28.4 C
Phnom Penh

ភូមា​ពិនិត្យ​សំណើ​របស់​ជន​ភៀស​ខ្លួន​សុំ​ត្រឡប់​ទៅ​ស្រុក​កំណើត​វិញ​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ ​មន្ត្រី​​ភូមា​ និង​មន្ត្រី​​​កម្ពុជា​​​​បាន​និយាយ​ថា ជន​ភៀស​ខ្លួន​រ៉ូហុីងយ៉ា​ម្នាក់​ដែល​បាន​​សុំ​ត្រឡប់​ទៅ​ស្រុក​កំណើត​វិញ​​បន្ទាប់ពី​មិន​បាន​ទៅ​ដល់​ទឹក​ដី​អូស្ត្រាលី​នោះ អាច​ត្រឡប់​​ទៅ​​ប្រទេស​ភូមា​វិញ​ក្នុង​រយៈ​ពេល​ប៉ុន្មាន​សប្ដាហ៍​ខាង​មុខ​​​​​​​ ​ពោល​គឺ​ភ្លាម​បន្ទាប់ពី​​រដ្ឋាភិបាល​ក្រុង​ណៃពិដោរ​សម្រេច​ទទួល​សំណើ​សុំធ្វើ​មាតុភូមិ​និវត្ត​របស់​គាត់​។

បុរស​រូប​នេះ​ ដែល​​គេ​មិន​បញ្ចេញ​អត្ត​​​សញ្ញាណ​ បាន​មក​ដល់​ក្រុង​ភ្នំពេញ​កាលពី​ថ្ងៃទី​៤​​​ខែ​មិថុនា រួម​ជាមួយ​ជនជាតិ​អុីរ៉ង់​​បី​នាក់​ ដែល​ជា​ក្រុម​ដំបូង​​ត្រូវ​គេ​បញ្ជូន​មក​ទី​​​នេះ​​​​​ពី​ជំរំជន​ភៀស​ខ្លួន​របស់អូស្ត្រាលី​នៅ​​ប្រទេស​ដែន​កោះ​ណូរូ​ ជា​ផ្នែក​មួយ​នៃ​កិច្ច​ព្រមព្រៀង​​តាំង​លំនៅថ្មី​​​ដ៏ចម្រូងចម្រាស​​ដែល​ប្រទេស​កម្ពុជា​ និង​​ប្រទេស​អូស្ត្រាលី​បាន​ចុះ​ហត្ថលេខា​​១ឆ្នាំ​មក​ហើយ​។

កាលពី​ថ្ងៃ​អាទិត្យ​ ក្រសួង​មហាផ្ទៃ​​បាន​និយាយ​ថា ​បុរស​រូប​នេះ​ចាប់ផ្តើម​មាន​​​អារម្មណ៍​​ថា​ឯកោ​ ហើយ​នឹក​ស្រុក​កំណើត និង​ចង់​ត្រឡប់​ទៅ​ប្រទេស​ភូមា​វិញ។

កាលពី​ម្សិលមិញ លោក កែម សារិន ប្រធាន​នាយកដ្ឋាន​ជន​ភៀសខ្លួន​នៃ​ក្រសួង​មហាផ្ទៃ​ បាន​​មាន​ប្រសាសន៍​ថា ដោយ​សារ​​បុរស​នេះ​ទទួលបាន​​ឋានៈជា​​ជន​ភៀសខ្លួន​​នៅ​​ទីនេះ​ ​ប្រទេស​កម្ពុជា​នឹង​ចេញ​ទិដ្ឋាការ​ធ្វើ​ដំណើរ​​ឲ្យ​គាត់ ​នៅ​ពេល​ណា​ប្រទេស​ភូមា​យល់​ព្រម​នឹង​ឲ្យគាត់​ត្រឡប់​ទៅ​វិញ​​។

លោក​បាន​​​និយាយ​ថា “​គាត់​បាន​ទាក់​ទង​ជាមួយ​ស្ថានទូត​ភូមា​ ហើយ​យើង​កំពុង​រង់ចាំ​ប្រទេស​ភូមា​ចេញ​ឯកសារ​បើក​ផ្លូវ​។ នៅ​ពេល ​ណា​ស្ថានទូត​ភូមា​ប្រគល់​លិខិត​អនុញ្ញាត​ឲ្យ​យើង ប្រទេស​កម្ពុជា​​នឹង​ចេញ​ទិដ្ឋាការ​មួយ​​​ ហើយ​ពេល​នោះ​គាត់​អាច​ត្រឡប់​ទៅ​​ស្រុក​កំណើត​របស់​គាត់​វិញ​បាន​”។

លោក​ Moe Htet Kyaw លេខាទី២​នៅ​ស្ថានទូត​ភូមា​ប្រចាំ​ក្រុង​ភ្នំពេញ​ បាន​និយាយ​ថា សំណើ​របស់​ជន​ភៀស​ខ្លួន​រូប​នេះ​​​ទទួល​​​បាន​​ហើយ​ និង​បាន​បញ្ជូន​​ទៅ​ក្រុង​ណៃពិដោរ​​ កាលពី​សប្ដាហ៍​មុន​។

​លោក​​បាន​និយាយ​ថា “​ស្ថានទូត​មីយ៉ាន់ម៉ា​​​បាន​​ដាក់ [សំណើ​នេះ​] រួច​ហើយ​​ទៅ​រដ្ឋាភិ​​​បាល​​របស់​យើង ហើយ​យើង​​​ត្រូវ​រង់ចាំ​រដ្ឋាភិ​​​បាល​​យល់​ព្រម​​សិន​។ ជា​ធម្មតា​រដ្ឋាភិ​​​បាល​​​ត្រូវ​ការ​ពេល​១ខែ​”។

ថ្វីបើ​ក្រុម​ជនជាតិ​ភាគតិច​​​រ៉ូហុីងយ៉ា​​​បាន​រស់​នៅ​ក្នុង​ប្រទេស​ភូមា​​ជា​ច្រើន​ជំនាន់​មក​ហើយ​ ​ដោយ​ភាគច្រើន​នៅ​ក្នុង​រដ្ឋ​រ៉ាឃីន​ភាគ​ខាង​លិច​​ប្រទេស​នេះ​ក្ដី​ ក៏​រដ្ឋាភិបាល​​បដិសេធ​មិន​ទទួល​ស្គាល់​ពួកគេ​តាម​ផ្លូវ​ច្បាប់​ជា​ក្រុម​ជន​ជាតិ​ភាគតិច​ច្បាស់​លាស់​មួយ​​​ឡើយ​​ ហើយ​ចង់​ឲ្យ​ពួកគេ​​កំណត់​ភិន​ភាគ​ខ្លួន​ឯង​ជា​​ក្រុម​ជនជាតិ​បេនហ្គាលី។ លោក​ Htit Kyaw បាន​និយាយ​ថា ជន​ភៀស​ខ្លួន​រូប​នេះ​​​តម្រូវ​ឲ្យ​ធ្វើ​​​សំណើ​​​សុំ​​ត្រឡប់​ទៅ​កាន់​​​ស្រុក​កំណើតវិញ​។

លោក​បាន​និយាយ​ថា “​នៅ​ពេល​គាត់​មក​ស្ថានទូត​ គាត់​បាន​និយាយ​ដោយ​ខ្លួន​ឯង​ថា គាត់​ជា​ជន​ជាតិ​បេនហ្គាលី។ គ្មាន​ជនជាតិ​​រ៉ូហុីងយ៉ា​នៅ​ក្នុង​ប្រទេស​មីយ៉ាន់ម៉ា​ទេ ​យើង​មានតែ​ជនជាតិដែលយើង​ហៅ​ថា​ ​បេនហ្គាលី ប៉ុណ្ណោះ​​”។

​យោង​តាម​អង្គការ​សហប្រជាជាតិ​បាន​ឲ្យ​ដឹង​ថា នៅ​ប្រទេស​ភូមា​ ការ​​ដើរ​ហើរ​ និង​សិទ្ធិ​របស់​ក្រុម​ជនជាតិ​​រ៉ូហុីងយ៉ា​​ត្រូវ​​​បានរឹត​​​បន្តឹង​​​យ៉ាង​ខ្លាំង​ ហើយ​កាលពី​ដើម​ឆ្នាំ​នេះ លិខិត​ចុះ​ឈ្មោះ​បណ្ដោះ​អាសន្ន​​រាប់​ពាន់​​​របស់​ពួកគេ​ត្រូវ​បាន​លុប​ចោល​ ​ដោយ​ដក​ហូត​សិទ្ធិ​បោះ​ឆ្នោត​របស់​ពួកគេ​តែ​ម្ដង​។ មនុស្ស​ជាច្រើន​ត្រូវ​បាន​គេ​សម្លាប់​ក្នុង​ការ​វាយ​ប្រហារ​ទ្រង់ទ្រាយ​ធំ​ជាច្រើន​លើក​​លើ​ក្រុម​ជន​ជាតិ​ភាគតិច​រ៉ូហុីងយ៉ា​ក្នុង​ឆ្នាំ​២០១២ ហើយ​​ចាប់​តាំង​ពីពេល​នោះ​មក មនុស្ស​ច្រើន​ជាង​​១០០.០០០​នាក់​បាន​​រត់​ភៀសខ្លួន​​​ចេញពី​ប្រទេសនេះ​​តាម​ទូក។

ទោះ​ជាយ៉ាង​នេះ​ក្ដី លោក សារិន ​បាន​និយាយ​ថា លោក​​ជឿថា​​ជន​ភៀសខ្លួន​ដែល​សុំ​ត្រឡប់​ទៅវិញ​នឹង​មាន​សុវត្ថិភាព​។

លោក​បាន​​ឲ្យ​ដឹង​ទៀត​ថា “​គាត់​មើល​ឃើញ​ថា ប្រទេស​​របស់​គាត់​​មាន​សន្តិភាព និង​សេរីភាព ហើយ​គាត់​ចង់​​ត្រឡប់​ទៅ​ស្រុក​​កំណើត​វិញ ដូច្នេះ​គាត់​មាន​សិទ្ធិ​​ត្រឡប់​ទៅ​​​វិញ។ នៅ​ប្រទេស​ភូមា​ គាត់​នឹង​មិន​​ប្រឈម​នឹង​ការ​គំរាម​កំហែង​ឬ​ការ​ដាក់​ទណ្ឌកម្ម​ណា មួយ​ឡើយ ដូច្នេះ​គាត់​​អាច​ទាមទារ​សញ្ជាតិ​ដើម​របស់​គាត់​វិញ​បាន​”។

ក្រុម​អ្នក​គាំទ្រ​សិទ្ធិ​ជន​ភៀសខ្លួន​​និយាយ​ថា ការ​សម្រេច​​​របស់​បុរសរូប​​នេះ​​​ចង់​​ត្រឡប់​​ទៅ​ប្រទេស​​ដែល​គាត់​បាន​រត់​ភៀស​ខ្លួន​ចេញ​ ​​​គឺ​ជា​ការ​ឆ្លុះ​បញ្ចាំង​អំពី​បរាជ័យ​របស់​គម្រោង​តាំង​លំនៅ​ថ្មី​ដែល​​​មិន​​​បាន​​​​​​ផ្ដល់​​ឲ្យ​គាត់​នូវ​​​ជម្រើស​ផ្សេង​​ដែល​ប្រសើរជាងមុន​​៕ និត​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស