កាលពីថ្ងៃសៅរ៍ នគរបាលមកពីនាយកដ្ឋានកណ្ដាលសន្ដិសុខនៃក្រសួងមហាផ្ទៃ បានចាប់ខ្លួនបុរសម្នាក់ដែលកាលពីខែមុនបានគំរាម “បាញ់ក្បាលលោក សុខ ទូច” ជាបណ្ឌិតមួយរូបដែលរដ្ឋាភិបាលបានជ្រើសតាំងឲ្យស្រាវជ្រាវកិច្ចការកំណត់ព្រំដែនដ៏ចម្រូងចម្រាសរបស់ខ្លួនជាមួយវៀតណាម។
យោងតាមលោកឧត្ដមសេនីយ៍ឯក គៀត ច័ន្ទថារិទ្ធ អ្នកនាំពាក្យអគ្គស្នងការដ្ឋាននគរបាលជាតិបានឲ្យដឹងកាលពីម្សិលមិញថា បុរសឈ្មោះ ផង់ សីហា អាយុ២៧ឆ្នាំ ត្រូវបានចាប់ខ្លួននៅច្រកទ្វារអន្តរជាតិប៉ោយប៉ែត ក្នុងខេត្តបន្ទាយមានជ័យ នៅម៉ោងប្រហែល៥ល្ងាច បន្ទាប់ពីរូបគេត្រូវបាននគរបាលថៃ ចាប់ខ្លួនពីបទធ្វើការក្នុងប្រទេសថៃ ដោយគ្មានលិខិតស្នាមត្រឹមត្រូវ។
អ្នកនាំពាក្យរូបនេះបានលើកឡើងទៀតថា ”យើងបានចាប់ខ្លួនជនសង្ស័យនៅព្រំដែន ខណៈពេលជននេះឆ្លងច្រកទ្វារអន្តរជាតិប៉ោយប៉ែតពីប្រទេសថៃ ដើម្បីវិលត្រឡប់ទៅស្រុកកំណើតវិញ។ យើងបានសហការជាមួយអាជ្ញាធរថៃ ហើយបានស្នើឲ្យពួកគេស្រាវជ្រាវរកជនសង្ស័យនេះ។ មួយសប្ដាហ៍ក្រោយមក ពួកគេបានជូនដំណឹងមកយើងថា ជនសង្ស័យកំពុងស្នាក់នៅក្នុងប្រទេសថៃ ដោយខុសច្បាប់ ហើយយើងបានចាប់ខ្លួនជននេះ បន្ទាប់ពីជននេះត្រូវបានចាប់ខ្លួន [នៅក្នុងប្រទេសថៃ]”។
លោកមានប្រសាសន៍បន្តថា ពេលនេះ ផង់ សីហា ដែលមានស្រុកកំណើតនៅខេត្តព្រៃវែង កំពុងជាប់ឃុំនៅក្រសួងមហាផ្ទៃហើយនគរបាលគ្រោងឃុំខ្លួនជននេះ៤៨ម៉ោង ដើម្បីសួរចម្លើយទាក់ទិនការគំរាមធ្វើឃាតលោក សុខ ទូច។ “ពេលនេះយើងកំពុងសួរចម្លើយគាត់ដើម្បីប្រមូលចម្លើយ ហើយគាត់បានសារភាពរួចហើយថា គាត់ពិតជាមានទោសមែន”។
តាមការចោទប្រកាន់ថា កាលពីថ្ងៃទី២៨ ខែសីហា ផង់ សីហា បានប្រើគណនីហ្វេសប៊ុកមួយដែលមានឈ្មោះថា “សី ហ៊ូ” (Sey Hu) បង្ហោះរូបកំាភ្លើងខ្លីមួយដើម និងគ្រាប់កំាភ្លើងតម្រៀបជាជួរចំនួន១០គ្រាប់អមដោយសារគំរាមលោក សុខ ទូច ចំពោះការគាំទ្រជំហររបស់រដ្ឋាភិបាលទាក់ទិនបញ្ហាព្រំដែន។
សារនោះមានខ្លឹមសារដូច្នេះថា “កាំភ្លើងនេះទុកបាញ់ក្បាល សុខ ទូច អាបណ្ឌិតខួរក្បាលឆ្កែ អាបណ្ឌិតកែប្រែប្រវត្តិសាស្ត្រ អាបណ្ឌិតលក់ខួរឲ្យយួន”។
សូមបញ្ជាក់ថា លោក សុខ ទូច គឺជាប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ដែលគ្រប់គ្រងដោយរដ្ឋ ហើយកាលពីខែមុន លោកទទួលបានការចាត់តាំងឲ្យបំពេញភារកិច្ចស្រាវជ្រាវបញ្ហាព្រំដែនចំពេលគណបក្សប្រឆាំងអះអាងថា ទឹកដីរបស់កម្ពុជាត្រូវបានកាត់ទៅឲ្យវៀតណាម។
ចាប់តាំងពីទទួលភារកិច្ចនេះមក លោក សុខ ទូច បានរិះគន់ការអះអាងរបស់គណបក្សសង្គ្រោះជាតិដែលលើកឡើងថា រដ្ឋាភិបាលបានប្រើប្រាស់ផែនទីព្រំដែនផ្សេងក្រៅពីផែនទីតែមួយគត់ដែលទទួលស្គាល់ដោយរដ្ឋធម្មនុញ្ញ ជាហេតុបណ្ដាលឲ្យមានប្រតិកម្មតប យ៉ាងខ្លាំងក្លាពីបណ្ដាអ្នកគាំទ្រគណបក្សប្រឆាំង។
ពេលទាក់ទងតាមទូរស័ព្ទកាលពីម្សិលមិញ លោក សុខ ទូច បានមានប្រសាសន៍ថា លោកមិនដែលជួបឈ្មោះ ផង់ សីហា ទេ ហើយលោកក៏គ្មានយោបល់អ្វីដែរពាក់ព័ន្ធនឹងការចាប់ខ្លួនបុរសរូបនេះ។ លោកបានគូសបញ្ជាក់ថា ”ខ្ញុំទទួលបានព័ត៌មានអំពីការចាប់ខ្លួនជនសង្ស័យ ប៉ុន្តែខ្ញុំមិនដែលស្គាល់បុរសម្នាក់នោះទេ ខ្ញុំមិនអាចនិយាយបានទេថា ខ្ញុំស្វាគមន៍ ឬមិនស្វាគមន៍នោះ ប៉ុន្តែ ខ្ញុំគ្រាន់តែចង់ឲ្យសមត្ថកិច្ចចាត់វិធានការ និងធ្វើការទៅតាមច្បាប់ប៉ុណ្ណោះ”។
លោក សុខ ទូច បានមានប្រសាសន៍កាលពីសប្ដាហ៍មុនថា លោកក៏ទទួលបានការគំរាមកំហែងតាមប្រព័ន្ធផ្ញើសារអុីនធើណិតវ៉ាយបឺ (Viber) ផងដែរ ហើយកំពុងសហការជាមួយនគរបាល ទោះបីជាលោកមិនបានដាក់ពាក្យបណ្ដឹងជាផ្លូវការក៏ដោយ។
សូមកត់សម្គាល់ថា ឈ្មោះ ផង់ សីហា មិនមែនជាជនទី១នោះទេដែលត្រូវបានចោទប្រកាន់ពីបទគំរាមធ្វើឃាតបុគ្គលសំខាន់តាមហ្វេសប៊ុកនៅក្នុងប្រទេសកម្ពុជា។ លោក ផែង វណ្ណៈ នាយរងការិយាល័យបណ្ដុះបណ្ដាល និងវិក្រឹតការ នៃស្នងការដ្ឋាននគរបាលរាជធានីភ្នំពេញ ត្រូវបានបណ្ដាអ្នកប្រើប្រាស់បណ្តាញទំនាក់ទំនងសង្គមចោទប្រកាន់ពីបទគំរាមធ្វើឃាតលោក កឹម សុខា អនុប្រធានគណបក្សប្រឆាំងនៅក្នុងឆ្នាំ២០១៣។
រូបភាពមួយបង្ហោះដោយលោក ផែង វណ្ណៈ ដែលជាម្ចាស់ទំព័រហ្វេសប៊ុកគាំទ្ររដ្ឋាភិបាលដ៏ពេញនិយមមួយ ត្រូវបានចែករំលែកតៗគ្នាព្រោងព្រាត ដែលបង្ហាញពីរូបកាំភ្លើងខ្លីមួយដើម និងគ្រាប់កាំភ្លើងចំនួនប្រាំពីរគ្រាប់អមដោយសារគំរាមបាញ់អវយវៈសំខាន់ៗនៃរាងកាយរបស់លោក កឹម សុខា។
ទោះជាយ៉ាងណា លោក ផែង វណ្ណៈ បានច្រានចោលការទទួលខុសត្រូវចំពោះអ្វីដែលបានបង្ហោះនោះ ដោយអះអាងថា មានអ្នកផ្សេងបានបង្កើតគណនីដាច់ដោយឡែកដោយប្រើឈ្មោះ និងរូបថតរបស់លោក។
លោកត្រូវបាននគរបាលសួរចម្លើយ ប៉ុន្តែមិនត្រូវបានចាប់ខ្លួនឡើយ។ ទាក់ទិននឹងបញ្ហានេះ លោក ផៃ សីុផាន អ្នកនាំពាក្យទីស្ដីការគណៈរដ្ឋមន្ត្រី បានមានប្រសាសន៍កាលពីម្សិលមិញថា ភាពខុសគ្នារវាងករណីទាំងពីរនៅត្រង់ថា លោក កឹម សុខា មិនបានសហការជាមួយសមត្ថកិច្ច។
លោកបានគូសបញ្ជាក់ថា ”ខ្ញុំសូមបញ្ជាក់ថា សមត្ថកិច្ចមិនបានចាប់ខ្លួនជនសង្ស័យណាម្នាក់ទេ ពីព្រោះលោក កឹម សុខា មិនបានបំពេញនីតិវិធីជាមួយនគរបាលដើម្បីស្វែងរកជនសង្ស័យ”៕ សុខុម