណ្តើម​​​​​​​បាន​​​ជ័យ​​​ជម្នះ​​​​ក្នុង​​​ការ​​​បោះ​​​ឆ្នោត​​​ គណបក្ស​​​បាន​​​បង្កើត​​​គណៈកម្មការ​​​នេះ​​​ដើម្បីសិក្សា​​​ស្ថាន​​​ភាព​​​នយោបាយ​​​ឲ្យ​​​បាន​​​ស៊ីជម្រៅ រួម​​​ទាំង​​​ការ​​​វាយ​​​តម្លៃ​​​ស្ថានភាព​ដើម្បី​​​ធ្វើ​​​ការ​​​ឃោស​​​នា​​​ដល់​​​ ប្រជា​​​ពល​​​រដ្ឋ​​​ឲ្យ​​​កាន់​​​តែ​​​មាន​​​ប្រសិទ្ធ​​​ភាព”។

លោក​​​ សុខ ឥសាន​​​ បាន​​​បន្ថែមថា “គណ​​​បក្ស​​​នឹង​លើកឡើង​អំពី​​​​​​កំណែ​​​ទម្រង់​​​ស៊ី​ជម្រៅរបស់រដ្ឋាភិបាល​ ដើម្បី​​​បង្កើន​​​ប្រជា​​​ប្រិយភាព។ គណបក្ស​​​នឹង​​​ពិនិត្យ​​​តាម​​​ដាន​​​មតិ​​​យោបល់​​​របស់​​​​​​អ្នក​​​គាំទ្រ​​​បក្ស​​​ដើម្បី​​​ទប់​​​ស្កាត់​​​ក៏​​​ឲ្យ​​​មាន​​​​​​ការ​​​ជឿ​​​ឃោស​​​នា​​​របស់​​​គណ​​​បក្ស​​​​​​ប្រឆាំង​​​ ឬ​​​គណ​​​បក្ស​​​ប្រកួត​​​ប្រជែង​​​ផ្សេង​​​ទៀត​​​ និង​​​ធ្វើ​​​ឲ្យ​​​ប្រជា​​​​​​ពល​​​រដ្ឋ​​​ជឿ​​​ទុក​​​ចិត្ត​​​កាន់​​​តែ​​​ខ្លាំង​​​លើ​​​ការ​​​ដឹក​​​នាំរបស់​​​គណ​បក្ស​​​ប្រជា​​​ជន​​​កម្ពុជា”។

នៅពេល​​​ត្រូវ​​​បាន​​​សួរ​​​ថា តើ​​​ហេតុ​​​អ្វី​​​បាន​​​ជា​​​គណៈកម្មការ​​​នេះ​​​មាន​​​សមាជិកជា​កម្លាំង​​​​សន្តិសុខ​​​ដូច​​​ជា​​​នាយ​​​ឧត្តម​​​សេនីយ៍ ​​​សៅ សុខា ​​​និង​​​ លោក ឆៃ ស៊ីណារិទ្ធ អគ្គស្នង​​​ការ​​​រង​​​នគរ​​​បាល​​​ជាតិ​​​ ព្រម​​​ទាំង​​​ឥស្សរជន​​​ផ្សេង​​​ៗ​​​ទៀត​​​ដូច​​​ជា​​​លោក ឱម យិុនទៀង ជាដើម​នោះ​ ​​​លោក សុខ ឥសាន លើកឡើង​ថា វា​ជារឿង​ធម្មតាទេ​​​​​​។

លោក​​​បាន​​​ថ្លែង​​​ថា “វា​​​មិន​​​អាច​​ចៀស​​​រួច​​​ទេ ពីព្រោះ​​​គណបក្ស​​​ប្រជា​​​ជន​​​កម្ពុជា​​​គឺ​​​ជា​​​គណ​បក្ស​​​កាន់​​​អំណាច​​​ ហេតុ​​​ដូច្នោះ​​​ហើយ​​​មាន​​​មន្ត្រី​​​ដែល​​​មាន​​​តួនាទី​​​ក្នុង​​​ជួរ​​​រដ្ឋាភិបាល ​​​ហើយ​​​ពួក​គាត់​​សុទ្ធ​​​តែ​​​ជា​​​​សមាជិក​​​គណបក្ស​​​ប្រជាជន​​​កម្ពុជា​​​ ដែល​​​ច្បាប់​​​មិន​​​បាន​​​ហាម​​​ឃាត់​​​ទេ​​​”។

លោក យឹម សុវណ្ណ អ្នក​​​នាំពាក្យ​​​គណបក្ស​​​សង្គ្រោះជាតិ​​​បាន​​​មាន​​​ប្រសាសន៍​​​ថា ​​​មធ្យោ​​​ បាយ​​​ ​​​​​​ឃោស​​​នាតែ​​​មួយគត់​​​ដែល​​​​អាច​​​ជួយ​​​​​គណ​​​បក្ស​​​ប្រជាជនកម្ពុជាឱ្យ​​​​ឈ្នះ​​​ការ​​​បោះ​​​ឆ្នោត​​​នៅ​​​ក្នុង​​​ឆ្នាំ​​​២០១៧ និង​​​២០១៨​​​​ បាន​​​ ​​​លុះ​​​ត្រា​​​តែ​​​ គណ​​​បក្ស​​​ កាន់​​​អំណាច​​​អាច​​​ដោះ​​​ស្រាយ​​​​​​បញ្ហា​​​ពុក​​​រលួយ​​​​​​ អសន្តិសុខ​​​ដីធ្លី ការ​​​កាប់​​​បំផ្លាញ​​​ព្រៃ​​​ឈើ​​​ និង​​​សេវា​​​សាធារណៈ​​​​​​ទន់​​​ខ្សោយ​​​។

លោក​​​បាន​​​បន្ថែម​​​ថា “ទាំង​​​នេះ​គឺជា​បញ្ហា​ដែល​​​​​​ប្រជា​​​ជន​​​គាំទ្រ​​​ ឬមិនគាំទ្រ  ហើយ​ទាំង​នេះ​ជា​​សេចក្តី​ត្រូវ​ការ​​​របស់​​​ប្រជា​​​ពល​​​រដ្ឋ​​​។ ​​​ប្រសិន​​​បើ​​​គណបក្ស​​​ប្រជា​​​ជន​​​កម្ពុជាអាច​​​ដោះ​​​ស្រាយ​​​បញ្ហា​​​ទាំង​​​នេះ​​​បាន​​​ ពួក​​​គេ​​​នឹង​​​ទទួល​​​បានការ​​​គាំទ្រ​​​​​​។ ​​​ពួក​​​គេ​​​មិន​​​អា​​​ច​​​​​​ធ្វើ​​​បាន​​ ​​​ពីមុន​​​ៗ​​​មក ហើយ​​​អំពើ​​​ពុករលួយ​​​នៅ​​​តែមាន​​​ដដែល​​​”៕ សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស