បុគ្គលិកក្រុមហ៊ុនម្នាក់បាននិយាយថា ទូរគមនាគមន៍កម្ពុជាបានព្យួរការងារអ្នកគ្រប់គ្រងម្នាក់ដែលត្រូវបានចោទប្រកាន់ថា បានលួចលុយ២៣០.០០០ដុល្លារ ហើយកំពុងរៀបចំពាក្យបណ្តឹងផ្លូវច្បាប់ប្តឹងអ្នកគ្រប់គ្រងរូបនេះ 
និងអតីតបុគ្គលិកជាន់ខ្ពស់ម្នាក់នៅក្នុងការិយាល័យហិរញ្ញវត្ថុរបស់ក្រុមហ៊ុននេះ ដែលតាមការអះអាងថា បានទទួលលុយដែលបាត់នោះ។
បុគ្គលិកបានធ្វើកូដកម្មកាលពីថ្ងៃច័ន្ទ ចំពេលដែលមានការចោទប្រកាន់ថា លោក សែម សំអាង ប្រធានផ្នែកប្រមូលចំណូល និងបំណុលរបស់ក្រុមហ៊ុនដែលគ្រប់គ្រងដោយរដ្ឋនេះ បានកិបកេងលុយពីក្រុមហ៊ុនNeocomISP ជាក្រុមហ៊ុនទូរគមនាគមន៍ និងអីុនធឺណិតតាំងពីឆ្នាំ២០១២មក។
យោងតាមលោក លឹម សាម៉ុន អនុប្រធាន រដ្ឋបាលដែលបានចូលរួមកិច្ចប្រជុំបានឲ្យដឹងថា អំឡុងកិច្ចប្រជុំជាមួយបុគ្គលិកជាន់ខ្ពស់កាលពីព្រឹកម្សិលមិញ លោក សំអាង បានសារភាពថា លោកបានដោះស្រាយការទូទាត់ ដោយមិនត្រឹមត្រូវ។
ប៉ុន្តែ លោកបានលើកឡើងថា លោកសំអាង អះអាងថា គាត់ធ្លាប់បានដោះស្រាយ ការទូទាត់តាមសំណើរបស់ប្រធាន និងអនុ ប្រធាននាយកដ្ឋានហិរញ្ញវត្ថុ និងគណនេយ្យតែប៉ុណ្ណោះ។
លោក សាម៉ុន បានថ្លែងថា “យើងបានសម្រេចព្យួរការងារលោក សំអាង ពីក្រុមហ៊ុន ទូរគមនាគមន៍ជាបណ្តោះអាសន្នសិន ហើយនឹងបង្កើតគណៈកម្មការដើម្បីសើុបអង្កេតអ្នកជាប់ពាក់ព័ន្ធផ្សេងទៀតទាក់ទិនលុយ ដែល បាត់នោះ។ លោក សំអាង ខ្លួនឯងក៏បានទទួល ស្គាល់ហើយថាគាត់បានជាប់ពាក់ព័ន្ធដែរ”។
លោកបានថ្លែងថា ”មនុស្សពីរនាក់គឺលោក សំអាង និង លោក ខឹម តេងសឿន នឹងប្រឈម មុខនឹងតុលាការ ពីព្រោះពួកគាត់បានប្រមូលសាច់ប្រាក់ ប៉ុន្តែ មិនបានផ្ទេរចូលគណនីធនាគារក្រុមហ៊ុនទូរគមនាគមន៍ឡើយ”។
ដោយសំដៅដល់លោក តេងសឿន ដែល ជាអនុប្រធានហិរញ្ញវត្ថុ និងគណនេយ្យដែល បានចាកចេញពីក្រុមហ៊ុនកាលពីខែឧសភា លោកបានបន្ថែមថា ”សូមកុំគិតថា អ្នកនឹងរួចខ្លួន ដោយសារអ្នកបានលាលែងពីការងារទៅហើយនោះ”។
លោក សាម៉ុន បានបដិសេធមិនធ្វើអត្ថា ធិប្បាយចំពោះការជាប់ពាក់ព័ន្ធរបស់លោក ណៃ សំកុល ប្រធានផ្នែកហិរញ្ញវត្ថុ និងគណនេយ្យឡើយ។ លោក សំកុល ក៏បានបដិសេធ មិនធ្វើអត្ថាធិប្បាយអំពីរឿងអាស្រូវនេះដែរ។
នៅពេលទាក់ទងតាមទូរស័ព្ទលោក សំអាង បានបដិសេធថា លោកមិនបានកិបកេងលុយនោះទេ។ លោកបានពន្យល់ថា ក្រុមហ៊ុន NeocomISP បានទូទាត់គណនីតាមមូលប្បទានបត្រ និងសាច់ប្រាក់ ហើយថាលោកទទួលបានការទូទាត់ជាសាច់ប្រាក់មួយ ចំនួនដោយផ្ទាល់ ហើយបានបញ្ជូនទៅផ្នែកហិរញ្ញវត្ថុដោយមិនបានកត់ត្រាអំពីប្រតិបត្តិ ការនោះឲ្យត្រឹមត្រូវឡើយ។
លោកបានថ្លែងថា ”នៅពេលនោះគេបានសុំឲ្យខ្ញុំដកសាច់ប្រាក់យកទៅឲ្យពួកគេដូច្នេះខ្ញុំគ្រាន់តែធ្វើតាមប៉ុណ្ណោះ។ ខ្ញុំមិនបានទុកលុយនោះទេ តើឲ្យខ្ញុំទទួលខុសត្រូវដោយ របៀបណាទៅ?។
លោកបានបន្ថែមថា ”ខ្ញុំពិតជាសោកស្តាយ ណាស់ ពីព្រោះខ្ញុំមិនបានបង្កទេ ប៉ុន្តែ ខ្ញុំត្រូវបានព្យួរការងារ។ ប្រធាន និងអនុប្រធានបាន ទទួលសាច់ប្រាក់នេះ ដូច្នេះពួកគាត់ត្រូវតែដឹងថា លុយនោះទៅណា។ មនុស្សតែម្នាក់មិនអាចធ្វើរឿងនេះបានឡើយ”។
លោក តេងសឿន អតីតអនុប្រធានក៏បានបដិសេធថា លោកមិនបានជាប់ពាក់ព័ន្ធនៅក្នុងការកិបកេងលុយនេះទេ ដោយបន្ថែម ថា លោកមិនដែលបានទទួលលុយពីលោក សំអាង ឡើយ។ លោកបានថ្លែងថា “ប្រសិនបើគាត់ឲ្យលុយខ្ញុំ នោះខ្ញុំបានចេញបង្កាន់ដៃឲ្យគាត់ហើយ។ តើភ័ស្តុតាងនៅឯណា?”។
ដោយសារបុគ្គលិកដែលបានធ្វើកូដកម្មកាលពីថ្ងៃច័ន្ទ បានចូលធ្វើការវិញ បន្ទាប់ពីមានកិច្ចប្រជុំកាលពីម្សិលមិញ លោក តេងសឿន បានបន្តថា ករណីប្តឹងរូបគាត់គួរត្រូវបានបិទ ។
លោកបានថ្លែងថា “ខ្ញុំបានលាលែងហើយ ហេតុអ្វីបានជាពួកគេចង់ប្តឹងខ្ញុំទៀត។ ឥឡូវនេះបុគ្គលិកត្រឡប់ចូលធ្វើការវិញហើយ ដូច្នេះវាមិនសមហេតុផលទេដែលពួកគេបន្តសើុបអង្កេត”៕សារុន