នៅក្នុងពិធីប្រកាសតែងតាំងអតីតមេ បញ្ជាការយោធាមួយរូបជាអភិបាលខេត្តព្រះសីហនុកាលពីម្សិលមិញ លោក ស ខេង រដ្ឋ មន្ត្រីក្រសួងមហាផ្ទៃបានស្ដីបន្ទោសនគរបាល មូលដ្ឋានថា បានបណ្តោយឲ្យជនជាតិរុស្ស៊ីមួយក្រុមធ្វើឲ្យខូចឈ្មោះតំបន់ទេសចរណ៍ដ៏ទាក់ទាញ ហើយលោកបានចេញបទបញ្ជាឲ្យបញ្ចប់ការនេសាទខុសច្បាប់នៅសមុទ្រ។
លោក ស ខេង ដែលមើលការខុសត្រូវចំពោះការដោះដូរមន្ត្រីជាន់ខ្ពស់បំផុតមួយចំនួននៅក្នុងខេត្តនេះ ក្នុងរយៈពេល១ឆ្នាំដែលអសន្តិសុខកើតមានយ៉ាងច្រើន បានប្រគល់តំណែងជាផ្លូវការឲ្យលោក យន្ត មីន អតីតមេបញ្ជាការកងយោធពលខេមរភូមិន្ទនៅក្នុងខេត្តកោះកុង។
រដ្ឋមន្ត្រីក្រសួងមហាផ្ទៃរូបនេះបានឆ្លៀតឱកាសនេះផ្ដោតគោលដៅលើនគរបាលការពារដែនទឹក ដែលមិនបានការពារដែនសមុទ្រកម្ពុជា និងមិនបានការពាររបរចិញ្ចឹមជីវិតរបស់អ្នកនេសាទមូលដ្ឋាន។
ដោយសំដៅលើប្រព័ន្ធមួយដែលអ្នកនេសាទ ភាគច្រើនមកពីវៀតណាមឲ្យប្រាក់ទៅអាជ្ញាធរដើម្បីទទួលបានសិទ្ធិនេសាទ ដែលជារឿយៗប្រើវិធីខុសច្បាប់ក្នុងដែន ទឹកកម្ពុជា លោក ស ខេង បានមានប្រសាសន៍ ថា ”គួរតែយកចិត្តទុកដាក់លើបញ្ហាសមុទ្រវាមិនមែនមានន័យថា គ្រាន់តែចេញសំបុត្រឲ្យគេចាប់ត្រីទេ។ កុំគិតថា ខ្ញុំមិនដឹងអំពីបញ្ហានេះ”។
លោកបានចេញបទបញ្ជាថា ”ឲ្យដោះស្រាយ”។លោកបានបន្តដោយ និយាយ ទាក់ ទិញនឹងតួនាទីរបស់មន្ត្រីមូលដ្ឋានម្នាក់ថា “ ខ្ញុំមិនដឹងថា ដោះស្រាយយ៉ាងម៉េចទេ អ្នកចាប់ ឲ្យអ្នកហ្នឹងដោះស្រាយទៅ។អ្នកឯងកំពុងតែប្រព្រឹត្តបទល្មើស។ អាហ្នឹងប៉ូលិសដែនសមុទ្រ មានមកអត់?”។
ពេលទាក់ទងតាមទូរស័ព្ទ លោក អឹុងសែនសម្បត្តិ អនុប្រធាននាយកដ្ឋានព្រំដែនទឹកទទួលបន្ទុកបង្ក្រាបបទល្មើសលើផ្ទៃសមុទ្រក្នុងក្រុងព្រះសីហនុ បានលើកឡើងថា លោក ស្ថិតក្នុងចំណោមមន្ត្រីប្រហែល៤០០នាក់ដែលបានមកចូលរួមក្នុងពិធីនេះ ប៉ុន្តែមិន ដឹងថា លោក ស ខេង ថ្លែងអំពីការនេសាទខុសច្បាប់ឡើយ។
ដោយបន្តបដិសេធថា មន្ត្រីរបស់លោកមិនបានយកប្រាក់ពីអ្នកនេសាទបរទេស លោក អុឹង សែនសម្បត្តិ បានមានប្រសាសន៍ថា “ខ្ញុំបានអង្គុយនៅទីនោះ ប៉ុន្តែខ្ញុំមិនបានឮគាត់លើកឡើងពីបញ្ហានេះទេ”។ ហើយដោយបដិសេធមិនធ្វើអត្ថាធិប្បាយបន្ថែម លោកបានថ្លែងថា”កងទ័ពការពារព្រំដែនទឹកធ្វើការដើម្បីការពារសន្តិសុខនៅក្នុងលំហសមុទ្រ និងការពារសន្តិសុខជូនអ្នកនេសាទ”។
កាលពីខែឧសភា អ្នកនេសាទវៀតណាមដែលធ្លងកាត់តាមដែនទឹកចន្លោះកោះតាង និងកោះរ៉ុងសន្លឹម បានប្រាប់អ្នកយកព័ត៌មានថា ពួកគេបានបង់ប្រាក់ឲ្យនគរបាលការពារ ដែនទឹកដើម្បីទទួលបានសិទ្ធិនេសាទ ហើយបានបង់បែបនេះអស់រយៈពេលជាច្រើនឆ្នាំមកហើយ។បន្ទាប់មក នគរបាលការពារដែនទឹកបានបដិសេធថា មិនដឹងអំពីអ្នកនេសាទវៀតណាមទេ ហើយកាលពីម្សិលមិញបាននិយាយដដែល។
ឧត្ដមសេនីយ៍ឯក ទៀ សុខា មេបញ្ជាការជួរមុខនៃគណៈកម្មការសន្តិសុខលំហសមុទ្ររាម បានមានប្រសាសន៍ថា កងទ័ពជើងទឹកគ្មានជាប់ពាក់ព័ន្ធនៅក្នុងការអនុញ្ញាតឲ្យមានការនេសាទខុសច្បាប់ឡើយ”។
លោក ស ខេង បានបញ្ចប់សុន្ទរកថារបស់លោកកាលពីម្សិលមិញដោយលើកឡើងថា លោកនឹងសុំជំនួយពីលោក ប៉ុល សារឿន មេបញ្ជាការកងយោធពលខេមរភូមិន្ទ ដើម្បីប្រយុទ្ធប្រឆាំងនឹងបញ្ហានេះ។
មុនពេលថ្លែងសុន្ទរកថា រដ្ឋមន្ត្រីក្រសួងមហាផ្ទៃរូបនេះបានស្តីបន្ទោសម្តងទៀតលើនគរបាលដែលបណ្ដោយឲ្យបទល្មើសហិង្សាកើតមានទូទាំងក្រុងព្រះសីហនុ និងតាមកោះ នានាកាលពីឆ្នាំមុន និងដើមឆ្នាំ២០១៥។
ដោយគូសបញ្ជាក់ពីគម្រោងដែល កំពុងស្ថិតក្រោមការពិភាក្សាជុំវិញការហោះហើរដោយផ្ទាល់ពីប្រទេសសិង្ហបុរី ថៃ និងប្រទេសវៀតណាមមកកាន់ក្រុងព្រះសីហនុ លោក ស ខេង បានមានប្រសាសន៍ថា “ខេត្តនេះមានសក្ដានុពលខ្លាំងផ្នែកទេសចរណ៍ ប៉ុន្តែការរក្សាសន្តិសុខសាធារណៈគឺជាអាទិ ភាពដែលត្រូវផ្ដោតការចាប់អារម្មណ៍”។ ហើយដោយសំដៅលើលោក សេរហ្គេ ប៉ូលុនស្គី មហាសេដ្ឋីរុស្ស៊ីដែលត្រូវបានចាប់ខ្លួន និងបក្ខពួករបស់គាត់ដែលជួនមានទំនាក់ទំនងនិងជួនមិនមានទំនាក់ទំនងជាមួយអាជ្ញាធរ ពេលពួកគេអនុវត្តគម្រោងអភិ វឌ្ឍន៍ដ៏ធំនៅលើកោះមួយចំនួននៅក្នុងក្រុងព្រះសីហនុ លោកបានមានប្រសាសន៍ថា “ដូចដែលយើងទាំងអស់គ្នាបានដឹងហើយថា មានជនជាតិរុស្ស៊ីមួយក្រុមដែលមកលាក់ខ្លួននៅទីនេះ ហើយកងកម្លាំងរបស់យើងការពារពួកគេ។ កងកម្លាំងគ្មានធ្វើអ្វីសោះ”។
លោក សេរហ្គេ ប៉ូលុនស្គី ត្រូវបាននិរទេសកាលពីខែឧសភា ដើម្បីឲ្យទៅប្រឈម នឹងការចោទប្រកាន់ពីបទឆបោកធ្ងន់ធ្ងរនៅក្នុងប្រទេសរុស្ស៊ី។
លោក ស ខេង បានមានប្រសាសន៍ថា “យើងបានចាត់វិធានការលើជនជាតិរុស្ស៊ីមួយក្រុមរួចហើយ ប៉ុន្តែនៅមានខ្លះទៀត”។
កាលពីខែមេសា រដ្ឋមន្ត្រីក្រសួងមហាផ្ទៃរូបនេះបានដកតំណែងលោក សៀង កុសល ស្នងការខេត្តនេះ ដែលលោកចោទប្រកាន់ថា ពុំបានបំពេញតាមតួនាទីរបស់ខ្លួន ហើយបានប្រគល់តំណែងនេះឲ្យលោក ជួន ណារិន ស្នងការរងនគរបាលរាជធានីភ្នំពេញដែលមានភាពម៉ឺងម៉ាត់វិញ។
លោកបានមានប្រសាសន៍ថា ”ស្នងការមុនស្លូតបូតសុភាពរាបសារ ប៉ុន្តែយើងមិនអាចបន្ទោសគាត់បានទេ។ ការដែលមានអាកប្បកិរិយាសុភាពរាបសារស្លូតបូតគឺល្អហើយ ប៉ុន្តែមិនអាចចាត់វិធានការអ្វីបានទេ”។ លោកបានបន្ថែមថា ឧត្ដមសេនីយ៍ទោ ជួន ណារិន បំពេញការងារបានយ៉ាងមានប្រសិទ្ធ ភាពនៅក្នុងតួនាទីរបស់លោក។
ឧត្ដមសេនីទោ ជួន ណារិន មិនអាចទាក់ទងសុំការធ្វើអត្ថាធិប្បាយបានឡើយ។
កាលពីខែសីហា លោក ជិន សារិន អភិ បាលក្រុងព្រះសីហនុក៏ត្រូវបានដកចេញពីតំណែងដែរ ហើយលោក អុី សុខឡេង អភិ បាលរងខណ្ឌ៧មករា រាជធានីភ្នំពេញ ជាអ្នកជំនួសតំណែងនេះវិញ។
ឧត្ដមសេនីយត្រី យន្ត មីន ដែលជាអភិ បាលខេត្តថ្មីបានជំនួសតំណែងរបស់លោក ឈិត សុខុន ដែលកាន់តំណែងនេះបានមិនដល់១ឆ្នាំផងបន្ទាប់ពីផ្ទេរពីក្រុមប្រឹក្សាខេត្តតាកែវមក។ ឧត្ដមសេនីយ៍ត្រីរូបនេះបានមានប្រសាសន៍កាលពីខែមុនថា ការតែងតាំងរូបលោកគួរឲ្យភ្ញាក់ផ្អើល។លោកមិនអាចទាក់ទងបានទេកាលពីម្សិលមិញ៕
ស៊ុយឈាង